Mga Tingog sa mga Santos sa Ulahing mga Adlaw

Ang Espiritu Mihulip sa Kulang

Ni Lisa Nielsen Young, South Carolina, USA

Mabati nako ang gugma sa mga miyembro sa ward samtang nanganta sila nga wala ang akong duyog.

Paghulagway pinaagi ni Katy Dockrill

Nagpuyo kami sa usa ka gamay nga lungsod sa Georgia, USA, sa dihang namatay ang akong amahan mga 55 lang ang edad. Kadaghanan sa among pamilya nagpuyo sa laing estado. Ang 2,000 ka milya (3,200 km) tali namo ug sa among pamilya wala sukad namo batia nga layo kaysa nianang higayona.

Ang akong bana mao ang bishop ug ako ang organista sa among gamay nga ward. Sa tanang emosyon ug mga kabalaka sa pagtabang sa mga plano sa haya, gibati nako nga gikapoy pag-ayo niana nga Dominggo sa dihang oras na alang sa among panapos nga himno sa panagtigom alang sa sakramento: “Ang Dios Magauban Kanimo” (Mga Himno, nu. 90).

Tunga-tunga sa ikaduhang bersikulo, nadala ko sa akong kaguol. Morag diha nako sa kataposan niana nga bersikulo, apan ang akong mga kamot nagkurog ug ang akong mga mata puno sa luha nga kinahanglan kong mohunong sa nahibilin nga tibuok bersikulo. Dili ko makahunong sa paghilak.

Mihunong og kadiyot sa dihang ang kongregasyon nakamatikod nga mihunong ang organ. Apan nagsugod dayon pagkanta ang mga miyembro sa ward bisan og walay duyog. Ang pagkanta dili perpekto. Diyutay ra man mi. Apan ang Espiritu mihulip sa kulang. Bisan sa akong mga luha ug kaulaw, gibati nako ang gugma sa kadaghanan samtang sila nanganta.

Ang Dios magauban kanimo;

Libutan kas iyang gugma;

Kon kamatayon mohulga.

Ang Dios magauban Kanimo.

Sa dihang nahuman na ang himno, ang lider sa musika migunit nako samtang ako nagbakho sa dihang gisulti ang panapos nga pag-ampo. Pipila ka tawo ang miduol sa organ nga adunay mga luha sa ilang mga mata nga misulti og pahasubo mahitungod sa akong amahan.

Dayon, gisultihan nako ang lider sa musika nga ako ang mopatukar sa piano didto sa haya. Tingali dili maayong ideya human sa unsay nahitabo, apan ang akong papa malingaw kaayo nga maminaw nako nga mopatukar sa piano. Gusto kong mopatukar alang kaniya. Nakaamgo ko dayon kon unsa ka duol siya atol sa panapos nga himno.

Mapasalamaton kaayo ko sa mga himno. Mopamatuod ko nga ang musika makatudlo ug makahupay nato sa mga paagi nga dili mahimo kanunay sa mga pulong. Sama sa gisulat sa Unang Kapangulohan sa pasiuna sa libro sa himno, “Ang mga himno … mohupay sa nagmasulub-on, ug modasig kanato sa paglahotay hangtod sa kataposan.” Mapasalamaton usab ako sa gugma sa maayo nga ward sa dihang ako layo kaayo sa akong kaugalingon nga pamilya. Nasayod ko nga ang akong amahan ug ako magkita ra pag-usab.