“Faatasiga e Auauna Atu i Chennai,” Liahona, Tes. 2024.
Tala mai le Au Paia, Voluma 4
Faatasiga e Auauna Atu i Chennai
Ata mai le Majority World / UIG / Bridgeman Images
I le afiafi o le aso 25 o Tesema, 2004, sa fiafia ai tagata o le Paranesi Muamua a Chennai i le talafatai i sasae o Initia i se gaoioiga o le Kerisimasi. Ma le latou le iloaina o le taeao na sosoo ai o le a tupu ai se mafuie tele i le Vasa Initia i talafatai o Sumatra. Na oo atu le malosi o le mafuie i le sami, ma faateleaiina ai puipui maualuluga o le suasami agai atu i le laueleele. Na taia e galu maualuluga ia taulaga ma nuu i Initia, Initonesia, Sri Lanka, Meleisia, ma Taialani, ma lolovaia ai auala ma ufitia ai fale o aiga ma fale tetele. E le mailoa le aofai o tagata na misi pe ua maliliu.
Ina ua taunuu Elders Alwyn Kilbert ma Revanth Nelabelle, o faifeautalai o loo auauna atu i Chennai, i le lotu i se taimi mulimuli ane o lena taeao, sa la lagonaina na i ai se mea na faaletonu. I le matafaga, sa faatu ai e leoleo ni pa e pupuni ai tagata na matamata mai ma sa latou leoleoina le eria a’o tietie i solofanua. I le matafaga, sa toso ese mai e tagata ia tino mai le vai. Sa mafai ona iloa e faifeautalai ua oo atu le vai ma le faatafunaga i le silia ma le afa maila (0.8 km) le mamao mai le matafaga.
O lena po na auina atu ai e le Ekalesia ni uta loli o sapalai mai se taulaga e toeitiiti atoa le 400 maila (640 km) le mamao mo le Au Paia e tufatufa atu ia i latou na manaomia le fesoasoani i Chennai. I le taeao, sa faapotopoto ai tagata o le ekalesia ma faifeautalai i le falelotu o le Paranesi Muamua a Chennai e fesoasoani i se galuega faatino o le auaunaga na faatulagaina e paranesi e lua o le aai. Mo aso e lua na sosoo ai, sa latou tuufaatasia ma faavasegaina pusa fesoasoani e i ai lavalava, moega, mea e faaaoga mo le tumama, ma aitema e taumamafa ai.
Ata mai le faaaloaloga a le Church News
Talu mai le taimi na taia ai e le galulolo, sa tufatufa atu ai e le Au Paia o Aso e Gata Ai i le atunuu i tagata na aafia ia oloa na saunia e le Ekalesia. Ina ua uma ona utaina loli e i ai le faitau selau o mea e faaaoga mo le tumama ma isi sapalai, sa malaga faatasi faifeautalai ma isi ma Peresitene Brent Bonham o le Misiona a Initia Bangalore e tiliva atu i se nofoaga o le Koluse Mumu a Initia.
I lea nofoaga, o le tamaloa sa faafeiloaia i latou na ia iloa i latou i pine o igoa. “Oi, tou te omai mai le Ekalesia,” o lana tala lea. “O a ni mea na outou aumaia?”
Sa latou tali atu na i ai moli, mea e faaaoga mo le tumama, ma ni nai tone o lavalava. Sa matuā fiafia le alii i foai ma fai atu iā i latou e ave loli i totonu o le nofoaga.
I totonu sa latou maua ai tagata o loo faapotopoto faataamilo i faaputuga tetele o lavalava. Sa tuuina atu foi e tagata mai lotu ma faalapotopotoga eseese ia sapalai, ma sa faaaluina e faifeautalai ni nai itula e tuu ai i lalo uta a loli ma auina atu sapalai i nofoaga sa manaomia ai.
A o tilotilo atu Elder Kilbert i tagata mai vaega eseese, sa faateia o ia i le auala na latou galulue faatasi uma ai ona o le alofa mo o latou tuaoi. “O loo i ai tagata lelei i soo se mea,” sa ia mafaufau ai.