“O Fea e Liliu Atu i ai mo le Faamoemoe, Filemu, ma le Faamoemoega pe a Suia le Olaga,” Liahona, Tes. 2024.
Autalavou Matutua
O Fea e Liliu Atu i ai mo le Faamoemoe, Filemu, ma le Faamoemoega pe a Suia le Olaga
O le malamalama o le talalelei ma le Togiola a Iesu Keriso e aumaia ai le faamoemoe, filemu, ma le faamoemoega i lenei vaitau o le Kerisimasi.
Ata na tusia e Benedetta C. Vialli
I le taimi o la tatou malaga i le tino, o le a tatou feagai uma lava ma aafiaga e mafai ona fesoasoani ia i tatou e avea ai ma soo sili atu o Iesu Keriso. Peita’i, e masani ona suia tulaga o o tatou olaga, ma e manaomia ai ona fetuunai le ala tatou te ola ai.
Ae ui i lea, o loo i ai le faamoemoe mo i latou o e “vaai atu ia [Keriso] i mafaufauga uma” (Mataupu Faavae ma Feagaiga 6:36), ma o loo i ai le “faamoemoe mo se lalolagi sili atu ona lelei” ma se lumanai sili atu mo i latou o e talitonu i le Atua (Eteru 12:4).
O tusitusiga paia ua a’oa’o mai, musuia, ma faaali mai ia i tatou le auala na tali atu ai i latou i aso ua mavae—a o lumanai, ma i le taimi, ma ina ua mavae le galuega ma le misiona a Keriso i le olaga nei—i o latou tulaga. Mo se faataitaiga, o le perofeta o Liae i le Tusi a Mamona na poloaiina e le Alii e tuua lona fale ma ana meatotino uma, sosola atu i le vao faatasi ma lona aiga, ma agai atu i se taunuuga e le mailoa. I le taimi o le malaga, sa feagai Liae ma teteega, lototiga, popole, tiga, ma le le fiafia. O nei aafiaga na saunia ai o ia ma lona aiga mo le laueleele folafolaina.
O le toatele o i tatou e feagai ma luitau e pei ona sa feagai ma Liae. Atonu e popole nisi i o latou aiga, faaipoipoga, aoga, po o galuega. Atonu e lagona e isi le mamao ese mai le Tama Faalelagi ma le Faaola o Iesu Keriso ona o filifiliga le lelei pe atonu foi e lagona le tuuatoatasi ona o le siitia atu i se isi taulaga po o se aoga.
O lenei vaitau o le Kerisimasi tatou te maua ai se avanoa faapitoa e taulai atu ai i le filemu ua ofoina mai e Iesu Keriso ia i tatou. E tusa lava po o a ou lagona, tulaga, po o le nofoaga, ia manatua e mafai ona tutupu vavega pe a e “fetaomi atu i luma ma le tumau ia Keriso” (2 Nifae 31:20).
O se Taimi o le Le Mautonu ma Feeseesea’iga
A o ou auauna atu o se faifeautalai i le Misiona a Côte d’Ivoire Abidjan i le 1998, sa ou faalogo ai i vevesi faaupufai ma tulaga faaagafesootai i lo’u atunuu, o le Ripapelika Temokarasi o Congo. O aso uma lava, e ma te o ai ma la’u soa e tala’i. Ina ua ou faailoa atu a’u lava ia ma ta’u atu ou te sau mai DR Congo, e ta’u mai e tagata ia te au le mamafa o mea o loo tutupu i le va o le malo ma vaega fouvale iina—aemaise lava i Kinshasa, le laumua, lea sa nonofo ai lo’u aiga. Sa nutimomoia lo’u loto i le faalogo atu ua fiaaai tagata o lo’u atunuu ma ua toatele tagata ua fasiotia.
Sa ou feso’ota’i atu i lo’u peresitene o le misiona alofa ma le popole e iloa ai pe na te iloa nisi mea e uiga i le mea o loo tupu pe na ia mauaina foi se faamatalaga e uiga i lo’u aiga. Sa ou lagona le leai o se faamoemoe ma ou tagi mo le tele o itula. Sa ou manao e togi le solo. Sa ou lagonaina ua tuulafoaiina a’u ma lo’u aiga e le Alii.
Sa ofoina mai e la’u soa ma isi faifeautalai le lagolago ma le tausiga i lea taimi. Ina ua toeitiiti lava a ou togia le solo, sa faasoa mai e Elder Joseph Wheeler, o se uo lelei, se mau o le a le galo lava ia te au.
I le 1830 na maua ai e le Perofeta o Iosefa Samita se faaaliga mo Tomasi B. Marsh. E lei leva ona papatisoina Tomasi ma faauuina o se toeaina i le Ekalesia. Sa valaauina foi o ia e talai atu le talalelei. I lena taimi, sa manaomia ai e Tomasi sina faamautinoaga. Ua ta’u atu e le Alii ia Tomasi e ala atu i le Perofeta:
“Tomasi, loʼu atalii e, amuia oe ona o lou faatuatua i laʼu galuega.
“Faauta, e tele puapuaga ua oo ia te oe ona o lou aiga; e ui i lea, o le a Ou faamanuiaina oe ma lou aiga, ioe, au fanau laiti; ma e oo mai le aso o le a latou talitonu ma iloa ai le upumoni ma faatasi ai ma oe i laʼu ekalesia.
“Ia siitia a’e lou loto ma olioli, ona ua oo mai le itula o lau misiona; ma o le a tatala lou laulaufaiva, ma ia e folafola atu tala fiafia o le olioli tele i lenei tupulaga.
“O lea, sasau atu lau selesaito ma lou agaga atoa, ma ua faamagaloina oe i au agasala, ma o le a faaee ia te oe fusisaito e tele i luga o lou tua, ona e agavaa lē e galue mo lona totogi. O le mea lea, o le a ola ai lou aiga” (Mataupu Faavae ma Feagaiga 31:1–3, 5; faaopoopo le faamamafa).
O le tali lenei sa ou sailia. Sa ou faia le galuega a le Alii, ma o le malamalama ma le upumoni o le talalelei ma le Togiola a Iesu Keriso na aumaia ai le faamoemoe ma le faamoemoega i lo’u olaga i lena taimi o le le mautonu.
O Mataupu Faavae e Fa e Maua ai le Filemu
O mataupu faavae nei e fa e mafai ona fesoasoani ia te oe pe a e le iloa le mea e liliu atu i ai mo le faamoemoe, filemu, ma le faamoemoega i lou olaga:
1. Ia talitonu o loo i ai le faamoemoe ma se vaifofo i le gaogao po o le lotovaivai e te lagonaina. O le faamoemoe e maua ia Iesu Keriso, Lana Togiola, ma Lana talalelei. Na fetalai le Faaola: “Ua ou sau ina ia latou maua le ola, ia maua atili ai lava” (Ioane 10:10). Faatasi ai ma Ia, e i ai pea lava pea lou faamoemoe mo lena olaga tele.
2. Ia olioli e tusa lava po o a tulaga po o luitau o lou olaga. Na aoao mai lo tatou perofeta pele, o Peresitene Russell M. Nelson:
“O le olioli o tatou lagonaina e itiiti lava se mea e faatatau i tulaga o o tatou olaga a o mea uma o loo faatatau i le taulaiga o o tatou olaga.
“Afai o le taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe le o tutupu foi—i o tatou olaga. E oo mai le olioli ona o Ia.”
E tusa lava pe e te “tagi ma taufaitagiaue, … e olioli le lalolagi” ona o Iesu Keriso, ma o le a “liua lo outou tiga ma olioli. … E le aveeseina foi e se tasi lo outou olioli” (Ioane 16:20, 22).
3. Ia agaalofa ma auauna atu i isi. Sa “femaliuai ma agalelei” le Faaola o Iesu Keriso (Galuega 10:38). Tatalo mo le malosi e avea ai ma tali i tatalo a se isi tagata. Ataata, talanoa, ma savavali faatasi ma i latou o loo siomia oe. Faalogo ia i latou ma faaavanoa se taimi mo i latou. Uunaia, faasoa atu mea ua e iloa e moni, ma faamagalo atu i isi. O nei gaoioiga faigofie o le a i ai se aafiaga loloto ia te oe ma isi.
4. Salamo ma taumafai e tausia au feagaiga. Ua aoao mai Peresitene Nelson:
“Ona o le Faaola, e ala i Lana Togiola e le gata, na togiolaina i tatou taitoatasi mai vaivaiga, mea sese, ma agasala, … a o e salamo moni ma saili Lana fesoasoani, e mafai ona e tulai ae i luga ae o lenei lalolagi matautia o i ai nei. …
“E ui i mea faalavefau ma mea leaga ua siomia ai i tatou, e mafai lava ona e mauaina le malologao lona uiga, o le mapusaga ma le filemu—e oo lava i le lotolotoi o ou faafitauli sili ona faigata.
Afai e te salamo ma taumafai i aso taitasi e tausia feagaiga na e osia ma lou Tama Faalelagi ma Iesu Keriso i le papatisoga ma i totonu o le malumalu, ua aoao mai Peresitene Nelson o le a e maua le “faateleina o le mauaina o le mana o Iesu Keriso.” O Lona mana “e faamalosia ai i tatou e tetee atili atu i o tatou tofotofoga, faaosoosoga, ma lototiga. O lenei mana na te faafaigofieina o tatou ala.”
O oe o se atalii po o se afafine o se Tama Faalelagi alofa. E finagalo o Ia ia outou alualu i luma ma maua le olioli, lea e na o Lona Alo, o Iesu Keriso, lea e mafai ona tatou taumafai e manatua pea i lenei vaitau o le Kerisimasi—ma vaitau uma e sosoo ai. Ou te iloa o le talalelei a Iesu Keriso ma Lana Togiola e mafai ona aumaia ai le faamoemoe, filemu, ma le faamoemoega i lou olaga.