“Gusto akong Makabalik sa Dios—apan Makahimo ba Ako?,” Liahona, Okt. 2024.
Gusto Akong Makabalik sa Dios—apan Makahimo ba Ako?
Bisan og mituo ako ni Jesukristo, nakombinse ako nga dili posible nga ako mapasaylo sa akong nabuhat.
Mga paghulagway pinaagi ni Mark Smith
Naglingkod ko sa kwarto sa akong motel sa daghan og snow nga gabii sa Enero, hilabihan nga nawad-an og paglaom. Bag-o lang nakong nahuman ang akong pagserbisyo og subra sa 34 ka tuig sa prisohan tungod sa grabeng mga krimen ug mga kadaot, ug naghunahuna ko og butang nga mopabalik nako diretso didto sa bag-o lang nakong gigikanan. Ang akong mga plano sukad nga nakagawas ko nagkatibuagsa—kay diyotay ra ang akong mga kapanguhaan ug ang akong mga pag-ampo ingon og walay mga tubag, ang akong mga opsiyon ingon og limitado ra.
Usa ka dahunog sa gawas nakakuha sa akong pagtagad. Sa paglili sa gawas sa akong bintana, akong nakita ang tag-iya sa motel nga nagpala sa snow sa parkinganan nga siya ra. “O, dili na maayo,” naghunahuna ko, mao nga gitabangan nako siya. Wala kaayo ko maghunahuna bahin sa akong buhat sa pagserbisyo nianang gabhiona. Apan sa akong katingala, sa sunod nga adlaw giminosan sa tag-iya ang akong bayranan sa akong kwarto. Ug samtang nagpuyo ko didto sa mosunod nga mga lima ka semana, wala gyod ko niya pabayara sa tibuok nga bayranan.
Ang iyang kamanggihatagon mas labaw pa sa pinansyal nga panalangin nga gikinahanglan kaayo nako. Ang iyang kabuotan mao usab ang tubag sa akong pag-ampo dihang nahutdan ko og paglaom. Pinaagi kaniya, akong nasabtan nga ang Dios nagpakabana kanako—ug nga ako nagkinahanglan nga mohimo og pipila ka lakang aron makabalik Kaniya.
Usa ka Paagi nga Makabalik
Mga dekada sa wala pa kadtong gabhiona sa Enero, wala koy gustong buhaton nga may kalabotan sa Dios. Sa pagsulod sa penitensyahanan isip usa ka masuk-anon, pungot, ug naglibog nga 22 anyos, gihimo nako ang tanan aron ang kauban nakong mga piniriso mahadlok ug motahod nako. Mituo sab ko nga walay bisan kinsa ang mahigugma o mohigugma kanako—bisan ang Dios—kay kombinsido ko nga milatas ako sa usa ka punto nga walay pagbalik ug nga wala nay paglaom sa akong katubsanan.
Nahibalo na ko karon nga sayop diay ko; kanunay kitang makahinulsol ug makabalik sa Dios. Si Elder Dieter F. Uchtdorf sa Korum sa Napulog Duha ka Apostoles mitudlo:
“Si Satanas gusto nga kita maghunahuna nga kon kita makasala nakalabang na kita sa usa ka ‘punto nga wala nay pagbalik’—nga ulahi na kaayo aron mag-usab sa atong padulngan. …
“Si Kristo miabot aron sa pagluwas kanato. Kon sayop nga dalan ang atong gitaak, ang Pag-ula ni Jesukristo makahatag kanato sa kasegurohan nga ang sala dili usa ka punto nga wala nay pagbalik. Ang luwas nga pagbalik posible kon atong sundon ang plano sa Dios alang sa atong kaluwasan.”
Ang akong pagbalik ngadto sa Dios misugod human sa akong pagkabilanggo sulod sa sobra sa usa ka dekada. Usa ka higala nga mibisita nako dito sa penetensiyahanan sulod sa katuigan mihatag kanako og Basahon ni Mormon ug midapit kanako sa pagbasa niini. Bisan og misaad ko nga akong basahon, padayon nako kining gibaliwala. Usa ka kataposan sa semana mibisita ang akong higala ug nangutana kon bisag gipunit ko lang ba ang basahon. Siyempre oo! Gipunit ko kini sa matag higayon nga manglimpyo ko sa akong katulganan. Apan wala ko kini basaha—ug wala hangtod sa usa ka seryuso nga panag-istoryahanay uban sa akong higala, kinsa mipatik diri nako kon unsa kaimportante ang pagtuman sa akong saad, nga sa kataposan akong gisugdan ang pagbasa.
Nakakita ko og daghang makapainteres nga mga istorya sa Basahon ni Mormon, apan gisutlihan nako ang akong kaugalingon nga kadto—mga istorya lamang. Dayon miabot ko sa Moroni 10:4. Motug-an ko, dili ko gustong “mangutana sa kinasingkasing, uban sa tinuod nga katuyoan, nga may hugot nga pagtuo kang Kristo” kon ang basahon tinuod ba; dili ko gustong maghunahuna mahitungod sa mga sangpotanan alang sa usa ka tawo nga sama nako kon kini tinuod ba. Dugang pa, kon pulong man kini sa Dios, nan ang Pag-ula ni Jesukristo tinuod, ug dili ko ganahang maghunahuna kon sa unsang paagi ang akong mga buhat midugang sa Iyang pag-antos.
Sa gihapon, nag-ampo ko. Wala ko makakita og panan-awon o makadungog og tingog nga nag-ingon nga tinuod ang basahon. Apan dihang milantaw ko sa gawas sa akong bintana sa usa ka tin-aw nga adlaw sa ting-init, usa ka dako kaayong bagyo ang mitadlas tabok sa langit. Walay ulan—usa lang ka labihan kakusog nga hangin—ug sa kadali sa pag-abot niini, ang panganod miagi na usab. Ug nasayod ako. Sama sa gisaad ni Moroni, ang Espriitu mipamatuod sa akong kasingkasing nga ang Basahon ni Mormon tinuod—ug nga kinahanglan akong mag-usab.
Gisugdan nako ang pagtuon sa mga kasulatan sa tinuoray gayod ug gitugotan nga magsugod og usa ka grupo nga pagtuon sa Basahon ni Mormon uban sa kaubanan nakong mga piniriso. Nakigkita usab ang mga misyonaryo kanako ug sa ubang piniriso. Sulod sa misunod nga 15 ka tuig, naminaw ko sa mga leksiyon sa misyonaryo, ug sa nahibilin nga panahon sa akong pagkapriso, naningkamot ko nga magpakabuhi sa lahi nga paagi. Dili kadto sayon sa ingon niana nga palibot. Apan naposible kadto tungod sa akong Manluluwas, nga misuporta ug migiya kanako latas sa kasinatian ug ngadto sa sunod nga hugna sa akong kinabuhi (tan-awa sa Mosiah 24:15).
Pagkaplag og Kapasayloan
Dili gayod nako hikalimtan kadtong adlaw nga akong nahimamat ang akong bishop human niadtong subo nga kagabhion sa Enero sa akong kwarto sa motel. Ang akong higala nga mihatag nako sa Basahon ni Mormon mitabang nako sa pagkontak kaniya. Dihang nahimamat nako ang bishop sa iyang opisina sa wala pa magsugod ang pagsimba, gisultihan nako siya mahitungod sa akong kaagi, ug ako andam na sa iyang pag-ingon nga wala sila magkinahanglan og tawo nga sama kanako sa ilang ward.
Hinoon, gidapit ko niya nga moadto sa miting sa sakramento.
Mao nga miadto ko. Kombinsido ko nga makita ko nila nga usa ka kombiktado ug unya sa akong pagsulod ang tanan mosalikway kanako. Apan wala kana mahitabo. Hinoon, akong nakaplagan ang mga tawo nga labihan ka matinagdanon nga sukad akong nasugatan. Pagkasunod Dominggo, mibalik ko. Wala madugay human sa pagsugod nako og simba, usa ka counselor sa bishopric mihangyo kon pwede ba kong mamulong bahin sa pagpasaylo didto sa miting sa sakramento.
“Ako? Maghisgot bahin sa pagpasaylo?” Nangutana ko. Apan dihang miseguro siya nga tinuod ang iyang giingon, gidawat nako ang gihangyo. Dihang namulong ko sa kongregasyon, segurado ko nga tan-awon lamang nila ako isip kanhi kombiktado. Apan, dihang nagkadugay ang akong pakigpulong, misamot ang akong kamasaligon, ug pagkahuman gisugat ko og walay lain kondili sa gugma niini nga mga miyembro, kinsa mitimbaya kanako og usa ka gakos o paglamano. Nianang adlawa tinuoray nakong gibati kon unsa ang “paghigugma sa isigkatawo sama sa imong kaugalingon” (Mateo 22:39).
Labaw sa tanan, akong nasabtan sa kataposan nga dihang ang Manluluwas nag-antos sa Tanaman sa Getsemani ug nanggawas ang mga dugo sa matag lungag sa iyang panit (tan-awa sa Mosiah 3:7; Doktrina ug mga Pakigsaad 19:18–19), Siya usab midugo para kanako. Mao kini ang punto sa dakong kausaban—bisan og akong gidawat ang katinuod sa Basahon ni Mormon ug gidapit si Jesukristo sa akong kinabuhi, nakombinse ko nga ako dili dapiton ngadto sa langit. Nga dili ako mapasaylo. Ang iyang Pag-ula alang sa tanan, apan dili alang kanako—tungod sa akong mga nahimo.
Apan niining mga gutloa, akong naamgohan nga pwede akong mapasaylo. Kini nga kahibalo nakatabang kanako nga makapadayon sa akong kinabuhi. Human sa dugang nga pakigkita sa mga misyonaryo, nabunyagan ko niadtong Marso 2012—una nakong lakang ngadto sa dalan sa pakigsaad. Bisan og kaniadto wala ko magtuo nga kini posible, naminyo ko sa usa ka talagsaong babaye sa akong ward. Naselyo kami sa Salt Lake Temple niadtong Hunyo 2013.
Ang akong asawa ug ako nakakat-on sa pagbutang sa among pagtuo diha kang Jesukristo. Misalig kami sa Iyang Pag-ula, mituo nga “tungod kay si Jesus mibaktas sa ingon ka taas, masulub-ong agianan nga nag-inusara, dili na kita kinahanglang mohimo pa sa ingon.” Isip tawhanong mga binuhat, mga imperpekto kita. Usahay mapandol kita—gani matumba. Apan bisan unsa kita kadili takos o sa atong hunahuna walay mahimo nga kita matul-id, dili maluya si Kristo kanato; Kanunay Siyang matinguhaon ug andam nga motabang kanato aron luwas nga makabalik pauli.