Pagtudlo sa mga Bata nga adunay mga Kakulangan

Ang Manluluwas nagtudlo nga, “Ug ang tanan ninyo nga mga anak pagatudloan mahitungod sa Ginoo; ug hilabihan ang kalinaw sa inyong mga anak” (3 Nephi 22:13).

Ang mga lider sa Primary adunay importanting responsibilidad sa pagtudlo sa ebanghelyo ni Jesukristo sa tanang mga bata, lakip kadtong adunay mga kakulangan. Ang Primary mao ang dapit diin ang matag bata kinahanglan nga maabi-abi, mahigugma, ug maatiman, ug malakip. Niini nga palibut mas sayon alang sa tanang bata ang pagsabut sa gugma sa atong Langitnong Amahan ug ni Jesukristo ug sa pagbati ug pag-ila sa impluwensya sa Espiritu Santo.

Ang matag bata bililhon sa Dios. Ang matag usa nagkinahanglan sa gugma, pagrespeto ug pagsuporta.

Pakigtambag sa uban samtang magbuhat ka sa pagsangkap sa mga panginahanglan sa mga bata sa imong Primary kinsa adunay mga kakulangan.

1. Pakigtambag sa mga ginikanan sa bata. Ang mga ginikanan sa kasagaran mas nakaila sa ilang mga anak kay sa uban. Makatudlo sila kanimo kon unsaon sa pagsangkap sa iyang mga panginahanglan, unsa ka taas ang iyang atensyon, ug iyang paborito nga mga paagi sa pagkat-on. Sama pananglit, ang pipila ka mga bata mas dali nga mosanong sa musika, ang uban sa mga istorya, mga litrato, sa mga kasulatan, o sa paglihok-lihok. Paggamit og lain-laing pamaagi sa pagtudlo, nga magsiguro sa paglakip sa mga pamaagi nga ang mga bata mas dali nga makakat-on.

2. Pakigtambag sa ubang mga lider sa Primary ug sa mga magtutudlo. Pag-ampo ug pagtinabangay sa buhat aron makakita og mga paagi sa pagtabang sa matag bata nga makakat-on sa ebanghelyo ni Jesukristo ug mobati nga gihigugma.

3. Pakigtambag sa ward council. Ang mga priesthood ug ubang mga lider sa auxiliary adunay mga ideya kon unsaon sa pagtabang sa mga bata nga adunay espesyal nga panginahanglan. Sa usa ka ward, ang grupo sa mga high priest mitanyag sa paghatag og “apohan nga lalaki alang sa Primary” sa pagtapad matag semana sa usa ka batang lalaki nga may autism. (mas maayo kon, kanunay nga mao gihapon kining tawhana matag semana.) Nakatabang kini sa batang lalaki nga makahatag og pagtagad sa leksyon ug mobati nga gihigugma.

Si Elder M. Russell Ballard mitudlo, “Tin-aw kaayo, kita nga gisaligan nianang bililhong mga anak gihatagan sa sagrado, halangdon nga pagkatinugyanan, kay kita ang mga gipili sa Dios nga magpalibut sa mga bata karon uban sa gugma ug sa kainit sa hugot nga pagtuo ug sa usa ka panabut kon si kinsa sila” (“Great Shall Be the Peace of Thy Children,” Ensign, Abr. 1994, 60).

Ang pipila ka mga bata nga may kakulangan mas daling mosanong ngadto sa mga biswal nga ilhanan. Paggamit og mga ilhanan sama sa gipakita dinhi sa pagpakita kon oras na sa pag-ampo, sa paghilom, o sa pagpanganta.

Ang mga hulagway anaa sa sharingtime.lds.org

Alang sa dugang nga impormasyon kon unsaon sa pagtabang sa mga bata nga nagkinahanglan og espesyal nga pag-atiman, tan-awa sa lds.org/callings/primary (i-klik ang Primary, dayon Pagtudlo sa Tanang mga Bata, Lakip Kadtong Adunay mga Kakulangan);); Pagtudlo, Walay Labaw nga Mahinungdanon nga Tawag, 38–39; ug disabilities.lds.org.

Pagpahiangay sa mga leksyon: Tingali gikinahanglan nga ipahiangay ninyo ang inyong mga panahon sa pagpakigbahin alang sa mga bata nga adunay mga kakulangan. Tan-awa sa sharingtime.lds.org alang sa pipila ka mga ehemplo kon unsaon sa paghimo niini.