“Ang Akong Panginahanglan aron Maulian,” Liahona, Okt. 2024.
Mga Tingog sa mga Santos sa Ulahing mga Adlaw
Ang Akong Panginahanglan aron Maulian
Pinaagi sa himno sa sakramento, gitudloan ako sa Espiritu mahitungod sa paghatag ug pagdawat og kapasayloan.
Paghulagway pinaagi ni Michael J. Bingham
Naglingkod ko sa simbahan usa ka adlaw gisapot ug nasagmuyo. Ang akong bana, si Aaron, ug ako nagkalalis sa milabayng gabii, ug miadto ko sa Simbahan nga mibati gihapon nga wala masulbad ug nasagmuyo. Padayon ang akong kalagot kang Aaron gikan sa pagsugod sa miting hangtod sa pagkanta sa himno sa sakramento, naghunahuna nga, “Nagkinahanglan siyang mangayo og pasaylo.”
Samtang nangandam kami sa pag-ambit sa sakramento, ang among kongregasyon nanganta sa himno nga “Karon sa Atong Pag-ambit sa Sakramento.” Padayon ang akong kalagot hangtod nahuman ang unang bersikulo. Dayon ang ikaduhang bersikulo nagsugod: “Sala among hinumdoman, among hinulsolan.”
Mihunong ko sa pagkanta. Naminaw ko sa akong bana, mga anak, ug mga miyembro sa ward nga padayong nanganta: “Pagkamatarong ang dalan—nga imong gipuy-an.”
Nalukmay ang akong kasingkasing. Tingali ang wala masulbad nga pagbati dili mahitungod sa akong bana. Tingali mahitungod kini kanako.
Nagpadayon ang himno:
Pagpasaylo Imong gasa
Among gitinguha.
Moambit mi’s sakramento,
Mohimo’s buhat mo.
Didto ako nga nasagmuyo, nga sa tinuod nagkinahanglan kong magpaubos ug magtinguha og pasaylo gikan sa Langitnong Amahan—usa ka gasa nga gihimong posible sa Iyang Anak, si Jesukristo.
Nakaluha ko dihang akong gitan-aw ang naglaray namong gagmayng mga anak. Ang tanan nga kalagot ug tensyon nga akong gibati, tanang pagmahay ug kaligutgot nga nabugkos sa akong dughan, nahanaw. Kini nga gutlo mao ang mahitungod kon unsa ang akong gikinahanglang himoon nga pag-usab aron makatinguha ko ug makadawat og kapasayloan gikan sa akong Langitnong Amahan ug ni Jesukristo. Pinaagi sa usa ka himno, gitudloan ako sa Espiritu sa tin-aw gayod mahitungod sa pagpasaylo ug sa akong panginahanglan sa pagdawat ug sa paghatag niini.
Si Presidente Russel M. Nelson miingon: “Ako mohangyo kaninyo sa pagduol ngadto Kaniya aron Siya makaayo kaninyo! Siya moayo kaninyo gikan sa sala samtang kamo maghinulsol. Siya moayo kaninyo gikan sa kaguol ug kahadlok. Siya moayo kaninyo gikan sa mga pag-antos dinhi niini nga kalibotan.”
Samtang naglingkod didto, naminaw sa mga pulong sa himno ug nag-ambit sa sakramento, gibati nako ang akong panginahanglan aron maulian, ug nasayod ako kon asa ako moadto. Ang mga kamatuoran nga akong nakat-onan mahitungod sa pagpasaylo atol niana nga miting nagdala kanako paduol sa Ginoo ug sa akong bana.