“Ang Kalinaw Mao ang Milagro,” Liahona, Okt. 2024.
Mga Tingog sa mga Santos sa Ulahing mga Adlaw
Ang Kalinaw Mao ang Milagro
Human ko madayagnos, among gipuntingang among mga mata ngadto sa Ginoo aron kami makakita sa among mga panalangin.
Paghulagway pinaagi ni Michael J. Bingham
Sa dihang ang akong bana, si David, ug ako nakahibalo nga dili kami makabaton og mga anak, mihilak ko. Dayon, niadtong 2016, ang akong doktor mipabalik nako ngadto sa iyang opisina human sa naandan nga medikal nga pagpahiling ug mammogram. Human sa dugang nga pagtesting, unsa ang iyang gituohan sa sinugdanan nga gamay nga problema nahimong dako: kanser.
Makapakugang kadto, ug nakasinati kami og lisod nga mga adlaw. Sa wala pa kami masayod kon unsa ang mga resulta niini nga mga hagit, gisultihan nako ang Langitnong Amahan, “Kon kini mao ang akong kataposan, palihog atimana si David.”
Nakahimo ako sa pagpugong sa akong emosyon sa adlawan, apan kon moabot na ang kagabhion ug hilom ang palibot, ang mga luha moagas. Apan mao usab kadto ang panahon nga akong mabati pinaagi sa Espiritu Santo nga ang tanan mamaayo ra—dili tungod kay ako mabuhi apan tungod kay ang Langitnong Amahan anaa. Mao nga, atol sa akong pagpatambal, mipadayon mi nga nakatutok sa hinay-hinay nga kalamboan.
Piho nga mga himno ug mga kasulatan nahimong mas makahuloganon. Ang Doktrina ug mga Pakigsaad 122:8 miigo kanako: “Ang Anak sa Tawo mikunsad ubos kanilang tanan. Labaw pa ba ikaw kay kaniya?”
Dili, nakaamgo ko, dili ako labaw pa kay Kaniya. Kon ang dili pagkamabdos ug ang kanser makapahimo nako nga mas magpasalamat sa Manluluwas ug sa Iyang maulaong sakripisyo, nan andam ako.
Among gipunting ang among mata diha sa Ginoo aron among makita ang among mga panalangin, lakip sa talagsaong sistema sa suporta. Ang akong presidente sa Relief Society talagsaon. Ang mga tawo gikan sa eskwelahan nga akong gitudloan nagkahiusa sa pagtabang kanako. Ang usa ka kauban nga gusto nga masayod ko nga siya nagpakabana mihatag nako og ballpen nga rosas ang kolor. Atol sa mga gutlo nga sama niana, ikaw makaingon, “Kamo ang akong mga anghel karon. Kamo ang akong ebidensiya nga ang Dios nasayod nga nagkinahanglan ko og gakos o usa ka ballpen nga rosas ang kolor.”
Ang mga tawo nagtan-aw nato isip mga miyembro sa Simbahan. Gusto silang masayod ngano nga kita makasinati og malisod nga mga butang ug sa gihapon mopahiyom.
“Nganong wala man kamo mabug-ati?” ang mga tawo kanunay nga mangutana namo. Gipasabot namo nga ang kalinaw nga among gibati nagagikan sa among hugot nga pagtuo, sa among gugma alang sa Langitnong Amahan, ug sa among pagsalig sa Iyang kabubut-on alang namo. Ang pagpakigbahin sa among hugot nga pagtuo nakapalig-on sa among pagtuo.
Ang kalinaw wala moabot sa dihang nadayagnos ako, apan miabot kini. Ang kalinaw mao ang milagro.