Abril

Si Jesukristo Ang Akong Manluluwas ug Manunubos

Kanta nga imong pinili gikan sa Children’s Songbook

“Kami nagtuo nga pinaagi sa Pag-ula ni Kristo, ang tanan nga mga katawhan mahimo nga maluwas, pinaagi sa pagsunod sa mga balaod ug mga ordinansa sa Ebanghelyo” (Mga Artikulo sa Hugot nga Pagtuo 1:3).

Dugangi ang mga ideya nga gihatag dinhi og pipila nga gikan sa imong kaugalingon. Pagplano og mga paagi sa pagpaila sa doktrina ngadto sa mga bata ug tabangi sila sa pagsabut niini ug sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”

Semana 1: Si Jesukristo mao ang gipili nga mahimo natong Manluluwas.

Ipaila ang doktrina: Isulat sa pisara “Si Jesukristo mao ang mahimo natong Manluluwas.” Himoa nga ang mga letra nga g,i,p,i,l, ug ang i magkatag libut sa kwarto. Ipaporma og balik sa mga bata ang mga letra sa pagkompleto sa han-ay sa mga pulong. Hangyoa sila sa pagbasa sa Moises 4:2 sa pagtan-aw sa ilang mga tubag. Basaha og dungan ang pamahayag diha sa pisara.

Ang pagmemorya sa mga kasulatan makatabang sa mga bata sa pagkat-on og mga doktrina sa ebanghelyo. Ang Espiritu makatabang sa mga bata sa paghinumdom niini nga mga pulong sa mga panahon sa panginahanglan. (Tan-awa sa PWLMT, 171–72.)

Awhaga ang pagsabut niini: Pag-andam og ginunting nga mga pulong nga adunay usa sa mosunod nga mga pangutana kabahin sa “I Lived in Heaven” (CS, 4) nga gisulat diha sa matag usa:

1. Kinsa man ang mipresentar sa plano ngadto sa tanan didto sa langit sa wala pa kita moanhi sa yuta?

2. Si Kinsa ang miingon, “Amahan, ipadala ako, ug imo ang himaya”?

3. Unsa ang gibuntog ni Jesus pinaagi sa pagsunod sa plano sa Amahan?

Pakantaha ang mga bata sa unang bersikulo sa kanta ug sa pagtindog kon ilang makanta ang tubag sa unang pangutana. Dayon hisguti ang pipila ka mga butang nga ilang nakat-unan gikan niini nga bersikulo. Hunahunaa ang pagpakanta og usab sa bersikulo human nimo mahisguti kini. Dayon balika ang kalihokan uban sa laing mga bersikulo ug mga pangutana.

Semana 2: Si Jesukristo ang perpekto nga ehemplo alang kanako.

Ipaila ang doktrina: Panganta og “Do As I’m Doing” (CS, 276), ug hangyoa ang mga bata sa pagsunod kanimo samtang mohimo ka og pipila ka sayon nga mga aksyon, sama sa pagpak-pak sa imong mga kamot, pagtuyhad sa imong mga bukton ibabaw sa imong ulo, o sa pagmartsa nga diha lamang sa lugar. Hangyoa ang mga bata sa pagngalan og pipila ka butang nga ilang nakat-unan pinaagi sa pagsunod sa ehemplo sa usa ka tawo (sama pananglit, unsaon sa pag-andam og higdaanan o sa pagdula og usa ka dula). Isulat sa pisara ang “Si Jesukristo ang hingpit nga ehemplo alang kanako.” lpamatuod nga si Kristo mao lamang ang tawo nga nakapuyo sa yuta nga nakapakita og hingpit nga ehemplo nga atong sundon. Ipabasa og dungan sa mga bata ang han-ay sa mga pulong.

Mga kanta: Ang mga kanta sa Primary nagtudlo og mga kamatuoran sa ebanghelyo sa pamaagi nga ang mga bata makahinumdom niini sa tibuok nilang kinabuhi (tan-awa sa PWLMT, 172–75).

Awhaga ang paggamit niini: pagpakita og pipila ka mga litrato ni Jesus nga naghigugma ug nagserbisyo sa uban. Isulat sa pisara ang “si Jesus nahigugma sa tanan” ug “si Jesus mialagad sa uban”. Pag-drawing og kasingkasing ug usa ka kamot sa ubos niining hugpong sa mga pulong. Sultihi ang mga bata nga kinahanglan kitang mosunod sa ehemplo ni Jesus pinaagi sa paghigugma ug sa pag-alagad sa uban. Hatagi ang matag bata og usa ka piraso nga papel ug ipa-drawing nila ang usa ka kasingkasing o subayon sa pagbadlis ang ilang kamot. Dayon dapita sila sa pagsulat o sa pag-drawing og pipila ka butang nga ilang mahimo sa pagsunod sa ehemplo ni Jesus. Ingna ang mga bata sa pagpakigbahin sa ilang mga ideya uban sa mga Primary ug sa pagbutang sa ilang mga papel tapad sa mga litrato ni Jesus. Kantaha ang “I’m Trying to Be like Jesus” (CS, 78–79).

Semana 3: Pinaagi sa Pag-ula ni Kristo ang tanang katawhan maluwas.

Ipaila ang doktrina: Grupo-grupoha ang mga bata ug hatagi ang matag grupo og hugpong sa mga pulong gikan sa ikatulo nga artikulo sa hugot nga pagtuo. Pabaruga ang matag grupo, sa husto nga pagkahan-ay, ug balika ang ilang mga pulong. Dayon pabaruga ang tibuok Primary ug ipabalik og sulti ang tibuok nga artikulo sa hugot nga pagtuo.

Awhaga ang pagsabut niini: Ipamatuod nga usa sa paagi nga ang Pag-ula ni Jesukristo nagluwas kanato mao nga kini nagluwas kanato gikan sa sala. Ipakita sa mga bata ang usa ka baso sa tin-aw nga tubig ug ipasabut nga nagrepresentar kini sa tawo nga walay sala. Paghulog og gamay kaayo nga pangkolor sa pagkaon diha sa tubig. Ipakita kon sa unsang paagi masagol ang pangkolor sa pagkaon sa tanang tubig ug naghimo niini nga dili na limpyo. Ipasabut nga kon kita makasala, mahimo kitang hugaw, sama niining tubig. Dayon dungagi og pipila ka tulo sa liquid nga pangpaputi sa pagpatin-aw og balik sa tubig. Ipasabut nga kon kita maghinulsol, ang Pag-ula molimpyo kanato gikan sa sala ug kita mapasaylo. Pagpakita og litrato ni Kristo nga anaa sa Getsemani. Ipaambit sa mga bata kon unsa ang ilang nahibaloan mahitungod sa litrato. Ipamatuod ang gugma ni Jesukristo alang kanato ug sa Iyang kaandam sa pagbayad sa kantidad alang sa atong mga sala.

Awhaga ang paggamit niini: Mogamit og pipila ka mga pamaagi sa pagtudlo nga gigamit niini nga booklet, tudloi ang mga bata mahitungod sa paghinulsol, nga naglakip sa pagbati og kasubo, sa pagpangayo og pasaylo, paghusto sa sayop, ug sa dili paghimo og usab sa maong sayop (tan-awa sa Primary 3, 55–59).

Ang paggamit og mga butang sa leksyon mahimong gamiton sa pagmugna og interes, sa pagkuha sa atensyon sa mga bata, o sa pagpaila og usa ka baruganan sa ebanghelyo (tan-awa sa PWLMT, 164). Kon wala kay mga butang nga magamit nga gikinahanglan alang sa paggamit og mga butang sa leksyon nga gihulagway sa leksyon sa semana 3, hunahunaa ang paggamit og mga materyal nga anaa kanimo. Sama pananglit, mahimo nimong sabunan ang hugaw nga kamot aron sa paglimpyo niini.

Semana 4: Si Jesukristo nabanhaw, ug ako mao usab.

Awhaga ang pagsabut niini: Paggamit og mga litrato sa mubo nga pagsaysay sa istorya sa kamatayon ni Jesus (tan-awa sa Mateo 27:33–60; Marcos 15:22–46; Lucas 23:33–53; Juan 19:17–42). Hangyoa ang mga bata sa paghunahuna mahitungod sa gibati sa pamilya ug sa mga higala ni Jesus dihang Siya namatay. Hangyoa daan ang pipila ka mga bata, (o mga hingkod) sa pag-adto sa Primary nga andam sa pagpaambit og istorya sa usa sa mga saksi sa Pagkabanhaw ni Kristo, sama kang Maria Magdalena (tan-awa sa Juan 20:11–18), Pedro ug Juan (tan-awa sa Juan 20:2–10), sa mga disipulo (tan-awa sa Juan 20:19–22; Lucas 24:33–53), Tomas (tan-awa sa Juan 20:24–29), ug sa mga Nephites (tan-awa sa 3 Nephi 11:8–17). Hatagi sila og mga name tag sa pag-ila kon kinsang istorya ang ilang gipakigbahin.

“Sa kasagaran mas sayon ang pagsabut sa baruganan sa ebanghelyo kon kini gipahayag isip usa ka bahin sa istorya nga gikan sa kasulatan” (PWLMT, 55).

Nephi