Ngaahi peesi fakalotofonuá
Ko ʻEku Mana ʻi he Temipalé
ʻI he taʻu 90 tupu siʻí, kimuʻa pea ʻi ai ha temipale ʻi Melipoané, naʻe totongi ai heʻemau siteikí ha pasi tuʻo taha ʻi he māhina ke ʻave kimautolu ki he Temipale Sydney Australia.
ʻI he teuteu ki aí, naʻá ku fakapapauʻi naʻe fai ʻeku faiako ʻaʻahí. ʻI ha efiafi Tūsite ʻe taha kimuʻa ia he fononga pasi ʻi he Falaité, naʻá ku ʻaʻahi ai mo hoku hoá ki ha fefine. ʻI heʻemau tangutu ʻo pōtalanoá, naʻe hū mai hono husepānití ki he lotofalé, pea naʻá ku ongoʻi ke kole kiate ia ha tāpuaki ʻo e lakanga fakataulaʻeikí.
ʻI he tāpuaki ko iá, naʻá ne pehē ai ko e fefine ʻe toko ua mei he kau fafine te u fai ha ngāue ki ai ʻi he Temipale Sydney Australia te na haʻu ʻo fakamālō mai kiate au ʻi he puleʻanga fakasilesitialé, ko e moʻoni ko ha meʻa fakafiefia ia ke fanongo ki ai.
ʻI he ʻaho hono hokó, naʻá ku maʻu ha telefoni he ʻikai ʻalu ʻa e pasí ki he temipalé ʻi he ʻaho Falaité.
Naʻá ku fakakaukau, “ʻOiauē, ko e hā ʻa e meʻa te u faí?” Naʻá ku tā ki hoku kaungāmeʻa ko Peví, ʻa ia ʻoku ʻalu maʻu pē ʻi he pasí, peá ne fakapapauʻi mai kuo kaniseli ʻa e pasí.
Naʻá ku fokotuʻu ange ke mau totongi ha kiʻi pasi siʻisiʻi ke ʻalu ai hamau niʻihi pē, ka naʻe ʻikai ke ne loto ki ai.
ʻI heʻeku fakamanatu ʻa e ngaahi lea ʻi he tāpuaki ʻo e lakanga fakataulaʻeikí naʻá ku maʻú, naʻá ku fakakaukau, “Ka ʻe fēfē ʻa e ongo fafine ko ʻení? ʻOku fiemaʻu ke u aʻu ʻi ha faʻahinga founga ki Sitinī!”
ʻOku ou ngāue ʻi he ʻaho Falaité ki ha fefine ʻoku ʻi ai hano ʻapi ʻi ʻAivenihou ki he kakai ʻoku ʻi ai haʻanau fiemaʻu makehé. Naʻe lahi ʻeku feimeʻatokoni mo fatongia ʻaki hono tokangaʻi ʻa e ngaahi houa maʻu meʻatokoni aí, ʻa ia naʻe fiemaʻu ke fai ia ʻi he taimi pau. ʻI he ʻaho kimuʻa ʻi he ʻaho naʻe totonu ke mau heka pasi ai ki he temipalé, naʻe fiemaʻu ʻe he kau fafine ʻe toko 24 ke nau maʻu meʻatokoni efiafi ʻi he 5:00 pm. Naʻe fiemaʻu ke fafanga kinautolu pea fakamaau ʻa e meʻa kotoa kimuʻa ʻi he 5:25 pm ke u lava ʻo aʻu ki he fakafofonga folaú ʻo totongi ʻeku tikite vakapuna ki Sitinií.
Lolotonga ʻa e ʻahó, ʻi heʻeku maʻu pē ha faingamālié, naʻá ku toutou tā ki he fakafofonga folaú ʻo ʻamanaki ke maʻu ha tikite ka naʻe ʻikai pē. Naʻe pehē mai ʻa Ane, ko e fakafofonga folaú ʻi he taimi ʻe taha, “Tuku ā Pev …”
Sai! Naʻe hangē ia hano taʻalo ʻo e fuka lanu kulokulá ki ha pulú!
Naʻá ku lava ʻo fakamaau ʻa e maʻu meʻatokoni efiafí mo tā ʻa e fafangú pea ʻi he 5:25 pm, naʻá ku ʻosi maau ai mo ʻeku kató, ʻo tali ʻi he matapā muʻá ke u mavahe—peá u ʻalu leva heʻeku kaá ki he fakafofonga folaú.
Meʻa mālié, naʻe ʻi ai ha kasitomā ai naʻe puka haʻane folau ki tuʻapuleʻanga, ʻo kei ava ai ʻa e ʻōfisí ʻi heʻeku aʻu atu ʻi he 5:35 pm. Naʻe sio pē ʻa e fakafofonga folau naʻá ne tokoniʻi aú ki he monitoá mo ne pehē mai, “ʻOku ʻikai ke u tui ʻe maʻu haʻo vaka.”
Naʻá ku tuʻu pē ai mo malimali, mo tatali, peá ne pehē mai, “ʻOleva angé. ʻOku toe ʻa e sea ʻe taha.”
Naʻá ku pehē atu, “Mālō,” naʻe totongi leva ʻeku tikité peá u fakavave atu ki heʻeku kaá ke u aʻu ki he malaʻe vakapuná ʻi he vave tahá.
Naʻá ku ʻiloʻi naʻá ku kiʻi tōmui ki he hū ki lotó. Naʻá ku kole fakamolemole ki he tokotaha ngāué mo fehuʻi ange, “ʻOku ou kei lava pē ʻo hū?” Naʻá ne sio ʻo ʻiloʻi naʻe tōmui ʻa e vaká ʻaki ha miniti ʻe 20, peá ne mono mai leva ʻeku tikité mo pehē mai, “ʻAlu ki he Gate 11.”
Mei he Malaʻe Vakapuna Sitinií, naʻe fiemaʻu ke u ʻalu ʻi ha lēlue ki he ʻapi hoku kaungāfefiné ʻi ʻEpingi, ʻa ia ʻoku ʻikai mamaʻo mei he temipalé. ʻI heʻeku tūʻutá, naʻá ku fakakaukau mahalo te u lava ʻo heka ha tekisī ki hono ʻapí, ka ko e 11:00 pm ia pea naʻe ʻikai ha tekisī ia ʻe ʻatā. Ne pau ke u lue ʻi he fakapoʻulí ʻi ha meimei kilomita ʻe ua.
ʻI heʻeku aʻu atu ki hono ʻapí, naʻá ku fakatokangaʻi naʻe ʻikai ulo ha maama ko ia naʻe pau ai ke u tokanga ʻi heʻeku afe atu ʻi he tauʻanga meʻalelé, ʻo toho māmālie atu ʻeku kató ke tukituki ʻi he matapaá.
Naʻe fakakaukau hoku kaungāmeʻá naʻe ʻikai ke u haʻu koeʻuhí naʻe ngalo ia ke u talaange ʻa e feleleaki holo naʻe faí, ka naʻe iku lelei pē ʻa e meʻa kotoa.
Naʻá ku lava ʻo fai ʻa e ngāue ki he ongo fafiné, pea ʻoku ou faʻa fakakaukau ki he taimi te mau feʻiloaki ai ʻi he puleʻanga fakasilesitiale ʻo e ʻOtuá.