Wala Ba Ninyo Makita ang Milagro sa Ebanghelyo?

Ni Enkhchimeg (Enku) Zorigt

Mibiya ko sa Simbahan ug wala makaamgo unsay nawala nako.

Kamo ba sukad dunay butang nga gibalewala, wala makaamgo sa unsa nga paagi kini nakahatag og kaayohan kaninyo hangtod nga kini nawala?

Nahitabo kini nako sa una—sa ebanghelyo ni Jesukristo.

Nagdako sa Mongolia, ang akong pamilya ug ako mga miyembro sa Simbahan. Pero paglabay sa panahon, ang pagsimba sa akong mga ginikanan nagkagamay ug dili na kaayo pirme. Sa hinayhinay ako usab nagsugod sa pagbati og kabugnaw sa ebanghelyo.

Wala gayod nako seryosoha unsay akong nakat-onan ug sa kadugayan mihunong usab sa pagsimba. Wala ko magtuo nga mingawon ko sa ebanghelyo, tungod kay wala man gayod kini sa tinuod nakahatag og kaayohan sa akong kinabuhi.

Mga paghulagway pinaagi ni David Green

Pagkakita sa Kahayag

Sa dihang usa pa ako ka young adult, ang akong magulang nga igsoong babaye nakasugat sa pipila ka misyonaryo. Gipahunong nila siya aron sa paghangyo kon makahubad ba siya og butang alang kanila sa Mongolian. Dali ra ang ilang panagsultihanay, ug sa dihang nakapauli na siya, nakaamgo siya kon kinsa sila.

Gusto siya nga moadto sa simbahan nianang semanaha ug midapit nako sa pagkuyog kaniya.

Hingpit gayod akong supak sa ideya sa sinugdanan. Naghunahuna ko maayo ra man ko sa akong kinabuhi nga wala ang Simbahan! Apan nakombinser ko niya nga mokuyog niya bisag kausa.

Sa dihang misulod ko sa panagtigom alang sa sakramento sa unang higayon sa katuigan, wala kaayo ko malipay nga anaa didto. Pero, sa akong pagtan-aw sa palibot, nakita nako ang pipila ka higala nga kadungan nako sa pagdako. Ang kahayag nga gikan kanila dayag kaayo. Samtang nagtan-aw ko nila, nakahinumdom ko sa gagmay nga espirituwal nga mga kasinatian nga akong gibati samtang nagdako ko sa simbahan.

Daghan kaayong kamatuoran nga akong gibaliwala nga sa kalit akong nahinumdoman, ug sa kalit mibati ko og kahaw-ang ug kasubo. “Dili ako pareha nila,” naghunahuna ko. “Nganong gibiyaan man nako kining tanan?”

Nakaamgo ko nga ako nahimong lahi nga tawo sa milabayng pipila ka tuig. Dihay usa ka pagbati nga kangitngit sa akong kinabuhi nga hagbay ra nakong gibaliwala. Apan samtang ako naglingkod didto, nakadungog ko og malinawon nga tingog sa akong hunahuna nga morag nag-ingon, “Makabaton usab ikaw sa kahayag sa ebanghelyo. Dili pa kaayo ulahi.”

Naghunahuna ko sa sambingay sa nawala nga karnero. Ang usa ka karnero nga gidala pagbalik sa Manluluwas ngadto sa panon (tan-awa sa Lucas 15:4–7).

Ako mao kadto nga karnero. Ug ang Manluluwas mahigugmaong nangita kanako tungod kay Siya nahigugma kanako sama sa Iyang paghigugma sa ubang karnero.

Gusto Siya nga mobalik ko.

Nakahatag kini nako og dako kaayong pasalamat alang sa akong Manluluwas. Mibati sa Espiritu sa unang higayon sa milabay nga mga katuigan, mihimo ko og desisyon nga mobalik sa Simbahan ug, niining higayona seryosohon kini.

Si Elder Dieter F. Uchtdorf sa Korum sa Napulog Duha ka Apostoles karong bag-o mipamatuod, “Sa higayon nga kamo modesisyon nga mobalik ug maglakaw diha sa pamaagi sa atong Manluluwas ug Manunubos, ang Iyang gahom mosulod sa inyong kinabuhi ug mousab niini [tan-awa sa Alma 34:31].”

Gibati nako kana nga kamatuoran ug nasayod nga kon akong ibutang ang akong kasingkasing ngadto sa ebanghelyo, ang akong kinabuhi mausab.

Ayaw Pagtan-aw lapas ni Jesukristo

Sa dihang nagsugod na ako sa pagpuyo sa ebanghelyo, nakita nako pag-usab ang katuyoan sa akong kinabuhi. Sa kataposan ako mituo nga ang Langitnong Amahan nahigugma sa matag usa sa Iyang mga anak ug nga ang ebanghelyo ni Jesukristo mao ang yawe aron makabalik ngadto sa atong langitnong panimalay.

Kini ang labing importante nga butang kanako karon.

Si Elder Dale G. Renlund sa Korum sa Napulog Duha ka Apostoles mitudlo:

“Kita usab adunay kalagmitan nga motan-aw lapas sa tumong. Gikinahanglan natong magbantay batok niini nga kalagmitan aron makalikay kita nga atong mataligam-an si Jesukristo sa atong mga kinabuhi ug mapakyas sa pag-ila sa daghang panalangin nga Iyang gitanyag kanato. Gikinahanglan nato Siya. …

“Siya mao ang atong tumong. Kon kita sayop nga maghunahuna nga adunay panginahanglan alang sa usa ka butang nga labaw sa unsay Iyang gitanyag, kita molimod o mopagamay sa sakop ug gahom nga Siya maana sa atong mga kinabuhi.”

Nagsige nakog tan-aw lapas sa unsay gitanyag ni Jesukristo kanako, ug karon dili na nako mahunahuna nga isalikway ang hingpit nga kalipay nga akong gibati tungod Kaniya.

Kon mobati mo nga kamo dili takos, kon kamo nakigbisog sa wala matubag nga mga pangutana, o kamo naghunahuna nga ang pagkadisipulo ni Jesukristo daghan kaayo og gipangayo kaninyo, tan-awa pag-ayo ang mga milagro sa atong Manluluwas nga gitanyag kanato. Nasayod ko nga ang Langitnong Amahan nakahibalo ninyo. Siya motabang ninyo nga makapadayon sa hugot nga pagtuo kon kamo moduol ngadto Kaniya.

Ayaw biyai ang labing mahinungdanon nga gasa ug milagro sa Manluluwas baylo sa butang nga dili kaayo bililhon. Bililhon kaayo kamo ngadto Kaniya.

Personal akong nakasaksi kon sa unsang paagi nga ang ebanghelyo ni Jesukristo sa tinud-anay nga nakahatag og kabuhong sa mga kinabuhi niadtong mosunod Kaniya.

Padayon kining mihatag og kabuhong kanako.

Ang tagsulat nagpuyo sa Ulaanbaatar, Mongolia.