“Mudimu Munena wa Mukalenga ne Mushindu Wetu Munena wa Kuwenza,” Liahona, Ngondu wa Muanda Mutekete 2024.

Mukenji wa ku Ngondu wa Liahona, Ngondu wa Muanda Mutekete 2024

Mudimu Munena wa Mukalenga ne Mushindu Wetu Munena wa Kuwenza

Kudi Mukulu Quentin L. Cook

Wa mu Tshisumbu tshia Bapostolo Dikumi ne Babidi

Image

Mukulu Quentin L. Cook

Patudi tunanga, tutangalaja, ne tubikila, tudi tuenza mudimu ne Mukalenga bua kuambuluisha anyima yonsu wa mushinga bua kulua kudiye.

Image

bamamu babidi benda bayukila mu njila

Muambi yonsu wa tshipungu etshi tshinena, ne tshia ndekelu uvua mulongesha bidimba bia Ekelezia wa Yezu Kilisto wa Bansantu ba Matuku a Ndekelu, bua kutangalaja lumu luimpa lupinguluja lua Yezu Kilisto. Mu nsombelu wanyi, bilejilu bia bungi bidi binduila mu meji:

Mulombodi Mukulu David O. McKay (1873–1970), muambi wa mu buana buanyi, wakamba ne, “Tshidimba tshionsu tshidi tshiena bukenji.”

Mulombodi Mukulu Spencer W. Kimball (1895–1985) wakalongesha ne, “Dituku dia kutuala lumu luimpa mu miaba yonsu ne kudi bantu bonsu didi apa ne mpindiewu,” ne “tudi ne bua kulepesha makasa etu” mu ditangalaja lumu luimpa kudi bakuabu.

Mulombodi Mukulu Gordon B. Hinckley (1910–2008) wakamba ne: “Mudimu wetu udi munena, bujitu buetu mu diambuluisha bua kupeta ba kulongesha budi bunena. Mukalenga mmutupesha bukokeshi bua kulongesha lumu luimpa kudi tshifukibua tshionsu. Biobo ebi nebilomba budienzeji [buetu] bua bungi.”

Ne Mulombodi Mukulu Russell M. Nelson uvua mulongesha ne: “Mudimu wa bukenji udi tshitupa tshia mushinga tshia disangisha dia Isalele dinena. Disangisha edi didi mudimu wa mushinga udi wenzeka pa buloba lelu. Kakuena tshintu tshitudi mua kuelekeja natshi mu bunena. Kakuena tshintu tshitudi mua kuelekeja natshi mu mushinga. Bena bukenji ba Mukalenga—Bayidi benda—mbadifila mu bualu ebu bunena, muanda munena, mudimu munena lelu pa buloba.”

Ndi mufika kuditshimanya nkayanyi pamvua nsonga muena bukenji mu Bukenji bua Bretagne. Ndi mutuishibua kabidi lelu ku tshiotshi. Bu Mupostolo wa Mukalenga Yezu Kilisto, ndi njadika ne mishindu idiku miaba yonsu bua kuambuluisha bakuabu bua balua kudi Kilisto ku dibaleja dinanga dietu, ku ditangalaja ditaba dietu, ne ku dibabikila bua balua netu bua kumanya disanka dia lumu luimpa lua Yezu Kilisto.

Mudimu Udi Uya Kumpala

Nankapeta diakalenga dia kuikala muimanyinyi wa Tshibambalu tshia Bukenji tshia Ekelezia pavua mfundilu wa kumpala wa Longesha Lumu Luimpa Luanyi mupatula mu 2004, ne pavua mfundilu muibidi muenzeka kabidi mu 2023. Ndi ngitaba ne Longesha Lumu Luimpa Luanyi uvua mubenesha mudimu wa bukenji bimpa bitamba.

Longesha Lumu Luimpa Luanyi Mupia-mupia udi ne bintu biabungi bitudi balonga katshia ku 2004, buludiki bua lungenyi bufuma kudi tshidimba tshionso tshia mu Bulombodi Bukulu bua Kumpala ne Mpuilu wa Bapostolo Dikumi ne Babidi, ne mashintuluka adi menza bua kutangalaja lumu luimpa mu tshikondu tshia biamu bia panshinga. Amua a ku mashintuluka â avua mafikisha ku bipeta bimpa.

Tudi bapeta ne kutangalaja lumu luimpa mu mushindu mukesa, mukumbana ne mupepela kupitshila ku nshindamenu wa “dinanga, ditangalaja, dibikila” kudi kubenesha bikola bukalenga. Yezu Kilisto wakatangalaja lumu luimpa mu mushindu ewu pavuaye pa buloba. Wakabanya moyo wenda ne dinanga dienda ne wakabikila bonsu bua kulua kudiye (tangila Matayo 11:28). Kunanga, kutangalaja, ne kubikila bu muvuaye muenza bidi dibenesha ne bujitu bisunguluka bua tshidimba tshionsu tshia Ekelezia.

Banga ne Dinanga

Mu budimi bua Getesemane ne pa mutshi mutshiamakana, Yezu Kilisto wakambula pa Yeya mibi ya ba pa buloba ne wakakenga tunyinganyinga tonsu ne “makenga a mubidi ne ntatu ne matêtshibua a mushindu onsu” (Alama 7:11). Ebi biakamuenza, munena wa ku bonsu, kuzakala bua busami, ne bua kupuekesha mashi mu kasosu konsu (Dilongesha ne Bipungidi 19:18 Kupitshila ku Bupikudi buenda ne ku Dibika ku Lufu, Yezu Kilsto uvua muenza lupandu ne dizanjikibua bipepela bua bonsu.

Mu dikeba Mupandishi ne kunana meji pa bionsu bidiye muenza buetu, tshidi tshifuka mu tuetu mutshima mûla ntenta ne dinanga buenda. Pashisha udi utuma mioyo yetu kudi bakuabu ne utuelela mukenji bua kubananga (tangila Yone 13:34–35) ne kuabanyangana lumu luimpa luenda nabu (tangila Matayo 28:19; Mako 16:15). Pikala badi mu nyunguluilu wetu bumvua ne tudi babananga bulelela ne tubakuba, nebanyisha bua kukangula mitshima yabu ku mukenji wetu, bu muvua Mfumu Lamoni mukangula mutshima wenda bua kuakidila lumu luimpa bualu bua dinanga ne disadila dia Ammona (tangila Alama 17–19).

Patudi tutangalaja lumu luimpa, mbimpa tubanga ne dinanga. Patudi tôlola tshianza kudi bakuabu mu dinanga—mu divuluka ne badi bana betu baluma ne bakaji ne bana banangibua ba Tatu wa mu Diûlu—mishindu neyikanguka bua tutangalaja tshitudi bamanya ne tshidi tshikala bulelela.

Ikala Mudifila ne Disumpakana ne Tangalaja

Kakuvua muntu uvua mudijidila bua kutangalaja lumu luimpa kupita Mulombodi Mukulu M. Russell Ballard (1928–2023). Mu muyuki wenda wa ndekelu wa mpungilu munena, wakajadika ne, “tshimua tshia ku bintu bia butumbi ne tshia dikema tshidi muntu yonsu wa pa buloba mua kumanya [tshidi] ne Tatu wetu wa mu Diûlu ne Mukalenga Yezu Kilisto bakamueneka mu matuku a ndekelu â ne Joseph [Smith] uvua mujudibua bua kupingajilula tshiwudi tshia lumu luimpa lua kashidi lua Yezu Kilisto.”

Mu matuku a moyo wenda, ne mu tshitupa tshinena tshia buloba, Mulombodi Mukulu Ballard uvua mudifila ne disumpakana mu ditangalaja mukenji ewu mulenga ne muntu yonsu. Udi utukankamika bua kuenza bia momumua. Wakalongesha ne tudi tutangalaja lumu luimpa “ku dîkala bena mutumba bimpa ne ku dikuba ne ku dileja dinanga.” Mu dienza nunku, tudi “tutantshisha lumu luimpa mu nsombelu yetu, ne … tutantshisha kudi [bakuabu] mabenesha adi lumu luimpa ne bua kufila.” Tudi kabidi “tufila bujadiki bua bitudi [tetu] bamanya ne bitaba ne bitudi [tuetu] tumvua.” Mulombodi Mukulu Ballard wakalongesha ne, “bujadiki bukezuka … budi mua kufidibua ku bukola bua Nyuma wa Tshijila mu mutshima mua aba badi bakanguka bua kubupeta.”

Ditangalaja lumu luimpa lupingajilula lua Yezu Kilisto divua dijinga dinena mu mutshima wa Mulombodi Mukulu Ballard. Tudi mua kudifila ne disumpakana—bu muvuaye—mu ditangalaja lumu luimpa mu miaku ne mu tshienzedi. Katuena bamanya ne nganyi wa munkatshi muetu udi ukeba bukenka bua lumu luimpa kadi kayi mumanya kua kubupetela (tangila Dilongesha ne Bipungidi 123:12).

Image

bantu baluma babidi babanda bibandilu

Tantshishayi Mabikila Mashindama

Mu diambuluisha bakuabu bua kulua kudi Kilisto, tudi tubabikila bua kumanya disanka didi Mupandishi ne lumu luimpa luenda bafila. Tudi mua kutshienza mu dibabikila bua kulua mu tshibilu, bua kubala Mukanda wa Molomo, anyi bua kututakena ne bena bukenji. Tudi kabidi mua kutuma dibikila dishindama bua babuela netu mu tshisangilu tshia biakudia bia tshijila.

Tudi tubuela mu tshisangilu tshia biakudia bia tshijila lumingu lonsu bua “kutendelela Nzambi ne tuangata biakudia bia tshijila bua kuvuluka Yezu Kilisto ne Bupikudi buenda.” Etshi tshidi diba dikumbana bua bantu bumvua Nyuma, balua pabuipi ne Mupandishi ne bakolesha ditabuija diabu mu Yeya.

Patudi tukeba mishindu ya kunanga, kutangalaja ne kubikila, dilongolola ne madienzeja bietu bidi biangata kuambuluisha bantu badi babuela mu tshisangilu tshia biakudia bia tshijila. Bobu bitaba dibikila dietu ne babuela mu tshisangilu tshia biakudia bia tshijila, nebananga bua kutungunuka mu njila wa ditambula ne dikudimuna moyo. Ndi ngitaba ne moyo wanyi mujima ne tshipeta tshinena netshilua patudi tubikila bakuabu ku tshisangilu tshia biakudia bia tshijila ne tubambuluisha bua kumanya mabenesha adibu mua kupeta ku dienza etshi.

Mukalenga Neatuludika

Katuena bamanya bipeta bimpa ne makenga bitudi mua kupeta patuananga, tutangalaja ne tubikila. Bana ba baluma ba Mosiya “bakaya ku tshimenga ne ku tshimenga, ne ku nzubu wa ditendelela umua ne ku mukuabu, … munkatshi mua Bena Lamana, bua kuyisha ne kulongesha dîyi dia Nzambi munkatshi muabu; ne nanku bakabanga kupeta tshipeta tshinena.” Ku madienzeja abu, “bakaluisha binunu bia bantu ku dimanya dia Mukalenga,” ne babungi “bakakudimuna moyo … [ne] kabakapambuka nansha” (Alama 23:4–6).

Nansha etshi tshiotshi katshiyi anu dimanya dietu, Mukalenga wakalaya ne neakuata mudimu ku luseka luetu bualu anyima yonsu udi ne mushinga Kudiye. Patudi tuteka dieyemena dietu mu Mukalenga ne tudifila mu mudimu wenda, neatuludika mu mushindu utudi mua kutangalaja lumu luimpa luenda ku dibananga, ditangalaja nsombelu yetu ne majadiki etu nabu, ne dibabikila bua kudisanga netu mu dimulonda.

Disanka [dietu] nedikala dinena (Dilongesha ne Bipungidi 18:15) patudi tuangata mishindu yonsu idi mu nyunguluilu wetu bua kuambuluisha Mukalenga Yezu Kilisto mu mudimu wenda munena wa kutuala anyima kudiye.

© 2024 kudi Intellectual Reserve, Inc. All rights reserved. Bipatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Monthly Liahona Message, July 2024. Tshiluba. 19293 760