Jesus Christ Edi Ntɔŋɔ “Enyene-uwem,’‘Eti,’ “Mfɔn Nkan Idorenyin,’” Liahona, Dec. 2024.
Ɔfiɔŋ-ke-ɔfiɔŋ Etop Liahona , Ɔyɔhɔ Ɔfiɔŋ Duopeba 2024
Jesus Christ Edi Ntɔŋɔ “Enyene-uwem,” “Eti,” ye “Mfɔn Nkan Idorenyin”
Ke akpan ini edidara emana eke ekpri-nsekeyen ke Bethlehem, yak nnyin kpukpru ini iti ke Jesus Christ ekedi ke ererimbot ndidi Andinyaŋa ye Andifak nnyin.
Usɔrɔ-emana Jesus Christ, otode Sharlotte Andrus
Apostle Peter ye mme prophet eke Ŋwed Mormon Jacob ye Moroni eyiri-etiŋ enɔ spirit eke idorenyin ke Christ ke mme mbiet usuŋ item ntem.
Nte uwutŋkpɔ, Peter ete, “Itoro enyene Abasi ye Ete Ɔbɔŋ Jesus Christ nnyin, emi, nte, asaŋade ekekem ye ediwak mbɔm Esie ama afiak obon nnyin esin ke odu-uwem idorenyin oto ke eriset Jesus Christ ke mkpa” (1 Peter 1:3; edian ŋkpɔ). Mbɔk ti edida ikɔ oro “odu-uwem” ndiwut “idorenyin.”
Jacob eketiŋ ete, Ke ntre, ndima nditɔ-ete, ekpe emem ye enye eto usio isop Christ, Ikpɔŋ-ikpɔŋ Eyen emi Enye Obonde, ndien mbufo ebɔ eriset ke mkpa, nte asaŋade ye odudu eriset ke mkpa emi odude ke Christ, ndien eda mbufo nte mme akpa mbuŋwum Christ enɔ Abasi, ke enyenede mbuɔtidem, enyuŋ ebɔde eti idorenyin ubɔŋ ke enye mbemiso enye ayarare idemesie ke obukidem” (Jacob 4:11; edian ŋkpɔ). Mbɔk ti edida ikɔ oro “eti” ndiwut “idorenyin.”
Ndien Moroni ete, “Ndien ami ŋko mmeti ke afo ɔkɔdɔhɔ ke imɔ imibeŋe ufɔk inim inɔ owo, iŋ, kpa kotu mme ebietiduŋ eke Ete fo, emi owo ekemede edinyene mfɔn nkan idorenyin; ke ntre owo eyenyene idorenyin, mme enye ikemek ndibɔ inyene kiet ke ebiet emi afo ekebeŋede onim” (Ether 12:32; edian ŋkpɔ). Mbɔk ti edida ikɔ oro “mfɔn nkan” ndiwut “idorenyin.”
Nso Idi Idorenyin ke Christ?
Enɔ spirit eke idorenyin ke Christ edi uyɔhɔ-idara ekikere eke nsinsi uwem otode ke “ndidot, ye mbɔm, ye mfɔn Edisana Messiah” (2 Nephi 2:8) ye akwa udɔŋ nnɔ mme eŋwɔŋɔ edidiɔŋ eke edinen-ido. Mme ikɔ oro “odu-uwem,” “eti,” ye “mfɔn nkan” ke mme ufaŋ ŋwed emi owut nsinsi-editara ye ɔsɔŋɔ uko eke Eriset ke mkpa ye eke nsinsi uwem otode mbuɔtidem ke Jesus Christ.
Prophet Mormon anam-aŋwaŋa ete:
Ndien efen, ndima nditɔ-ete mi, ami nyetiŋ nnɔ mbufo kabaŋa idorenyin. “Didie ke edidi ete ke mbufo emekeme edisim mbuɔtidem, ke mibɔhɔke mbufo edinyene idorenyin?
“Ndien nso ke mbufo edinyene idorenyin ibaŋa? Sese, ami ndɔhɔ mbufo nte mbufo edinyene idorenyin ito erisio-isop Christ ye odudu eriset-ke-mkpa esie, man emenede osim nsinsi uwem, ndien emi oto ke mbuɔtidem mbufo ke enye nte asaŋade ye eŋwɔŋɔ.
“Ke ntre, edieke owo enyenede mbuɔtidem enye eneye ndinyene idorenyin, koro mbuɔtidem miduhe idorenyin ikemeke ndidu” (Moroni 7:40–42).
Uduak Inemesit eke Ete
Idorenyin ke Christ emi edide odu-uwem, eti, ye mfɔn nkan ɔtɔŋɔ ye edinyene ifiɔk ete ke Abasi Nsinsi Ete odu uwem. Enye edi Ete nnyin, ndien nnyin idi nditɔ spirit Esie. Nnyin idi ukem-ukem nditɔ iren ye iban spirit eke Abasi inyuŋ inyene edisana mbiet ito Enye.
Ete edi ntɔŋɔ eke uduak inemesit (se Abraham 3:22–28). Nte nditɔ iren ye iban spirit eke Abasi, nnyin “ima inyime uduak Esie emi edide ke nditɔ Esie ekeme ndibɔ ikpɔkidem nyuŋ nnyene ifiɔk-ukpep eke uwem isɔŋ ndikɔri ŋkesim mfɔn-mma ndien ke akpatre edibɔ edisana akaŋa mmɔ nte mme adiakpa eke nsinsi uwem.” Ke ye ŋwed Abasi, nnyin ikpep ke: “Ete enyene obukidem ye ɔkpɔ ukem nte owo etiede, Eyen ŋko enyene” (Doctrine ye Covenants 130:22). Ntem, ndibɔ mme ikpɔkidem edi akpan ŋkpɔ ke usuŋ ndikɔri ŋkesim edisana akaŋa nnyin.
Nnyin idi ke mbiet iba. Spirit nnyin, nsinsi ubak idem nnyin, esine ke mme ikpɔkidem emi osukde-ibuot ɔnɔ mme udɔŋ ye nduwɔrɔ eke uwem isɔŋ. Ekenam uduak inemesit eke Ete ndinɔ nditɔ Esie ndausuŋ, man aŋwam mmɔ ndinyɔŋ ufɔk ke ifure mbine Enye ye eriset, edimenede ikpɔkidem, nyuŋ mbɔ mme edidiɔŋ eke nsinsi idara ye inemesit.
Ekpri-nsek Jesus, otode Sharlotte Andrus
Utom Edifak eke Jesus Christ ke Uduak Ete
Jesus Christ Edi Ikpɔŋ-ikpɔŋ Eyem emi Nsinsi Ete Obonde Enye ekedi ererimbot ndinam uduak Ete Esie (se 3 Nephi 27:13). Jesus Christ edi enye emi Ete ekeyetde-aran onim ndidi ata andida-nnɔ Enye ke kpukpru ŋkpɔ kabaŋa erinyaŋa ubonowo. Enye edi Andinyaŋa ye Andifak nnyin koro Enye ama akan mkpa ye idiɔkŋkpɔ mbiba.
Alma etiŋ prophesy ɔn mbon Gideon kabaŋa utom erinyaŋa eke Messiah ete;
“Ndien enye eyewɔrɔ aka, ɔbɔ ubiak ye ukut ye idomo eke ofuri oruk, ndien emi edi man ikɔ okposu emi eketiŋde ete ke enye eyeda mme ubiak ye udɔŋɔ eke ikɔt esie odori ke idemesie.
“Ndien enye eyeda mkpa ɔnɔ idem esie, man enye atat mme uruk mkpa emi ɔkɔbɔpde ikɔt esie, ndien enye eyeda ɔnɔ idem esie mme mmemidem mmɔ, man esit esie ɔyɔhɔ ye mbɔm, nte asaŋade ke obukidem, man enye ɔfiɔk ke obukidem nte aŋwamde ikɔt esie nte asaŋade ye mme mmemidem mmɔ.
“Idahaemi Spirit ɔfiɔk kpukpru ŋkpɔ, ke ntre Eyen Abasi ɔbɔ ndutuhɔ nte asaŋade ke obukidem man enye ada mme idiɔkŋkpɔ ikɔt esie ɔnɔ idem esie, man enye ɔsɔhi mme ndudue mmɔ osio nte asaŋade ye odudu ubɔhɔ esie.” (Alma 7:11–13).
Akpa ukpepŋkpɔ ke ikɔ Abasi edi mbuɔtidem ke Ɔbɔŋ Jesus Christ. Ata mbuɔtidem ɔkɔŋɔ ke ye ke idem Andinyaŋa onyuŋ ɔnɔ nnyin ukeme ndinim Enye ke akpanikɔ nyuŋ nnyene ofuri uko ke odudu Esie man aŋwam nnyin osio ke mkpa, eyet nnyin osio ke idiɔkŋkpɔ, onyuŋ ɔdiɔŋ nnyin ye ɔsɔŋɔ emi akande eke idem nnyin.
Moroni etiŋ ikɔ-ntiense ete: “Ke ntak erifak owo, emi okotode Jesus Christ, ekeda mmɔ edi iso Jehovah; iŋ, emi edi ebiet emi erifak osimde kpukpru owo, koro mkpa Christ anam eriset ke mkpa osu, emi anamde erifak emi otode nsinsi idap osu, koro edito ke idap emi kpukpru owo eyedaha eda oto ke odudu Abasi ke ini obukpoŋ edisiorede uyo, ndien mmɔ eyedi, ŋkpri ye ikpɔ, mmɔ eyeda ke iso esie, ke ema ekebɔ erifak ye edikpɔk uruk nsinsi mkpa, mkpa emi edibede ifep.” (Mormon 9:13).
Ami ntiŋ ikɔ ntiense ke Andinyaŋa ama obuŋ eduat mkpa. Enye ama eset ke mkpa, Enye odu uwem, ndien Enye edi nkokure ntɔŋɔ odu-uwem, eti, ye mfɔn nkan idorenyin.
Iwuk Kiet ɔnɔ Ukpɔŋ Nnyin
Prophet Ether etiŋ ikɔ ntiense ete, “Ke ntre, owo eke enimde Abasi ke akpanikɔ ekeme ye ɔsɔŋɔ idorenyin ɔnɔ edifɔn ererimbot, iŋ, kpa ebiet kiet ke ubɔk nnasia Abasi, idorenyin emi edide oto mbuɔtidem, anamde iwuk kiet ɔnɔ ukpɔŋ nditɔ owo, emi edinamde mmɔ esɔŋɔ etuak-eda, kpukpru ini edu ke nti utom, esinde mmɔ enɔ Abasi ubɔŋ” (Ether 12:4; edian ŋkpɔ).
Ke akpan ini edidara emana eke ekpri-nsekeyen ke Bethlehem, yak nnyin kpukpru ini iti ke Jesus Christ ekedi ke ererimbot ndidi Andinyaŋa ye Andifak nnyin. Enye ɔnɔ nnyin mme anana ekɔm-urua enɔ eke uwem, uŋwana, edinam-obufa, ima, emem, ekikere, idara, ye idorenyin.
Ami ŋkot mbufo nte enehede eyom enɔ spirit eke idorenyin ke Andinyaŋa ke edikot mme ukpepŋkpɔ ye ikɔ ntiense eke mme prophet eyo-eset ye eke eyo emi kabaŋa uwa isio-isop Esie ye ata Ersiet ke mkpa. Nte mbufo enamde oro, ami ŋwɔŋɔ ke ikɔ ntiense mbufo kabaŋa edisana Andifak eyenyene ɔsɔŋɔ, ŋkabare-esit mbufo nnɔ Enye eyekpon, udɔŋ ye ubiere mbufo ndida nte ɔsɔŋɔ ntiense kabaŋa Enye eyekɔri, ndien afo eyebɔ edidiɔŋ ye iwuk kiet ɔnɔ ukpɔŋ fo kpa—odu-uwem, eti, ye mfɔ nkan idorenyin.
Ye mme Apostle emi ekenɔde ikɔ ntiense kabaŋa Enye ke ofuri mme emana, ami mmedara mfiori ntiense mi nte ke Jesus Christ edi odu-uwem Eyen eke odu-uwem Abasi. Enye edi Andifak nnyin emi ekesetde ye enyene-ubɔŋ, ukem ikpɔkidem eke obuk ye ɔkpɔ. Ndien otode ke erifak ye edinam-emem ye Abasi emi Ɔbɔŋ akanamde osu ɔnɔ kpukpru ubonowo, nnyin iyekeme ndibɔ ɔsɔŋɔ spirit ye odu-uwem, eti, ye mfɔn nkan idorenyin ete “ke Christ ke eyenam kpukpru owo edu uwem” (1 Corinthians 15:22).
© 2024 eketode Intellectual Reserve, Inc. Ekpan kpukpru unen ndimiŋ nwed emi. Ekemiŋ ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare Ɔfiɔŋ-ke-ɔfiɔŋ Etop Liahona, Ɔyɔhɔ Ɔfiɔŋ Duopeba 2024. Efik. 19296 553