“Unsaon man Nato sa Pagpangalagad sama sa Manluluwas?,” Liahona, Okt. 2024.
Dali, Sunod Kanako
Unsaon man Nato sa Pagpangalagad sama sa Manluluwas?
He Healed Many of Diverse Diseases [Giayo Niya ang Daghang Nagkalainlaing mga Sakit], ni J. Kirk Richards, dili mahimong kopyahon
Ang Manluluwas midapit sa Iyang mga disipulo sa pagpangalagad sama sa Iyang gibuhat (tan-awa sa 3 Nephi 18:30; 27:21). Sa dihang mibisita Siya sa mga Nephita, tagsa-tagsa Siyang nangalagad ngadto kanila (tan-awa sa 3 Nephi 11; 17). Nangalagad Siya ngadto kanila tungod kay Siya nahigugma kanila ug tinud-anay nga gusto nga sila—ug ang matag usa kanato—nga magmalipayon, makabaton og paglaom, ug makadawat sa Iyang tabang.
Mao nga kon maningkamot nga mahimong usa ka mas maayong tigpangalagad ug disipulo ni Jesukristo, asa kita magsugod?
Ang hingpit nga ehemplo sa Ginoo nagpakita nato nga ang pagpangalagad, sa labing importante nga bahin, mas labaw pa kay sa buluhaton sa Simbahan lamang. Ang pagpangalagad mao ang pag-atiman sa uban sama sa buhaton sa Manluluwas. Ang pagpangalagad kabahin sa pagtuman sa atong pakigsaad sa bunyag (tan-awa sa 2 Nephi 31:13–14; Mosiah 18:10, 13; Doktrina ug mga Pakigsaad 20:37). Si Presidente Russell M. Nelson mitudlo kanato nga, “usa sa labing sayon nga paagi sa pag-ila sa usa ka tinuod nga sumusunod ni Jesukristo mao ang maluluy-on nga pagtagad niana nga tawo ngadto sa ubang tawo” (“Gikinahanglan ang mga Tigpasiugda og Kalinaw,” Liahona, Mayo 2023, 98).
Samtang maningkamot kita sa pagpuno sa atong mga kasingkasing sa mas tinuod nga kapuangod makaplagan nato nga kita nagkaduol ngadto sa Manluluwas—ug mas duol nga mahimong sama sa Manluluwas. Unsaon ninyo sa pagpalig-on sa inyong kapuangod, pag-ampo alang sa uban, ug pagpangalagad sama sa Manluluwas?
|
Mga Paagi nga Nangalagad ang Manluluwas |
Masundog ba ninyo ang Manluluwas pinaagi sa … |
|
“Ang akong kasingkasing napuno sa kapuangod diha kaninyo” (3 Nephi 17:6). |
… pagbaton og tinuod nga kapuangod ngadto sa mga tawo nga inyong gialagaran? |
|
“Dad-a sila ngari ug Ako moayo kanila” (3 Nephi 17:7). |
… pagsuporta sa masakiton ug may balatian? |
|
“Kami nakadungog kaniya nga nag-ampo alang kanamo ngadto sa Amahan” (3 Nephi 17:17). |
… pag-ampo alang sa uban? |
|
“Bulahan kamo tungod sa inyong hugot nga pagtuo. Ug karon tan-awa, ang akong hingpit nga kalipay nabug-os” (3 Nephi 17:20). |
… pagkamalipayon kon kadtong inyong gipangalagaran ug giserbisyon modawat ug motubag sa inyong pagserbsiyo? |
|
“Mikuha sa ilang gagmay nga mga bata, sa tinagsa, ug mipanalangin kanila” (3 Nephi 17:21). |
… pag-atiman sa mga tawo isip mga indibidwal ug pagserbsiyo nila sa tinagsa-tagsa? |