Pija ko an Tōmak

Juon Im̧we In Jetōb kōn Kōm̧anm̧an eo

Jān Stephan Seable, Oregon, USA

Pinmuur eo an Jisōs Kraist ekar bōk juon meļeļe em̧wilaļ n̄an n̄a ilo aō kar ļōme bwebwenato eo an Ebream im Aijōk.

Pija ko jān Christina Smith

Painting im sculpting ej juon wāween ij kwaļo̧k kam̧m̧oolol eo aō kōn aiboojoj eo an laļ in. N̄an n̄a, pija ej jino kōn juon im̧we in jetōb kōn kōm̧anm̧an eo.

“Ajri in Bujen eo”

Ke eo m̧ōtta ekar kakkije jān jerbal im kōppopo n̄an em̧m̧akūt ettoļo̧k, ikar kōm̧m̧ane juon sculpture n̄an e kar ņa etan Ajiri in Bujen eo. Ekar juon annan̄ in Ebream ej jibwe nin̄nin̄ Aijōk. Jān tōre eo, ikar kōm̧m̧ane elōn̄ annan̄ ko jet kōn Ebream im Aijōk. Rej men ko rem̧m̧antata ippa im jet iaan jerbal ko rekanooj in aorōk ippa.

Sculpture ko an Stephan Seable me rej kwaļo̧k kōn Ebream im Aijōk rej ko rem̧m̧an tata ippān. Rej kakeememej e kōn iakwe eo an Jemān n̄an Eo Nejin Emake Ekar Keotak. Ilo tuanmooņ tata ej sculpture ņa etan Ajri in Bujen eo.

Eo ekajoor tata n̄an n̄a ej kōn an Ebream katakin ļeo nejin jān bok lemlem ko. Ebream ej kuul neen make im reilōn̄ļo̧k kōn juon erreitok in merak ilo mejān ippān juon im̧we jān Irooj bwe e ej aikuj katok kōn ļaddik eo emake wōt nejin. Aijōk ej atbakwōj Ebream bōtaab ejjab maron̄ meļeļe etke jemān ejjamin naaj uwaak e.

Ilo sculpture in jān Brother Seale ņa etan Bōk Eo Nejūm̧, Nejūm Emake Wōt, Ebream ej bōk juon im̧we jān Irooj bwe ej aikuj katok kōn ļeo nejin Aijōk.

Bar juon sculpture ejjan̄in dedeļo̧k ej kwaļo̧k kōn erro ruo rej kalōk juon lokatok. Aijōk ej kajjitōk ia eo katok eo epād ie, im Ebream ej uwaak bwe Irooj enaaj kalikare. Ilo kar sculpture eo m̧oktaļo̧k, Ebream ekar kōpooj juon ram ilo bulōņ wōjke ko im kar jiron̄ bwe ejjab kar aikuj in katok kōn ļeo nejin. Ebream ej atbakwoj Aijōk, lukkuun keņe. (Lale Jenesis 22:1–13.)

Ebream ej atbakwoj Aijōk ilo sculpture in jān Brother Seable kar ņa etan Ālkin Mālijjon̄ eo.

Ta eo ekanooj aorōk kōn bwebwenato in ej bwe ej juon jekjek, ak kakōļļe, kōn katok eo an Nejin Anij. Jemādwōj ilo Lan̄, eo ej iakwe Eo Neiin Ekar Keotak Emake Wōt, barainwōt kar kāālet n̄an katok kōn E bōtaab kar jab dāpij E ilo iien eo āliktata. Ilo naan ko an Elder Neal A. Maxwell (1926–2004) jān Doulul eo an Jon̄oulruo Rijilōk ro, “Ekar ejjeļo̧k ram ilo buļōn wōjke ilo Calvary n̄an dāpij E, in M̧ōttan Ebream im Aijōk” (“O, Divine Redeemer,” Ensign, Nob. 1981, 8).

Ijello̧kin, eo Jemān ekar kōtļo̧k an Eo Nejin kāālet (lale Moses 4:2) n̄an kōm̧m̧ane Pinmuur eo ilo etad bwe jen maron̄ aolep bar jepļaak n̄an kapijuknen n̄an mour Ippāer bar juon alen eļan̄n̄e jej ikdeelel im mour jim̧we n̄an kōjeraam̧m̧an jab in (lale Jon 3:16–17).

Jeļā eo aō ej jiron̄ eō bwe Anij ej bōk kuņaan ilo mour ko ad. Jej āinwōt bwe jen “maron̄ bōk m̧ōņōņō” (2 Nipai 2:25), bōtaab jej bōk en̄jake jān men ko jej en̄taan kaki. Ainwōt an alikkar an men ko rem̧m̧an waļok, ewōr, mekarta, “jum̧ae ilo men otemjej“” (2 Nipai 2:11). Anij, ijo ke, ej pād iien otemjej n̄an jipan̄ kōj, im jemaron̄ anjo̧ ioon jabdewōt men jej aikuj in, jekdo̧o̧ņ ta apan̄ ko jej iooni. Jenaaj lo bwe jemaron̄ anjo̧ ioon mālijjon̄ ko ad ilo ad wōnm̧aanļo̧k wōt ilo kajjieon̄ iakwe, jerbal, im ļapļo̧k ad iakwe—āinwōt ad Rilo̧mo̧o̧r.

Ij kam̧m̧oolol kōn gospel eo, baam̧le eo aō, im aolep armej ro raiboojoj ilo Kabun̄ in. Jekdo̧o̧n ta ia eo lio pāleō im n̄a kar etal n̄an mijen ilo aolepān laļ in, kōm kar lo Rikwojarjar ro me rej iakwe doon im jerbal, kōjeraam̧m̧an, im kaarmejete n̄an doon. Jemedwōj Ilan̄ ej iakwe kōj, im jej ajri ro Nejin. Ejjeļo̧k juon men aurōkļo̧k jān ad tiljek n̄an E im Nejin, ro im eļap aer tiljek n̄an kōj.

Jekdo̧o̧n ia eo Brother Seable im lio pāleen, Kathleen, raar jerbali mijen ko aer ie ilo aolepān laļ in, raar lo Armej ro Rekwojarjar Ilo Raan-ko Āliktata “me rej iakwe doon im jerbal, kōjeraam̧m̧an, im kaarmejete n̄an doonn.”