Mga Panudlo alang sa Panahon sa Pagpakigbahin ug Pasundayag sa mga Bata sa Sakrament Miting

Minahal nga mga Kapangulohan sa Primary ug mga Music Leader,

Ang mga kasulatan mao mga pulong sa Dios. Samtang kamo mainampuong magbasa sa mga kasulatan ug mogamit sa mga baruganan nga gitudlo diha ug niini nga outline, kamo maandam sa espirituhanong paagi sa pagtudlo sa ebanghelyo ni Jesukristo ngadto sa mga bata sa Primary. Kamo usab makagamit sa mga kasulatan sa pagtabang sa mga bata sa pagsabut sa mga baruganan sa ebanghelyo nga inyong itudlo niining tuiga, sama sa plano sa Langitnong Amahan, sa misyon ni Jesukristo, sa tahas sa mga propeta, sa Pagpahiuli sa Simbahan, ug sa mga panalangin sa templo. Ang mga kasulatan makatabang kaninyo sa pagdapit sa Espiritu diha sa inyong Primary ug sa pagmugna og usa ka palibut diin ang mga bata mobati sa impluwensya sa Espiritu Santo. Kana nga impluwensya makatabang sa matag bata nga Primary nga makaingon nga, “Ako nasayud nga ang mga kasulatan tinuod.”

Salamat sa inyong matinud-anong pagserbisyo. Kami nag-ampo alang kaninyo ug may pagsalig sa inyong katakus sa paghigugma sa mga bata ug sa pagtudlo kanila sa ebanghelyo ni Jesukristo.

Ang Kinatibuk-ang Kapangulohan sa Primary

Mga Panudlo alang sa Panahon sa Pagpakigbahin

Panudlo sa Ebanghelyo

Gamita kini nga booklet samtang ikaw nag-andam sa pagtudlo og 15-minutos nga leksyon matag semana sulod sa panahon sa pagpakigbahin. Mahimo nimong dugangan ang sinemana nga mga leksyon sa ubang gitugutan sa Simbahan nga mga materyal, sama sa Friend o sa Liahona. Ang mosunod nga mga giya makatabang kanimo sa pagplano ug sa paghatag sa mga leksyon.

Higugmaa Kadtong Imong Gitudloan. Ipakita ang imong gugma sa mga bata pinaagi sa pag-ila sa ilang mga pangalan ug sa pagpakabana sa ilang mga interes, mga talento, ug mga panginahanglan.

Itudlo ang Doktrina pinaagi sa Espiritu. Samtang ikaw nag-andam sa mga leksyon, pag-ampo alang sa giya ug tinguhaa nga malig-on ang imong pagpamatuod sa mga baruganan nga imong itudlo. Kini makatabang kanimo sa pagtudlo pinaagi sa Espiritu.

Pagdapit aron sa Pagkat-on. Kini nga booklet gidisenyo sa pagtabang kanimo sa pagkahibalo dili lamang sa unsa ang itudlo apan usab unsaon sa pagtudlo ug sa pagdapit aron sa pagkat-on. Makatudlo ka sa doktrina sa mas epektibo nga paagi samtang imong buhaton ang mosunod nga tulo ka mga butang sa matag leksyon:

1. Ipaila ang doktrina. Iklaro sa pagpaila ang doktrina nga pagatun-an sa mga bata. Hunahunaa ang mga paagi sa pagbuhat niini pinaagi sa pulong ug sa pagtan-aw. (Alang sa pipila ka mga ehemplo, tan-awa ang mga leksyon alang sa unang semana sa Marso ug sa unang semana sa Hulyo.)

2. Awhaga ang pagsabut niini. Siguroha nga ang mga bata makaangkon og mas lawom nga pagsabut sa doktrina pinaagi sa nagkalain-laing mga pamaagi sa pagtudlo nga modani kanila sa pagkat-on, sama sa pag-awit og mga kanta, pag-role play, ug sa pagbasa og mga kasulatan.

3. Awhaga ang paggamit niini. Hatagi ang mga bata og mga oportunidad sa paggamit sa doktrina diha sa ilang mga kinabuhi. Hunahunaa sa unsa nga paagi sila makapahayag og mga pagbati mahitungod sa paghimo og usa ka tumong nga may kalabutan sa doktrina.

Kini nga booklet naghatag og kompleto nga mga leksyon alang sa pipila ka mga semana sulod sa tuig. Ang mga ideya, apan dili kompleto nga mga leksyon, giapil alang sa uban nga mga semana. Dugangi kadto nga mga ideya og pipila nga imong kaugalingon. Makakuha ka og mga ideya pinaagi sa pagbasa og ubang mga leksyon niini nga booklet. Kon adunay ikalima nga Dominggo, gamita kini nga panahon sa pagribyu sa miaging mga leksyon. Ang Espiritu makagiya kanimo samtang ikaw magplano ug mag-andam og mga kalihokan alang sa mga leksyon.

Pagtrabaho uban sa music leader samtang ikaw nag-andam sa imong mga leksyon. Ang pagpangankanta makatabang sa paglig-on sa mga doktrina nga imong gitudlo. Panagsa mahimo ka nga modapit og mga magtutudlo ug sa ilang mga klase sa pagtabang kanimo sa mga bahin sa panudlo sa ebanghelyo.

Ang pipila sa mga leksyon nagsugyot sa pagdapit og dinapit nga mga mamumulong sa pag-apil sa Primary. Kinahanglan ka nga mangayo sa pagtugot sa imong bishop o branch president sa dili pa dapiton kini nga mga tawo sa pag-apil.

Kauban sa mga leksyon mao ang daghan nga mga tabang sa pagtudlo nga makatabang kanimo sa pagpalambo sa imong abilidad sa pagtudlo. Ang mga leksyon naglakip usab og mga litrato nga makatabang kanimo sa pagkakita unsa ang sitwasyon sa usa ka kalihokan. Bisan tuod ang pagpalambo og mga kahanas sa pagtudlo importante, ang imong kaugalingong espirituhanong pagpangandam ug pagpamatuod mao ang modapit sa Espiritu sa pagpamatuod niini nga mga doktrina diha sa kasingkasing sa mga bata.

Mga kasulatan: Ang pagdapit sa mga bata sa pagkat-on gikan sa mga kasulatan makatabang kanila sa pagpalambo og usa ka tibuok kinabuhi nga gugma alang sa pulong sa Dios. Pagplano og mga paagi matag semana sa pagdapit sa mga bata sa paggamit ug sa pagkat-on gikan sa ilang mga kasulatan. Pipila sa mga bata tingali walay mga kasulatan. Ang uban tingali dili pa makamaong mobasa. Ang mga kalihokan sa pagkat-on niining outline ug ang mga tabang sa pagtudlo diha sa mga pahina 8 ,13, ug 24 mohatag kanimo og mga ideya unsaon sa pagtudlo ginamit ang mga kasulatan.

Mga Biswal: Daghan sa mga biswal niini nga booklet makita sa internet sa sharingtime.lds.org. Pangita usab og lista sa mga kapanguhaan mahitungod sa piho nga mga hilisgutan gikan sa Friend sa friend.lds.org. Kini nga mga kapanguhaan mahimo usab nga iimprinta ug maggamit sa pagtudlo sa mga bata.

Panahon sa Pagpanganta

Ang musika sa Primary kinahanglan nga mopasiugda og kahimtang sa balaan nga pagtahud, motudlo sa ebanghelyo, ug motabang sa mga bata nga mobati sa impluwensya sa Espiritu Santo ug sa kalipay nga moabut pinaagi sa pagkanta. Ang 20 ka minutos nga bahin sa panahon sa pagpakigbahin kinahanglan nga igahin sa pagpanganta ug sa pagtudlo og musika. Kini mosiguro nga ikaw adunay igo nga panahon sa pagtudlo og bag-o nga musika ug sa pagtabang sa mga bata nga malingaw sa pagkanta.

Kini nga booklet naglakip og bag-o nga kanta nga tun-an sa mga bata niining tuiga (tan-awa sa pahina 28). Kini naglakip usab og seksyon nga nag-ulohan “Unsaon Paggamit og Musika sa Primary” (tan-awa sa mga pahina 26–27) ug dugang nga mga ideya alang sa pagtudlo og mga kanta ngadto sa mga bata (tan-awa sa pahina 7).

Pagpangandam: Pag-ampo alang sa paggiya ug tinguhaa ang impluwensya sa Espiritu samtang ikaw nag-andam sa imong mga panahon sa pagpakigbahin. Samtang ikaw nag-andam ug nagtudlo uban sa Espiritu, Siya mopamatuod sa kamatuoran sa unsay imong itudlo. (Tan-awa sa PWLMT, 13.)

Mga Giya alang sa Pasundayag sa Sakrament Miting

Ubos sa direksyon sa bishop o branch president, ang pasundayag sa sakrament miting sa mga bata ihatag atol sa ikaupat nga bahin sa tuig. Pakigkita sa magtatambag sa bishopric o kapangulohan sa branch kinsa nagdumala sa Primary sayo sa tuig aron sa paghisgot sa pasiuna nga mga plano. Pangayoa ang iyang pagtugot kon ang mga plano nahuman na.

Pagplano alang sa mga bata nga mopasundayag sa programa pinasikad sa binulan nga panahon sa pagpakigbahin nga mga tema. Sa tibuok tuig, pagtipig og mga mubo nga sulat sa mga pakigpulong ug personal nga mga kasinatian sa mga bata nga posibleng magamit sa pasundayag. Samtang ikaw nagplano alang sa mga bata nga mopakigbahin unsa ang ilang nakat-unan mahitungod sa tema niini nga tuig, paghunahuna og mga paagi nga makatabang sila sa kongregasyon sa paghatag og pagtagad sa mga doktrina sa ebanghelyo nga ilang gitudlo. Usa ka sakop sa bishopric mahimong motapos sa miting pinaagi sa mubo nga pakigpulong.

Samtang ikaw nag-andam sa pasundayag, hinumdumi ang mosunod nga mga giya:

• Ang mga praktis kinahanglan dili moiban og oras gikan sa mga klase o sa mga pamilya nga wala kinahanglana.

• Mga hulagway, mga saput nga gamitunon, ug mga pasundayag sa media dili angay sa pasundayag sa sakrament miting.

Ang mga kanta nga gigamit sa pasundayag mahimong kantahon sa daghan o gagmay nga grupo, mag-solo ug mag-duet, sa usa ka pamilya, o duyugan og instrumento nga de-kwerdas. Siguradoha nga mahibaloan gayud sa mga bata ang mga pulong ug makakanta gikan sa ilang mga kasingkasing.

Mga Kapanguhaan nga Gigamit dinhi Niini nga Booklet

Ang mosunod nga minubo nga pagkasulat gigamit sa tibuok booklet:

(CS)Children’s Songbook

PWLMTPagtudlo, Walay Labaw ka Mahinungdanon nga Tawag

Daghan nga mga leksyon naglakip og mga sugyot alang sa paggamit og mga hulagway. Ikaw makakita og mga hulagway diha sa Libro sa mga Hulagway sa Ebanghelyo,sa Pakete sa mga Hulagway sa Ebanghelyo, sa mga pakete sa hulagway sa manwal sa Primary, ug mga magasin sa Simbahan ug sa internet diha sa images.lds.org.

Mga Kapanguhaan: Makakaplag ikaw og dugang nga mga kapanguhaan sa pagtudlo sama sa mga koloranan nga pahina, mga istorya, ug mga kalihokan diha sa Friend, Liahona, manwal sa nursery, ug sa Libro sa mga Hulagway sa Ebanghelyo. Gamita kini nga mga kapanguhaan aron sa pagdugang sa imong mga leksyon.

Kurikulum alang sa 2016

Kinatibuk-ang Kurikulum

Nursery: Tan-awa ang Inyong Gagmay nga mga Bata; Sunbeams: Primary 1; CTR 4–7 Primary 2; Valiant 8–11: Primary 4

Sukaranan nga Kurikulum

Sunbeams: Primary 1; CTR 4–7: Primary 2; Valiant 8–11: Primary 4