Mati

E Fetalai mai le Tama Faalelagi ia i Tatou e ala mai i Ana Perofeta

Pese: “Tu mo le Mea Tonu”

(TT, 81)

“O le mea ua fai atu ai au le Alii, ua ou fai atu ai lava; … pe fai atu i lo’u lava leo po o le leo o a’u auauna, ua tusa lava ia” (MFF 1:38).

Ia faaopoopo ni ou manatu i manatu ua tuuina atu iinei. Ia fuafua ni auala e faailoa atu ai le aoaoga faavae i tamaiti ma fesoasoani ia latou malamalama i ai ma faaaoga i o latou olaga. Fesili ifo ia te oe lava, “O le a se mea e fai e tamaiti e aoao ai, ma e mafai faapefea ona ou fesoasoani ia latou lagonaina le Agaga?”

Vaiaso 1 ma le 2: E saunoa mai perofeta mo le Tama Faalelagi.

Faailoa atu le aoaoga faavae: Valaaulia se tamaitiiti e sau i luma o le potu. Tau atu i isi tamaiti e mulimuli i ana faatonuga. Musumusu atu i le tamaitiiti ni faatonuga faigofie, e pei o le, “Fai i ai e tuu o latou lima i luga o latou ulu” po o le “Fai atu ia i latou e faatalofa lemu atu i le tagata o loo nofo i o latou autafa.” Toe fai e faaaoga ai nisi faatonuga faigofie, ae faaiu i le “Fai atu ia i latou e piilima.” Fesili i tamaiti pe faapefea ona latou iloa le mea na e manao latou te faia. Faamalamalama atu o se tasi o auala e auina mai ai e le Tama Faalelagi ma Iesu Keriso ni savali i tagata i le fogaeleele o le fetalai atu lea ia Laua auauna ma poloaiina na auauna e saunoa atu i tagata. Fesili atu, “O ai auauna ia e saunoa mai mo le Tama Faalelagi ma Iesu?” Fai i tamaiti e fai faatasi mai, “O perofeta e saunoa mai mo le Tama Faalelagi.”

Uunaia le [agaga] malamalama: A o lei amataina le Peraimeri, faapipii i lalo o ni nai nofoa se ata o se perofeta ma ni nai mau faasino lea e faamatala mai ai mea na ia faia po o sana saunoaga. O faataitaiga e mafai ona aofia ai Noa (Kenese 6:13–14; 7:5, 7–10); Mose (Esoto 14:8–9, 13–14, 21–22); Samuelu le Sa Lamana (Helamana 14:1–8; 16:1–3); ma Iosefa Samita (MFF 89). Fai i tamaiti e autilo i lalo o o latou nofoa e sue ai ia ata. Vaevae tamaiti i ni vaega, ma tofu vaega taitasi ma se ata se tasi, ma tuu i ai latou te sauniuni ma faia se gaoioiga e faatino ai le latou perofeta. Valaaulia isi vaega e mate mai le perofeta o loo latou faatinoina. Talanoa i le auala na maua ai e tagata le savali a le perofeta ma po o le a le taunuuga.

Uunaia le [agaga] malamalama: Fai se “Uili o Perofeta” e pei o le tasi lea o loo faaalia i i. Vaevae le lio i ni vaega se valu, e tofu ma le igoa o se perofeta mai le pese “Mulimuli i le Perofeta” (TT, 58–59). Valaaulia se tamaitiiti e vili le uili. Faamatala atu se tala puupuu e uiga i le perofeta o loo faaali mai i le uili (faaaoga mau faasino i le TT, 59, mo ni manatu). Ona usu lea o le fuaiupu e uiga i lena perofeta i le pese “Mulimuli i le Perofeta.” Valaaulia se isi tamaitiiti e vili le uili, ma toe fai le gaoioiga pe a lava le taimi.

E maua uili i le sharingtime.lds.org

Mose

Aperaamo

Tanielu

Enoka

Iona

Noa

Atamu

Samuelu

Migao: E sili atu le migao o tamaiti pe a faaaofiaina i latou i le aoaoina. O gaoioiga i vaiaso muamua ma le lua e aofia ai le tele o tamaiti. O i latou e le o auai i faatinoga o tala o le a auai a o latou matamata i a latou uo. (Tagai AALVSA, 89–90.)

Vaiaso 3: O loo taitaia i tatou e se perofeta soifua i lenei vaitaimi.

Uunaia le [agaga] malamalama: Tipi se fasi pepa i ni vaega se fa ma tuu i luga o se ata o le perofeta o loo i ai nei. I tua o fasi pepa taitasi tusi ai se aoaoga a le perofeta. (Tagai i lauga o konafesi o le Liahona e iloa ai po o le a se saunoaga a le perofeta talu ai nei.) Valaaulia se tamaitiiti e aveese se fasi pepa se tasi ma faatino le aoaoga. Fesili atu i isi tamaiti e mate mai le mea o loo faia e le tamaitiiti. Toe fai mo isi aoaoga. Faaali atu se kopi o le Liahona ma faamalamalama atu e mafai ona tatou faitau i saunoaga a le perofeta i le aso.

Uunaia le faaaogaaga: Tuu atu i se tamaitiiti e tu i luga ma faauma le faamatalaga lenei: “O le a ou mulimuli i le perofeta soifua e ala i le …” Valaaulia se isi tamaitiiti e toe fai le faamatalaga muamua, ma faaopoopo se isi auala e mulimuli ai i le perofeta. Faaauau pe a lava le taimi, uunaia tamaiti e toe fai le tele o manatu o isi tamaiti.

Vaiaso 4: E i ai le saogalemu i le mulimuli i le perofeta.

Uunaia le [agaga] malamalama: Saunia ni faailo faigofie o le auala e faitauina faapea “Taofi,” “Alu Lemu,” ma le “Alu.” Filifili ni tamaiti se toatolu e uu i luga faailo, ma ta’u atu ia i latou e tuu i luga ia faailo pe a popo o latou tauau e le taitai musika. Tau atu i tamaiti o le faailo o le Alu e amata ai ona pepese; o le faailo o le Taofi e taofi ai le pepese; ma o le faailo o le Alu Lemu o lona uiga o le pepese lemu. Tuu atu i le taitai musika e taitaia tamaiti i le usuina o le pese “Tu mo le Mea Tonu” (TT, 81).

Faamalamalama atu o faailo o le auala tatou te saogalemu ai ma lapataia ai i tatou i faigata o i luma atu. Ona faamalamalama atu lea o faatonuga a le perofeta e pei lava foi o nei faailo o le auala aua e puipuia ma faamanuiaina ai i tatou e le Tama Faalelagi pe a tatou mulimuli atu i ai. Vaevae tamaiti i ni vaega se tolu. Tuu atu i se taitai po o se tamaitiiti matua i vaega taitasi, e faasoa mai se tala puupuu e uiga i se taimi na puipuia ai o ia (po o se tasi mai tusitusiga paia) e ala i le mulimuli i le perofeta. Ona tuu lea i vaega e o i se isi taitai e faalogologo i se isi tala. Valaaulia i latou e usu le tali o le pese “Mulimuli i le Perofeta” a o latou feoai i le va o taitai. Molimau atu e oo mai faamanuiaga pe a tatou mulimuli i le perofeta.

Uunaia le faaaogaaga: Tuu atu i tamaiti e tusi a latou lava faailo o le auala ma tusi ai i luga pe faapefea ona latou mulimuli i aoaoga a perofeta soifua. Tuu atu ia i latou e ave ia faailo i le fale e fesoasoani ia i latou e manatua ai ia mulimuli i le perofeta.

O le a sili atu le faaaogaina e tamaiti o aoaoga faavae pe afai latou te fauina a latou lava auala e faaaoga ai. E lagona foi e tamaiti le alofa ma le faatauaina pe a toe ta’u mai o latou manatu e le faiaoga po o isi tamaiti.

Alu

E maua faatusa [shapes] i le sharingtime.lds.org

Taofi

Lemu

Alu

Fesoasoaniga mo le Taitai Musika

Ina ia fesoasoani i tamaiti e aoao le pese “Tu mo le Mea Tonu” (TT, 81), mafaufau i mea nei:

• Faaali atu se ata o le perofeta o i ai nei ma talanoaina puupuu ni isi o faatonuga ua ia tuuina mai ia i tatou. Tau atu i tamaiti o le pese o le a latou aoaoina o loo faamatala ai le taua o le mulimuli i le perofeta.

• Vaevae tamaiti i ni vaega. Avatu i vaega taitasi se laina se tasi pe lua o le pese, ma valaaulia i latou e fai se taga faatino o le a fesoasoani ia i latou e manatua ai ia upu. Tuu atu i vaega taitasi e aoao atu a latou taga i isi tamaiti.

Pe a aoaoina i tamaiti se pese, faaaoga lou lima e faaali atu ai ia i latou le fati. Sii i luga ma tuu i lalo lou lima a o fesuiai le leo (tagai AALVSA, 181).

Pese: O le usuina o se pese e uiga i se aoaoga faavae o le a fesoasoani lea i tamaiti e aoao ma manatua ai. O le a sili atu foi ona aoaoina e tamaiti pe a vaai i se mea faitino pe fai se gaoioiga e o faatasi ma se musika. O fautuaga mo lenei masina o loo faataitaia ai ni nai auala eseese e fai ai lenei mea. Mafaufau i ni manatu e tali tutusa ma nei mea a o e fuafuaina isi lesona. (Tagai AALVSA, 181–84.)