“Pukot Deor ilo Bujen Jemjerā eo Ad ippān Anij,” Liaona, Jept. 2024.
Pukot Deor ilo Bujen Jem̧jerā eo Ad ippān Anij
Jisōs Kraist ej unin iakwe eo erreo, kemour, m̧ōņōņō, im lan̄lōn̄.
Tibdikin jen E ej Bar Itok n̄anTōl im Irooj, jan Mary R. Sauer
Pukot kadeor jān bujen jemjerā eo ad ippān Anij ekar pād ilo ļōmņak eo aō im būruō ium̧win jet iien. Āinwōt an rikanaan eo an Irooj kar katakin im kōketak kōj n̄an katak kōn bujen ko, tampeļ ko, im kajoor in priesthood eo, ikar lo aō make etale, iakwe, im kwojkwoj ioon m̧ool ko bar kōro̧o̧litok ilo tipdikier ilo bujen ko.
Jekar baj karōk wōt n̄an m̧ōttā ippān Irooj ilo juon wāween ekajoor ilo bujen ko ad. An ikdeelel bwe en pād ippād ilo n̄ūrbōktak ko ad im jokāālet ko ad. Jejjab aikuj ņa mejļan apan̄ ko, būrom̧ōj ko, jab lōke ko, im metak bōro ko an mour in makeļo̧k iaad. E enaaj pād ikōjaad. E ekar ba, “I jāmin likūt kom̧ atajinemjen: I naaj iwōj n̄an kom̧.” (Jon 14:18).
Būreejtōn Russell M. Nelson ear kemeļeļeik paaktok in Anij im iakwe eo An eļap n̄an kōj ilo an katakin bwe “Iaļ in bujen eo ej kōn jemjerā eo ad ippān Anij.” Ekar ba: “N̄e em̧ōj am̧ im n̄a kar kōm̧m̧ane juon bujen ippān Anij, jemjerā eo ad Ippān ej ļapļo̧k wōt an epaak m̧okta jān bujen eo ad. Kiiō jej loklok ippān doon. Kōnke kōn bujen eo ad ippān Anij, E ejjamin ļo̧k wōt n̄an jidik mōk ilo kijejeto ko An n̄an jipan̄ kōj, im jej jamin naaj mōk kōn tūriam̧o in kijenmej eo An ippād. Kajjojo iaad ewōr juon jikin ejenolo̧k ilo būruōn Anij. E ewōr kōjatdikdik ko routiej n̄an kōj.”
Unjen Aenōm̧m̧an eo Aō Eļaptata
Āinwōt juon sister ejjan̄in de m̧are, iakwe im tūriam̧o in an bujen jemjerā eo ippān Jema Ilan̄ im Rilo̧mo̧o̧r eo ewōr juon jikin ekjaoor ilo mour eo aō ekar im ej unjen kadeor im aenōm̧m̧an eo aō eļap tata. Jekdo̧o̧n ta jekjek in m̧are eo ad ak bwebwenato in mour, ikdeelel eo an Irooj n̄an kōj n̄an m̧ōttā Ippān ilo juon wāween ekajoor—n̄an erom “juon” (3 Nipai 19:23) Ippen ilo “aolep [ad] kōm̧m̧an ko” (Alma 37:37). Ilo ad kūr n̄an Irooj kōn jipan̄ eo ad, im “kōtļo̧k bwe iakwe ko an [ad] bōro [ko] ren pād ioon [E] indeeo” (Alma 37:36; ekkatak ko kakobaba), mour ko ad remaron̄ obrak kōn korak in bujen in aiboojoj.
Kōn Rilomo̧r eo, Jisōs Kraist, jemaron̄ bōk kadeor eo jān ņa mejļan apan̄ ko an mour makeļo̧k iaad.
Kōjwōj aolep ewōr an n̄ūrbōktak ko im aikuj ko me jemaron̄ en̄jake ad makeļo̧k kaki, E ej kea kōn n̄ūrbōktak ko ad jekdo̧o̧n ta ewi jon̄an aer eļļap ak dik. Em̧ōj aō kar en̄jake aikuj eo kōn An jipan̄ n̄e inepata kōn men ko reddik āinwōt enaaj wōr ke m̧ōttan enaaj pād n̄e ij kūrļo̧k n̄an “kōm̧m̧ani jerbal in kōkāāl ko ilo m̧weo.” Ilo an ejjeļo̧k eo pālele n̄an arto artak ippān, imaron̄ inepata makeļo̧k kōn contractor eo ejim̧we, wōņāān eo em̧m̧an, bōk iien kakkije jān jikin jerbal n̄an pād m̧weo, im erom juon ribōk eddo in jāān ko aō im m̧weo im̧ō. Ekar juon menin m̧ōņōņō raan eo juon bwe kōjām in garage eo aen kōm̧m̧an! Irooj ekar ron̄ n̄ūrbōktak eo aō. Im men̄e edik ilo aolep men ko otemjeļo̧k, E ekar uwaake jar eo aō. Ekōjkan? Kōn juon rūturū em̧m̧an, jipan̄ eo an Jetōb im juon pija ilo YouTube, ikar jeraam̧m̧an n̄an jeļā ta eo in kōm̧m̧ane n̄an kōm̧m̧ane kōjām eo.
Eļan̄n̄e Irooj ej kalimjōk men ko reddik, ļōmņak kōn ikdeelel eo An n̄an kōjeraam̧m̧an im rejtake kōj ilo apan̄ reppenļo̧k an būruōd im ad, ko rejjab iiet ilo oraer: kakkure, aūrlep, jemjerā ko reppan an baam̧le, jako im inepata, apan̄ in nan̄nmej ko rej wōnm̧aanļo̧k an kōļmenļo̧kjeņ im ānbwin, edodo kōn jāān, n̄ūrbōktak ko rejjab jokod āinwōt juon jinen ak jemān, n̄ūrbōktak ko rejjab jokod ilo kea an juon jinen ak jemān, kakkōt ko kōn tōmak an juon make, juon ajri ak eo pālele me ej kāālet n̄an jab bōk kuņaan ilo gospel eo.
Ilo iien ko reppen tata im m̧ōjņo̧ an mour, ikar kanooj atartar ioon im kōdāpdep n̄an bujen jemjerā eo aō ippān Anij. Ke ikar lōke ilo iakwe in kea eo An im kajjieon̄e ijo em̧m̧an tata ippa n̄an ajeļo̧k mour eo aō n̄an E, E ekar letok kadeor eo kōn kajoor in priesthood eo An im eļakkar aō Rikake ilo aikuj ko aō ilo jetōb im kanniōk. E ekar letok kadeor jān mijak, kadeor jān jab lōke ko, kadeor jān utiej bōro, kadeor jān jerawiwi, kadeor jān ajjimakeke, kadeor jān būrom̧ōj.
Būreejtōn Nelson ear katakin ilo alikkar im kam̧ool bwe “Nōbar eo kōn kōjparok bujen ko ippān Anij ej kajoor in lan̄—kajoor eo ej kōkajoor kōj n̄an jutak ņae apan̄ ko ad, kapo ko, im būrom̧ōj ko.”
Kōn Jisōs Kraist, kōj jemaron̄ bōk kadeor eo jān ņa mejļan apan̄ ko an mour in makeļo̧k iaad.
Sister Yee ippen bar ruo kōrā ro in Micronesia ro im rej kajiririk ajiri ro im ejako jiner im jemer.
Sister ro “jān Āne ko Ilo̧meto”
Ilo aō kar kejekļo̧kjeņ ioon kōjeraam̧m̧an ko an karōk in bujen eo jaar kōm̧m̧ane ippān Anij, ij ļōmņak kōn ijjitōn̄ eo aō n̄an loļo̧k Asia North Eria eo.
Ekar wōr aō iien n̄an etal n̄an āne jiddik ko ilo Chuuk ilo Micronesia, enan̄in 1,500 m̧aiļ ko (2,400 km) iturōkrear in Japan. Ruo iaan sister ro jen Weno, Chuuk, kar wujlepļo̧k mour ko aer n̄an kajiririik ajiri ro im kar ejeļo̧k jiner im jemer. Sister rein rekkar en̄jake bwe aurōk bwe ren karūttoļo̧k ajiri rein ilo gospel eo. Juon iaan sister rein ejjeļo̧k rejetan im jerbal aolep raan āinwōt juon counselor ilo jikuuļ.
Ikar kwaļo̧k ippāerro ennaan eo an Būreejtōn Nelson n̄an sister ro an Kabun̄ in, eo ej bwe kom̧ sister ro rej iakwe, aikuji, im aorōk.
Sister eo aiboojoj ejjeļo̧k rejetan eo ej karūttoļo̧k leddik ro im ļaddik ro men̄aden ekar jan̄ im ba ejjan̄in kar en̄jake an aorōk m̧okta; ekar jab keememej e. Bōtaab liin ekar kam̧ool ekar en̄jake iakwe eo an Anij im kile n̄an e ilo naan ko an rikanaan eo jon̄an ekar ilo m̧ool “aorōk,” im ekar jeļā ekar m̧ool. Liin ekar en̄jake iakwe in kemour eo an Anij; liin ekar deor.
Irooj ear ba, “Kom̧ij jab jeļā ke n̄a, Irooj ami Anij, Iaar kōm̧anm̧an armej otemjeļo̧k, im bwe Ij keememej ro ioon āne ko ilo̧meto?” (2 Nipai 29:7).
Jemedwōj Ilan̄ im Rilo̧mo̧o̧r eo rejeļā kajeen sister rein. Rejjab make iaer. Im bareinwōt kwe im n̄a ilo māllijon̄ im appan̄ ko ad. Irooj ear boktok eō enan̄in 8,500 miles (13,700 km) ilo baļuun, train, car, im ļoon n̄an boktok iakwe eo an Anij im kadeor n̄an “juon eo” ilo āne ko ilo̧meto. Im kōn menin E enaaj pukot kwe im n̄a ilo āne ko ad make ijo jemaron̄ en̄jake ad makeļo̧k iaad ilo n̄ūrbōktak ko im eddo ko jej ineki ilo būruōd. Ej pād ipped im pojak n̄an kōjeram̧m̧an, tōl, im kainem̧m̧ kōj.
“Inaaj iwōj n̄an kom̧”
Būreejtōn Gordon B. Hinckley (1910–2008) juon iien kar kōmeļeļeik en̄jake eo an juon eo edik ekar jepel “jinen jiljijlimjuon ajri ro dettaer jān 7 n̄an 16. Liin ekar ba juon joteen ekar kijoon iaļ eo n̄an bōkļo̧k juon men n̄an juon armej rūturin.” Erkein naan ko an liin ke ekar kwaļo̧ki:
“Ke ikar oktak likļo̧k n̄an etetalļo̧k n̄an m̧weo, imaron̄ kar lo an m̧weo im̧ō ebbōl. Imaron̄ kar keememej ta ko ajri ro nejūm rekar ba ke ikar diwōjļok jejjo minit ko m̧oktakļo̧k. Rekar ba: ‘M̧am̧a,ta naaj kōjota eo ad?’ ‘Komaron̄ ke bokļo̧k eō n̄an library eņ?’ ‘Ij aikuj kappok aō peba killep bon̄in in.’ Ilo aō m̧ōk im edodo, iar kalimjeke m̧weo im loe meram eo ilo kajojo ruum̧ ko. Iar ļōm̧ņake aolep ajiri ro m̧weo rej kōttar eō n̄an kōtebrak aikuij ko aer. Edodo ko aō rekkar jino ļap n̄an maron̄ eo aō.
“Ij kemejmej aō reilōn̄ļo̧k n̄an lan̄ kōn denin kemjaļaaļ, im kar ba, ‘Jema Jitōnbōro, ijjab maron̄ kōm̧m̧an jabdewōt bon̄in in. Ilukkuun in m̧ōk. Ijjab maron̄ jelm̧ae. Ijjab maron̄ jepļaak n̄an m̧weo im lale aolep ajiri ro makke iaaō. Imaron̄ ke iwoj Ippam̧ im pād Ippam̧ juon wōt bon̄? …’
“Ikar jab lukkuun ron̄ naan ko n̄an uwaak, bōtaab ikar ron̄jaki ilo ļōmņak eo aō. Uwaak eo kar: ‘Jaab, eo edrik, kwojjab maron̄ itok ippa kiiō. … Bōtaab Imaron̄ iwōj ippam.’”
“Imaron̄ iwoj ippam̧.” E ekar ilo̧k ippān liin, im E enaaj iwōj ippam̧i im ippa, ejja āinwōt an Rilo̧mo̧o̧r eo kar itok n̄an kōrā eo ilo aibōj laļ eo ijo liin ekar jerbal im buuļ jerbal aolepān raan ko an (lale Jon 4:3–42). Ear rōjan̄ e, katakini, im kwaļok utiej eo An n̄ane, im iakwe e ilo bōlen iien eo ekkar jab iakwe e makke. N̄an kōrā eo ilo aibōn̄ laļ eo, kōrā jiljilimjuon nejin, n̄an kwe im n̄a, Jisōs Kraist ej jutak pojak n̄an letok kadeor. Ij kam̧oll bwe jemaron̄ deor kōn korak in bujen eo ad ippān juon Anij ej iakwe.
Bōlen āinwōt n̄a, kwar akweļap kōn jipan̄ n̄an jab kōmakeļo̧k eok ilo iien eo jet iaan tōre in iien ko ilo mour eo am̧ eļap aer ļap an en̄jake, kanniōk, im jetōb. Tōre in iien kein reppen an eddōkļo̧k kar door ta eo ij ņa etan “jeno̧k ko ilo jetōb” ioon jetōb eo ad. Ak ij kwaļok aō rejetak bwe E ear kotak eō , im ijeļā E enaaj bar kotak eok. E ar je kōj wōj ilo lo̧piden Pein (lale Aiseia 49:16; 1 Nipai 21:16). E ekar pād ijo ilo am̧ kar pukote “n̄an jim̧we ilo marok.” E ejjan̄in de eļļo̧k jān n̄a, ak E ejjamin naaj eļļo̧k jān eok. Im inaaj iakwe e n̄an indeeo.
Ro jeū im jatū rej jitōnbōro, unjen iakwe eo erreo, kemour, m̧ōņōņō, im kadeor em̧ōj loe ilo Jisōs Kraist. Ij kam̧ool bwe Jisōs Kraist ej aenōm̧m̧an.
An ikdeelel n̄an kea kōn kwe, n̄an kōjeraam̧m̧an im jeorļo̧k am̧ bōd. E ekar itok kōn lukkuun un in, n̄an kake n̄an eok kōn kadeor eo elukkuun menin aikuj bwe kwoj pukote. E ej Ri Pinmuur eo an laļin, im ij kam̧ool bwe e emour im Ej iakwe eok.
Jān juon Ekōņono ilo Kweilo̧k eo Eļap an Kōrā ro ilo Brigham Young University eo kar kōm̧m̧an ilo Māe 3, 2023.