Oktubre

Ang Pag-ampo Mao ang Matinahuron nga Pagpakigsulti tali sa Dios ug Kanako

“Kon aduna kaninyo’y kulang sa kaalam, papangayoa siya sa Dios, nga naghatag ngadto sa tanan nga mga tawo sa walay pagdumili, ug sa walay pagkasuko; ug kini ihatag ngadto kaniya (Santiago 1:5).

Dugangi ang mga ideya nga gihatag dinhi og pipila nga gikan sa imong kaugalingon. Pagplano og mga paagi sa pagpaila sa doktrina ngadto sa mga bata ug tabangi sila sa pagsabut niini ug sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”

Pagpangandam: Samtang magplano ka sa imong mga panahon alang sa pagpakigbahin, basaha og una ang tanan nga mga leksyon alang sa mao nga bulan. Dayon timbang timbanga ang mga kalihokan nga giplano nimong gamiton sumala sa panahon nga anaa kanimo ug sa mga panginahanglan sa imong Primary. Sama pananglit, mahimo nimong kompletuhon ang katunga sa mas taas nga kalihokan sa usa ka semana ug humanon kini sa mosunod nga semana o balikon ang mas mugbo nga mga kalihokan aron matabangan ang mga bata nga makaribyu. (Tan-awa sa PWLMT, 98–99.)

Semana 1: Ako mahimo nga mag-ampo sa Langitnong Amahan.

Ipaila ang doktrina: Hangyoa ang usa ka ginikanan ug bata sa pagbarug sa atubangan sa mga bata. Dapita ang bata sa pagpangutana sa iyang ginikanan og usa ka pangutana, ug ipatubag sa ginikanan. Dayon hangyoa ang ginikanan sa pagbiya sa kwarto ug isirado ang pultahan. Pangutan-a ang mga bata kon unsaon nila sa pagpakigsulti sa ilang mga ginikanan kon sila wala diha o dili nila kauban (sama pananglit, paghimo og sulat o pagpakigsulti diha sa telepono). Ipasabut nga ang Dios mao ang atong Amahan ug kita Iyang mga anak; tungod kay kita wala sa Iyang presensya, mihatag Siya kanato og paagi sa pagpakigsulti ngadto Kaniya. Pangutan-a ang mga bata kon kahibalo ba sila kon unsaon sa pagpakigsulti ngadto sa Dios. Pasultiha ang mga bata human nimo, “Ako mahimo nga mag-ampo sa Langitnong Amahan.”

Awhaga ang pagsabut niini: Kantaha ang “I Pray in Faith” (CS, 14). Paghimo og kopya sa mapakli-pakli nga basahon nga anaa sa pahina 19 sa manwal sa nursery, Tan-awa ang Inyong Gagmayng mga Bata, alang sa matag bata. Dapita ang mga bata sa pagkolor sa mga litrato. (Ang mas magulang nga mga bata mahimong mosulat diha sa mga palid og pipila ka mga butang nga sila mapasalamaton ug sa pipila ka butang nga ilang mapangayo sa Langitnong Amahan. Dayon mahimo nimo silang dapiton sa pagpakigbahin sa ilang mga ideya kauban sa tibuok nga Primary.) Pakantaha og usab ang mga bata sa kanta samtang magribyu sa ilang mapakli-pakli nga mga basahon.

Ang pagplano og mga kalihokan nga maglakip sa mga bata sa nagkalain-laing pamaagi magdugang sa panabut ug paggamit niini. Sama pananglit, niini nga kalihokan ang mga bata manan-aw, manganta, magkolor, magsulat, maminaw, ug magpaambit.

Ang mapakli-pakli nga basahon anaa sa sharingtime.lds.org

Makaampo Ako Ngadto sa Langitnong Amahan

Mosugod ako sa pag-ingon, “Among Langitnong Amahan.”

Moposalamat ako Kaniya tungod sa mga Panalangin.

Mohangyo ako Kaniya alang sa mga panalangin.

Sa pangalan ni Jesukristo, amen.

Semana 2: Ang mga kasulatan nagtudlo kanako kon unsaon ug kon kanus-a mag-ampo.

Ipaila ang doktrina: Tabangi ang mga bata nga makamemorya sa mosunod nga han-ay sa mga pulong gikan sa Alma 13:28: “Kamo magpaubos sa inyong mga kaugalingon sa atubangan sa Ginoo, ug motawag sa iyang balaan nga ngalan, ug magbantay ug mag-ampo sa kanunay.” Hisguti kon unsa ang gitudlo sa mga kasulatan mahitungod sa paagi kon unsaon ug kanus-a kita mag-ampo.

Ipahiangay ang mga leksyon sa pagtagbaw sa mga panginahanglan ug sa mga kapabilidad sa pagkat-on sa mga bata (tan-awa sa PWLMT, 110–17). Sama pananglit, sa ika-2 nga semana, ang mas manghod nga mga bata mahimong magmemorya sa hugpong sa mga pulong nga “Magbantay ug mag-ampo sa kanunay” kay sa kompleto nga kasulatan.

Awhaga ang pagsabut niini: Tabangi ang mga bata sa pagsabut nga kita mahimong mag-ampo sa Langitnong Amahan sa hilum sulod sa atong mga kasing-kasing bisan kanus-a, bisan asa ug kita kinahanglang magpasalamat Kaniya alang sa atong mga panalangin ug mangayo Kaniya og tabang. Isulat ang mosunod nga mga pakisayran sa mga kasulatan sa pisara: 3 Nephi 18:19; 3 Nephi 19:6–8; 3 Nephi 18:15. Isulat usab ang mga pulong nga unsaon ug kanus-a sa pisara. Dapita ang mga bata sa pagpangita sa matag kasulatan ug hisguti kon unsay gitudlo niini kanato kon unsaon o kanus-a kita kinahanglang mag-ampo. Isulti ang mahitungod ni Alma ug ni Amulek nga nagtudlo sa mga Zoramites kon unsaon sa pag-ampo (tan-awa sa Alma 31; 34:17–27; tan-awa usab sa Primary 4, leksyon 21). Mahimo kang mohangyo og pipila ka mga bata sa paghimo og aksyon mahitungod sa istorya samtang imo kining isulti.

Awhaga ang paggamit niini: Pagdapit og pipila ka mga bata sa pagpakigbahin kon unsa ang ilang gibati kon sila mag-ampo. Hangyoa ang mga bata sa pagsugyot og pipila ka mga kanta sa Primary nga nagtudlo mahitungod sa pag-ampo. Kantaha ang pipila niini nga mga kanta, ug dapita ang mga bata sa pagsugyot og sayon nga mga aksyon nga ipuli sa usa o duha ka mga pulong sa matag kanta. Sama pananglit, imbis kantahon ang pulong nga “ampo” o “pag-ampo,” sila mokyugpos sa ilang mga kamot.

Mga semana 3 ug 4: Ang Langitnong Amahan maminaw ug motubag sa akong mga pag-ampo.

Ipaila ang doktrina: Ipapangita sa mga bata ang 3 Nephi 14:7 ug ang Santiago 1:5. Dapita sila sa pagpangita unsay gitudlo sa mga kasulatan mahitungod sa pag-ampo. Basaha og kusog ang mga kasulatan nga magdungan, ug ipahimo sa mga bata ang pagpakigbahin kon unsa ang ilang nakat-unan. Dapita ang mga bata sa pagsulti dungan kanimo sa “Ang Langitnong Amahan maminaw ug motubag sa akong mga pag-ampo.”

Awhaga ang pagsabut ug paggamit niini: Grupo-grupoha ang mga bata, ug papuli-puliha sila sa pagbisita sa mosunod nga mga estasyon (tan-awa sa PWLMT, 179). Sa matag estasyon, ipahimo sa magtutudlo ang pagpasabut og usa ka paagi nga ang Langitnong Amahan motubag sa atong mga pag-ampo ug tuguti ang mga bata sa pagpaambit kon sa unsang paagi gitubag ang ilang mga pag-ampo. Mahimo kang magplano og duha ka estasyon alang sa usa ka semana ug ang laing duha ka mga estasyon alang sa mosunod nga semana.

• Estasyon 1: Usahay ang pag-ampo matubag pinaagi sa hunahuna o mga ideya nga mosulod sa atong mga hunahuna ug kasingkasing (tan-awa sa D&P 8:2). Pagpakigbahin og usa ka kasinatian dihang kini nahitabo sa imong kinabuhi, ug isaysay ang istorya ni Enos (tan-awa sa Enos 1:4–5, 10; tan-awa usab sa Tan-awa ang Inyong Gagmayng mga Bata, 17).

• Estasyon 2: Ang Langitnong Amahan mogamit sa uban sa pagtubag sa mga pag-ampo. Pagpaambit og kasinatian dihang ang laing tawo maoy mitubag sa imong mga pag-ampo, o isulti ang istorya mahitungod ni Presidente Thomas S. Monson nga nagtubag sa pag-ampo ni Ben ug ni Emily Fullmer (tan-awa sa Conference Report, Okt. 2003, 63; o sa Ensign, Nob. 2003, 58–59).

• Estasyon 3: Ang mga tubag sa pag-ampo mahimong maggikan sa mga pulong ni Kristo, nga makita sa mga kasulatan (tan-awa sa 2 Nephi 32:3). Pagpaambit og kasinatian sa dihang gitubag ang imong pag-ampo samtang gibasa nimo ang mga kasulatan.

• Estasyon 4: Ang mga tubag sa pag-ampo mahimong moabut gikan sa mga pagtulun-an sa mga propeta sa ulahing mga adlaw (tan-awa sa D&P 1:38). Ipakita sa mga bata ang isyu sa Ensign o sa Friend, ug sultihi sila nga makit-an nila ang mga pagtulun-an sa mga propeta diha sa mga magasin sa Simbahan. Ipakigbahin ang kasinatian sa dihang ang imong pag-ampo gitubag samtang naminaw ka o nagbasa sa mga pulong sa ulahing adlaw nga mga propeta sa kinatibuk-ang komperensya.

Ang mga estasyon mao ang mga dapit diin ang ginagmayng grupo sa mga bata moapil sa lain-laing mga kasinatian sa pagkat-on (tan-awa sa PWLMT, 179). Sa Primary nga daghan og mga bata, ang mga estasyon mahimo nga yano sama sa pagbalhin-balhin sa mga magtutudlo ngadto sa lain-laing pundok sa mga bata.