Digital Lamang: Mga Pagtulun-an sa mga Lider sa Simbahan gikan sa Social Media
Pagkaayo pinaagi sa Pag-ula ni Jesukristo
Tan-awa kon unsa ang bag-ohay lang nga gitudlo sa mga buhing propeta, ug sa ubang mga lider sa Simbahan diha sa social media bahin sa pagkaayo.
Bisan og ang matag-usa nato walay duda nga mag-atubang og daghang hagit sa mortalidad, ang saad sa Manluluwas sa pagkaayo makahatag kanato sa kahupay, kalinaw, ug hingpit nga kalipay nga atong gikinahanglan sa pagbuntog niadtong mga hagit. Kita mahimong mamaayo gikan sa atong espirituwal, mental, emosyonal ug pisikal nga mga samad kon kita modawat sa pagdapit ni Jesukristo sa pagduol ngadto Kaniya.
Si Presidente Nelson mitudlo:
“Pagtuon og balik sa asoy sa pagpakita sa Manluluwas ngadto sa mga Nephita sa Amerika, sama sa gisulat diha sa 3 Nephi. Dili pa dugay sa wala pa kadtong pagpakita, ang Iyang tingog nadunggan sa katawhan, lakip niini nga mga pulong sa pagpangamuyo:
“‘Dili ba kamo mobalik ngari kanako, ug maghinulsol sa inyong mga sala, ug makabig, nga aron unta Ako moayo kaninyo?
“‘…Tan-awa, ang akong bukton sa kaluoy gitunol nganha kaninyo, ug kinsa kadto nga moduol … Ako modawat’ [3 Nephi 9:13–14].
“Minahal nga kaigsoonan, si Jesukristo mihatag sa sama nga pagdapit nganha kaninyo karon. Ako mohangyo kaninyo sa pagduol ngadto Kaniya aron Siya makaayo kaninyo! Siya moayo kaninyo gikan sa sala samtang kamo maghinulsol. Siya moayo kaninyo gikan sa kaguol ug kahadlok. Siya moayo kaninyo gikan sa mga pag-antos dinhi niini nga kalibotan.”
Ang mga lider sa Simbahan namulong sa kinatibuk-ang komperensiya mahitungod sa pagkaayo. Mipakigbahin usab sila og mga mensahe mahitungod niini nga hilisgotan diha sa social media, lakip na sa mosunod:
Pagkaplag og Kahupay pinaagi sa Pag-ula ni Jesukristo
“Atol sa akong bag-ohay lang nga miting sa pipila ka batan-ong mga miyembro sa Ang Simbahan ni Jesukristo sa mga Santos sa Ulahing mga Adlaw, usa ka batan-ong babaye ang nangayo og tambag mahitungod sa pagsagubang sa emosyonal nga mga hagit samtang naapil sa buhat sa Ginoo.
“Ako mapasalamaton sa akong bag-ong higala si Carol kinsa mipakigbahin kon sa unsang paagi ang iyang pagsabot sa Pag-ula ni Jesukristo nakahatag kaniya og kahupay latas sa iyang tumang kabalaka.”
Bidyo:
Presidente Oaks: “Sa dihang namatay ang akong amahan, ang akong mama mibalhin sa iyang tulo ka anak … aron mopuyo uban sa among mga apohan tungod kay nag-antos siya og grabeng problema sa panghunahuna ug dili na makaatiman sa iyang kaugalingon. O, una sa tanan, dili makapadayon sa programa sa master’s degree nga iyang gisugdan nianang higayona. Ug nagkinahanglan siya og tabang medikal sulod sa hapit duha ka tuig aron makahimo sa iyang gimbuhaton. Karon, kana medyo seryoso nga matang sa mental nga kahuyang. Ug ako nagdako uban niana tungod kay ang akong inahan nakabaton og milagroso nga pagkaayo gikan sa iyang sakit nga nerbiyos ug nahimong usa ka tawo nga talagsaon ang mental nga kapasidad, nakaangkon og usa ka propesyonal nga kinabuhi diin mitabang siya sa pag-organisar og akadimikanhong mga programa sa pag-atiman alang sa mga tawo nga adunay mental nga kahuyang ug diin siya usa ka nangulong propesyonal sa iyang kinabuhi. Ug ang ubang mga tawo adunay mas dagkong mga gasa sa mental nga kalig-on kay sa uban. Ang uban mahimong nanglimbasog sa tibuok nilang kinabuhi. Ang uban mahimong adunay seryoso nga pagsuol ug nakabuntog niini, sama sa gibuhat sa akong inahan. Apan unsa man ang ubang mga paagi sa pagpalambo sa mental nga kalig-on?”
Carol: “Ako nakasinati og dakong kabalaka sa tibuok nakong kinabuhi. Ug mao nga gibati nako nga kini usa ka pangutana nga naa sa akong hunahuna kanunay ug nakigbisog usab ako. Apan niining kataposang pipila ka semana sa seminary, amoa gayod nga gitutokan ang pagkat-on mahitungod sa Pag-ula. Ug samtang akong nakat-on ang mahitungod ni Jesukristo, ug nga siya nag-antos sa kada butang nga akong nabati, nabati nako ang hilabihan nga kahupay, nasayod nga ang bisan unsa nga mental nga kahuyang nga tingali akong mabati, kon sa unsa man nga rason, iya usab kanang nabati. Ug ako nakahimo sa pagkaplag og dakong kahupay diha niana ug sa pagkasayod lang nga ako wala nag-inusara.”
Presidente Oaks: “Maanindot kana nga paghulagway sa usa ka bahin sa Pag-ula nga daghan sa mga tawo ang wala makabantay. Wala lang Siya nag-antos sa atong mga sala. Siya miantos sa atong mga kasakit, sa atong mga kakulangan, lakip sa atong mga depresyon ug mga kabalaka. Gibati Niya kining tanan.”
Presidente Dallin H. Oaks, Facebook, Aug. 6, 2023, facebook.com/dallin.h.oaks.
Si Kristo Nagdala og Pagkaayo ngadto sa Kalag
“Tungod sa mga hagit sa kahimsog sa panglawas sa usa sa among minahal nga mga miyembro sa pamilya, si Harriet ug ako napahinumdoman pag-usab sa panginahanglan nga kanunayng mosalig sa Ginoo ug sa makaayo nga gahom nga si Jesukristo lang ang makahatag.
“Sa dihang una namong nadunggan ang mga balita mahitungod sa sakit, nagguol kami—apan malaomon. Kami gipasaligan nga ang mga kawani sa health care mobuhat sa tanang butang kutob sa mahimo sa pagtambal sa pisikal nga sakit. Ug kami nasayod nga ang grasya sa Manluluwas maoy mahimong gahom nga magdala og balaan nga pagkaayo ngadto sa kalag.
“Kitang tanan mahimong madawat og kahupayan diha sa pagkahibalo nga ang gasa sa Dios ngadto sa tanang katawhan, gani ang Iyang Anak, si Jesukristo, usa ka aktibong gahom sa pag-ayo sa tibuok tuig, dili lang sa Pasko ug sa Pasko sa Pagkabanhaw.
“Si Harriet ug ako hilabihan ang kamapasalamaton nga ang mensahe sa Pasko mao ang mensahe sa hingpit nga kalipay ug pagkaayo. Kini nga panahon sa Pasko, ug sa matag panahon sa tuig, kita makasalig diha kang Jesukristo. Siya modala og paglaom ug pagkaayo sa atong mga kinabuhi.
“Malipayong Pasko! “Hinaot ang Dios mopanalangin kaninyong tanan.”
Elder Dieter F. Uchtdorf, Facebook, Dec. 20, 2023, facebook.com/dieterf.uchtdorf.
Ang mga resulta sa Sinsero nga Paghinulsol Mao ang Kalinaw, Kahupayan, Espirituhanong Pagkaayo, ug Hingpit nga Kalipay
“Ang Paghinulsol nagkinahanglan sa Manunubos. Ang pagpalayo gikan sa daotan dili makahatag og espirituhanon nga pagkaayo nga dili modangop ngadto Kaniya.
“Si Ezra Taft Benson (1899–1994), presidente sa Ang Simbahan ni Jesukristo sa mga Santos sa Ulahing mga Adlaw, mitudlo nga ang paghinulsol tinuod nga makapausab sa kinaiya ug pamatasan, apan ang yano nga pag-usab sa mga kinaiya ug pamatasan dili paghinulsol.
“Si Presidente Benson miingon, ‘Ang hugot nga pagtuo diha ni Ginoong Jesukristo mao ang pundasyon diin ang sinsero ug makahuloganon nga paghinulsol kinahanglan matukod. Kon kita tinuod gayod nga nagtinguha sa pagsalikway sa sala, kinahanglan una kitang motan-aw ngadto Kaniya kinsa ang Tagsulat sa atong kaluwasan.’”
Bidyo:
“Ang pag-ila ug pagbiya sa sala, ang pagbati og kahasol sa tanlag ug ang paghimo og pagpahiuli tungod sa sala, ug ang pagkompisal sa mga sala ngadto sa Dios ug, kon gikinahanglan, ngadto sa atong mga lider sa pagkapari ang tanan mahinungdanon ug importanteng mga elemento sa proseso sa paghinulsol. Bisan pa man, kining mahinungdanong mga lakang wala maglangkob og basta lang listahan nga tsekanan sa mga pamatasan nga mahimo nato nga mekanikal, dali, ug kaswal ra nga makompleto. Kon kita mobuhat niining mga butang ug mapakyas sa pag-ila ug pag-depende sa Manunubos ug sa Iyang maulaon nga sakripisyo, nan bisan ang atong labing maayo nga indibiduwal nga mga paningkamot makawang. Ang mga resulta sa sinsero nga paghinulsol mao ang kalinaw, kahupayan, espirituhanong pagkaayo ug pagbag-o, ug hingpit nga kalipay.”
Elder David A. Bednar, Facebook, Sept. 8, 2023, facebook.com/davida.bednar.
Si Kristo Anaa—sa Paghupay Kanato, Pag-ayo Kanato, ug sa Pagtabang Kanato nga Mahisama Kaniya
“Samtang kita magtinguha sa pag-ugmad og Kristohanon nga mga hiyas ug mosagop sa gugmang putli ni Kristo sa paggiya sa atong ambisyon, kita kinahanglan moila nga ang pag-uswag ug ang paglambo moabot paglabay sa panahon ug uban sa balaan nga tabang—grasya ngadto sa laing grasya, ug grasya alang sa grasya.
“Sigurado, nga kitang tanan dili gayod hanas kon itandi ngadto ni Jesukristo. Apan Siya miisip gihapon kanato nga takos sa Iyang pagtagad, gugma, ug tabang, ug niana nga tabang, ang atong katakos molambo. Ang kaikag ni Kristo kanato dalaygon nga indibidwal ug personal, sama ngadto sa Iyang mga higala sa mga panahon sa Iyang mortal nga pangalagad.
“Siya nag-uban gihapon kanato bisan og dili makita. Kauban gihapon Siyang mobakho ug mohupay sa mga Maria kinsa nawad-an og mga igsoong lalaki, igsoong mga babaye, mga ginikanan, mga kapikas, o mga anak. Ang hiyas modagayday gihapon gikan Kaniya sa pag-ayo sa kababayen-an ug kalalakin-an nga naningkamot sa pagkab-ot sa sid-sid sa Iyang beste. Si Jesus wala mahadlok og suod nga panaghigalaay.”
Elder D. Todd Christofferson, Facebook, Dec. 10, 2023, facebook.com/dtodd.christofferson.
Pagkaayo Human sa Pagkawala sa usa ka Minahal
“Ang among pagbisita niining semanaha [sa Brazil] kauban ni Gobernador Raquel Lyra sa Pernambuco [Estado] usa ka espesyal nga kasinatian nga dili daling makalimtan ni Kathy ug nako.
“Si Gobernador Lyra ingon ka manggihatagon ug ingon ka mabination kutob sa iyang mahimo. Among gikahimuot nga si Elder ug Sister Joni Koch sa kapangulohan sa area sa Brazil miuban usab kanamo.
“Apan, ang nasugdan isip usa ka yano, mabination nga pagbisita dali ra nga nahimong butang nga adunay mas dakong kahulogan alang sa matag usa kanamo.
“Subo lang, si Gobernador Lyra nawad-an sa iyang bana pipila lang ka bulan ang milabay human sa grabing pag-atake sa kasingkasing niadtong Oktubre 2022. Sama sa gilaoman, ang kamatayon sa iyang bana nagbilin ni Gobernador Lyra ug sa iyang duha ka bata pa nga mga anak og grabe nga pagbati sa pagkawala ug kasub-anan.
“Samtang gipakigbahin ni Gobernador Lyra ang iyang mga pagbati sa gugma ug pagbangotan ngari kanamo, among gipaneguro kaniya pag-usab ang mahangtoron nga kinaiyahan sa atong mga kalag ug nga ang iyang bana buhi gihapon.
“Mipakigbahin kami sa Basahon ni Mormon diha kaniya, ug siya mibasa sa Alma 40:11–12 nga matahom nga namulong mahitungod sa kinabuhi nga nagsunod niadtong motuo ni Jesukristo ug mosunod Kaniya. Akong gipakigbahin ang akong kaugalingon nga pagsaksi sa Manluluwas ngadto kaniya.
“Sa pagpakita og gugma ug pagtahod sa usag usa, human sa among panagkita, si Gobernador Lyra mihatod kanamo paglakaw ngadto sa matahom nga marmol nga hagdanan ug nanamilit kanamo diha sa atubangan sa Palasyo sa Gobernador.
“Ang pagbati sa pagkawala nga atong mabati atol sa kamatayon tinuod kaayo ug personal kaayo—apan ingon man usab ang paglaom ug pagkaayo nga moabot kanato tungod ni Jesukristo.
“‘O kamatayon, hain na ang imong kadaogan? O kamatayon, hain na ang imong kalala?’
“Apan salamat sa Dios nga naghatag kanatog kadaogan pinaagi sa atong Ginoong Jesukristo!’ (1 Mga Taga-Corinto 15:55, 57).”
Elder Neil L. Andersen, Facebook, Mar. 9, 2023, facebook.com/neill.andersen.
Ang Makaayo nga Gahom sa Manluluwas Nagpuno Kanato sa Kalinaw, Kahayag, Pagsabot, Hingpit nga Kalipay, ug Gugma
“Ang akong asawa, si Rosana, ug ako malipayon kaayo nga makauban ang mga estudyante sa BYU–Hawaii bag-ohay lang. Gihisgotan namo ang pagbaton og hugot nga pagtuo diha kang Jesukristo, ang kinadak-ang gahom nga atong magamit niini nga kinabuhi.
“Ang pagpili sa pagtuo ug pag-ugmad og hugot nga pagtuo diha ni Jesukristo mopadako sa atong pagbaton sa diosnong gahom, dili igsapayan sa mga kasagmuyo ug kawalay kaseguroan sa kinabuhi. Kini ang tinubdan sa pagpakabuhi nga adunay balaan nga katuyoan ug mahangtorong panglantaw.
“Sa atong pagtutok sa atong mga kinabuhi diha ni Jesukristo, makaplagan nato ang mga tubag sa lawom ug mahinungdanong mga kabalaka sa atong mga kalag. Ako mopasalig kaninyo nga ang atong kamasaligon ug hugot nga pagtuo diha sa atong Manluluwas nga si Jesukristo molig-on kanato sa pagpadayon sa unahan, bisan pa sa atong mga hagit. Kini naghatag kanato og rason alang sa lig-on nga paglaom ug nagsangkap og lig-on nga angkla sa atong mga kalag, naghatag kanato og malungtaron nga kalinaw sa kahiladman nga kita kinahanglang magpakabuhi niini nga mga panahon ug makakaplag og kapahulayan diha Kaniya.
“Pinaagi sa Manluluwas nga si Jesukristo ug sa Iyang makaayo nga maulaong sakripisyo, kita makabarog nga tul-id ug lig-on, bisan nag-atubang og kalisdanan. Ang makaayo nga gahom sa Manluluwas mopuno sa atong mga kalag og kalinaw, kahayag, pagsabot, hingpit nga kalipay, ug gugma.”
Elder Ulisses Soares, Facebook, Mar. 21, 2023, facebook.com/soares.u.
Ang Manluluwas Naghatag og Emosyonal nga Kahupay isip ang Bantogan nga Tig-ayo
“Sa miagi nga bulan ang among kapangulohan adunay oportunidad sa pagpamulong atol sa BYU Women’s Conference sa hilisgotan nga ‘Si Jesukristo Mao ang Kahupay.’ Akong gitutokan ang emosyonal nga kahupay nga gihatag sa Manluluwas isip ang Bantogan nga Tig-ayo. Akong gipakigbahin ang kasinatian sa akong kamanghorang anak nga babaye bahin sa emosyonal nga mga kalisdanan sa panglawas nga nagsugod sa dihang siya bata pa kaayo. Sa milabay nga lima ka tuig sa iyang panaw sa pagpaayo, siya nakasabot kon sa unsang paagi ang Manluluwas naga-uban kaniya sa tibuok niyang kinabuhi, bisan atol sa mga panahon nga siya mibati nga hingpit nga gibiyaan Niya ug dili makabati sa Espiritu. Nakaamgo siya nga si Jesukristo anaa ra sa matag maayo nga butang nga miabot sa iyang kinabuhi ug sa matag maayo nga tawo kinsa mitunol sa kamot aron sa pagtabang.
“Minilyon ang nanglimbasog sa kahimsog sa pangisip ug emosyonal nga mga hagit. Usa sa lisod kaayo nga bahin niini nga mga hagit mao ang lama sa palibot niini ug ang masakit nga mga paghukom sa uban nga kini dili maayo nga karakter o usa ka timailhan sa kahuyang o katapolan. Ang mga epekto sa mental ug emosyonal nga sakit ingon ka tinuod ug ingon ka makadaot sama sa pisikal nga sakit o pagkaangol, apan ang mga epekto dili kaayo maklaro sa panggawas kaysa nabali nga paa o kanser. Ang mga epekto sa mental ug emosyonal nga sakit kasagaran makapahimo sa tawo nga maglisod sa pagbuhat sa iyang buluhaton o maglisod sa pagkaplag og kalipay. Ang uban mosulti niadtong adunay kalisdanan sa kahimsog sa pangisip nga ‘kaya ra na’ ug ‘mas paningkamot pa’ o ‘mas magmatinud-anon pa.’ Dili kita mosulti niana ngadto sa tawo nga adunay kanser o usa ka nabalian og paa.
“Ang atong Manluluwas, si Jesukristo, mao ang atong bantogan nga tinubdan sa kahupay. Pagkadakong panalangin niini nga kita makauban Niya sa pagtabang sa pagdala og emosyonal, espirituwal, ug pisikal nga kahupay ngadto sa nagpalibot kanato. Itugot nga kita mahimong mga instrumento sa kahupay diha sa Iyang mga kamot alang niadtong naglibot kanato, lakip sa atong kaugalingong mga sakop sa pamilya. Adunay daghan kaayo nga nagkinahanglan sa kahupay sa Manluluwas!”
Sister J. Annette Dennis, Facebook, June 20, 2023, https://www.facebook.com/RS1stCounselor.
Makaayo nga Gahom sa Pagkamapasalamaton
“Si Presidente Nelson nag-ingon, ‘Walay tambal o operasyon nga makaayo sa daghang espirituwal nga mga kagul-anan ug kasakit nga atong giatubang.
“‘Hinoon, adunay usa ka alibyo—usa nga makapatingala—tungod kay sukwahi kini sa atong natural nga mga panghunahuna. Bisan pa man, ang mga epekto niini napamatud-an na sa mga siyentipiko ingon man usab sa mga kalalakin-an ug kababayen-an nga adunay hugot nga pagtuo.
“‘Ako nagpasabot ngadto sa makaayo nga gahom sa kamapasalamaton. …
“‘Ang pag-ihap sa atong mga panalangin mas maayo pa kay sa pagsubay sa atong mga problema. Bisan unsa pa ang atong sitwasyon, ang pagpakita og kamapasalamaton sa atong mga pribilehiyo usa ka espirituwal nga resita nga paspas moalibyo ug malungtaron ang kaepektibo. …
“‘Ang kamapasalamaton makapalingkawas ba kanato gikan sa kasubo, kaguol, pagbangutan, ug kasakit? Dili, apan makahupay kini sa atong mga pagbati. Kini naghatag kanato og usa ka mas dakong panglantaw sa labing katuyoan ug sa hingpit nga kalipay sa kinabuhi’ (Ang Simbahan ni Jesukristo sa mga Santos sa Ulahing mga Adlaw, “President Russell M. Nelson on the Healing Power of Gratitude,” Nov. 20, 2020, YouTube video).
“Sama sa gisulti ni Presidente Nelson, ang siyensya mosuporta sa iyang mga pulong. Ang website sa Mayo Clinic namahayag: ‘Ang pagpahayag og pasalamat adunay kauban nga daghang benepisyo sa pangisip ug sa pisikal. Ang mga pagtuon nagpakita nga ang pagbati og kamapasalamaton makapalambo sa pagkatulog, sa kabuot ug depensa sa panglawas. Ang pagkamapasalamaton makapaubos sa depresyon, tumang kabalaka, mga kalisdanan nga adunay pabalik-balik nga kasakit ug risgo nga sakit’ (“Can Expressing Gratitude Improve Your Mental, Physical Health?,” Mayo Clinic Health System, Dec. 6, 2022).
“Ug ang pagsiksik sa BYU nagsugyot nga ang pagpasalamat ngadto sa Dios, ug ang utang kabubut-on ngadto Kaniya, maoy mas makahuloganon kaayo ug mas dako og epekto kaysa simpleng pagpasalamat lang. Sa laing pagkasulti, ang pag-ihap sa inyong mga panalangin ug pag-ila sa tinubdan nga gigikanan niini mas gamhanan pa gani sa atong mga kinabuhi.
“Si Presidente James E. Faust mitawag sa pagpasalamat nga ‘usa ka pagpahayag sa hugot nga pagtuo’ ug ‘usa ka makaluwas nga baroganan’ (kinatibuk-ang komperensiya, Apr. 1990).
“Ganahan ko niining bersikulo sa Doktrina ug mga Pakigsaad 78:19: ‘Ug siya kinsa nakadawat sa tanan nga mga butang uban sa pagpasalamat mahimo nga mahimayaon; ug ang mga butang dinhi sa yuta madugang ngadto kaniya, gani sa gatosan ka pilo-pilo, oo, labaw pa.’
“‘Tanang butang’ lakip na gani ang lisod nga mga butang.
“Tugoti nga atong ilhon ang mga tinubdan kon diin gikan magadagayday ang mga panalangin. Atong ugmaron ang usa ka ‘hiyas sa pagkamapasalamaton,’ sama sa giingon ni Presidente Thomas S. Monson. Makapausab gayod kini sa kinabuhi!”
Sister J. Annette Dennis, Facebook, Nov. 23, 2023, http://facebook.com/RS1stCounselor.
Usa ka Makaayo nga Kamatuoran: Kita mga Anak sa Dios
“Sa unsang paagi ang inyong pagkahibalo nga kamo anak sa Dios nakaluwas kaninyo?
“Bag-ohay lang, kami (Presidente Camille N. Johnson, Sister Tracy Y. Browning, ug Sister Andrea Veronica Muñoz Spannaus) nakabaton og oportunidad sa pagbisita sa Nashville, Tennessee. Samtang anaa kami didto, nakahigayon kami og bisita sa Thistle Farms, usa ka dapit nga naghatag og usa ka santuwaryo sa pagkaayo ug katubsanan. Ang misyon sa Thistle Farms nagpakita sa lawom nga pagsabot nga ang atong mahangtoron nga kamatuoran lapas pa sa mga kahimtang nga lagmit naghulagway kanato.
“Ang mga pulong ni Presidente Russell M. Nelson misantop sa among mga hunahuna atol sa among pagbisita: ‘Minahal kong mga higala, kamo mga tinuod nga espiritu nga mga anak sa Dios. Gikanta ninyo kini nga kamatuoran sukad inyong nakat-onan ang mga pulong sa ‘Ako Anak sa Dios.’ Apan kana ba nga mahangtoron nga kamatuoran napatik sa inyong kasingkasing? Kini ba nga kamatuoran nakaluwas kaninyo sa dihang nag-atubang og tintasyon?’ (“Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 15, 2022], Librarya sa Ebanghelyo).
“Sa Thistle Farms, ang mga indibidwal dili lang mga nakalahutay apan gihangop usab isip takos ug gihatagan og bili nga mga magtatampo sa usa ka komunidad nga nakasabot, sama sa ilang panultihon nga nag-ingon, nga ang ‘gugma moayo.’ Kini nga gugma, nakagamot diha sa salabotan nga kita gimahal sa Dios, mahimong elemento alang sa lawom nga personal nga pagpahiuli.”
Sister Tracy Y. Browning, Facebook, Dec. 3, 2023, http://facebook.com/Primary2ndCounselor.