“Tudi Babikidibua bua Kuenza Bimpa,” Liahona, Ngondu Muisambombu 2024.
Mukenji wa ku Ngondu wa Liahona, Ngondu Muisambombu 2024
Tudi Babikidibua bua Kuenza Bimpa
Tudi tuibaka bukalenga bua Nzambi patudi tusadila bakuabu, patudi tuleja bukenka buetu, ne patudi tuimanyina budishikaminyi bua ntendelelu.
Gideona wakamanya malongesha a mashimi pakumvuaye nunku. Ukavua mubiumvua kumpala kudi Mfumu Noa ne bakuidi benda—bakuidi bavua badibandisha mu diditambisha mu mitshima yabu ne bavua babakuatshisha nanku bua bufuba buabu, ne bua ditendelela diabu dia mpingu, ne bua masandi abu, ne bitadi bivua mfumu Noa mutekela bantu benda (Mosiya 11:5–6).
Bibi bitamba, Mfumu Noa wakashebeya muambi Abinadi ne wakakeba bua kubutula Alama ne bantu benda bavua bakudimuna moyo (tangila Mosiya 17; 18:33–34). Bua kujikija bubi ebu, Gideona wakaditshipa bua kuimanyika mfumu, uvuayi mulama amu bua dibabuelela dia Bena Lamana (tangila Mosiya 19:4–8).
Pashisha, Gideona wakafunda bakuidi ba Noa, bualu bobu bavua bîba bana bakaji 24 ba Bena Lamana. Wakatangila muvua meyi a buambi a Abinadi avua atangila bantu aba bumuvua akumbana bualu bakabenga bua kukudimuna mutshima. (Tangila Mosiya 20:17–22.) Wakambuluisha bua kusungidila bantu ba Limi, bavua mu bupika kudi Bena Lamana (tangila Mosiya 22:3–9).
Bumukavuaye mukulakaja, Gideona wakaluisha diditambisha ne bubi kabidi pakimanaye kumpala kua Neholo, uvua mubueja buakuidi bua mafi munkatshi mua bantu. Neholo uvua “uluisha ekelezia” ne uteta bua kulombola bantu ku dipambuka. (Tangila Alama 1:3, 7, 12; tangila kabidi 2 Nefi 26:29.)
Gideona wakadimuisha ne diyi dia Nzambi Neholo bua bubi buenda. Neholo wakaluisha mu tshiji ne kushipa Gideona ne muela wenda wa mvita. (Tangila Alama 1:7–9.) Ke mua kajika matuku a “muntu muakana” muntu “uvua muenza malu mimpa a bungi munkatshi mua bantu aba” (Alama 1:13).
Matuku a ndekelu atudi â adi atupesha mishindu ya bungi ya kuenza bu Gideona bu “tshiamu tshia mudimu mu bianza bia Nzambi” (Alama 1:8) mu kuikala “wadiambuluisha” (Mosiya 22:4) kudi bakuabu, kuimanyina buakana, ne kakuyi kutangila bidi bimakija budishikaminyi buetu bua kukukuila ne kusadila Nzambi. Patudi tulonda tshilejilu tshia ditabuija dia Gideona, tudi bua kuenza kabidi bimpa bia bungi.
Bobumua mu Disadila
“Bu balondi ba [ Mupandishi], tudi tujinga bua kunanga Nzambi ne bena mutumba betu ba pa buloba,” ke muakamba Bulombodi Bukulu bua Kumpala. “Ekelezia wa Yezu Kilisto wa Bansantu ba Matuku a Ndekelu udi ne disanka dia kubenesha bakuabu ne kuambuluisha badi mu dijinga. Tudi babeneshibua bua kuikala ne makanda, ne biambuluishi, ne bantu ba kutekemena mu buloba bujima bua kuenza mudimu ewu wa tshijila.”1
Ndi ne kusakidila bua disadila dia bakuabu ne mudimu udi bidimba bia Ekelezia bienza mu ntempelo yetu ne mu bikongu, mu matamba, ne mu makunji abu. Ndi kabidi ne disanka bua bidimba bia Ekelezia bidi bisadila mu misoku ya bungi, mu tulasa, ne mu bisumbu ya malu a dinanga ne badi badibueja mu midimu binunu ya diambuluisha bantu ku tshidimu, badisuila mbombu ya meba mu matunga ne misoku bifika ku 200.2
Mushindu umua udi Ekelezia utantshisha mishindu ya kusadila mu matunga a bungi udi kupitshila ku JustServe.org. Mutuibua mpanda kudi Ekelezia kadi mupeshibua kudi ewu yonsu udi ujinga kubenesha bakuabu, JustServe.org “ udi utuangaja bantu badi ne majinga mu musoku ne bantu badi badisuila” badi “babandisha buimpa bua mushindu wa moyo mu musoku.”3
Ekelezia ne bidimba bienda bidi bidienza pamua ne bisumbu bia diambuluisha pa buloba bujima. Ekelezia, kupitshila ku bidimba bienda, uvua “mufidi munena wa mashi wa Croix Rouge mu 2022.” Mu disakidila, mu matuku mashala aa, Ekelezia mmuenza dipa dia milio 8,7$ kudi Croix Rouge.4
Ekelezia kabidi mmusangila ne bisumbu bua kufila mâyi a kazeza ne midimu ya mankenda mu ntenji ya buloba bujima. Mu 2022, Ekelezia mmuenza mu midimu 156.5 Tudi kabidi tuenza midimu ne tuenza mapa kudi bibambalu bidi bifila diambuluisha kudi bana ba Nzambi badi mu ntatu.6
“Patudi tudisuika bua kusadila bantu badi mu dijinga,” muakamba Mulombodi Mukulu Henry B. Eyring, Mubedi Muibidi mu Bulombodi Bukulu bua Kumpala, “Mukalenga udi utuangaja mioyo yetu,”7
Leja bukenka bueba
Bu bayidi ba Mupandishi, tudi kabidi tubenesha bena mutumba betu patudi tulama bipungidi bietu ne tuenza malu a buena Kilisto. Mukanda wa Molomo udi ulongesha ne “bantu badi mu Ekelezia” kabena amu mua kusungula buakana, kadi badi kabidi ne bua kuenza bua ne, meyi abu a buakana umvuika pikalabu basua bua Mukalenga abalama ne abalubuluija (tangila Alama 2:3–7; tangila kabidi Mosiya 29:27). Mukalenga udi utekemena bua tuetu tuyisha bantu ditabuija dietu ne ditaba ne bua tuleja bukenka buetu. “Monayi mema ndi bukenka bunuambulula kulu” (3 Nefi 18:24).
“Katuena mua kusadila Mupandishi bilenga patudi tutshina muntu kutamba Nzambi,” muakamba Mulombodi Mukulu Dallin H. Oaks, Mubedi wa Kumpala mu Bulombodi Bukulu bua Kumpala. Wakakumbaja ne, “Tudi babikidibua bua kushikamija malongesha a Mukalenga, katuyi tulonda bia pa buloba.”8
Pawikala mu tshilongelu, ku mudimu, anyi mu dinaya, mu dikisha, mu dilopoka, mu internet, bayidi ba Mukalenga kabena “ne bundu bua kuangatabu dîna dia Kilisto to” (Alama 46:21). Ku meyi etu ne ku bienzedi bietu, tudi tujadika ne Nzambi udi ne moyo ne tudi tulonda Muanenda.
“Ditabuija dietu kadiena dia kansungansunga, ne kadiena ne bua kuikala nunku to. Ditabuija kadiena amu bua ekelezia, kadiena amu bua ku nzubu, anyi bua [tshilongelu],” muakamba Paul Lambert, munsantu wa matuku a ndekelu mumanyi mu malu adi atangila ntendelelu mivula. “Ebi bidi bitangila malu onsu awudi wenza.”9
Katuena bamanya bujitu budi bujadiki buetu, tshilejilu tshilenga tshietu, ne bienzedi bilenga bietu mua kuikala kudi bakuabu. Kadi patudi tuimanyina buakana ne tuleja bukenka bua Mupandishi, bantu nebatumona, ne diûlu nedituela kalumbandi.
Kuimanyina Budishikaminyi bua Ntendelelu
Bakuidi ba mafi ba lelu, ne nsangilu ya bantu ba pa buloba bidi bipuekesha bantu bena ditabuija, kabena bashilangana ne bantu ba mu Mukanda wa Molomo to. Meyi a bantu badi baluisha mudimu munena wa ntendelelu adi enda avula mu bibilu bia patoka ne mu tshididi. Bena secularism ne bamfumu ba matunga, pamua ne bilongelu bia universite, badi balombola ditangalaka dia malu mabi, a kubenga kuitabuija, ne diela mpata.
Buluishi bua budishikaminyi bua ntendelelu nebutshimuna bituabenga kuimanyina manema a ntendelelu wetu. Ndi mulongesha mu matuku mashala ne, ekelezia wetu udi udisangisha ne bantu ba ntendelelu.”10
Mvita ya mu diûlu ivua miluanganyibua bua bualu bua budienzedi—budishikaminyi buetu bua kusungula. Bua kulama budienzedi buetu bidi bikengela tuikala bananukidi mu dikuba budishikaminyi buetu bua ntendelelu.
Ditabuija dia ntendelelu dia bujitu didi dikankamika ne dikuba mêku, misoku, ne matunga. Didi dilela ditumikila ku mikenji, difila kanemu bua moyo ne bintu bietu, ne dilongesha bunangi, bunema, ne buimpa—bienzedi bidi bilombibua bua kuenza musoku mujalama, mudisuila, ne wa buena muntu. Katuena tujinga kudibingisha bua ditabuija dietu nansha.
Budienzeji bua bena bukenji betu, midimu yetu ya mushinga ya mu ntempelo, budienzeji bua kuibaka bukalenga bua Nzambi, ne disanka dietu dinena didi dijinga ne tuimanyina ditabuija dia ntendelelu ne budishikaminyi. Katuena mua kujimija budishikaminyi ebu katuyi bajimija madishikaminyi makuabu nansha.
Muambi Joseph Smith wakalongesha ne, “dinanga dia budishikaminyi ki didi dipesha anyima wanyi meji—buena muntu ne budishikaminyi bua ntendelelu kudi bantu ba makoba onsu.”11 Budishikaminyi bua ntendelelu budi kabidi bufila meji mu anyima patudi tulonda mibelu ya balombodi ba Ekelezia:
-
“Manya bintu bidi bitangila mushinga wa bantu, ne akula ne dikima ne buena muntu.”12
-
“Manya bua ne, bunena bua budishikaminyi dia ntendelelu nedikala ne bujitu bua bungi mu mishindu yetu ya kukola mu dikankamana ne mu dimanya dia lumu luimpa, bua kubeneshibua ku milulu ya tshijila, ne kueyemena kudi Mukalenga bua kulombola Ekelezia wenda.”13
-
“Imana ne akula bua kujadika ne, Nzambi udiku ne kudi malelela mashindama adi mikenji yenda ishikamija.”14
-
“Nuluangana ne mikenji idi mua kutupambuisha bua kuteka mu tshienzedi ditabuija dietu.”15
-
“Ndaku mu miaba yonsu ne enza bimpa, bua kuibaka ditabuija mu Nzambi wa bukola bonsu, ne kuambuluisha mua kutuala bakuabu mu miaba ya disanka.”16
-
Longa biambuluishi ku religiousfreedom.ChurchofJesusChrist.org ne ku religiousfreedomlibrary.org/documents.
Tudi tuibaka bukalenga bua Nzambi patudi tusadila, tuleja bukenka buetu, ne tuimanyina budishikaminyi bua ntendelelu. Mukalenga udi mua kutubenesha mu didienzeja dietu dia kuenza “bimpa bia bungi” mu mêku, mu misoku, ne mu matunga etu.
© 2024 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, June 2024. Tshiluba. 19347 760