Alang sa mga Ginikanan

Mapasalamaton alang sa usa ka Propeta

Si Presidente Russell M. Nelson mitimbaya sa mga Santos sa Ulahing mga Adlaw sa Kona, Hawaii, niadtong Mayo 16, 2019, atol sa iyang pagpangalagad sa Pasipiko.

Minahal nga mga Ginikanan,

Niini nga bulan si Presidente Russell M. Nelson mosaulog sa iyang ika-100 nga adlaw nga natawhan. Ang mga artikulo niini nga isyu naghatag og importansiya kon giunsa niya ug sa ubang mga propeta pagtudlo nato ngadto ni Jesukristo.

Usa ka paagi nga ang kabatan-onan makasunod sa propeta mao ang pinaagi sa pagtubag niini nga imbitasyon sa pagtambong kanunay sa seminary ug sa pagbasa kada adlaw sa mga kasulatan. Misaad siya og talagsaon nga mga panalangin ngadto niadtong mobuhat, lakip ang pagkat-on sa pagdawat og personal nga pagpadayag, pagpangita og tubag sa lisod nga mga pangutana sa kinabuhi, ug pagkaila sa Manluluwas. Ang imo bang tin-edyer nga mga anak nakadungog niining mapanagnaon nga imbitasyon? Bisitaha ang seminary.ChurchofJesusChrist.org sa pagpangita og dugang pa nga impormasyon.

Mga Panaghisgotan sa Ebanghelyo

Hinumdomi ang Inyong mga Pakigsaad

Sa artikulo ni Presidente Jeffrey R. Holland sa pahina 4, atong makat-onan kon sa unsang paagi ang pagtuman sa atong mga pakigsaad ug pagsul-ob sa garment sa balaang pagkapari human kita matugahan makahatag og proteksiyon ug makapaduol nato ngadto sa Espiritu. Mahimo nimong ipakigbahin sa inyong pamilya ang usa ka kinutlo gikan sa artikulo ug hisgotan kon sa unsang paagi ang pagsul-ob sa garment “usa ka panggawas nga pagpahayag sa imong kinahiladman nga pasalig.” Unsa ang laing panggawas nga pagpahayag nga atong mahimo aron mapakita ang atong pasalig ngadto sa mga disipulo?

Mosunod sa mga Sugo

Si Elder Isaac K. Morrison mihangyo ni Presidente Nelson alang sa usa ka personal nga mensahe alang sa iyang asawa ug mga anak. Ang tubag sa propeta mao ang “Sunda ang mga sugo.” (Tan-awa sa pahina 20.) Mahimo nimong pangutan-on ang imong mga anak: Sa unsa nga paagi kaha nga ang imong mga pagpili lahi kon ang propeta molingkod diha sa lamesa uban nimo ug mosugo nimo sa pagsunod sa mga sugo?

Sunda ang Propeta

Si Presidente Nelson mag-edad na og 100 niini nga bulan! Si Presidente Dallin H. Oaks mipakigbahin og pipila ka leksiyon nga iyang nakat-onan gikan sa propeta (tan-awa sa pahina 12). Unsay nakat-onan sa imong mga anak gikan sa propeta? Aduna bay piho nga pakigpulong o debosyonal nga nakapatandog kanila? Ipakigbahin ang inyong mga hunahuna. Mahimo ninyong tan-awon ang usa ka mensahe sa bidyo gikan kaniya.

Dali, Sunod Kanako nga Kalingawan sa Pamilya

Ang Pagpaminaw sa Tingog sa Dios

3 Nephi 11:5

Sa 3 Nephi 11, atong mabasa kon sa unsang paagi nga ang mga Nephita dili makadungog sa tingog sa Dios hangtod nga ilang gipunting ang ilang mga mata ngadto sa tingog ug miabli sa ilang mga dunggan.

1. Barog atbang sa usa ka tawo. Talikod aron nga kamo dili magtinan-away sa usag usa.

2. Ang usa ka tawo mao ang mamumulong, ug ang lain mao ang tigpaminaw. Pataboni sa tigpaminaw ang iyang mga dunggan.

3. Pasultiha ang mamumulong og hugpong sa mga pulong sa usa ka hinay nga tingog, “Maninguha kong mahimong mahisama kang Jesus.”

4. Susiha kon ang tigpaminaw makasulti ba unsa ang gisulti sa mamumulong.

5. Karon ayaw na pataboni sa tigpaminaw ang iyang mga dunggan ug moatubang sa tawo nga namulong.

6. Ang mamumulong mosubli sa samang hugpong sa mga pulong.

Panaghisgotan: Mas sayon ba nga maminaw sa tingog kon ang tigpaminaw moatubang sa mamumulong? Basaha ang 3 Nephi 11:5. Unsaon ninyo pagpunting ang inyong mga mata ug ablihan ang inyong mga dunggan ngadto sa tingog sa Dios karon?

Gikan sa Alang sa Kalig-on sa mga Kabatan-onan nga Magasin

Lakaw diha sa Kahayag sa Manluluwas

Pagkat-on gikan ni Elder Dieter F. Uchtdorf kon sa unsang paagi nga ang makapaayo ug makapalig-on nga gahom sa Manluluwas makagiya ninyo gikan sa kangitngit samtang kamo maghinulsol.

Mas Maayo nga Kahimsog sa Pangisip

Si Sister Tamara W. Runia mipakigbahin og pipila ka ideya alang sa pagpalambo ug pagmintenar og maayong kahimsog sa pangisip ug pagpabilin nga duol ngadto sa Espiritu.

Dili Kanunay nga Inila apan Mapanagnaon Kanunay

Sama sa gitudlo ni Samuel ang Lamanita, ang mga propeta dili kanunay nga inila, apan nagtudlo sila nato kon unsa ang gikinahanglan nga atong madunggan.

Gikan sa Higala nga Magasin

Pagkat-on sa Paghinulsol

Basaha ang usa ka mensahe gikan ni Presidente Dallin H. Oaks sa pagtabang sa inyong mga anak nga makat-on mahitungod sa paghinulsol.

Hello gikan sa Zimbabwe!

Himamata ang among higala si Sariah gikan sa Zimbabwe ug magkat-on giunsa niya pagsunod si Jesukristo.

Tabang gamit ang Dali, Sunod Kanako

Pangita og sinemana nga makalingaw nga mga kalihokan aron matabangan ang inyong pamilya nga makakat-on gikan sa Basahon ni Mormon.

Himsog nga mga Hunahuna ug mga Kasingkasing

Sa Seksiyon sa Mas Dagko nga mga Bata, pangitaa ang mga istorya nga mahigalaon sa mga bata ug mga kapanguhaan mahitungod sa kahimsog sa pangisip.