Digital Lamang: Mga Young Adult
Kon Kamo Nagpakabuhi nga Wala Mahisubay sa Ebanghelyo, Dili Pa Ulahi ang Pagbalik
Ang paghinumdom sa mga pakigsaad nga akong gihimo ngadto sa Langitnong Amahan ug ni Jesukristo nakatabang nako nga makaplagan ang kaisog sa pagbalik sa simbahan.
Nagdako ko sa Krasnodar, Russia. Isip usa ka batang babaye, ako nabunyagan sa usa ka Kristiyanong simbahan nga maoy bahin sa akong kultura. Ako nasayod nga si Jesukristo tinuod, apan ako dili kaayo aktibo sa akong relihiyon.
Pipila ka tuig ang milabay, akong nahimamat ang mga misyonaryo sa Ang Simbahan ni Jesukristo sa mga Santos sa Ulahing mga Adlaw. Ako nakabaton og usa ka pagpamatuod sa katinuod sa ebanghelyo ug misulod ngadto sa usa ka pakigsaad sa Dios pinaagi sa bunyag—usa ka pakigsaad sa pagserbisyo sa Dios, motuman sa Iyang mga sugo, ug andam nga modala sa ngalan ni Jesukristo ngari kanako ug kanunay nga mohinumdom Kaniya.
Usa ka Espirituhanong Kagutom
Sa dihang nabunyagan ko, ang akong kinabuhi maayo ra! Gihigugma ko ang Dios, si Jesukristo, ug ang Simbahan. Gihigugma kaayo nako ang ebanghelyo nga gusto nakong mopakigbahin sa akong mga pagbati sa akong mga kauban sa klase. Apan sa dihang akong gibuhat, nakasugat ko og oposisyon. Tungod sa paagi nga ang uban mitratar kanako tungod sa akong pagtuo, kinahanglan ko nga mobalhin og mga eskwelahan. Ug kinahanglan ko nga molatas sa dalan isip usa ka disipulo ni Kristo nga kasagaran mag-inusara.
Nakahimo ra ko sa pagdumala niini og taud-taud. Akong gigahin ang akong panahon uban sa pipila sa akong mga higala ug mga misyonaryo. Ang akong pagpamatuod lig-on, apan human ako migradwar ug mibalhin ngadto sa usa ka bag-o nga siyudad, medyo nagmaampingon ako sa pagpakigbahin sa akong pagtuo tungod sa akong naagian nga nigatibong mga kasinatian.
Sa hinayhinay misugod pagkaminos ang akong pagtutok sa ebanghelyo. Atol niining higayona, bisan tuod nga wala kaayo nako giprayoridad ang ebanghelyo, naglaom gihapon ko nga ang Dios mohatag nako og matinabangong kamot uban sa akong mga panglimbasog. Apan sa dihang kadto nga mga panalangin nga akong gilaoman wala miabot, mihukom ko nga dili na ko gustong magpaabot alang sa Iyang direksiyon.
Ang usa ka pagpalta sa miting sa simbahan nahimong tulo, nga nahimong mga bulan sa dili pagtambong. Kini nagdala kanako sa paghimo og gagmayng mga desisyon nga mosupak sa sumbanan sa ebanghelyo, nga sa kataposan nahimong sunod-sunod nga dinagko nga mga pagpili. Sa wala nako damha, nagpuyo na ko gawas sa Simbahan sulod sa lima ka tuig ug wala sukad mibati nga nahilayo gikan sa Dios.
Sa akong hunahuna, ako nasayod nga mihimo ko og mga pakigsaad, ug aduna pa gihapon koy mga tipik sa usa ka pagpamatuod. Apan akong gibaliwala kadtong mga hunahuna tungod kay dili kadto komportable nga dawaton nga ako wala na nagsubay sa ebanghelyo.
Sa kataposan, miabot ko sa ponto nga dili na madala, diin ako nakasinati og espirituhanong kagutom. Nasayod ko nga kinahanglan ko nga mobalik ngadto sa Dios—walay makadala nako sa tinuod nga kalipay o katumanan. Apan, ang panaw balik ngadto Kaniya ingon og makapaluya nga sugdan. Gusto ko nga mahimong unsa ako kanhi lima ka tuig nang milabay, ang tawo nga adunay ingon kalig-on nga pagtuo, apan mibati ko nga nawala.
Naghunahuna ko kon aduna pa ba kahay agianan nga makabalik.
Ang Dalan sa Pagbalik
Sa kataposan, akong gipaningkamotan ang kaisog sa pagbuhat. Ang dalan sa pagbalik ingon og lisod nga taakon nga mag-inusara, apan nakahinumdom ko nga wala ako nag-inusara. Sama sa gisulti sa Deuteronomio 31:6, “Magmakusganon kamo ug magmadasigon kamo; dili kamo malisang kanila, ug dili kamo mahadlok … : kay ang Ginoo nga imong Dios, mao ang magauban kanimo; dili ka pasagdan niya, ni pagabiyaan ikaw niya.”
Sa higayon nga ako mihukom nga mobalik ngadto kang Jesukristo pag-usab, ang mga milagro mipadayon sa paggiya nako balik sa dalan sa pakigsaad. Tungod sa mga pakigsaad nga atong gihimo uban sa Dios, kon kita mopili sa pagbalik ngadto Kaniya ug maghinulsol uban sa matinuoron nga kasingkasing, Siya mopasidungog ug mobag-o niadtong mga pakigsaad ngari kanato.
Ang akong ginagmay apan tinuyo nga mga buhat sa paghinulsol nakatabang nako sa pagkaplag og pagbag-o pinaagi ni Jesukristo. Ug pinaagi sa pagtuon sa mga pulong sa akong patriyarkal nga panalangin, pag-ampo ngadto sa akong Langitnong Amahan, ug sa pagbuhat niadtong yano nga mga butang nga makadala kanato nga mas mapaduol ngadto ni Kristo, ako nakabaton og kamasaligon sa kaugalingon nga ang Manluluwas nag-usab kanako alang sa mas maayo.
Sama sa bag-ohay nga gipakigbahin ni Elder Dale G. Renlund sa Korum sa Napulong Duha ka Apostoles, “Samtang maglakaw kamo sa dalan sa pakigsaad, gikan sa bunyag ngadto sa templo ug sa tibuok kinabuhi, mosaad ako kaninyo og gahom sa pagbuntog sa kinaiyanhong pamaagi sa kalibotan—gahom sa pagkat-on, gahom sa paghinulsol, ug gahom nga mabalaan, ug gahom nga makakaplag og paglaom, kahupay, ug gani kamaya samtang mag-atubang kamo sa mga hagit sa kinabuhi.”
Kon ang usa ka tawo mahilayo gikan sa dalan sa pakigsaad ug sa kadugayan mibalik, ako makapamatuod nga kini tinuod.
Kon ikaw mobati nga nahilayo ra kaayo ka gikan sa ebanghelyo para makabalik, ikaw dili! Ako mibati usab nga nawala, apan kon ikaw magpabilin nga nakatutok diha ni Jesukristo, Siya mogiya kanimo.
Ang kinahanglan lang natong buhaton mao ang pagsalig Kaniya.