Kwōn Erreo
Ukwelo̧k raan otemjej ej kōtļo̧k ad kile tōl eo an Irooj kōn Jetōb Kwojarjar.
Ke ekar ļalem aō iiō, iaar ikkure football ippān ro m̧ōtta itulikin m̧ōnjar eo ilo bukōn jidikdik eo aō. Ij kanooj keememej an rūkaki eo kūr jarlepju eo an n̄an karreoik nuknuk ko aer ilo kōppopo n̄an itok eo an Rilo̧mo̧o̧r. Kōn aō baj dik, ikar bōk menin ilo lukkuun m̧ool. Ikar buuļ kakōtkōt jon̄an wōt an neen ko reddik neeū bōk eō n̄an m̧weeo im akweļap n̄an jinō n̄an karreoik jet aō nuknuk bwe in jab libbijinjin im pojak n̄an itok eo an Rilo̧mo̧o̧r raan eo juon. Mekarta jinō ekar kōrraate ta eo enaaj waļo̧k kōn jepļaaktok eo an Rilo̧mo̧o̧r, liin ekar kwaļ nuknuk eo aō em̧m̧antata.
Jibbon̄ōn eo tok juon, ikar kōņak nuknuk eo ej m̧ōļawi wōt im kijooror in kōttar kōjjeļā eo kōn itok eo an Rilo̧mo̧o̧r. Ke raan eo ej tōn jem̧ļo̧kļok im ejjeļo̧k men ekar waļo̧k, ikar ļōmņak in etal n̄an m̧ōnjar eo. Ekar kanooj lukkuun nana aō mour n̄an lo bwe m̧ōnjar eo ejjeļo̧k kobban im bwe Rilo̧mo̧o̧r ekar jab itok. Kwomaron̄ ke pijaikļo̧k en̄jake ko aō ke ikar etetal dikdikļo̧k n̄an m̧weeo.
Iiō ko tokālik, ke ikar bōk katak ko an mijenede ilo kōppopo n̄an kobaļo̧k ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, ikar riiti men in: “Im ejjeļo̧k men ejjab erreo emaron̄ deļo̧n̄ ilo aelōn̄ eo An; kōn menin ejjeļo̧k ej deļo̧n̄ ilo An kakkije ijello̧kun wōt ro raar kwaļ ballier ilo bōtōktōkū, kōn tōmak eo aer, im ukeļo̧k jān aolep aer jero̧wiwi, im aer tiljek n̄an jem̧ļo̧kin.”
Alikkar eo ikar bōke ilo iien jab in ekar jipan̄ eō meļeļe aorōk eo an m̧ool eo me ikar jab meļeļe ke ikar dik elōn̄ iiō ko rellōn̄ m̧oktaļo̧k. Ennaan eo an rūkaki eo ekar pedped ioon aorōk eo an erreo ilo jetōb. Ekar libūjōrjōre jarlepju eo n̄an kappukot ukweļo̧k, kōm̧m̧ani oktak ko ilo mour ko aer, im oktakļo̧k n̄an Rilo̧mo̧o̧r eo kōn pinmuur.
Jemedwōj Ilan̄ emeļeļe iaļ ko ad ilo mour in im jerawiwi ko jenaaj kōm̧m̧ani ilo mour ko ad. Ij lukkuun in kam̧m̧oolol bwe E ekar kōpooj juon Rilo̧mo̧o̧r n̄an pinmuur kōn bōd ko ad. Kōn en̄taan in pinmuur eo an Rilo̧mo̧o̧r, kajjojo iaad emaron̄ ukweļo̧k im pukot jeorļo̧k bōd im erom erreo. Ukwelo̧k, ej juon pedped in katak eo an gospel in, eaorōk n̄an eddōkļo̧k in jetōb eo im kije eo ad ilo ad dipuk apan̄ ko an mour in.
Ilo kweilo̧k eo eļap an Eprōļ 2022 eo, Būreejtōn Russell M. Nelson ekar karuwianeneik aolep membōr ro an Kabun̄ in n̄an en̄jake m̧ōņōņō eo an ukweļo̧k raan otemjej. Eaar ba:
“Jouj im jab mijak ak karum̧wijļo̧k iien ukweļo̧k. Setan ej m̧ōņōņō ilo am̧ en̄taan. Kōkaduikļo̧k. Joļo̧k kareel eo an jān mour eo am̧! Jino rainin n̄an en̄jake lan̄lōn̄ eo n̄an utikļo̧k armej ilo lukkuun biktokin. Rilo̧mo̧o̧r ej iakwe kōj aolep iien ak eļaptata ilo ad ukweļo̧k. …
“Eļan̄n̄e kwoj en̄jake ke kwaar jejļo̧k ak ettoļo̧k jān iaļen bujen in im ejjeļo̧k juon iaļ n̄an ro̧o̧ltok, ejjab m̧ool menin.”
Eļan̄n̄e ewōr juon men eo me kwojjan̄in kar lukkuun ukweļo̧k jān e, ij kōketak eok n̄an ron̄jake kūr eo an Būreejtōn Nelson n̄an jab aepedped ilo am̧ ukweļo̧k. Bōlen emaron̄ aikuji jidik peran n̄an koba ilo men in; ijo ke, imaron̄ kam̧ool n̄an kwe bwe lan̄lōn̄ eo me ej jarjar jān m̧ool in ukweļo̧k eo ej eļļā jān jeļā otemjej. Kōn ukweļo̧k, eddo ko ad kōn bōd rej jako im bōk jikier kōn juon en̄jake in aenōm̧m̧an im jokane. Ilo ad lukkuun ukweļo̧k, jej erreeo kōn bōtōktōkin Rilo̧mo̧o̧r, kōļapļo̧k ekkeke in en̄jake eo ad n̄an im̧we ko kōn kareel eo an Jetōb Kwojarjar.
Eo karejera indeeo ekar ļotak kōn jorrāān in lo̧jilin̄i, im āinwōt juon tōprak eaikuj in ekkōņak kein ron̄jake. Būn̄aln̄al im menokadu emaron̄ jelet wāween an jerbal kein ron̄jake kein, im kōn menin kajjojo jibbon̄ ij lale an liin niknik karreoik tube ko rej eddep m̧okta jān an kōļak kein ron̄jake ko. Jerbal jidikdik in n̄an kōm̧m̧ane aolep iien ej joļo̧k jabdewōt ettoon, m̧ōļawi, ak tutu, āinwōt juon tōprak ekkōm̧anm̧anļo̧k an maron̄ ron̄ im kōnono. N̄e liin ej jerwane an kōm̧m̧ane jerbal in, an maron̄ ron̄jake emaron̄ jorrāān ilo aolepān raan eo, naan ko rej jino dikļo̧k n̄an an jako ainikien. Ejja wōt an liin karreoik kein ron̄jake eo an aolep raan bwe en em̧m̧anļo̧k an ron̄, ukwelo̧k raan otemjej ej kōtļo̧k ad kile tōl eo an Irooj kōn Jetōb Kwojarjar.
Ilo jem̧ļo̧kin ļo̧k jerbal in karejar eo an Irooj ilo mour in im m̧okta jān An em̧m̧akūt jān Jikin Kallib Gethsemane, Ekar kōpooj rikaļoor ro An n̄an jelm̧ae mālijjon̄ ko rej itok wōt. Ekar jiron̄ er, im ba: “A Ri Kaenōm̧m̧an, e Jetōb Kwōjarjar, eo Jema enaaj jilkintok ilo eta, enaaj katakin kom̧ men otemjej, im kakememej men otemjej n̄an kom̧, men ko Iar ba n̄an kom̧.”
Juon iaan jerbal ko raorōk an Jetōb Kwojarjar ej n̄an kakkōl, ba kajjien, im tōl aolep kajjojo n̄an ron̄jake ainikien eo emera, itulowa. Ejja āinwōt tube in leto letak meļeļe ko rej boņ kōn juon kein ron̄jake emaron̄ bōbrae an men eo jerbal, ekkejel in jetōb eo ad ippān Jemedwōj Ilan̄ emaron̄ bar jepewa, tōlļo̧k n̄an meļeļe ko rebōd rōkauwōtata ak likjab n̄an ron̄jake kapilōk eo An. Waļo̧ktok eo an intōrnet ekar kōm̧m̧an an meļeļe ko em̧m̧anļo̧k jān m̧okta. Menin emaron̄ tōlļo̧k kōj n̄an oktakļo̧k n̄an laļ in kōn tōl ijello̧kin n̄an Anij. Būreejtōn Russell M. Nelson ekar katakin, “Ilo raan ko rej itok, enaaj maron̄ pen n̄an jo̧o̧r ilo jetōb ilo ad jab tōl, jineet, kaenōm̧m̧an, im bōk kareel eo an Jetōb Kwojarjar.”
Ij kam̧m̧oolol bwe kajjojo iaad emaron̄ bōk menin letok eo an Jetōb Kwojarjar ilo iien ad kapene. Ijoke, Būreejtōn Dallin H. Oaks ekar kakkōļ bwe “kōjeraam̧m̧an ko repād kōn menin letok eo an Jetōb Kwojarjar rej pedped ioon mour jim̧we [im] ‘Jetōb eo an Irooj ej jab jokwe ilo tampeļ ko rejjab kwōjarjar’ [Hilamōn 4:24].”
N̄e jej ļōmņak in kāālet n̄an ļoor tōl eo an rikanaan ro im rijilōk ro, maron̄ eo ad n̄an bōk Jetōb Kwojarjar eo āinwōt juon m̧ōttad iien otemjej enaaj kajoorļo̧k. Jetōb Kwojarjar ej letok alikkar ilo jokāālet ko kōm̧m̧ani, im̧we ļōmņak ko im en̄jake ko me rej ekkejel ippān ankilaan Jemedwōj Ilan̄. Bōk Jetōb Kwojarjar ej āinwōt juon m̧ōtttad iien otemjej eo eaorōk n̄an eddōkļo̧k eo ad ilo jetōb.
Kiiō epaak kar kappeik eō n̄an tōl ilo juon kweilo̧k an stake ilo Salt Lake Granger West Stake ilo Utah. Ilo iien in, ikar kweilo̧k ippān juon stake būreejtōn eo ekar niknik kōkajoorļo̧k maron̄ eo an n̄an jeļā im̧we ko an Jetōb Kwojarjar kōn mour jim̧we im ukweļo̧k aolep raan. Ejja m̧ōttan kijejeto in jerbal in karejar eo am, kōm kar kōpeļaak n̄an loļo̧k jilu baam̧le. Ke ej dedeļo̧k loļo̧k eo am āliktata, kōm kar lo ke m̧ōttan wōt 30 am minit m̧okta jān kweilo̧k eo tok juon am. Ke kōm kar jepļaak n̄an stake center eo, Būreejtōn Chesnut ekar bōk juon im̧we n̄an loļo̧k bar juon baam̧le. Kōm kar jim̧or errā n̄an ļoor im̧we in.
Kōm kar wōnm̧aanļo̧k n̄an loļok baam̧le eo an Jones, ijo kōm kar lo Sister Jones babu ioon peet eo an kōn juon nan̄inmej. Ekar alikkar bwe liin ekar aikuji juon kōjeraam̧m̧an an priesthood. Kōn mālim eo an, kōm kar kōjeraam̧m̧an e. Ke kōm kar pojak in ilo̧k, Sister Jones ekar kajjitōk ekōjkan am kar jeļā kōn aikuj eo an kōn juon kōjeraam̧m̧an. M̧ool eo in ej, kōm̧ kar jaje. Ijo ke, Jemedwōj Ilan̄, eo ekar jeļā kōn aikuj ko an, ekar jeļā im im̧we Būreejtōn Chesnut n̄an loļo̧k m̧weeo im̧ōn. N̄e jej m̧ōņōņō in bōk tōl eo an ainikien eo elur im mera, jepojakļo̧k n̄an jerbal in karejar eo ewejepedikļo̧k n̄an ro rej pād ilo aikuj.
Ij kam̧ool kōn juon Jemedwōj Ilan̄ eo ejouj im iakwe. Jisōs Kraist ej Rilo̧mo̧o̧r im Ripinmuur eo an aolep armej. Ij kam̧ool bwe Pinmuur eo an Jisōs Kraist ej m̧ool im bwe ilo ad katak n̄an ļoor tōl eo an Jetōb Kwojarjar, E enaaj tōl kōj n̄an ukweļo̧k im kōjerbal kajoor eo an Pinmuur eo an Rilo̧mo̧o̧r ilo mour ko ad. Būreejtōn Russell M. Nelson ej rikanaan eo em̧ool im emour an Irooj, kōn aolep kii ko an priesthood eo ioon laļ in rainin. Ilo etan Jisōs Kraist, amen.