“Kita Mosunod sa Labing Hanas nga Tigpangalagad,” Liahona, Okt. 2024.
Kita Mosunod sa Labing Hanas nga Tigpangalagad
Si Jesukristo mao ang atong hingpit nga ehemplo sa mapuangoron nga pagpangalagad ngadto sa tanan.
Ideal Christ [Hingpit nga Kristo], ni Hiram Powers, Smithsonian American Art Museum, pinalit sa museyo agig handumanan ni Ralph Cross Johnson
Samtang ako motambong og mga komperensiya sa stake sa tibuok Simbahan, aduna koy talagsaon nga oportunidad sa pag-uban sa mga presidente sa stake aron mobisita ug mangalagad sa indibidwal nga mga miyembro ug mga pamilya. Niining mga pagpangalagad nga pagbisita, maghunahuna ko usahay unsay isulti ug buhaton, ilabi na kon kadtong akong gibisitahan adunay malisod nga mga hagit. Apan imbes motutok unsay akong isulti o buhaton, nakaplagan nako nga ang pagtutok diha sa Labing hanas nga tigpangalagad—ang atong Manluluwas, si Jesukristo—mas labing nakatabang nako kon mangalagad ngadto sa uban.
Diha sa tanang maayong mga butang, Siya ang atong hingpit nga ehemplo. Kon kita mobiya sa atong mga panimalay—ug mohimo sa mga butang nga dili komportable—sa pagpangalagad niadtong anaa sa atong palibot sama sa Iyang buhaton, ang Manluluwas mogiya kanato sa atong mga paningkamot. Ang atong pagpangalagad dayon mahimong mas makahuluganon kaysa bisan unsa nga mahimo natong isulti o buhaton sa atong kaugalingon.
Ayaw Palabya
Sa dihang gipangutana, “Kinsa ang akong silingan?” (Lucas 10:29), gipahimuslan ni Jesus ang oportunidad sa pagpakigbahin sa usa ka sambingay. Gisugilon Niya ang bahin sa usa ka tawo nga naglakaw gikan sa Jerusalem paingon sa Jerico nga “gibanhigan sa mga tulisan” ug gitulis, gibunalan, ug gibiyaan nga “himatyon” diha sa dalan (Lucas 10:30).
Sa wala madugay adunay usa ka pari ang miagi. Ang pari nakakita gayod nga ang tawo anaa sa kritikal nga kahimtang, apan wala siya mohunong aron sa pagtabang. “Milabay lamang siya agi sa pikas daplin” sa dalan (Lucas 10:31). Sunod, usa ka Levita “mitan-aw” kon unsa ka ngil-ad ang pagkaangol sa tawo. Siya usab “misaylo lamang” (Lucas 10:32). Dayon usa ka Samaryanhon ang miabot. Gihulagway ni Jesus ang Samaryanhon nga adunay butang nga wala sa pari ug sa Levita: ang Samaryanhon “naluoy [sa tawo]” (Lucas 10:33) ug “miduol kaniya, … gibugkosan ang iyang mga samad, … ug gialimahan siya” (Lucas 10:34).
Le Bon Samaritain (The Good Samaritan) [Ang Maayong Samaryanhon], ni François Sicard
Ang sambingay sa maayong Samaryanhon dili lamang mahitungod sa mga pari, sa mga Levita, o sa mga Samaryanhon. Mahitungod gayod kini kanato. Kita adunay kaigsoonan nga gibiyaan nga samaran sa daplin sa dalan sa kinabuhi. Mahimong si bisan kinsa sila—mga higala, pamilya, mga silingan, mga sakop sa komunidad, ug bisan kadtong naglingkod sa chapel uban nato sa Dominggo. Nakita ba nato sila ug giagian lang? O mangalagad ba kita kanila sa kaluoy sama sa gibuhat sa maayong Samaryanhon? Kadaghanan sa atong makita walay makita nga mga samad. Daghan ang nag-antos sa hilom ug wala mangayo og tabang. Ang bugtong paagi aron makaseguro sa atong pagduol mao ang paghimamat sa uban pinaagi sa gugma ug kaluoy nga gipakita sa Samaryanhon. Ang pagpangalagad sama ni Kristo nagpasabot sa paghatag og kaluoy ngadto sa tanan.
Pag-ampo aron Makakita sa mga Panginahanglan sa Uban
Samtang si Jesus naglakaw taliwala sa pundok sa mga tawo, usa ka babaye nga 12 na ka tuig nga nag-antos sa pagsigi ug dugo mikab-ot Kaniya pinaagi sa hugot nga pagtuo. Sa dihang nahikapan niya ang sidsid sa kupo ni Jesus, Siya mibati nga ang gahom o “hiyas [mi]gula gikan [Kaniya].” Si Jesus miatubang sa babaye ug miingon, “Anak, ang imong pagsalig nag-ayo kanimo; pauli nga malinawon” (tan-awa sa Lucas 8:43–48).
Sa dihang “usa ka paralitiko” gidala ngadto ni Jesus agi sa atop giyayungan sa iyang mga higala, giayo pag-una ni Jesus ang pagkaespirituwal sa paralitiko. “Anak, gipasaylo na ang imong mga sala,” miingon Siya. Agig tubag, ang mga magtutudlo sa balaod miakusar ni Jesus sa pagpasipala. Aron matabangan kadtong anaa nga makasabot nga Siya adunay “gahom dinhi sa yuta sa pagpasaylog sala,” si Jesus misulti sa tawo, “Bangon, dad-a ang imong gihigdaan ug pauli sa inyo.” Dihadiha dayon, ang tawo “samtang nagtan-aw silang tanan, mibangon” (tan-awa sa Marcos 2:3–12). Ang gahom ni Kristo sa pag-ayo sa masakiton sa pisikal nga paagi mao ang sama nga gahom nga Iyang gigamit sa pag-ayo sa masakiton sa espirituwal nga paagi.
Kining duha ka sitwasyon—ug daghan pang uban—nagpakita nga ang Manluluwas hingpit nga nakasabot sa temporal ug espirituwal nga mga panginahanglan sa uban ug nangalagad ngadto kanila sumala niadto nga mga panginahanglan. Makabuhat usab kita niini. Samtang dili nato makita sa hingpit ang mga panginahanglan sa uban, sama sa Manluluwas, mahimong mag-ampo kita alang sa abilidad nga makakita niadto nga mga panginahanglan, sa giya kon unsaon sa pagtubag niini, ug mahimo nga tubag sa pag-ampo sa laing tawo.
Kon makita na nato, kinahanglan usab nga molihok kita nga adunay kaluoy. Unsa ang punto sa pagkakita kon dili kita mohimo og bisan unsa? Kon kita makakita ug walay buhaton, mahimong mawala ang atong espirituwal nga panan-aw. Kon kita molihok, bisan sa gagmay nga mga paagi, makadawat kita og dugang kahayag sa Manluluwas nga mas makakita ug makapangalagad niadtong naglibot kanato.
Pakig-uban Kanila
Usahay, tingali kita magduhaduha sa pagpangalagad sa uban. Mabalaka kita kon unsay reaksyon sa uban o kon unsa sila ka madawaton. Nahitabo kini kanako. Niadto nga mga higayon, ang labing importante nga butang nga atong mahimo mao ang pagpakig-uban kanila ug paghigugma kanila. Usab, ang Manluluwas mao ang atong hingpit nga ehemplo.
Sa wala pa magpakita ang nabanhaw nga Manluluwas ngadto sa mga Nephita, nakasinati sila og daghang katalagman ug grabeng kangitngit. Desperado silang nagkinahanglan og tabang. Mahimo ra man unta nga ang Manluluwas mamulong ngadto kanila gikan sa langit ug misulti kanila unsay ilang gikinahanglan nga madungog (tan-awa sa 3 Nephi 9–10), apan nagpakita Siya ngadto kanila ug migahin og panahon uban kanila. Siya mitudlo kanila ug nag-ampo uban kanila ug alang kanila. (Tan-awa sa 3 Nephi 11–19.)
Ang Manluluwas nangutana usab kanila: “Aduna ba kamo dihay mga masakiton? Dad-a sila ngari. Aduna ba kamo dihay mga bakol, o mga buta, o mga pungkol, o mga angol, o mga sanglahon, o mga dili makalihok, o kadto nga mga bungol, o kadto nga gitakbuyan sa tanan nga mga matang sa sakit? Dad-a sila ngari ug Ako moayo kanila, kay Ako adunay kaluoy diha kaninyo; ang akong kasingkasing napuno sa kaluoy. …
“Ug nahinabo nga sa diha nga siya nahuman sa pagpamulong, ang tanan nga pundok sa mga katawhan, nagkahiusa, ug miduol … sa tanan kanila nga gitakbuyan sa tanan nga matang sa sakit; ug siya miayo kanila matag usa kanila nga gidala ngadto kaniya” (3 Nephi 17:7, 9).
Kon kamo wala makaseguro o nabalaka mahitungod sa pagpangalagad sa uban, ayaw kaayo kabalaka mahitungod unsay isulti o buhaton. Sugdi bisan moadto lang. Si Presidente Russell M. Nelson mitudlo nga ang, “maayo nga inspirasyon pinasikad sa maayo nga impormasyon.” Kon kamo makig-uban nila, kamo makakat-on mahitungod kanila ug makahibalo kanus-a mobisita kon sila nagkasakit, kanus-a motanyag ug mohatag og mga panalangin sa pagkapari, kanus-a maminaw ug “andam nga mopas-an sa mga alantoson sa usag usa, nga kini mogaan,” “sa pagbangotan uban niadto nga nagbangotan; … ug sa paghupay niadtong nanginahanglan og kahupayan” (Mosiah 18:8–9), ug magmaya uban niadtong nagmaya! Ayaw pagduhaduha. Madasig kamo unsay kinahanglan sa Manluluwas nga inyong isulti ug buhaton samtang kamo mangalagad.
Sunda ang Iyang Sundanan
Ang unang aksiyon nga gihimo sa Manluluwas sa dihang nagpakita Siya ngadto sa mga Nephita mao ang pagsulti nila nga “tindog ug duol ngadto [Kaniya]” ug nga “mohikap sa [ilang] mga kamot sa [Iyang] kilid, ug … mobati sa mga agi sa lansang sa [Iyang] mga kamot ug … mga tiil” (3 Nephi 11:14).
Ang Manluluwas dili gusto kanila nga makakita lang Kaniya. Nakasaksi na sila Kaniya nga “[mikunsad] gikan sa langit … ug [mibarog] taliwala kanila” (3 Nephi 11:8). Gusto Niya nga ang matag usa kanila moduol ngadto Kaniya ug mobati ug makaila Kaniya ug sa unsay Iyang nabuhat alang sa tibuok kalibotan. “Ug kini sila mihimo, miduol tagsa-tagsa hangtod silang tanan nakaduol” (3 Nephi 11:15).
Mitawag usab Siya og napulog duha ka disipulo ug “mihatag sa gahom sa pagbunyag” (3 Nephi 11:22) ug mitudlo sa doktrina sa bunyag (tan-awa sa 3 Nephi 11:23–27). Siya misugo dayon sa mga Nephita sa paghunong sa tanang panagbingkil. “Tan-awa, kini dili mao ang akong doktrina, sa pagkutaw sa mga kasingkasing sa mga tawo sa kasuko, usa batok sa usa,” Siya miingon, “apan mao kini ang akong doktrina, nga ang ingon niini nga mga butang pagahunongon” (3 Nephi 11:30).
Sa daghang paagi, ang pagpangalagad sa Manluluwas diha sa Basahon ni Mormon nagsilbi nga usa ka sundanan alang sa atong kaugalinon nga pagpangalagad. Makatabang kita sa atong kaigsoonan nga moduol ngadto ni Jesukristo, moawhag kanila nga magpabunyag ug modawat sa ubang mga ordinansa sa kaluwasan, ug mohigugma kanila ug mahimong tigpasiugda sa kalinaw, sumala sa gitudlo sa propeta kanato.
Usahay dili sayon ang pagtabang sa uban. Gani mahimong makita nato ang atong mga kaugalingon nga adunay atong kaugalingong mga pagsulay nga naghimong mas nakapalisod nga madasig sa pagpangalagad sa pamaagi sa Manluluwas. Ang mga pagsulay ug mga kalisod nahitabo sa Manunubos sa Iyang pagpangalagad. Samtang atong dad-on sa atong mga kaugalingon ang Iyang ngalan ug mobarog nga mga saksi Kaniya (tan-awa sa Mosiah 18:9), sugoon kita sa paglakaw sama sa Iyang paglakaw ug motabang ug mohigugma niadtong atong mahimamat.
Kon kita mosunod ni Jesukristo—ang Labing Hanas nga tigpangalagad—ug mangalagad ngadto sa uban sama sa Iyang pagpangalagad, Siya molig-on ug mohatag og gahom kanato. Pinaagi sa atong pagpangalagad, kita makapanalangin sa mga kinabuhi sa uban ug makakaplag og kalinaw ug kamaya alang sa atong kaugalingon.