Nobyembre

Ang Balaang Pagtahud Mao ang Paghigugma ug Pagtahud sa Dios

“Higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan” (Mateo 22:37).

Dugangi ang mga ideya nga gihatag dinhi og pipila nga gikan sa imong kaugalingon. Pagplano og mga paagi sa pagpaila sa doktrina ngadto sa mga bata ug tabangi sila sa pagsabut niini ug sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”

Semana 1: Ang balaang pagtahud mao ang paghigugma ug pagtahud sa Dios.

Ipaila doktrina: Pagpakita og litrato sa usa ka bata nga nag-ampo, ug ipasabut nga ang bata nagpakita og gugma ug pagtahud sa Dios. Sultihi ang mga bata nga naghunahuna ka og pulong nga adunay kinse ka letra nga nagpasabut og gugma ug pagtahud sa Dios. Pagbadlis og kinse ka blanko nga linya diha sa pisara, usa sa matag letra sa pulong nga balaang pagtahud, ug dapita ang mga bata sa pagtag-an og mga letra. Samtang makatag-an sila og husto nga mga letra, isulat kini sa tukma nga mga blanko. Mahimo nimong patabangon ang mas magulang nga bata sa pagtabang kanimo. Alang sa mas manghod nga mga bata, ipakita ang litrato ug pangutan-a sila kon giunsa nila sa pagkahibalo nga ang bata naghimo sa balaang pagtahud. Pasultiha og dungan ang mga bata, “Ang balaang pagtahud mao ang paghigugma ug pagtahud sa Dios.”

Awhaga ang pagsabut niini: Hangyoa ang mga bata sa pag-abli sa ilang mga kasulatan ug mobasa sa Juan 14:15. (Kon ang mga bata nakamemorya niini sa miaging tuig, mahimo nimo silang hangyoon sa pag-recite niini.) Pangutan-a ang mga bata kon unsaon nato sa pagpakita ang atong gugma alang kang Jesukristo. Kantaha ang “Reverence Is Love” (CS, 31). Ingna ang mga bata sa pagbutang sa ilang mga kamot diha sa ilang kasingkasing sa matag higayon nga makadungog sila sa pulong nga “balaang pagtahud” o “motahud.”

Pagribyu: Ang pagsumpay sa usa ka doktrina ngadto sa pisikal nga kalihokan o biswal makatabang sa mga bata sa paghinumdom niini (tan-awa sa PWLMT, 182–83). Ang ikaduhang kalihokan sa semana 1 makatabang sa mga bata nga makahinumdom nga ang balaang pagtahud may kalabutan sa gugma alang sa Dios pinaagi sa pagdapit kanila sa pagbutang sa ilang kamot diha sa ilang kasingkasing. Hunahunaa ang pagribyu niini nga doktrina sulod sa pipila ka bulan pinaagi sa pagbutang sa imong kamot diha sa imong kasingkasing kon mag-awhag ka og balaang pagtahud.

Awhaga ang paggamit niini: Bahina ang mga bata ngadto sa ginagmay nga grupo, ug pahisguta sila sa mga paagi kon unsaon nila sa pagpakita og balaang pagtahud alang sa Langitnong Amahan ug kang Jesukristo sa usa sa mosunod nga mga sitwasyon: kon anaa sila sa simbahan, kon sila mag-ampo ug kon sila anaa sa balay o kauban sa mga higala. Ang mas manghod nga mga bata mahimong mag-drawing og mga litrato kon unsa ang mahimo nilang buhaton. Ipahimo sa pipila ka mga bata ang pagpakigbahin sa ilang mga ideya diha sa tibuok grupo. Awhaga sila sa pagpaambit sa ilang mga ideya kauban sa ilang mga pamilya sa panimalay.

Semana 2: Ang balaang pagtahud panahon sa sakrament makatabang kanako sa paghinumdom kang Jesukristo.

Awhaga ang pagsabut ug ang paggamit niini: Dapita ang bishop o branch president ug pipila ka mga tighupot sa Aaronic Priesthood sa pagtudlo sa mga bata kabahin sa sakrament. Kon mahimo, hangyoon nimo sila sa pagdala sa mga bata sa sulod sa chapel ug tudloan sila kon unsay gisimbolo sa sakrament ug sa pagpakita kanila sa lamesa sa sakrament, sa dapit diin sila magluhod sa paghalad sa pag-ampo, ug sa panapton nga gigamit sa pagtabon sa sakrament. Pagdapit og lain pang tighupot sa Aaronic Priesthood sa pagpasabut kon unsay iyang gihimo sa pag-apud-apod sa sakrament matag semana ngadto sa kongregasyon ug ngano nga kini usa ka sagrado nga pribilehiyo. Pangutan-a ang mga bata kon unsa ang gipanghimo sa mga naghupot sa priesthood sa pagpakita og pagtahud alang sa Dios kon sila mopanalangin sa sakrament (magluhod sa pag-ampo, magtabon sa sakrament sa puti nga panapton, ug magsinina ug molihok sa usa ka kinaiya nga may balaang pagtahud). Dapita ang mga bata sa pagpaambit kon unsa ang ilang mahimo sa pagpakita og pagtahud kang Jesukristo panahon sa pagpangalagad sa sakrament.

Kon magdapit og mga dinapit nga mamumulong sa Primary, pahinumdumi sila sa paghimo sa ilang mensahe nga yano aron ang mga bata makasabut. Ang tanang dinapit nga mamumulong kinahanglan adunay pagtugot sa bishopric.

Semana 3: Makapakita ako og balaang pagtahud sa mga sagradong dapit ug mga butang.

Ipaila ang doktrina: Isulat sa pisara ang, “Makapakita ako og balaang pagtahud alang sa sagradong mga dapit ug mga butang” ug paghangyo og bata sa pagbasa niini sa tibuok nga Primary. Hangyoa ang mga bata sa pagpiyong sa ilang mga mata ug sa pag-isa sa ilang mga kamot kon madungog nila nga aduna kay gihulog nga sinsilyo o butones. Sultihi ang mga bata nga ang building sa simbahan usa ka sagrado nga dapit ug ang hilum nga paglingkod ug ang pagpaminaw og maayo maoy usa ka paagi nga kita makapakita sa atong balaang pagtahud. Dapita ang mga bata sa pagpakigbahin sa pipila ka laing mga butang nga ilang mahimo diha sa mga building sa simbahan sa pagpakita og balaang pagtahud.

Awhaga ang pagsabut niini: Pagpakita og litrato ni Moises ug sa nagdilaab nga sampinit, ug isaysay ang istorya nga anaa sa Exodo 3:1–10. Basaha og kusog ang bersikulo 5 ug papaminawa ang mga bata kon ngano nga ang Ginoo misugo kang Moises sa paghubo sa iyang mga sapatos. Ipasabut nga kita dili na mohubo sa atong mga sapatos aron magmatinahuron, apan adunay daghang butang nga atong mahimo sa pagpakita og balaang pagtahud alang sa sagradong mga dapit ug sa sagradong mga butang.

Awhaga ang paggamit niini: Ipakita ang pipila sa mosunod nga mga litrato: templo o building sa simbahan, usa ka panimalay, pamilya, usa ka tawo nga nag-ampo, usa ka bata, mga kasulatan, pundok sa mga bata, usa ka klase sa Primary, ug ang sakrament. Guniti pataas ang usa ka lapad nga panapton isalipod sa tanang litrato ug pagtangtang og usa ka litrato. Kuhaa ang panapton ug pasultiha ang mga bata diha kanimo kon unsa nga litrato ang nawala. Ipakita ang nawala nga litrato ug dapita ang mga bata sa pagpaambit og paagi nga sila makapakita og balaang pagtahud sa dapit o butang nga anaa sa litrato. Balika sa lain na usab nga litrato.

Unsa ang buhaton sa mga bata aron makakat-on? Ang pagpangutana niini samtang ikaw nag-andam sa mga kalihokan makatabang sa mga bata nga makakat-on pinaagi sa pag-apil. Sama pananglit, ang ikatulo nga kalihokan sa semana 3 nagtugot sa tanang mga bata sa pag-apil sa panghisgot, sa pagtan-aw og mga litrato, ug sa pagpakigbahin og mga ideya.

Semana 4: Ang balaang pagtahud ngadto sa Dios nagtabang kanako sa pagrespeto ug sa paghigugma sa uban.

Awhaga ang pagsabut niini: Kantaha ang mosunod nga mga kanta. Human sa matag kanta, hisguti ang nag-uban nga mga pangutana.

• “Reverence Is Love” (CS, 31). Balika sa pagsulti ang tudling nga nag-ingon, “Kon ako may balaang pagtahud, makita kini sa akong pulong ug sa akong mga buhat.” Pangutan-a: Unsa ang pipila ka mga pulong o hugpong sa mga pulong nga nagpakita og pagtahud ngadto sa Langitnong Amahan o sa uban? Unsa ang pipila ka butang nga atong mahimo sa pagpakita og pagtahud alang sa uban?

• “Kindness Begins with Me” (CS, 145). Pangutan-a: Unsa ang pipila ka pamaagi nga kita makapakita sa atong kamabination sa atong mga higala?

• “I’ll Walk with You” (CS, 140–41). Pangutan-a: Kinsa ang pipila ka mga tawo ang nagkinahanglan sa atong kamabination? Unsaon nato sa pagpakita og kamabination ngadto kanila?

Pagtudlo pinaagi sa ehemplo unsaon sa pagpakita og gugma ug pagtahud alang sa uban (tan-awa sa PWLMT, 18–19). Pangalagari ang mga magtutudlo sa imong Primary pinaagi sa pagtanyag og pagdasig ug pagsuporta. Dayon tabangi ang mga bata sa pagkakita kon unsaon nila sa paghigugma ug pagdasig ang usag usa.