Mga Disipulo Kita ni Jesukristo

usa ka inahan ug anak nga babaye nga nagkuyog sa paglakaw

Minahal nga mga Ginikanan,

Ang Ginoo nahigugma sa inyong mga anak ug gusto nga sila makapaminaw Kaniya. Ang mga artikulo niini nga isyu makagiya kaninyo samtang magtudlo kamo sa inyong mga anak kon unsaon pagdawat ug pag-ila og personal nga pagpadayag. Magamit ninyo kini nga mga ideya aron matabangan ang inyong mga anak nga makatukod og mas suod nga relasyon sa ilang Langitnong Amahan ug sa Manluluwas.

Mga Panaghisgot sa Ebanghelyo

Unsaon Nato Pagkab-ot ang Panaghiusa?

Ang artikulo ni Presidente Nelson sa pahina 2 naglatid sa pito ka baroganan nga makatabang nato sa pagtuman sa mga sugo nga “maghiusa” (Doktrina ug mga Pakigsaad 38:27). Asa niining mga baroganan ang mahimo ninyong hisgotan kauban sa inyong mga anak? Sama pananglit, sa unsang paagi ang paghimo ug pagtuman sa mga pakigsaad makamugna og kahiusahan ngadto sa uban?

Modala sa Iyang Ngalan diha Kaninyo pinaagi sa Pagpangalagad

Ang artikulo sa pahina 8 ni Elder Villar nagtudlo kon sa unsang paagi nangalagad ang Manluluwas atol sa Iyang panahon dinhi sa yuta. Isip usa ka pamilya, mahimo kamong mag-ampo aron masayod kon kinsa ang nagkinahanglan og tabang ug unsang pagpangalagad ang ilang gikinahanglan. Hisgoti uban sa inyong mga anak unsay ilang gibati human sa pag-ampo. Tabangi sila sa pag-ila sa mga tubag nga ilang nadawat.

Ang Ginoo Gusto nga Mamulong Kaninyo

Gamita ang artikulo nga “Tungod sa Imong Pagtuo Ikaw Nakakita” (pahina 20) sa pagtudlo sa inyong anak mahitungod sa pagdawat og pagpadayag. Ang tagsulat naghisgot unsaon nga kita mahatagan sa Ginoo og giya sa atong misyon sa kinabuhi pinaagi sa patriyarkal nga panalangin. Mahimo kamong mopakigbahin kon sa unsang paagi ang patriyarkal nga panalangin migiya kaninyo.

Dali, Sunod Kanako nga Kalingawan sa Pamilya

3 Nephi 12:6; 21:2; 28:11

Si Jesukristo mitudlo nga nagkinahanglan kita og direksiyon sa Espiritu Santo sa atong kinabuhi. Kining anino sa puppet nga kalihokan makatabang sa mga bata sa paghanduraw niini nga baroganan.

Pagsulat diha sa mga ginunting nga papel og lahi-lahing porma nga mahimong anino sa kamot nga mga puppet (sama pananglit, usa ka langgam, lobo, o bitin).
Pakuhaa ang mga bata og usa ka ginunting nga papel. Pagnga ang mga suga sa kwarto, ug ipasiga sa usa ka tawo ang usa ka flashlight ngadto sa bongbong, nagsimbolo sa Kahayag ni Kristo.
Hangyoa ang inyong mga anak sa pagpulipuli og butang sa ilang mga kamot atubangan sa siga aron ang anino sa ilang mga kamot moporma og usa ka porma nga gisulat diha sa papel. Pasagdi sila nga maningkamot nga walay tabang gikan nimo.
Sa pagsimbolo sa giya sa tingog sa Espiritu, itanyag ang pagtabang sa inyong mga anak, lakang human sa usa ka lakang, unsaon sa pagpahimutang ang ilang mga kamot aron makahimo og anino nga puppet.
Kon ang matag bata nakasulay na, pagbasa og usa ka kasulatan mahitungod sa Espiritu Santo sama sa 3 Nephi 12:6. Pangutan-a ang mga bata kon mas sayon ba ang pagporma og usa ka porma nga adunay tabang ninyo o walay tabang ninyo. Tabangi nga makita nila ang pagkaparehas tali niini nga kalihokan ug sa giya sa Espiritu Santo.

Panaghisgotan: Unsaon nato sa pagpalambo ang atong abilidad sa pag-ila kon ang Espiritu nakigsulti kanato?