“Cev Tsoos Tsho ntawm lub Pov Thawj Hwj Dawb Huv,” Liyahaunas, Cuaj Hlis Ntuj 2024.
Zaj Lus hauv Liyahaunas Txhua Hli, Cuaj Hlis Ntuj 2024
Cev Tsoos Tsho ntawm lub Pov Thawj Hwj Dawb Huv
Los ntawm vaj txiaj ntsim hauv lub tuam tsev, peb tau txais ib yam dawb ceev uas pab peb nco txog peb tej kev khi lus—yog ib lub cim txog tus Cawm Seej Nws tus kheej.
Ib feem los ntawm Adas thiab Evas, los ntawm Douglas Fryer
Txawm yog twb tau npaj nkawd lub siab thiab tej lus nplij siab uas nkawd sim nco txog los, nyaj yuav tsum ua rau Adas thiab Evas nkawd nyuaj siab kawg thaum nkawd tawm lub Vaj Edees mus rau hauv ib lub ntiaj teb uas poob lawm.
Nkawd paub zoo tias yuav zoo li cas thaum muab nkawd lub neej uas nyob dawb nyob do thiab nyob kaj siab lug pauv kom raug tawm tsam thiab tawm hws, tuaj pos thiab muaj kev nyuaj siab—es tom qab ntawd mam li raug kev tuag. Nkawd yeej tsis paub thaum xub thawj tias tej no yuav zoo li cas, tiam sis tsis ntev nkawd twb kawm tias txhua hnub yuav raug tej yam mob tshiab. Muaj tseeb tiag, qhov uas nyuaj siab tshaj plaws yog qhov uas nkawd paub tias nkawd yuav raug txhua yam no thaum nkawd Leej Txiv Saum Ntuj Ceeb Tsheej tsis nrog nkawd nyob—“vim tau muab nkawd nrug ntawm nws xub ntiag mus lawm,” xws li Mauxes sau.
Vim nkawd nrug ntawm Vajtswv thiab muaj kev kho siab hauv ib lub ntiaj teb nyuaj siab li, nyaj ib yam uas nkawd nco txog nplij Adas thiab Evas lub siab: nkawd twb cog lus lawm—cog lus txog ib yam dawb ceev uas kav ntev mus ib txhis hu ua kev khi lus. Nkawd twb cog lus tias nkawd yuav mloog Leej Txiv lus tag nkawd lub neej, thiab Nws tau cog lus tias yuav txib ib tug Cawm Seej los, ib tug uas yuav ris nkawd txoj kev mob thiab txoj kev nyuaj siab, theej txhoj rau nkawd tej kev txhaum, thiab coj nkawd rov qab mus cuag Nws.
Tiam sis nkawd ob leeg uas txawj tuag no yuav ua li cas kom nco txog tej yam uas nkawd cog lus? Nkawd yuav ua li cas kom nco txog nkawd tej xwm txheej nyuaj heev—txhua lub sij hawm, tas hnub tas hmo?!
Kev Nco txog Nkawd tej Kev Khi Lus
Kom pab nkawd nco txog qhov no Nws muab “tawv tsiaj” rau nkawd hnav. Nov yog ib lub txiaj ntsim zoo kawg uas muab rau ib lub sij hawm zoo. Tom qab nkawd noj cov txiv uas txwv tsis pub noj, Adas thiab Evas paub kiag hais tias nkawd liab qab. Thaum xub thawj, nkawd sim siv cov nplooj txiv cev npog nkawd. Ces, nkawd ntshe tias yuav tsis txaus, nkawd thiaj li sim nkaum kom tus Tswv tsis pom. (Qhov ruam ntawd yeej qhia tias nkawd tab tom txawj tuag!) Txij thaum ntawd los, Leej Txiv uas hlub Nws cov me nyuam tau caw lawv tsis txhob nkaum thiab los cuag Nws. Ib yam li cov tawv tsiaj thiab cov khaub ncaws txij thaum ntawd los, Nws muaj lub siab dawb tsis cia peb nyob liab qab xwb tiam sis tau muab “lub tsho tshaj sab ntawm kev ncaj ncees” rau cov neeg uas mloog lus hnav, kom peb nco txog peb tej lus cog tseg thiab tej kev khi lus. “Cev tsoos tsho ntawm kev cawm seej” no yog ib lub cim txog lub txiaj ntsim zoo tshaj plaws, Yexus Khetos txoj Kev Theej Txhoj.
Cev Tsoos Tsho Yog Ib lub Cim txog tus Cawm Seej
Nim no, kev xav txog Adas thiab Evas thiab tej kev khi lus thiab tej ris tsho yeej tsis yog ib yam txoj kev xav xwb. Yeej tsis nyuaj rau peb xav tias Adas thiab Evas xav li cas, vim peb kuj tau raug txom nyem nyob hauv lub ntiaj teb uas tau poob lawm no thiab. Peb nrug Vajtswv lub xub ntiag, thiab peb txav mus deb zog txhua zaus peb ua txhaum. Ib yam li Adas thiab Evas, Vajtswv txib tib tug Cawm Seej ntawd, Yexus Khetos los ntawm Naxales, tus Alafas thiab Aumenkas, Vajtswv Leej Tub uas muaj txoj sia nyob. Ib yam li Adas thiab Evas, peb twb nrog Vajtswv khi lus. Thiab, los ntawm vaj txiaj ntsim hauv lub tuam tsev, peb tau txais ib yam dawb ceev uas pab peb nco txog peb tej kev khi lus—yog ib lub cim txog tus Cawm Seej Nws tus kheej. Nyob hauv peb lub caij nyoog yog ib yam hu ua cev tsoos tsho ntawm lub pov thawj hwj dawb huv.
Ib feem los ntawm Txoj Kev Los Zaum Ob, los ntawm Harry Anderson
Peb hnav cev tsoos tsho no hauv qab peb ris tsho. Txawm yog kuv muaj kev lav ris twg los, txawm kuv muaj tej hauj lwm twg ua hauv lub neej no, txawm kuv yuav tsum ua li cas txhua hnub, yeej muaj kuv tej kev khi lus—tas mus li. Yeej muaj tej kev cog lus dawb ceev uas kuv ua raws nraim li. Cev tsoos tsho tsis yog ib yam uas khav txog los sis muab rau neeg ntiaj teb pom thiab kuv tej kev khi lus yeej zoo ib yam. Tiam sis kuv sim npuab tej no—ze npaum li kuv ua tau. Tej no yeej dawb ceev rau kuv heev.
Thaum peb nco txog tej kev khi lus no, tej lus cog tseg uas yog ob tug neeg cog lus, peb hnav cev tsoos tsho tas peb lub neej. Txoj kev ua li no qhia tias peb xav kom tus Cawm Seej coj peb lub neej ntau npaum li cas. Lwm yam lub cim yeej ua rau ib lub sij hawm xwb. Peb tsuas ua kev cai raus dej ib zaug. Peb txais lub cim nco txog txhua lub lim tiam ib zaug xwb. Peb mus rau lub tuam tsev thaum twg peb mus tau. Tiam sis cev tsoos tsho ntawm lub pov thawj hwj dawb huv txawv: lub cim no yog ib lub cim uas peb saib taus txhua hnub thiab txhua hmo.
Tej kev khi lus yeej zoo li no ntag—peb tsis muab tso tseg kom yooj yim rau peb los sis vim peb tsis xyuam sim thiab peb tsis hloov kom thiaj li hnav tau tej yam uas cov pej xeem nyiam hnav. Nyob hauv Yexus Khetos tus thwj tim lub neej, yuav tsum hloov tej yam uas neeg ntiaj teb ua kom muaj raws li peb tej kev khi lus, es tsis muaj ib txoj kev ntxiv.
Thaum peb hnav cev tsoos tsho, peb ua li Thawj Pawg Thawj Tswj Hwm tau qhia, thiab hnav ib lub cim dawb ceev txog Yexus Khetos. Yog li ntawd, vim li cas peb yuav nrhiav kev kom zam peb tus kheej hle lub cim ntawd? Vim li cas peb yuav tsis xav tau cov lus cog tseg tias pb yuav txais hwj chim, kev pov hwm, thiab lub siab hlub uas cev tsoos tsho piv txog? Thaum twg peb yuav tsum hle cev tsoos tsho, peb yuav tsum muaj siab xav rov qab hnav, sai li sai tau, vim peb nco txog tej lus cog tseg thiab tej xwm txheej uas ua rau peb tej kev khi lus muaj nqis. Qhov tseem ceeb, peb nco txog tus ntoo khaub lig thiab lub ntxa ntawm Yexus Khetos.
Tej zaum ib txhia hais tias, “Muaj lwm txoj kev uas kuv siv kom nco txog Yexus.” Thiab kuv yuav teb hais tias, zoo kawg. Yim ntau yim zoo. Cia peb xav txog txhua yam uas peb ua taus kom ua raws li peb txoj kev cog lus tias peb yuav “nco ntsoov txog nws.” Tiam sis thaum peb ua li ntawd, yeej yuav tsis ncaj yog peb txhob txwm muab txoj kev nco txog tus Tswv uas Nws twb qhia rau cov uas tau txais vaj txiaj ntsim tso tseg, uas yog cev tsoos tsho ntawm lub pov thawj hwj dawb huv.
Yexus Khetos thiab Nws txoj moo zoo yog txhua yam rau kuv. Tag nrho kuv tej kev cia siab thiab tej kev ntshaw uas nyob mus ib txhis, txhua tus uas kuv hlub, yeej nyob ntawm Nws. Nws yog “lub pob zeb ntawm kuv txoj kev cawm seej,” kuv txoj kev ncav cuag kuv Leej Txiv Saum Ntuj Ceeb Tsheej, kuv tib txoj kev kom tau tej yam uas kuv muaj dhau los thiab kuv xav rov qab muaj, nrog ntau yam ntxiv. Nws lub txiaj ntsim uas Nws foom pub rau peb yog qhov zoo tshaj uas kuv tau txais, yog kev muab los ntawm ib lub siab dawb siab zoo—vim Nws twb raug txom nyem uas kav ntev mus ib txhis kom thiaj yuav tau, Nws muab lub txiaj ntsim rau neeg coob uas suav tsis txheeb, thiab muaj kev hlub puv npo muab rau peb. “Khetos [tau] kov yeej” tag nrho txhua yam uas tuaj pos, kev mob kev nkeeg, kev nyuaj siab thiab kev txhaum ntawm lub ntiaj teb uas tau poob lawm.
Yog li ntawd kuv tau hnav cev tsoos tsho ntawm lub pov thawj hwj dawb huv—txhua hnub txhua hmo raws li tsim nyog txij thaum kuv txais vaj txiaj ntsim 64 xyoos dhau los, thaum kuv muaj 19 xyoos—vim kuv hlub Nws thiab vim kuv xav kom muaj raws li Vajtswv tau cog lus.
Muaj tej Lus Nug txog Kev Hnav Cev Tsoos Tsho Los?
Ntshe nej ib txhia uas nyeem zaj lus no cia siab tias kuv yuav teb ib yam uas nej xav nug txog cev tsoos tsho. Tej zaum nej xav hnov “Tus Tswv hais li no”—los sis “Nws cov tub qhe hais li no”—txog ib yam uas nej lub siab xav txog. Tej zaum nej lo lus nug yog nyob ntawm ib qho xwm txheej thaum ua hauj lwm, ua exercise, tu cev, huab cua, kev npog lub cev, kev siv hoob nab, los sis ib txoj kev raug mob.
Tej lo lus nug zoo li no los ib txhia muaj lus teb nyob ntawm temples.ChurchofJesusChrist.org thiab nyob hauv tshooj 38.5 ntawm Phau Qhia Kev Coj lub Koom Txoos. Tej zaum nej yuav xav nrog tsev neeg thiab cov thawj coj tham txog qhov xwm txheej no. Tiam sis, twb qhia meej txog qhov no nyob hauv cov kab ke chiv thawj, thiab muaj nej Leej Txiv Saum Ntuj Ceeb Tsheej uas nyob mus ib txhis li, Nws paub nej thiab hlub nej thiab to taub txhua yam txog nej tej xwm txheej. Nws yeej zoo siab kom nej thov Nws txog tej lo lus nug no.
Daim duab txog qhov siab ntawm lub Tuam Tsev St. George Utah
Thov kom nej to taub zoo. Thaum nej thov Vajtswv, tus Ntsuj Plig yeej yuav tsis tshoov koj lub siab kom ua tsawg dua li tej lus qhia uas txais hauv lub tuam tsev thiab tus yaj saub tej lus ntuas uas Thawj Pawg Thawj Tswj Hwm tau hais nyob hauv lawv zaj lus. Ib Leej Txiv uas hlub nej yeej yuav tsis pab nej zam nej tus kheej kom ua tsawg dua li Nws tej kev cai txog kev teev ntuj thiab kev npog lub cev uas yuav foom koob hmoov rau nej niaj hnub no thiab mus ib txhis li. Tiam sis Nws yeej to taub nej tej lus nug, thiab Nws yuav pab nej txais cov koob hmoov los ntawm txoj kev saib taus cev tsoos tsho thiab kev ua raws li nej tej kev khi lus? Kam mas! Nej puas xav nrog cov kws kho mob thiab cov kws tu mob tham thaum twg yuav tsum ua li ntawd? Xav kawg! Puas tsim nyog tso kev xav zoo tseg los sis ntsia dhau lub hom phiaj? Kuv thov Vajtswv kom nej yuav tsis txhob ua li no.
Kuv teb tsis tau txhua lo lus nug uas nej muaj. Kuv kuj teb tsis tau txhua lo lus nug uas kuv muaj. Tiam sis, kuv, tus uas yog tus Tswv Yexus Khetos tus Thwj Tim, cog lus rau nej hais tias thaum muaj Vajtswv txoj kev pab, tus uas xav kom nej vam meej thiab tau koob hmoov, los ntawm tej yam uas tam sim no nej tsis to taub los sis pom tsis taus, thaum nej ua raws li koj tej kev khi lus nrog Nws.
© 2024 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Askiv: 6/19. Pub txhais ua lus Hmoob: 6/19. Kev txhais Monthly Liahona Message, September 2024. Hmong. 19295 295