Mga Tingog sa mga Santos sa Ulahing mga Adlaw

Pagaubanan ka sa Dios

Ni Pete Czerny, Utah, USA (gikan sa usa ka asoy sa iyang amahan)

“Hunong!” misinggit ang sundalo, nagtutok sa dako nga armas tumong gayod sa akong amahan.

Paghulagway pinaagi ni Michael J. Bingham

Human sa Ikaduhang Gubat sa Kalibotan, ang akong mga ginikanan gustong moipon sa mga Santos sa Amerika. Apan kinahanglan una silang moeskapo kauban sa ilang lima ka anak gikan sa Sidlakang Germany ngadto sa Kasadpang Germany.

Ang akong papa, si Walter, miadto nga siya rang usa sa pagtino kon asa ang labing luwas nga agian sa pagtabok sa utlanan. Diyotay ra ang iyang gidala sa pagbiyahe apan naaghat nga dad-on niya ang iyang violin. Isip malamposon nga bayolenista, aduna siyay nadawat nga espiritwal nga pagdasig nga lagmit ang iyang violin makatabang niya sa iyang panaw.

Niadtong Pebrero 1949, si Papa misakay og tren padulong sa lungsod nga pipila pa ka milya gikan sa utlanan. Sa pag-abot, sekreto siyang mibiya sa lungsod, sa agianan nga padulong sa bugnaw nga kalasangan. Si bisan kinsang masakpan nga padulong sa utlanan sa Kasadpang German dudahang moikyas ug arestohon.

Sa iyang pagpadulong, nakakita si Papa og tawo nga misulay sa pag-eskapo ngadto sa Kasadpang Germany. Nakahukom silang magkuyog sa pagbiyahe. Upat ka mabinantayong mga mata mas maayo kay sa duha.

Mainampingon silang mipadayon samtang gilabyan nila ang tore nga bantayanan. Sa kalit lang, sa likod sa kasagbotan, usa ka batan-ong Russian nga sundalo miambak ug misinggit, “Hunong!”

Ang akong papa ug ang bag-o niyang higala mikaging sa kalisang dihang gitionan sila sa sundalo og dako nga armas. Giingnan sila sa sundalo nga arestado sila.

Hinayhinay, ang bag-ong higala ni papa miabli sa iyang malita, nga nagpakita sa pipila ka maayong mga pagkaon. Miyukbo siya sa sundalo giingnan nga iyaha na kini kon tugotan silang makalakaw, apan ang sundalo wala molihok.

Sa dili hanas nga Russian nga pulong, giingnan sa akong papa ang sundalo nga ganahan siya og folk music sa Russia. Gitudlo niya ang iyang violin ug miingon nga ganahan siya nga iyaha siyang tukaran.

Gikuha ni papa ang iyang violin ug misugod sa pagtukar og sentimental nga melodiya nga Russian. Human sa mubo nga higayon, nakita niya ang mga luha nga milugmaw sa mga mata sa batan-on. Dihang nahuman ni Papa ang pagtukar, nangutana ang sundalo kon may nahibaloan ba siyang uban pang mga melodiya nga Russian.

Mipatukar dayon og laing melodiya si Papa. Dihang nahuman siya, nagbakho ang sundalo. Gisab-ay og balik sa abaga sa sundalo ang iyang pusil, miingon ang Russian, “Pagaubanan ka sa Dios.” Dayon gitugotan niya silang duha nga mopadayon sa pag-eskapo ngadto sa Kasadpan.

Wala madugay ang akong papa nakabalik nga luwas sa Sidlakang Germany, mapasalamaton sa inspirasyon nga nagdala og panalipod kaniya. Tulo ka tuig human niadto, mieskapo siya kauban sa iyang pamilya pinaagi sa pagbiyahe ngadto sa Sidlakang Berlin ug latas sa utlanan didto sa Kasadpang Berlin.