Ban Bar Ajjimakeke: 7 Wāween ko n̄an Ekkejel

Jān Julianne Holt-Lunstad

Professor in Psychology, Brigham Young University

ej juon idajon̄jon̄ me maron̄ anjo̧ ioon kōn jet kijejeto, kajoor in en̄jake, im jipan̄ jān Rilo̧mo̧o̧r eo.ajjimakeke

Jenaaj aolep en̄jake ad ajjimakeke jet iien. Jān iien n̄an iien en̄jake ko an ajjimakeke maron̄ lukkuun ājmour im kobbā, juon kakōļļe ej kwaļo̧k bwe jej aikuj in kalōk jemjerā ko rekajoorļo̧k. Bōtaab an jab jem̧ļo̧k ajjimakeke emakijkij an juon kabbōjrak eļap n̄an lem̧ōņōņō.

Karōk in m̧ōņōņō eo an Jemādwōj Ilan̄ ekitbuuj kobaik kōj ilo baam̧le ko im ilo jarlepju ko. Menin ejjab jipan̄ wōt kōj ilo eddōkļo̧k indeeo eo ad bōtaab ej barāinwōt ilo aikuj in kanniōk eo ad n̄an ibwilijin ro jet, n̄an en̄jake āinwōt jej uwaan, n̄an leļo̧k im bōk rie ilo en̄jake. Science ej jino n̄an kile ekkejel eo ilo ikitōltōl āinwōt juon aikuj ej ekkejel n̄an ājmour eo ad im mour.

Ej bareinwōt juon menin aikuij ilo jetōb. Jej aikuji doon n̄an em̧m̧an eo im eddōkļo̧k eo ad ilo jetōb. Im lan̄ ej obrak kōn jemjerā ko indeeo ej juon ļōmņak elem̧ōņōņō eļap tata (lale Katak im Bujen Ko 130:2).

Ļōmņak kōn aitia kein n̄an m̧anļo̧k ajjimakeke ilo mour eo am̧:

Pedped wōt ioon Rilo̧mo̧o̧r eo. Jemāmi Ilan̄ im Jisōs Kraist rejeļā ami ajimakek im kōņaan jipan̄. Jeļā bwe Rilo̧mo̧o̧r eo ej jeļā kōn metak in ajjimakeke emaron̄ in jipan̄ eok jeļā bwe E emeļeļe ta eo kom̧ij en̄jake. Epaakeļo̧k Jemādwōj Ilan̄ im Rilo̧mo̧o̧r eo kōn jar, ekkatak jeje ko rekwojarjar, im kabun̄ jar ilo Jabōt im ilo tampeļ eo naaj jipan̄ kom̧ jeļā kom̧ij jamin makeļo̧k. Āinwōt an Būreejtōn Russell M. Nelson kar katakin, “N̄e mour ko ad rej pedped wōt ilo … Jisōs Kraist im gospel eo An, jemaron̄ en̄jake m̧ōņōņō jekdo̧o̧n ta eo ej waļo̧k—ak ejjab waļo̧k—ilo mour ko ad.”
Kōn jouj. Ajjimakeke emaron̄ jet iien kōm̧m̧an bwe jen pere bwe kōm̧m̧ane juon kijejeto naaj jipan̄ kadikļo̧k metak eo ad. Kōm̧m̧ane juon etale eok make n̄an lale eļan̄n̄e kwoj kōrraat. Ilo am̧ kappok m̧ōttā ko, keememej bwe jouj ekkā an menin aikuj. Baj ba iakwe n̄an juon rūturum̧ emaron̄ kōm̧m̧ane juon oktak. Im kappukot iien ko rem̧m̧an n̄an kōjeraam̧m̧an mour ko an ro jet me rej kakkōk kōn ajjimakeke maron̄ in jerbal eo ekajoor tata an aolep.
Ekkal ioon itoklimo ko reier wōt juon. Pukotļo̧k armej ro ak kumi ko me itok limo ko aer, kōļmenļo̧kjeņ ko, im jon̄ak ko aer reier wōt juon n̄an ko am̧. Komaron̄ kappokt (ak jino ļōm̧ņake!) juon douluul eo an bok, douluul in jipan̄, douluul in hike, douluul in al, douluul in nukun m̧weo in jota, ak douluul in ritto ro ejjeļo̧k nejier rej jokwe ilo m̧weo.
Kakajoorļo̧k jemjerā ko em̧ōj aer ejaak kadede. Elōn̄ armej ewōr kadede aer jemjerā ko ippen bam̧le, m̧ōttāer, ro rūturier, im ro uwaan ward eo aer. Kōjparok jemjerā kein repād kadede ej juon jikin em̧m̧an n̄an ijjino n̄e ko̧bōk ippān ajjimakeke. Jemjerā ko rebōk iien n̄an make ejaak, kōn menin kijenmej ilo am̧ lolorjake kōjparok jemjerā ko. Keememej bwe jon̄ak eo an jemjerā ko am̧ eļap an aorōk jān oran jemjerāko ewōr am̧.
Kappukot iien ko rem̧m̧an n̄an jipan̄ im im kwaļok tōļan ko im menin letok ko am ilo jetōb. Elōn̄ iien ko rem̧m̧an renan̄in ejjeļo̧k dettaer n̄an jerbal in karejar im jerbal ilo Kabun̄ in, baam̧le ko ad, im jukju in pād eo. N̄e jej en̄jake an wōr kilaan em̧m̧an kijejeto ko ad ioon ro jet, emaron̄ in bōktok juon en̄jake in meļeļe im jibadbad n̄an mour ko ad. En̄jake bwe mour ko ad ewōr tokjeer n̄an ro jet ej juon kein bōbrae ekajoor n̄an ajjimakeke.
Pepe n̄an iien ko rapan̄. Iiien kakkije ko im iien ko raorōk, eo āinwōt iien eo juon eo ejitōnbōro ekar mej, maron̄ in pen. Kajjieon̄ karōk m̧akūtkūt ko ippān ro m̧ōttam̧ ak baam̧le eo ilo kain raan rōt in n̄an jab ļōmņak kōn kōtaan ko kwoj kōņaan en kar wōr ippam̧.
Bōk koņaam̧ ilo jerbal an tampeļ im menmenbwij an baam̧le. En̄in ej juon wāween ekajoor n̄an en̄jake kaenōm̧m̧an im uwaan. Elder Dale G. Renlund jān Doulul eo an Jon̄oulruo Rijjilōk ro ekar kallim̧ur kōn elōn̄ kōjeraam̧m̧an ko jemaron̄ būki, ekoba “Kōļapļo̧k iakwe im kam̧m̧oolol kōn rūtto ro jibūd im jim̧aad im ro nukid remaron̄, im jejjab en̄jake ad make iaad.”

N̄an elōn̄ wōt armej ro, ajjimakeke ej juon idajon̄jon̄ me maron̄ in anjo̧ ioon kōn jet kijejeto, kajoor in en̄jake, im jipan̄ jān Rilo̧mo̧o̧r eo.