Kita ang mga Anak sa Pakigsaad

ang Manluluwas diha sa uma kauban sa karnero

Sa 3 Nephi 20–21 mabasa nato ang mahitungod sa mga pakigsaad nga gihimo sa Dios ngadto sa Iyang mga anak. Si Jesukristo mitudlo sa Iyang mga disipulo sa Amerika:

“Kamo anaa sa pakigsaad diin ang Amahan mihimo uban sa inyong mga amahan, nag-ingon ngadto kang Abraham: Ug diha sa imong binhi ang tanan nga mga kaliwatan sa yuta mapanalanginan.

“…Kamo ang mga anak sa pakigsaad” (3 Nephi 20:25–26).

Si Presidente Russell M. Nelson mibalikbalik sa pagpasabot sa kaimportante sa paghinumdom niini nga mahinungdanon nga kamatuoran.

Unsay ipasabot nga mahimong mga anak sa pakigsaad?

Ang mga anak sa pakigsaad mohimo og sama nga pakigsaad, o sagrado nga mga saad, ngadto sa Langitnong Amahan ug ni Jesukristo nga Ilang gihimo ngadto ni Abraham (tan-awa sa Abraham 2:8–11).

Niadtong 1843 ang Ginoo misulti ni Joseph Smith:

“Si Abraham nakadawat og mga saad mahitungod sa iyang binhi, ug sa bunga sa iyang mga bat-ang—kang kinsa nga mga bat-ang kamo gikan … ; ug ingon mahitungod ni Abraham ug sa iyang binhi, … diha sa kalibotan ug gawas sa kalibotan sila magpadayon ingon sa mga bitoon. …

“Kini nga saad inyo usab, tungod kay kamo gikan kang Abraham” (Doktrina ug mga Pakigsaad 132:30–31).

Ang gisaad nga mga panalangin alang usab kanato. Si Presidente Nelson mitudlo nga ang saad naglakip sa “katungod sa pagdawat sa kahingpitan sa ebanghelyo,pagpahimulos sa mga panalangin sa priesthood, ug pagpakasarang sa labing dako nga panalangin sa Dios—kana mao ang kinabuhing walay kataposan.”

Unsa kaha kon dili ako kaliwat ni Abraham?

Sa dihang kita nabunyagan ug nakompirmahan nga usa ka miyembro sa Ang Simbahan ni Jesukristo sa mga Santos sa Ulahing mga Adlaw nahimo kitang kabahin sa pamilya ni Abraham. Dayon kita nahimong “giisip nga mga anak nga lalaki ug mga anak nga babaye ni Jesukristo, nahimo Niyang mga anak pinaagi sa pagkamasulundon sa ebanghelyo.”

Unsa ang gipakigsaad sa Langitnong Amahan ngadto sa Iyang mga anak?

Ang Langitnong Amahan nakigsaad nga pinaagi sa katubsanan ug pagkabanhaw ni Jesukristo, kita makabalik sa pagpuyo uban Kaniya ug mahimong sama Kaniya. Mao kini ang katuyoan sa plano sa kaluwasan. Si Presidente Nelson mitudlo: “Ang plano sa Langitnong Amahan alang sa Iyang mga anak magtugot kanato nga magpuyo kon asa ug sa unsang paagi Siya nagpuyo ug sa kataposan anam-anam nga mamahimong mas sama Kaniya. Ang Iyang Plano tinuod nga makahimo sa labing buhong nga mga panalangin sa tanang kahangtoran nga maanaa kanato, lakip ang kalagmitan alang kanato nga mamahimong ‘isigka manununod uban kang Kristo’ [Mga Taga-Roma 8:17].”

ang Manluluwas nga naglakaw subay sa dalan

Ngano nga mohimo kita og mga pakigsaad ngadto sa Langitnong Amahan?

Makabalik kita sa Langitnong Amahan pinaagi sa paghimo ug pagtuman sa pakigsaad uban Kaniya. Kini ang gipasabot sa mga propeta nga maglakaw sa dalan sa pakigsaad. Si Elder D. Todd Christofferson sa Korum sa Napulog Duha ka Apostoles mipasabot: “Kita mosulod niana nga dalan diha sa ganghaan sa bunyag. … Sa pagpadayon diha sa dalan sa pakigsaad … , kita makadawat sa tanang mga ordinansa ug mga pakigsaad kalabot sa kaluwasan ug kahimayaan.”

Unsa man ang bag-o ug walay kataposan nga pakigsaad?

Laing ngalan alang sa pakigsaad ni Abraham mao ang bag-o ug walay kataposan nga pakigsaad. Bag-o kini tungod kay kini gipahiuli pinaagi ni Joseph Smith isip ang kahingpitan sa ebanghelyo ni Jesukristo. Kini walay kataposan tungod kay kini mao ang sama nga pakigsaad nga gihimo sa Dios ngadto sa Iyang mga anak bisan kanus-a nga ang katawhan andam nga modawat niini.

Ang matag pakigsaad nga atong himoon kabahin sa bag-o ug walay kataposan nga pakigsaad, lakip sa bunyag, pagdawat sa Melchizedek nga Pagkapari alang sa mga lalaki, ug pagtuga sa templo ug pagselyo (mahangtorong kaminyoon).