Marso

Ang Langitnong Amahan Mamulong Kanato pinaagi sa Iyang mga Propeta

Kanta: “Stand for the Right”

(CS, 105)

“Unsa nga Ako ang Ginoo namulong, Ako namulong; … bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra” (D&P 1:38).

Dugangi ang mga ideya nga gihatag dinhi og pipila nga gikan sa imong kaugalingon. Pagplano og mga paagi sa pagpaila sa doktrina ngadto sa mga bata ug tabangi sila sa pagsabut niini ug sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”

Mga semana 1ug 2: Ang mga Propeta mamulong alang sa Langitnong Amahan.

Ipaila ang mga doktrina: Pagdapit og usa ka bata sa pag-adto sa atubangan sa kwarto. Ingna ang ubang mga bata sa pagsunod sa iyang mga itudlo. Hunghungi og sayon nga mga instruksyon ang bata, sama sa, “Sultihi sila sa pagbutang sa ilang mga kamot nganha sa ilang mga ulo” o “Sultihi sila sa hinay nga pagsulti og hello ngadto sa naglingkod sa ilang tapad.” Balika kini uban sa pipila ka laing sayon nga mga instruksyon, nga nagtapos sa “Sultihi sila sa pagkyugpos sa ilang mga kamot.” Pangutan-a ang mga bata kon giunsa nila sa pagkahibalo kon unsay imong gusto nga ilang buhaton. Ipasabut nga usa sa mga pamaagi sa pagpadala og mensahe sa Langitnong Amahan ug ni Jesukristo ngadto sa mga tawo sa yuta mao ang pagpakigsulti ngadto sa Ilang mga sinugo ug dayon mandoan kadtong mga sinugo sa pagpamulong ngadto sa mga katawhan. Pangutan-a, “Kinsa ang mga sinugo nga mamulong alang sa Langitnong Amahan ug ni Jesus?” Ipadungan og sulti sa mga bata ang, “Ang mga propeta mamulong alang sa Langitnong Amahan.”

Awhaga ang pagsabut niini: Sa di pa magsugod ang Primary, ipapilit ang litrato sa usa ka propeta ug ang pipila ka mga pakisayran sa kasulatan nga naghisgot mahitungod sa iyang gipangbuhat o gipangsulti diha sa ilalum sa pipila ka mga lingkuranan. Ang mga sanglitanan mahimong maglakip kang Noe (Genesis 6:13–14; 7:5, 7–10); Moises (Exodo 14:8–9, 13–14, 21–22); Samuel nga Lamanite (Helaman 14:1–8; 16:1–3); ug Joseph Smith (D&P 89). Dapita ang mga bata sa pagtan-aw sa ilawom sa ilang mga lingkuranan sa pagpangita sa mga litrato. Grupo-grupoha ang mga bata, nga adunay usa ka litrato sa kada usa ka grupo, ug paandama ug pahimoa sila og role-play sa ilang propeta. Dapita ang laing grupo sa pagtag-an kon kinsa nga propeta ang ilang gihulagway. Hisguti kon sa unsang paagi nadawat sa mga propeta ang mensahe ug unsa ang mga resulta.

Awhaga ang pagsabut niini: Pagbuhat og usa ka “Roleta sa mga Propeta” sama sa gipakita dinhi. Bahina ang lingin ngadto sa walo ka seksyon, ang matag usa may pangalan sa propeta gikan sa kanta nga “Follow the Prophet” (CS, 110–11). Pagdapit og bata sa pagtuyok sa roleta. Pagpaambit og mubo nga istorya kabahin sa propeta nga gipakita diha sa roleta (gamita ang pakisayran sa mga kasulatan nga anaa sa CS, 111, alang sa mga ideya). Dayon kantahon ang bersikulo mahitungod sa propeta diha sa “Follow the Prophet.” Dapita ang laing bata sa pagtuyok sa roleta, ug balik-balika ang kalihokan kutob sa itugot sa oras.

Ang roleta anaa makita sa sharingtime.lds.org

Moises

Abraham

Daniel

Enoch

Jonas

Noe

Adan

Samuel

Balaan nga pagtahud: Ang mga bata adunay kalagmitan nga may balaang pagtahud kon sila adunay labut sa pagkat-on. Ang mga kalihokan sa una ug ikaduhang semana naglakip sa daghang mga bata. Kadtong walay labut sa role play maapil samtang sila magtan-aw sa ilang mga higala. (Tan-awa sa PWLMT, 82–83.)

Semana 3: Gigiyahan kita og usa ka buhi nga propeta karon.

Awhaga ang pagsabut niini: Pagputol og usa ka piraso nga papel ngadto sa upat ka seksyon ug ibutang kini ibabaw sa litrato sa kasamtangan nga propeta. Sa luyo sa matag piraso isulat ang pagtulun-an sa propeta. (Dangup ngadto sa isyu sa komperensya sa Ensign o Liahona aron makat-un kon unsa ang kasamtangang gipamulong sa mga propeta.) Pagdapit og usa ka bata sa pagtang-tang og usa ka piraso nga papel ug ipahimo ang pagtudlo. Ipatagna sa laing mga bata unsa ang iyang gibuhat. Balika kini kauban sa ubang mga pagtulun-an. Pagpakita og kopya sa Higala o Liahona ug ipasabut nga mahimo kitang mobasa sa pulong sa mga propeta karon.

Awhaga ang paggamit niini: Patinduga ang usa ka bata ug kumpletuha kini nga pamahayag: “Akong sundon ang buhi nga propeta pinaagi sa …” Pagdapit og laing bata sa pagbalik og sulti sa gisulti sa unang bata, nga mopuno og laing paagi sa pagsunod sa propeta. Ipadayon kon duna pay oras, mag-awhag sa mga bata sa pagsulti og balik kutob sa mga ideya sa ubang mga bata kon mahimo.

Semana 4: Adunay kasiguroan sa pagsunod sa propeta.

Awhaga ang pagsabut niini: Pag-andam og yano nga mga timailhan sa dalan nga mabasa “Hunong,” “Hinay,” ug “Larga.” Pagpili og tulo ka bata nga mogunit sa mga timailhan, ug sultihi sila sa pagpataas sa mga timailhan kon ang music leader mopikpik sa ilang abaga. Sultihi ang mga bata nga ang timailhan nga Larga nagpasabut sa pagsugod og kanta; ang timailhan nga Hunong nagpasabut sa paghunong og kanta; ug ang timailhan nga Hinay nagpasabut sa pagkanta og hinay. Ipahimo sa music leader ang pagpangulo sa mga bata sa pagkanta sa “Stand for the Right” (CS, 159).

Ipasabut nga ang mga timailhan sa dalan naghimo kanatong luwas ug nagpahimangno kanato sa mga peligro sa unahan. Dayon ipasabut nga ang direksyon sa propeta susama niini nga mga timailhan sa dalan tungod kay ang Langitnong Amahan manalipod ug manalangin kanato kon kita mosunod kaniya. Bahina ang mga bata ngadto sa tulo ka grupo. Sa matag grupo, ingna ang lider o ang mas magulang nga bata sa pagpaambit og usa ka mubo nga istorya mahitungod sa panahon dihang siya (o usa gikan sa mga kasulatan) napanalipdan tungod sa pagsunod sa buhi nga propeta. Dayon pabalhina ang grupo ngadto sa laing lider sa pagpaminaw og lain na usab nga istorya. Dapita sila sa pagpanganta sa chorus sa “Follow the Prophet” samtang magbalhin-balhin sila sa lain-laing lider. Ipamatuod ang mahitungod sa mga panalangin nga moabut samtang magsunod kita sa propeta.

Awhaga ang paggamit niini: Ipa-drawing sa mga bata ang kaugalingon nilang mga timailhan sa dalan ug isulat diha niini kon unsaon nila sa pagsunod ang mga pagtulun-an sa buhing mga propeta. Ipadala nila pauli ang mga timailhan sa pagtabang kanila nga mahinumdom sa pagsunod sa propeta.

Ang mga bata may kalagmitan nga mogamit sa mga doktrina kon makahimo sila og kaugalingon nilang mga paggamit. Ang mga bata mobati usab og gugma ug kaangayan samtang ang ilang mga ideya gibalik-balik og sulti sa mga magtutudlo ug sa ubang mga bata.

Larga

Mga porma anaa sa sharingtime.lds.org

Hunong

Hinay

Larga

Mga tabang alang sa Music Leader

Aron pagtabang sa mga bata nga makakat-on sa “Stand for the Right” (CS, 159), hunahunaa ang mosunod:

• Pagpakita og litrato sa kasamtangan nga propeta ug hisguti og kadiyot ang pipila ka mga direksyon nga iyang gihatag kanato. Sultihi ang mga bata nga ang kanta nga ilang makat-unan nagpasabut sa kaimportante sa pagsunod sa propeta.

• Grupo-grupoha ang mga bata. Hatagi og usa o duha ka linya sa kanta ang matag grupo, ug dapita sila sa paghimo og aksyon nga makatabang kanila nga makahinumdom sa mga pulong. Ipatudlo sa matag grupo ang ilang aksyon ngadto sa ubang mga bata.

Kon magtudlo og kanta sa mga bata, gamita ang imong mga kamot sa pagpakita kanila sa melodiya. Ipataas ug ipaubos ang imong kamot samtang mag-usab-usab ang tuno (tan-awa sa PWLMT, 174).

Mga kanta: Ang pagpanganta mahitungod sa usa ka doktrina makatabang sa mga bata nga makakat-on ug makahinumdom niini. Ang mga bata mas makakat-on usab kon sila adunay makita nga biswal o mobuhat og kalihokan nga uyon sa musika. Ang mga sugyot alang niining bulana nagmodelo sa nagkalain-laing mga paagi sa paghimo niini. Ikonsidera ang mga ideya nga susama niini samtang magplano ka og laing mga leksyon. (Tan-awa sa PWLMT, 172–75.)