“3 ka Paagi sa Paglahutay sa Kinabuhi ug Pagpahimulos Niini,” Liahona, Sept. 2024.
Mga Young Adult
3 ka Paagi sa Paglahutay sa Kinabuhi ug Pagpahimulos Niini
Gusto sa Langitnong Amahan nga makakaplag kita og kamaya sa kinabuhi nga gihatag kanato.
Si Guido taga-Germany
Kanus-a ang kataposang higayon nga ikaw tinuod gayod nga nalipay?
Malisod ba tubagon kana nga pangutana?
Atol sa mahagiton nga mga panahon, tingali mahimo kitang tig-a tungod sa atong mga pagsulay nga dili na gayod nato mahinumdoman kon unsa ang pagbati sa kamaya. Sama sa gihulagway ni Sister Reyna I. Aburto, kanhi Ikaduhang Magtatambag sa Kinatibuk-ang Kapangulohan sa Relief Society: “Ang mga kalisod mahimong moabot … sa atong kinabuhi, nga makapalimot nato sa kahayag sa Dios ug gani maoy hinungdan nga mangutana kita kon kana nga kahayag anaa pa ba alang kanato.”
Para sa daghang mga young adult, ang kinabuhi usahay daw sama sa usa ka butang nga angay lahutayon—usa ka butang nga angay panglimbasogan hangtod nga sa kataposan madawat nato kanang mga panalangin nga gisaad ngari kanato.
Unsa ang atong makalimtan usahay mao nga usa usab kini ka butang nga angay pahimuslan. Ang panalangin sa mahangtorong kalipay mahimong magsugod karon.
Ania ang pipila ka paagi nga atong mapabalik ang paglaom ug kamaya sa atong mga kinabuhi.
Hinumdomi ang Yano nga mga Kamatuoran
Imbis nga atong bansayon ang atong mga mata sa pagtan-aw diha sa kangitngit, makapangita kita sa mga bidlisiw sa kahayag nga gidala sa ebanghelyo ni Jesukristo sa atong kinabuhi.
Si Presidente Russell M. Nelson nagpahinumdom kanato nga “ang kalipay moabot gikan ug tungod [ni Jesukristo]. Siya ang tinubdan sa tanang kalipay.” Kon nagkalisod ka sa pagpangita og kahayag sa imong kinabuhi, ang pagduol ngadto kang Jesukristo kinahanglan mao kanunay ang una nga lakang.
Mahimo usab nimong hangyoon ang Langitnong Amahan nga tabangan ka sa paghinumdom sa pagkamahinungdanon sa imong balaanong pagkatawo.
Si Elder Gary B. Sabing sa Seventy nagtudlo nga, “Importante kaayo sa atong kalipay nga kita mohinumdom nga kita anak nga mga lalaki ug mga babaye sa usa ka mahigugmaon nga Langitnong Amahan.” Ang tinuod nga pagkasayod nga ang Dios nagpakabana kanimo ug nagtinguha sa labing maayo alang kanimo, makahatag og kahayag sa imong kinabuhi.
Bisan pa sa mga hagit nga imong giatubang, ang paghinumdom sa nag-unang mga baroganan sa ebanghelyo makatabang kanimo sa pagdapit sa kahayag sa Manluluwas nganha sa imong kinabuhi.
Pangitaa kon Unsa ang Makahatag Kanimo og Kalipay
Usahay mahimong malisod ang paghinumdom nga ang atong kalipay dili sa kanunay nga kaparehas sa uban. Gani, isip mga young adult, malisod ang dili pagtandi sa atong kinabuhi ngadto sa mga kinabuhi niadtong anaa sa atong palibot. Apan hinumdomi nga anaa ra kanimo ang pagdumala sa imong kaugalingong kalipay.
Pangutan-a ang imong kaugalingon: unsay makalipay nimo?
Unsay makapaphiyom nimo?
Sama sa gisugyot ni kanhi Presidente Dieter F. Uchdorf sa dihang Ikaduhang Magtatambag pa siya sa Unang Kapangulohan, “Minosan ang inyong pagdali-dali ug mogahin og gamayng panahon nga mas maila-ila ninyo ang inyong kaugalingon.” Pangitaa ang katahom diha sa ginagmay nga mga butang: Paglakawlakaw. Mobisita sa templo. Pagpalista alang sa usa ka proyekto sa pagserbisyo. Pangita og bag-ong kalingawan nga buhaton o baliki kadtong imong nasugdan sa una.
Si Elder Richard G. Scott (1928–2015) sa Korum sa Napulog Duha ka Apostoles sa makausa namulong kon sa unsang paagi nga ang pagkamamugnaon makabanwag sa atong mga kinabuhi: “Pagpili og usa ka butang sama sa musika, sayaw, pagkulit, o balak. Ang pagkamamugnaon makatabang nimo nga malipay sa kinabuhi. Makamugna kini og diwa sa pagpasalamat. Makapalambo kini sa nakatulog nga talento, makapahait sa imong kapasidad sa pagpangatarongan, sa paglihok, ug sa pagpangita og tumong sa kinabuhi. Makaiway kini sa mga kasubo ug kasakit. Makahatag kini kanato og kabag-ohan, gamay nga tipik sa kadasig, ug kahinam sa kinabuhi.”
Ang pagkaplag kon unsa ang makapuno sa imong kasingkasing og kalipay makatabang sa pagpabalik sa paglaom sa imong kinabuhi kon nahunong ang imong pag-uswag.
Tutoki ang Unsay Labing Mahinungdanon
Kon ang kinabuhi hilabihan sa kabug-at ug gibati nimo nga nahurot ang tanan nimong kusog aron lamang makalahutay sa matag adlaw, paggahin og gamay nga panahon sa kahilom aron tutokan ang unsay labing mahinungdanon.
Aron mahimo kini, misugyot si Presidente Uchtdorf nga “atong himoon nga may gamay nga pagkayano ang atong kinabuhi.” Ipunting og balik ang imong kinabuhi ngadto sa gugma sa Langitnong Amahan ug sa matahom nga gasa sa Pag-ula ni Jesukristo. Hatagi og prayoridad ang imong mga relasyon ngadto sa imong pamilya, mga higala, ug sa imong kaugalingon.
Pakigbatoki ang negatibo pinaagi sa positibo, ang kangitngit pinaagi sa kahayag ni Jesukristo ug sa Iyang ebanghelyo.
Sama sa giawhag ni Presidente Nelson: “Dili lang kita molahutay niining kasamtangan nga panahon. Atong hangopon ang umaabot uban sa hugot nga pagtuo!” Samtang maglauhtay sa mga kalisod sa kinabuhi, kat-oni usab ang pagpahimulos sa katahom niini. Ang mahangtorong kalipay nga gisaad sa ebanghelyo dili magsugod sa umaabot nga panahon—nagsugod kini karon.