“Usa ka Sundanan alang sa Panaghiusa diha ni Jesukristo,” Liahona, Okt. 2024.
Usa ka Sundanan alang sa Panaghiusa diha ni Jesukristo
Samtang kita makighiusa diha ni Jesukristo sama sa katawhan sa 4 Nephi, ang atong tinguha nga magkahiusa molabaw sa atong mga kalainan ug mosangpot ngadto sa kalipay.
Nagpuyo kita sa panahon nga ang grabeng panagbingkil ug panagsumpaki mikatap sa tibuok kalibotan. Mikatap pinaagi sa teknolohiya ug giawhag sa mga tawo kansang mga kasingkasing nagkabugnaw, kining mabingkilon nga impluwensya naghulga sa pagpuno sa atong mga kasingkasing sa kasilag ug moguba sa atong komunikasyon gamit ang panagbingkil. Ang mga koneksyon ngadto sa ubang tawo nagkaguba. Nagkagrabe ang mga gubat.
Niini nga konteskto, ang matinud-anong mga sumusunod ni Jesukristo nangandoy og kalinaw ug aktibong nagtinguha sa pagtukod og lahi nga matang sa katilingban—kanang gibase sa mga pagtulun-an ni Jesukristo. Aron matuman kini nga tumong, ang Ginoo misugo nato sa “paghiusa; ug kon kamo dili magkahiusa kamo dili ako” (Doktrina ug mga Pakigsaad 38:27). Sa pagkatinuod, ang panaghiusa mao ang ilhanan sa tinuod nga Simbahan ni Jesukristo.
Unsaon nato sa pagpakigbatok sa mga pwersa sa panagbahin ug panagbingkil? Unsaon nato pagkab-ot ang panaghiusa?
Sa maayong palad, ang 4 Nephi sa Basahon ni Mormon naghatag nato og usa ka ehemplo. Kini nga kapitulo sa minubo mirekord sa paagi nga ang katawhan nagpuyo human ang Manluluwas mibisita kanila, mitudlo kanila, ug mitukod sa Iyang Simbahan taliwala kanila. Kini nga asoy nagpakita giunsa niini nga katawhan pagkab-ot sa malipayon ug malinawon nga panaghiusa, ug naghatag kini kanato og sundanan nga atong masunod sa pagkab-ot niining sama nga panaghiusa sa atong kaugalingon.
Pagkakabig
Sa 4 Nephi 1:1, mabasa nato: “Ang mga tinun-an ni Jesus mitukod og usa ka simbahan ni Kristo sa tanan nga mga yuta nga naglibot. Ug ang mga [tawo] miduol ngadto kanila, ug matinud-anon nga naghinulsol sa ilang mga sala.”
Kita nakighiusa libot sa Ginoo ug sa Manluluwas nga si Jesukristo. Samtang ang matag tawo makat-on mahitungod ni Jesukristo, sa Iyang ebanghelyo, ug sa Iyang Simbahan, ang Espiritu Santo mosaksi sa kamatuoran ngadto sa matag kasingkasing sa tawo. Dayon ang matag usa kanato makadawat sa imbitasyon sa Manluluwas nga magbaton og hugot nga pagtuo diha Kaniya ug mosunod Kaniya pinaagi sa paghinulsol.
Sa ingon magsugod ang indibidwal nga panaw sa pagkakabig—layo gikan sa hinakog ug makasasala nga mga tinguha ug padulong sa Manluluwas. Siya ang pundasyon sa atong hugot nga pagtuo. Ug samtang ang matag usa kanato motan-aw ngadto Kaniya sa matag hunahuna (tan-awa sa Doktrina ug mga Pakigsaad 6:36), Siya mahimong usa ka pwersa nga mohiusa sa atong mga kinabuhi.
Mga Pakigsaad
Ang rekord sa 4 Nephi nagpadayon sa pagpahayag nga kadtong miadto sa Simbahan ug mihinulsol sa ilang mga sala “nabunyagan sa ngalan ni Jesus; ug sila usab nakadawat sa Espiritu Santo” (4 Nephi 1:1). Misulod sila sa usa ka pakigsaad—usa ka espesyal, nagbugkos nga relasyon—ngadto sa Dios.
Kon kita mohimo ug motuman sa mga pakigsaad, atong gidala ang ngalan sa Ginoo ngari kanato isip mga indibidwal. Agig dugang, kita midala sa Iyang ngalan ngari kanato isip katawhan. Ang tanan nga mohimo og mga pakigsaad ug maningkamot sa pagtuman niini mahimong katawhan sa Ginoo, Iyang espesyal nga bahandi (tan-awa sa Exodo 19:5). Sa ingon, kita mosubay sa dalan sa pakigsaad sa tinagsa-tagsa ug sa hiniusang paagi. Ang atong relasyon sa pakigsaad ngadto sa Dios naghatag nato og managsamang katuyoan ug managsamang kailhanan. Samtang atong bugkoson ang atong kaugalingon ngadto sa Ginoo, Siya motabang kanato aron ang atong “mga kasingkasing mabugkos sa panaghiusa ug sa gugma sa usag usa” (Mosiah 18:21).
Kaangayan, Pagkapareha, ug Pagtabang sa Kabos
Ang asoy sa 4 Nephi nagpadayon: “Walay mga panagbingkil ug mga panaglalis diha kanila, ug matag tawo mitagad nga makiangayon sa usag usa.
“Ug sila aduna sa tanan nga mga butang nga alang kanilang tanan; busa walay adunahan ug kabos, ulipon ug gawasnon, apan silang tanan gihimo nga mga gawasnon, ug nag-ambit sa langitnon nga gasa” (4 Nephi 1:2–3).
Sa atong temporal nga mga pakigsandurot, ang Ginoo gusto nga kita magmakiangayon ngadto sa usag usa ug dili manglimbong o mamintaha sa usag usa (tan-awa sa 1 Mga Tesalonica 4:6). Samtang kita magkaduol ngadto sa Ginoo, kita “dili maghunahuna nga pasakitan ang usag usa, apan magpakabuhi nga malinawon, ug mohatag sa matag tawo sumala sa iyang gikinahanglan” (Mosiah 4:13).
Ang Ginoo misugo usab kanato sa pag-atiman sa kabos ug timawa. Kita kinahanglan nga “mopakigbahin sa [atong] kabtangan” sa pagtabang kanila, sumala sa atong abilidad sa pagbuhat sa ingon, nga dili mohukom kanila (tan-awa sa Mosiah 4:21–27).
Ang matag usa kanato, “motamod sa iyang igsoon sama sa iyang kaugalingon” (Doktrina ug mga Pakigsaad 38: 24). Kon kita gusto nga mahimong katawhan sa Ginoo ug nagkahiusa, dili lamang nga tagdon nato ang usag usa nga managsama, apan kinahanglan gayod nga lantawon usab nato ang usag usa nga managsama ug mobati sa atong mga kasingkasing nga kita managsama—pareha sa atubangan sa Dios, nga managsama og bili ug managsama og potensyal.
Pagkamasulundon
Ang sunod nga leksiyon gikan sa 4 Nephi nagagikan niining yanong pamahayag: “Sila nagsunod subay sa mga sugo diin sila midawat gikan sa ilang Ginoo ug sa ilang Dios,” (4 Nephi 1:12).
Ang Ginoo mitudlo niini nga katawhan sa Iyang doktrina, mihatag kanila og mga sugo, ug mitawag og mga sulugoon sa pagpangalagad ngadto kanila. Usa sa Iyang mga katuyoan sa pagbuhat niini mao ang pagseguro nga walay panaglalis taliwala kanila (tan-awa sa 3 Nephi 11:28–29; 18:34).
Ang atong pagkamasulondon ngadto sa mga pagtulun-an sa Ginoo ug sa Iyang mga sulugoon importante sa atong pagkahimong mahiusa. Kini naglakip sa atong pasalig sa pagsunod sa mga sugo sa paghinulsol kon kita makasala ug sa pagtabang sa usag usa samtang maningkamot kita nga mahimong mas maayo ug mahimong mas maayo matag adlaw.
Nagtigom Kanunay
Sunod, atong nakat-onan nga ang katawhan sa 4 Nephi “[mipadayon] sa pagpuasa ug sa pag-ampo, ug nagtigom kanunay sa pag-ampo ug pagpamati sa pulong sa Ginoo” (4 Nephi 1:12).
Kinahanglan kitang magtigom kanunay. Ang atong senimana nga mga miting sa pagsimba mahinungdanon nga oportunidad alang nato sa pagkaplag og kalig-on, sa indibidwal ug sa tanan. Moambit kita sa sakramento, magkat-on, mag-ampo, manganta og dungan, ug mosuporta sa usag usa. Ang ubang panagpundok makatabang usab sa pag-awhag sa pagpalambo og panaghigalaay, ug gipakigbahin nga katuyoan.
Gugma
Ang rekord sa 4 Nephi naghatag nato unsa ang mahinungdanon nga elemento niining tanan— nga kon wala kini ang tinuod nga panaghiusa dili makab-ot: “Walay panagbingkil diha sa yuta, tungod sa gugma sa Dios nga anaa sa mga kasingkasing sa mga katawhan” (4 Nephi 1:15).
Ang personal nga kalinaw makab-ot kon kita, sa mapahiubsanon, tinud-anay nga mahigugma sa Dios. Kini mao ang una ug dakong sugo. Ang paghigugma sa Dios nga labaw ni bisan kinsa o sa bisan unsang butang mao ang kondisyon nga makahatag og tinuod nga kalinaw, kahupayan, og kamasaligon ug hingpit nga kalipay. Samtang mopalambo kita og gugma ngadto sa Dios ug ni Jesukristo, ang gugma sa pamilya ug sa silingan natural na lang nga mosunod.
Ang labing dakong kalipay nga atong masinati sukad mahitabo kon kita malukop sa gugma alang sa Dios ug alang sa tanan Niyang mga anak.
Ang gugma nga putli, ang tiunay nga gugma ni Kristo, mao ang pangontra sa panagbingkil. Mao kini ang nag-unang kinaiya sa tinuod nga sumusunod ni Jesukristo. Kon kita magpaubos sa atong mga kaugalingon sa atubangan sa Dios ug mag-ampo inubanan sa tibuok kusog sa atong kasingkasing, ang Dios mohatag kanato sa gugma nga putli (tan-awa sa Moroni 7:48).
Samtang kita magtinguha nga ang gugma sa Dios motuhop sa atong mga kasingkasing, ang milagro sa panaghiusa ingon og hingpit nga natural ngari kanato.
Balaanong Pagkatawo
Sa kataposan, ang katawhan sa 4 Nephi nagpakita og timailhan sa panaghiusa nga angayan sa atong pagtagad: “Wala nay mga tulisan, ni mga mamumuno, ni adunay mga Lamanita, ni bisan unsa nga matang sa pundok sa mga katawhan; apan sila nagkahiusa, mga anak ni Kristo, ug manununod sa gingharian sa Dios.” (4 Nephi 1:17).
Ang mga timaan nga mibahin sa katawhan sulod sa gatosan ka tuig nagkawala napulihan sa malahutayon ug maligdong nga kailhanan. Mitan-aw sila sa ilang mga kaugalingon—ug sa tanan—sumala sa ilang relasyon ngadto sa Langitnong Amahan ug ni Jesukristo.
Ang pagkadaiya ug mga kalainan mahimong maayo ug importante kanato. Apan ang atong labing importante nga mga pagkatawo mao kadtong may kalabotan sa atong balaanon nga gigikanan ug katuyoan.
Una ug kinaunahan, matag usa kanato usa ka anak sa Dios. Ikaduha, isip miyembro sa Simbahan, matag usa kanato usa ka anak sa pakigsaad. Ug ikatulo, matag usa kanato usa ka disipulo ni Jesukristo. Ako moawhag natong tanan nga dili motugot sa bisan unsa nga laing timailhan nga “motangtang, mohulip, o mag-una sa prayoridad niining tulo ka malahutayon nga mga titulo.”
Maghiusa
Ang Dios nagdapit sa tanan sa pagduol ngadto Kaniya. Adunay luna alang sa tanan. Mahimong managlahi kita sa atong mga kultura, mga politika, mga ganahan, mga lasa, ug daghan pang ubang paagi. Apan kon kita magkahiusa diha ni Jesukristo, ang mao nga mga kalainan dili na kaayo importante ug malabwan sa atong labing importante nga tinguha nga magkahiusa—aron nga kita mahimong Iya.
Hunahunaa pag-ayo ang mga leksiyon nga gitudlo sa 4 Nephi. Samtang ang matag usa kanato maningkamot sa paggamit niining importante nga mga elemento sa panaghiusa sa atong mga kinabuhi, mahimong masulti kini bahin kanato, ingon nga kini nasulti bahin kanila, “Sa pagkamatuod wala nay mga katawhan nga labaw pa ka malipayon sa tanan nga mga katawhan nga gilalang sa kamot sa Dios” (4 Nephi 1:16).