Mayo

Ang Simbahan ni Jesukristo Gipahiuli na

Kanta: “Pagdayeg sa Tawo,” mga bersikulo 1 ug 3

( Mga himno ug Mga Awit sa Mga Bata, nu. 50)

“Ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya! (Joseph Smith—Kasaysayan 1:17).

Dugangi ang mga ideya nga gihatag dinhi og pipila nga gikan sa imong kaugalingon. Pagplano og mga paagi sa pagpaila sa doktrina ngadto sa mga bata ug tabangi sila sa pagsabut niini ug sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”

Semana 1: Ang Simbahan ni Jesukristo gipahiuli na.

Ipaila ang doktrina: Sa dili pa ang Primary, isulat ang ikaunom nga artikulo sa hugot nga pagtuo sa pisara. Hangyoa ang mga bata sa pagpiyong sa ilang mga mata. Sultihi sila nga human sa pagkamatay ni Jesukristo, ang mga tawo nahimong dautan ug ang Iyang ebanghelyo ug priesthood gikuha gikan sa yuta. Ipasabut nga mao kini ang gitawag og Apostasiya, ug ang mga katawhan anaa sa espirituhanong kangitngit—hangtud nga gipahiuli ni Jesus ang Iyang Simbahan pinaagi ni Joseph Smith. Guniti pataas ang litrato sa Unang Panan-awon, ug ingna ang mga bata sa pagbuka sa ilang mga mata. Tabangi ang mga bata sa pagmemorya sa ikaunom nga artikulo sa hugot nga pagtuo pinaagi sa pagpabasa kanila og dungan niini nga kusog. Papasa ang pipila ka mga pulong, ug balika kini hangtud ang tanang mga pulong mapapas ug ang mga bata makamemorya na sa artikulo sa hugot nga pagtuo.

Dasiga ang pagsabut niini: Paghimo og ginunting nga mga pulong alang sa matag usa nga mga katungdanan diha sa tsart nga gipakita sa ubos. Isulat ang title ug mga katungdanan diha sa pisara sigun sa gipakita, ug pagbilin og blanko nga kolum sa tunga sa pagrepresentar sa mga katungdanan. Bahina ang mga bata ngadto sa lima ka grupo, ug hatagi ang matag grupo og usa sa “mga Katungdanan” nga ginunting nga pulong. Dapita ang matag grupo sa pagbutang sa ilang ginunting nga pulong sa husto nga dapit diha sa pisara. Ipasabut nga ang gipahiuli nga Simbahan adunay susamang mga matang sa mga lider sa Simbahan dihang si Jesukristo dinhi sa yuta.

TITLE NGA GIGAMIT SA UNA NGA SIMBAHAN	MGA KATUNGDANAN	TITLE NGA GIGAMIT SA GIPAHIULI NGA SIMBAHAN
Apostol	Mamahimong linain nga saksi ni Jesukristo	Apostol
Propeta	Mamulong sa kabubut-on sa Langitnong Amahan	Propeta
Pastor	Mangulo og gamay nga pundok sa mga Santos	Bishop
Magtutudlo	Magtudlo sa ebanghelyo	Magtutudlo
Ebanghelista	Maghatag og espesyal nga mga panalangin	Patriyarka

Ang mga ginunting nga mga pulong anaa sa sharingtime.lds.org

Managlahi og edad nga mga grupo: Planoha ang imong mga panahon sa pagpakigbahin sa pagpaapil sa mas magulang ug mas manghud nga mga bata. Sama pananglit, sa ikaduha nga kalihokan sa semana 1, mahimo ka nga mogamit og mga puppet nga ibutang sa tudlo aron sa pagtabang sa mga bata nga makahinumdom sa matag ulohan. Sa kalihokan sa semana 2, mahimo nimong bahinon ang mas manghod nga mga bata ngadto sa mga grupo sa klase ug ipasay-say sa magtutudlo ang mga istorya ngadto kanila ug dayon iribyu pinaagi sa pagtudlo ngadto sa mga litrato ug maghatag og mga pangutana.

Ang mga puppet nga ibutang sa tudlo anaa sa sharingtime.lds.org

Semana 2: Si Joseph Smith mao ang propeta sa Pagpahiuli.

Awhaga ang pagsabut niini: Pagkuha og mga litrato sa mga panghitabo gikan sa Pagpahiuli sa Simbahan. Bahina ang han-ay sa mga pulong nga “si Joseph Smith mao ang propeta sa Pagpahiuli” ngadto sa daghang seksyon sama kadaghana sa mga litrato, ug pag-andam og ginunting nga pulong alang sa matag pulong o hugpong sa mga pulong (tan-awa ang sanglitanan). Grupo-grupoha ang mga bata, ug hatagi ang matag grupo og usa sa ginunting nga mga pulong, usa ka litrato, ug usa ka pakisayran sa kasulatan nga naghulagway kon unsay panghitabo diha sa litrato. Hangyoa ang mga bata sa pagbasa sa mga kasulatan ug hisguti kon unsay panghitabo diha sa litrato. Dayon ingna ang matag grupo sa pagpakigbahin sa ilang istorya ngadto sa ubang mga Primary. Hisguti ang tahas ni Joseph Smith diha sa matag hitabo, ug ipahunahuna sa mga bata mahitungod sa unsay epekto sa panghitabo o unsay mahimong epekto niini sa ilang kinabuhi. Ibutang ang matag litrato ug ang ginunting nga pulong sa pisara nga gihan-ay. Kon ang tanang ginunting nga mga pulong anaa na sa pisara, ipadungan og basa ang han-ay sa mga pulong.

Ang ginunting nga mga pulong ug mga hulagway anaa sa sharingtime.lds.org

Si Joseph Smith mao ang propeta sa Pagpahiuli.

JS—K 1:5–13

JS—K 1:14–20

JS—K 1:30–35

JS—K 1:34–35, 67

JS—K 1:68–73

D&P 109:2–4

Semana 3: Ang Basahon ni Mormon mao ang lain nga tugon ni Jesukristo.

Awhaga ang pagsabut niini: Basaha og dungan ang ulohan sa Basahon ni Mormon gikan sa ulohan nga pahina. Basaha og kusog ang mosunod nga mga kasulatan, ug ipaisa sa mga bata ang ilang mga kamot kon madungog nila ang pipila ka ngalan sa Manluluwas: 2 Nephi 19:6; Alma 5:38; 3 Nephi 5:26. Kon ang mga bata makaila sa mga title kon unsa sila, isulat kini sa pisara. Pagpili og ubay-ubay nga mga title, ug ipasabut kon giunsa sa Manluluwas sa pagtuman niadtong mga tahas

Awhaga ang paggamit niini: Hatagi ang matag bata og usa ka bookmark nga adunay han-ay sa mga pulong nga “Ang Basahon ni Mormon mao ang lain nga tugon ni Jesukristo” nga nakasulat niini. Dapita sila sa pag-adorno sa ilang bookmark ug sa paggamit niini diha sa ilang mga kasulatan. Hunahunaa ang pagpareport sa pipila ka mga bata mahitungod sa ilang tumong sa paghimo og kinaiya sa regular nga pagtuon sa kasulatan (tan-awa sa, semana 2). Mahimo nimo silang dapiton sa pagpaambit sa ilang gibati kabahin sa tudling sa mga kasulatan nga ilang nabasa.

Ang mga bookmark anaa sa sharingtime.lds.org

Ang Basahon ni Mormon usa ka lain nga tugon ni Jesukristo

Semana 4: Ang priesthood gipahiuli na.

Ipaila ang doktrina: Pagpakita sa mga bata og butang nga nagkinahanglan og kuryente. Dayon ipakita nga dili kini molihok kon walay tukma nga kuryente. Paguniti pataas sa usa ka bata ang litrato ni Kristo nga nag-orden sa Iyang mga Apostoles. Ipasabut nga ang Simbahan ni Kristo dili makalihok kon wala ang gahum sa priesthood. Ipatago sa bata ang litrato diha sa iyang luyo. Ipasabut nga human sa pagkamatay sa mga Apostoles ni Kristo, ang awtoridad sa priesthood nawala. Ingna ang lain nga bata sa pagpakita og litrato mahitungod sa pagpahiuli sa priesthood. Ipamatuod nga ang Dios mipahiuli sa priesthood pinaagi ni Joseph Smith.

Awhaga ang pagsabut niini: Paghangyo og usa nga mobasa sa D&P 107:1, ug ipapaminaw sa mga bata ang mga pangalan sa duha ka priesthood. Pagbutang sa pisara og litrato sa pagpahiuli sa Aaronic Priesthood ug usa ka litrato sa pagpahiuli sa Melchizedek Priesthood. Isulat ang Aaronic o Melchizedek ibabaw sa tukma nga litrato. Hisguti kon si kinsa ang mipahiuli, o midala og balik, sa matag usa niini nga priesthood ngadto kang Joseph Smith (tan-awa sa Joseph Smith—Kasaysayan 1:72). Ipakita sa mga bata ang litrato sa pipila ka mga ordinansa sa priesthood, sama sa pagbunyag, pagkumpirma, pag-apud-apod sa sakrament, pagpanalangin sa sakrament, ug pag-ayo sa masakiton. Dapita ang mga bata sa pagpasa sa mga litrato samtang sila manganta sa “The Priesthood Is Restored” (CS, 89). Pahunonga ang musika bisan kanus-a, ug hangyoa ang mga bata nga naggunit sa mga litrato sa pagbarug dinha sa mga pulong nga Aaronic o Melchizedek sa pagpakita sa gahum nga gikinahanglan sa pagpahigayon niana nga ordinansa. Balika kutob sa itugot sa panahon.

Awhaga ang paggamit niini: Ipahunahuna sa mga bata kon sa unsang paagi ang priesthood nakapanalangin kanila. Dapita sila sa paghimo og kard sa pasalamat o litrato nga ikahatag ngadto sa tighupot sa priesthood nga ilang nailhan (sama sa bishop, magtutudlo, amahan, o misyonaryo).

Pagpaambit sa mga pagbati: Hatagi ang mga bata og kahigayunan sa pagpaambit sa ilang mga pagbati mahitungod sa ebanghelyo. Kini modapit sa Espiritu ug maglig-on sa panabut sa mga bata kon sa unsang paagi ang doktrina magamit sa ilang mga kinabuhi. (Tan-awa sa PWLMT, 63–65.)

Sa kalihokan diha sa semana 4, ikaw adunay kahigayunan sa pagsuta sa panabut sa mga bata. Ang pagbalik-balik makasilsil sa konsepto diha sa ilang mga hunahuna.