Enero

Ang mga Kasulatan Mga Pulong sa Dios

Kanta: “Kon Maminaw sa Dughan Ko”

(pahina 28 niini nga outline)

“Pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton” (2 Nephi 32:3).

Dugangi ang mga ideya nga gihatag dinhi og pipila nga gikan sa imong kaugalingon. Pagplano og mga paagi sa pagpaila sa doktrina ngadto sa mga bata ug tabangi sila sa pagsabut niini ug sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”

Semana 1: Ang mga kasulatan mga pulong sa Dios.

Ipaila ang doktrina: Pagdala og lain-laing mga libro ngadto sa Primary, (sama sa libro sa pangluto, libro sa mga sugilanon, ug libro sa eskwelahan) ug pagdapit og pipila ka mga bata sa pagpakita niini nga mga libro ug sa mga kasulatan ngadto sa Primary. Dapita ang mga bata sa paghisgut sa mga pagkasusama ug sa mga kalainan tali sa mga libro, lakip ang mga tagsulat niini. Ipasabut nga ang mga kasulatan lahi kay kini gisulat man pinaagi sa mga propeta sa Dios ug kini mga pulong sa Dios.

Awhaga ang pagsabut niini: Sultihi ang mga bata nga kita adunay upat ka basahon nga atong gigamit sa Simbahan: ang Biblia, ang Basahon ni Mormon, ang Doktrina ug mga Pakigsaad, ug Perlas nga Labing Bililhon. Ipasabut nga gitawag nato kini og “sumbanang mga basahon.” Tudloi ang mga bata mahitungod sa matag usa niini nga libro. Paglakip og pipila ka istorya o mga pagtulun-an nga anaa sa matag libro. Pagdula og pagpares-pares nga dula (tan-awa sa PWLMT, 169) uban sa mga ngalan sa sumbanan nga mga basahon ug sa mga litrato nga nagrepresentar og usa ka istorya o pagtulun-an nga anaa sa matag libro.

Awhaga ang paggamit niini: Dapita ang pipila ka mga bata sa pagpaambit sa ilang paborito nga kasulatan o istorya sa kasulatan. Awhaga sila sa pagpakigbahin kon unsa ang ilang nakat-unan tungod sa pagtuon sa mga kasulatan. Ihatag ang imong pagpamatuod kabahin sa mga kasulatan.

Tinuig nga Hagit: Sa tibuok tuig, hatagi ang mga bata og kahigayunan sa pagpaambit sa ilang mga nakat-unan gikan sa ilang pagbasa sa kasulatan. Makahatag kini sa mga bata og kahigayunan sa pagpaambit sa ilang mga kasinatian ug makatabang sa pagdasig sa uban sa pagbasa sa mga kasulatan diha sa ilang balay.

Semana 2: Kinahanglan kita nga magbusog sa mga pulong ni Kristo.

Awhaga ang pagsabut ug ang paggamit niini: Ipasabut nga ang Ginoo migamit og mga pulong nga may dala nga aksyon sa paghulagway kon unsaon gayud nato sa pagtuon ang mga kasulatan. Ipakita ang mosunod nga mga pulong ug hugpong sa mga pulong diha sa mga poster libut sa kwarto: pagbusog (tan-awa sa 2 Nephi 32:3); mahala (tan-awa sa D&P 84:85); pagsiksik nga makugihon (tan-awa sa Mosiah 1:7); hugot nga mogunit (tan-awa sa 1 Nephi 15:24). Pagplano sa mamugnaon nga paagi sa pagpaila ug sa pagpasabut niini nga mga ideya ngadto sa mga bata. Sama pananglit, mahimo nimong dapiton ang mga bata sa pagpakita sa kalainan tali sa pagtimi-timi sa pagkaon ug sa pagbusog sa pagkaon ug dayon hisguti kon unsay kalabutan niini sa pagtuon ngadto sa mga kasulatan. Mahimo ka usab nga mangutana sa mga bata nganong kinahanglan silang “mogunit og hugot” sa kamot sa ilang mga ginikanan kon naa sa merkado nga daghang tawo ug dayon ipasabut kon unsaon nila sa paggunit og hugot ngadto sa mga kasulatan ug ngano nga sama ra kini ka importante sa paggunit og hugot sa kamot sa ilang ginikanan.

Awhaga ang paggamit niini: Hagita ang mga bata ug ang mga magtutudlo sa pagpalambo og kinaiya sa regular nga pagtuon sa kasulatan. Ipasabut nga sa matag semana, ang mga bata kinsa nakabasa o nakapaminaw sa mga kasulatan makasulat sa ilang mga pangalan sa usa ka pirasong papel ug idugang kini ngadto sa kadena nga papel. Sultihi sila nga samtang ang kadena magkataas, mao usab ang ilang kahibalo sa mga kasulatan. Hunahunaa ang paghipos sa kadena sulod sa kahon sa “bahandi” (kini nga kahon mahimo usab nga gamiton sa pagtudlo kon unsay ipasabut sa “mahala” diha sa kalihokan sa ibabaw). Awhaga ang mga bata sa pagpakigbahin sa ilang tumong sa pagtuon sa mga kasulatan uban sa ilang mga pamilya.

Kini nga kadena mahimo nga usa ka pahinumdom sa kalamboan nga moabut pinaagi sa pagbasa sa mga kasulatan.

Nathan

Ann

Juan

Andres

Pagpaapil sa tanang mga bata: Paghunahuna og mga paagi sa pagtabang sa tanang mga bata sa inyong Primary nga makaangkon og kalampusan sa pagbasa sa ilang mga kasulatan sulod sa tibuok tuig. Sama pananglit, ang mga bata nga walay suporta diha sa panimalay mahatagan og kahigayunan sa pagbasa diha sa simbahan ug dayon modugang sa ilang mga pangalan diha sa kadena nga papel.

Semana 3: Ang mga pulong ni Kristo mosulti kanato sa mga butang nga angay natong buhaton.

Awhaga ang pagsabut niini: Taptapi ang mata sa usa ka bata. Paguniti sa lain nga bata ang usa ka litrato ni Jesukristo diha sulod sa lawak sa Primary. Ipasulay sa gitaptapan nga bata ang pagpangita sa litrato nga walay motabang. Balika ang kalihokan, apan ning higayuna hangyoa ang duha ka mga bata sa paggunit og tukon, o pisi nga magrepresentar sa gunitanang puthaw nga maggiya gikan sa gitaptapan nga bata ngadto sa litrato ni Kristo. Ipasubay sa bata ang pisi padulong sa litrato. Pangutan-a: “Sa unsang paagi nga ang paggunit sa pisi susama sa pagbasa sa mga kasulatan?” (Tan-awa sa 1 Nephi 15:23–25.) Tudloi ang mga bata sa chorus sa “The Iron Rod” (Hymns, nu. 274). Pagpaambit og pipila ka ehemplo gikan sa imong kinabuhi dihang ang mga kasulatan mitudlo kanimo unsay imong buhaton. Ipasabut kon sa unsang paagi nga ang mga pagtulun-an diha sa mga kasulatan makatabang kanimo nga maduol sa Manluluwas.

Ang paggamit og mga butang sa leksyon makatabang sa mga bata nga makasabut sa mga ideya sa usa ka yano ug pamilyar nga paagi (tan-awa sa PWLMT, 164).

Semana 4: Mahimo akong masayud kon tinuod ba ang mga kasulatan.

Awhaga ang pagsabut niini: Pagdala og usa o sobra pa nga butang aron makakat-on ang mga bata mahitungod sa paggamit sa ilang lima ka mga pagbati. Sama pananglit, mahimo kang magdala og prutas o bulak, o mahimo kang motukar og pipila ka musika. Tagai ang pipila ka mga bata og higayon nga makakita, makasimhot, makahikap, makatilaw, o makadungog sa imong gidala. (Hunahunaa ang paghimo niini nga kalihokan sa ginagmay nga grupo aron ang matag bata makahigayon sa pag-apil.) Ipakita nga kita usab makakita, makahikap, makasimhot, ug makadungog sa mga kasulatan, apan aron sa pag-angkon og pagpamatuod niini nagkinahanglan kita nga makadawat og pagsaksi pinaagi sa Espiritu. Dapita ang mga bata sa pagpanganta sa “Search, Ponder, and Pray” (CS, 109). Hangyoa sila sa pagpaminaw, samtang sila manganta sa tulo ka butang nga atong mabuhat sa pagdapit sa Espiritu sa pagpamatuod nga ang mga kasulatan tinuod. Dapita ang mga bata sa paghimo og mga aksyon sa kamot alang sa mga pulong nga siksik, pamalandong, ug pag-ampo. Balika ang kanta, gamit ang mga aksyon nga ipuli sa mga pulong.

Ginagmay nga grupo: Ang pag-apil pinaagi sa ginagmay nga grupo makahatag sa mga bata og dugang nga kahigayunan sa pag-apil (tan-awa sa PWLMT, 161). Mga bata sa klase manglingkod nga naggrupo nang daan. Kini nga mga grupo mahimong gamiton alang sa mga kalihokan sa ginagmay nga grupo. Ang mga magtutudlo sa klase makatabang sa pagsiguro nga adunay partisipasyon ug mapadayon ang balaan nga pagtahud.

Awhaga ang paggamit niini: pagpakita og litrato ni Moroni, ug basaha ang Moroni 10:4–5. Dapita ang pipila ka mga bata sa pagpaambit sa ilang mga pagbati mahitungod sa mga kasulatan. Mahimo usab nilang ipaambit kon unsa ang ilang gipangbuhat sa pagbasa sa mga kasulatan sa balay. (Hangyoa daan ang pipila ka mga bata aron sila adunay igong panahon sa pagpangandam.) Awhaga ang mga bata sa pagpaambit sa ilang mga pagpamatuod sa kasulatan uban sa ilang mga ginikanan nganha sa panimalay.