“Sa Unsa nga Paagi nga ang Akong mga Pakigsaad Nakatabang Kanako nga Motutok sa Unsay Labing Importante,” Liahona, Okt. 2024.
Mga Young Adult
Sa Unsa nga Paagi nga ang Akong mga Pakigsaad Nakatabang Kanako nga Motutok sa Unsay Labing Importante
Wala ko makaamgo nga ang akong mga pakigsaad usa ka pribilihiyo.
Detalye gikan sa Christ in Red Robe [Kristo Nagsul-ob ang Pula nga Sapot], ni Minerva Teichert
Ganahan ko nga mobati sa Espiritu. Usa kini ka pagbati nga masaligon akong makasulti nga namatikdan nako karon.
Apan kana nagkinahanglan og paningkamot. Diin ako nagtubo sa amihanang England, lisod kanunay nga akong mabutang ang akong kaugalingon sa usa ka kahimtang nga makapahimo nako nga mobati sa Espiritu Santo. Adunay daghan kaayong buotang young adult didto nga nagdako sa Simbahan, apan lisod usahay ang pagpahaom sa among mga kinaiya ngadto sa doktrina ug mga kamatuoran nga among nahibaloan sa among mga kasingkasing.
Sulod sa dugay na nga panahon, nagsimba ko ma-Dominggo apan mibati nga nawad-an og kadasig ug nagsubo nakahibalo nga ang mga butang sa Espiritu nga akong nadawat wala makahimo og epekto ngadto sa uban nga akong gimahal ug gipangga.
Human sa tanan, si Presidente Russell M. Nelson mitudlo, “Sa umaabot nga mga adlaw, dili na posible ang espirituhanong pagsugakod kon wala ang giya, direksyon, ug makahupay nga impluwensya sa Espiritu Santo.”
Pero, ako nagkat-on sa kaimportante sa pagtinguha sa impluwensya sa Espiritu sa tanang bahin sa akong kinabuhi ug pagtabang sa uban sa paghimo sa ingon.
Nanglimbasog sa mga Pagtental
Human makagradwar sa high school, nag-atubang ko og daghang kalisod. Pananglitan, dihay daghang kalihokan ug mga komperensiya alang sa mga young adult nga mga miyembro sa Simbahan diin ako nagpuyo. Apan human niini nga mga kalihokan, ang pipila ka young adult moadto sa mga club o mga dapit nga dili haom sa atong mga hiyas.
Kana nakapahikurat nako!
Ang pag-inom og alkohol ug pag-adto sa club komon dinhi, apan wala ko magdahom nga ang mga higala nga akong gikatupad sa simbahan mohimo niining mga butanga.
Naglibog ko.
Ang pagkakita sa mga higala nga mohimo niini nga mga desisyon nakapahimo niini nga lisod nga makahibalo kon kinsa ang motabang nako aron magpabilin nga espirituwal nga lig-on. Kadugayan, tungod kay ako nakakita sa uban nga kaswal nga nagsunod sa ebanghelyo, ako usab nahilayo sa ebanghelyo. Wala nako mosimba o mag-ampo, ug ako naghimo og mga butang nga dili unta angay nakong buhaton.
Apan usa ka adlaw, sa dihang ako mibati nga miserable, nag-ampo ko ngadto sa Langitnong Amahan ug misulti Kaniya sa akong mga pagbati. Gisultihan nako Siya nga gusto ko nga ang Simbahan mahimong tinuod ug gusto ko nga makasabot sa Iyang mga sugo, apan lisod kaayo nga bisan sa paghunahuna lang nga magbarog nga mag-inusara. Apan gisultihan nako Siya nga kon ako makakaplag og kaseguroan sa mga kamatuoran sa ebanghelyo, maminaw ko ug mosunod sa ebanghelyo sa tinuod nga katuyoan.
Paglabay sa pipila ka adlaw, gibati nako ang usa ka klaro nga espirituwal nga impresyon nga kinahanglan ko nga moserbisyo og misyon.
Ang hunahuna miabot gayod nga wala damha. Apan akong mabati ang Espiritu nga nag-awhag nako niana nga direksyon. Nasayod ko nga ang pagpangandam alang sa usa ka misyon makapahimo nako sa paghinumdom sa akong pagpamatuod, sa pagpalig-on pag-usab sa akong relasyon sa Langitnong Amahan ug ni Jesukristo, ug sa pagsalig sa akong kaugalingong hugot nga pagtuo—dili sa uban.
Ug kadto mao ang akong tinguha.
Mao nga, misugod ko nga mag-usab. Nagkinahanglan kini og dakong espirituwal nga paningkamot. Kinahanglan ko nga mohunong sa paggahin og panahon sa piho nga mga higala, nakigbulag ko sa tawo nga akong gika-date, ug kinahanglan nga pulihan nako ang dili maayo nga mga kinaiya sa maayo nga mga kinaiya. Nakigtambayayong ko sa akong bishop ug misalig sa makatabang nga gahom ni Jesukristo sa pagtabang nako nga mopadayon.
Usa ka Nausab nga Panglantaw
Sa wala pa ko magmisyon, wala ko makasabot sa mga sugo ug mga pakigsaad. Ang akong mga higala miisip niini nga mga panalangin nga mga palas-anon, ug ako misugod usab sa pagkakita niini nianang paagiha. Apan human makaserbisyo og misyon ug nakapalig-on pag-usab sa akong hugot nga pagtuo, ako na kining makita karon nga ang mga pakigsaad ug mga sugo mga bulahan nga responsibilidad nga makatabang nako sa pagmintinar sa balaan, direkta nga koneksiyon sa Langitnong Amahan ug ni Jesukristo—matag adlaw.
Si Presidente Emily Belle Freeman, Kinatibuk-ang Presidente sa Young Women, karong bag-o mipamatuod sa gahom sa mga pakigsaad: “Tingali nakadungog mo niadtong mga pulong ug naghunahuna sa tsekan nga mga kahon. Basin ang tanan ninyo nga nakita mao ang dalan sa mga kinahanglanon. Ang mas duol nga pagtan-aw mopadayag og usa ka butang nga mas namugos. Ang usa ka pakigsaad dili lamang mahitungod sa usa ka kontrata, bisan kon kini importante. Kini mahitungod sa relasyon.”
Si Elder Robert M. Daines sa Seventy mipamatuod usab nga ang “mga pakigsaad mao ang paagi sa paghangop sa Dios.”
Bisan unsa pa ang atong sitwasyon—bisan kon magbarog kita nga mag-inusara—ang mga pakigsaad nga atong gihimo nagbugkos nato ngadto sa mga relasyon nga labing importante.
Usahay makapasubo nako nga ang uban wala makakita sa talagsaong mga panalangin sa ebanghelyo ni Jesukristo. Usahay, gusto nakong uyogon ang ilang mga abaga ug pahinumdoman sila sa milagro sa ilang mga pakigsaad! Gusto nako nga makaamgo sila unsa ang mahimo sa Manluluwas nga ilang mabuhat ug mamahimo!
Apan samtang dili ko makakontrol sa uban, ako makahimo sa pagpalig-on sa akong pagpamatuod. Makahibalo ko kon kanus-a mopahilayo gikan sa impluwensya sa pipila ka tawo ug makahibalo usab ako unsaon nga mahimong maayong impluwensya ngadto kanila.
Sa akong hunahuna kana ang nakapabalik nako human ako nakigbisog sa akong hugot nga pagtuo: ang paghinumdom sa gugma sa akong Manluluwas, si Jesukristo.
Nasayod ko nga dili unta ako makamisyon kon wala pa ako mangayo sa Langitnong Amahan og balaan nga direksyon sa usa ka panahon sa grabe nga kalibog. Bisan pa nanghinaot unta ko nga wala na lang moagi niadtong masakit nga mga kasinatian, daghan ako og nakat-onan mahitungod sa paghinulsol, mahitungod sa hingpit nga gugma sa Langitnong Amahan, ug mahitungod sa kaimportante sa pag-una sa maayong mga relasyon (ilabi na uban Kaniya ug sa atong Manluluwas) nga makapakonektar nato ngadto sa Espiritu.
Bisan pa sa lisod nga mga bahin, ang pagpalig-on pag-usab sa akong hugot nga pagtuo diha Kaniya bililhon pa sa tanan.