Ainikien Armej ro Rekwojarjar ilo Raan Ko Āliktata

Bok in Mormon Ear Letok n̄an Eō Aenōm̧m̧an

Jān Américo Chantre Fernandes, Cape Verde

Iaar bōk meleļe eo ke Bok in Mormon ekar mennin aikuj n̄an ukōt mour eo aō im boktok eō epaakļo̧k n̄an Jisōs Kraist.

pija ko jān Allen Garns

Ilo jem̧ļo̧kin 2013 eo, ruo likao ro rej ekkōņak jōōt mouj im tie ko rekkar jino aer loļo̧k sister eo ao ruo allen ilo juon wiik. Ikar jeļā tōre eo bwe rej jān kabun̄ in. Jen baj n̄a, kobaļo̧k im m̧ōttan juon kabun̄ ear ejeļo̧k ilo karōk ko aō, kōn menin iar jab kōnono ipper.

Kōn kajjojo lotok ko aer, ikar kanooj lale bwe in jab pād m̧weo ke raar jikrōktok. Juon men ejenolo̧k, ijoke, kar kairuj eō. Aolep iien rekar bōk ippāer juon bok ebūļu. Ijan̄in kar loe bok in mokta, im ekar āinwōt ainjuon n̄an n̄a.

Juon raan ilo ruum̧ in bwebwenato eo, sister eo aō ear jino an kwaļok kōn bok eo. Ejjab etto, likao ro ruo rej jādetok. Jerata eo, Ijjab maron̄ in kar kūtileek jān erro. Rekkar loe bok blue eo ipemro—Bok in Mormon—im jinoe aer kajjitōk ta eo ijeļā kōn Jisōs Kraist.

Ke iar ron̄jake mijinede ro jān raan eo maantak, iar bwilōn̄ kin wāwein aer kaiokļo̧k katak ko aer n̄an Bok in Mormon. Āinwōt juon tōprak, bok būļu eo ekar dikļo̧k an ainjuon n̄an n̄a.

Ekar wōr wōt aō pere ko reļļap kake, bōtaab ikar jino riiti. Iaar bōk meļeļe eo ke Bok in Mormon kar jab juon eo ej bōk jikin baiboļ eo ak mennin aikuj n̄an ukōt mour eo aō im boktok eō epaakļo̧k n̄an Jisōs Kraist. Iar katak bwe Bok in Mormon ej pedped ioon Rilomo̧r eo. Katak ko ie rekkar jipan̄ n̄a jeļā wōn E im wōn eo Jemed Ilan̄.

Bok in Mormon ear makaj an jipan̄ eō erom̧ juon armej eo em̧m̧anļo̧k, juon lukun rikaļoor an Jisōs Kraist. Ekar barāinwōt jipan̄ eō kōkm̧anm̧anļo̧k m̧wilū ke ikar jelm̧ae apan̄ ko raan otemjeļo̧k. Jān jeļā eo aō kōn ekkatak kake, ijeļā ej jipan̄ armej ro itok n̄an Kraist im mour kōn gospel eo (lale Moroni 10:32). Ej barāinwōt kōketak kōj n̄an ļoor katak ko an Kraist im kōjerbali ilo mour ko ad raan otemjeļo̧k. Ej letok n̄an kōj jeļā eo bwe jej ļaddik im leddik ro nejin Anij. Ej bōktok aenōm̧m̧an.

Ālkin jejjo wiik ko ālkin iioon mijenede ro im riiti Bok in Mormon, ikar peptaij. Ij kwaļo̧k aō naan in kam̧ool kōn aolepān būruō bwe Bok in Mormon ej m̧ool im bwe riiti ej bōktok kōjatdikdik ilo iien ko remarok tata, jipan̄ kōj en̄jake iakwe im kōjparok eo an Irooj. Ij kam̧m̧oolol kōn an wōr Bok in Mormon ilo mour eo aō.