Mga Tingog sa mga Santos sa Ulahing mga Adlaw

Ang Maaghop nga Hagawhaw sa Balaang Espiritu

Ni Barry Wells, Arkansas, USA

Hangtod nga akong namatikdan ang mga bunga sa Espiritu, nakombinse ako nga ang Simbahan sa Ginoo wala sa yuta.

Paghulagway pinaagi ni Michael J. Bingham

Ang akong asawa, si Ruby, ug ako wala magdako sa Ang Simbahan ni Jesukristo sa mga Santos sa Ulahing mga Adlaw. Apan sa iyang kabatan-on, si Ruby nakaadto na og daghang lahi-lahi nga simbahan ug mga pagtulun-an. Pinaagi sa padayon ug makugihong pag-ampo, mipili siya og mga pagtulun-an nga gibati niyang tinuod, naghatag kaniya og mga gituohan gikan sa mga pagtulun-an sa nagkalain-laing mga Kristiyanong Simbahan. Nagdako ako sa usa ra ka simbahan ug diyotay ra og nahibaloan sa ubang simbahan.

Human sa among pagminyo, dungan kaming mosimba, apan nagsugod ko sa pagduhaduha sa tinuohan nga akong nadak-an ug gipangutana ang akong asawa kabahin sa doktrina. Maalamon siya ug yanong mitubag, “Nakabasa ka na ba sa Biblia?”

Wala, mao nga dungan kaming mibasa sa tibuok Biblia. Samtang nagbasa kami, misulat ako og mga pangutana nga nagpabiling wala matubag. Nagsugod kami sa pagpangita og simbahan nga nagtudlo sa tanan nga among nadiskobrehan. Sulod sa misunod nga duha ka tuig, mibisita kami og daghang simbahan, naghangyo og mga literatura, mibasa mahitungod sa pilosopiya ug relihiyon, ug nag-ampo. Nakombinse ko nga ang Simbahan sa Ginoo wala sa yuta.

Nagkulang kami og kaalam ug nagkinahanglan og langitnong tabang (tan-awa sa Joseph Smith Kasaysayan 1:11–13). Mao nga, dungan kaming nag-ampo sa sinsero nga paagi, mihangyo sa Dios nga ipakita ngari namo ang dalan. Wala madugay human sa among pag-ampo, ang mga misyonaryo gikan sa Simbahan nanuktok dapit sa pultahan sa among hagdanan. Diha dayon si Ruby mibati sa katinuod sa ilang gitudlo. Ang ilang mga gipangtudlo mitandog kaniya ug mitugma sa mga tubag nga iyang nadawat sa daghang milabay nga mga tuig sa dihang nag-ampo siya sa batan-on pa. Natubag usab sa mga misyonaryo ang akong tanan nga pangutana, apan gusto kong makaseguro. Gibasa nako ang Basahon ni Mormon, Doktrina ug mga Pakigsaad, ug ang uban pang mga basahon sa Simbahan.

Misimba usab kami matag semana ug gisunod ang mga pagtulun-an sa ebanghelyo. Sa kadugayan, akong naamgohan ang mga bunga sa Espiritu sa Dios sa akong kinabuhi (tan-awa sa Mga Taga-Galacia 5:22) ug nakadawat og lig-ong pagpamatuod. Nabunyagan kami, nakadawat sa gasa sa Espiritu Santo, ug wala madugay naselyo sa templo.

Wala gayod kami magmahay nga mipasakop sa Simbahan. Mipalig-on kini sa among kaminyoon atol sa lisod nga mga panahon, ug ang legasiya sa pagkahimong suod sa Espiritu sa Dios padayon nga anaa sa among unom ka anak.

Alang niadtong naningkamot nga makaangkon og pagpamatuod sa Basahon ni Mormon o sa gipahiuli nga Simbahan ni Jesukristo, moingon ko nga, “Padayon sa pag-ampo, padayon sa pagbasa, ug padayon sa pagpaminaw sa maaghop nga hagawhaw sa Espiritu Santo.”