Ainikien Armej ro Rekwojarjar ilo Raan Ko Āliktata

Jetōb Ekar Kabweļo̧k Likjab eo

Jān Lisa Nielsen Young, South Carolina, USA

Imaron̄ en̄jake iakwe eo an ward membōr ro ilo aer kar al ilo an ejeļo̧k kōjan̄jan̄.

pija eo jān Katy Dockrill

Kem kar jokwe ilo juon jikin jidikdik ilo Georgia, USA, ke jema ekar mej ilo an 55 wōt iio dettan. Enan̄in aolepān bam̧le ko am rekkar jokwe ilo bar juon state. 2,000 m̧aiļ ko ikōtaam im baam̧le eo am ejjan̄in kar aitok jān ilo iien in.

Leo ippa ear juon bishop im iar juon rio̧kwōn ilo ward eo edik am. Kōn aolep en̄jake ko im inepata kōn jipan̄ kōn karōk ko an juon ilomej, ikar en̄jake eļap tata aō m̧ōk Jabōt eo ke ekar iien n̄an al in ikkilōk kweilo̧k in kwojkwoj eo am: “Anij Ippam̧ M̧ae Iien Jen bar Lo Doon” (Al Ko Al In Ajri, nō. 30).

Lukwōn ļo̧k eoon ruo, būrom̧ōj eo aō ekar kalibubuik eō. Ilo juon wāween ikar kōjan̄jan̄ aolepān eoon jab eo, bōtaab peiū ekar wudiddid im meja ekar obrak kōn kōjemaaļaļ jon̄an ikar aikuj bōjrak jān aolepān eoon eo. Ikar jab maron̄ bōjrak jān aō jan̄.

Juon bōjrak ekadu ekar itok ke jarlepju eo ekar kile bwe o̧kwōn eo ekar bōjrak. Bōtaab innām ward membōr ro raar jino al ilo an ejjeļo̧k kōjan̄jan̄. Al eo ekar jab jetjet.t Kōm kar iiet, ilo m̧ool. Bōtaab Jetōb eo ekar kabweļo̧k likjab eo Jān kōmejaļaaļ ko aō im kajookok, ikar maron̄ en̄jake iakwe eo an elōn̄ ke raar al.

Anij ippam̧ m̧ae iien jenaaj bar lo doon;

Kōpālpel wōt būļāāk in iakwe eo ioomi;

Den̄ōt ņo̧ in kamijak ko an mej im̧aami.

Anij ippam̧ m̧ae iien jenaaj bar lo doon.

Ke al eo ekar jem̧ļo̧k, ritōl al eo ekar jibur eō ke ikar m̧ōtato ilo jar in ikkilōk eo. Innām jejjo armej ro itok n̄an o̧kwōn eo kōn kōmejaaļaļ ilo mejāer n̄an ba ewi jon̄an aer būromōj kōn jema.

Tokālik, ikar jiron̄ ritōl al eo inaaj kōjan̄jan̄ ilo iienn ilomej eo. Emaron̄ in kar juon ļōmņak enana ālkin ta eo ekar waļo̧k, bōttaab jema ekar kanooj m̧ōņōņō in ron̄ aō kōjan̄jan̄ piano. Ikar kōņaan kejan̄jan̄ n̄an e. Innām ikar kile ewi jon̄an aō kar en̄jake aō epaake ilo jar in ikkilōk eo.

Ij lukkuun in kam̧m̧oolol kōn al ko. Ij kam̧ool bwe al ko remaron̄ katakin im kainem̧m̧an kōj ilo wāwein ko im naan ko rejjab maron̄. Einwōt an Būrejitenji eo Kein Kajuon je ilo tum̧aan in bok in al eo “Al ko … rej kainem̧m̧an ro im rej rub buruer, kaenōm̧m̧an ro rej liejļo̧ļ, im kōkajoor kōj n̄an niknik n̄an jem̧oļo̧kin.” Ij kam̧olool kōn iakwe eo an juon ward eo em̧m̧an ilo aō kar etoļo̧k jān bam̧le eo aō. Ijeļā bwe jema im n̄a ilo m̧ool bar ioon doon.