Disyembre

Si Jesukristo Mao ang Anak sa Dios.

“Tan-awa, Ako si Jesukristo, ang Anak sa Dios. Ako ang kinabuhi ug ang kahayag sa kalibutan” (D&P 11:28).

Dugangi ang mga ideya nga gihatag dinhi og pipila sa imong kaugalingon. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”

Semana 1: Ang Langitnong Amahan mipadala sa Iyang Anak nganhi sa yuta.

Pag-ila sa doktrina (Balikon pag-usab ang bersikulo nga kalihokan): Balika pag-usab ang mosunod nga bersikulo nga kalihokan sa makadaghan nga higayon uban sa mga bata:

Ang Langitnong Amahan mipadala sa Iyang Anak nganhi sa yuta.
Mianhi siya isip usa ka bata. (nagduyan nga mga bukton)
Mitubo siya sama kanimo ug kanako. (motikubo ug hinay-hinayng motul-id)
Tungod kay Siya nahigugma kanato (mga kamot ibabaw sa kasingkasing) Siya nagpakamatay alang kanato. (lingkod)
Tungod kay Siya nabanhaw, kita mabuhi og usab! (tindog og usab)

Ipasabut nga diha sa mga kasulatan, nagsulti si Jesus kanato nga Siya mao ang Anak sa Dios. Basaha og dungan ang Doktrina ug mga Pakigsaad 11:28 og kusog. (Mahimong imong dapiton ang mas gagmay nga mga bata sa pagsulti lamang og “ang Anak sa Dios” kon imong basahon kana nga bahin sa kasulatan.)

children participating — Ang pagtugot sa mga bata sa pag-apil sa pag-asoy og istorya mopabilin kanila nga maminaw ug may buhatunon.

I-awhag ang pagsabut (nagdrawing ug naminaw og istorya): Ipa-draw sa matag bata ang usa ka talan-awon o usa ka tawo gikan sa istorya sa pagkatawo ni Jesukristo (sama pananglit, Maria, Jose, o ang mga magbalantay sa mga karnero). Ibalik og istorya ang asoy gikan sa Lucas 2:4–17 ug Mateo 2:1–12. Dapita ang mga bata sa pagpataas sa ilang mga hulagway sa tukma nga mga higayon sa panahon sa istorya. Mahimong gusto kang mokanta og mga awit sa Pasko gikan sa Songbook sa mga Bata sulod niini nga kalihokan (tan-awa sa mga pahina 34–54). Alang sa mga sugyot mahitungod sa paggamit og musika sa pagtudlo tan-awa sa PWLKMNT, 172–76.

Semana 2: Si Jesus mitubo sa kaalam ug sa gidak-on ug sa kahimuot sa Dios ug sa tawo.

Ilha ang doktrina (nagkanta ug nagmemorya og kasulatan): Pagpakita og hulagway nga nagpakita sa pagtubo ni Kristo gikan sa pagkamasuso ngadto sa pagkabata ngadto sa pagkahamtong. Panganta og dungan “Sa Bata pa si Jesus” (SB, 34), ug hangyoa ang mga bata sa pagpasabut kon unsa ang gitudlo sa awit mahitungod ni Jesus. Tabangi ang mga bata sa pagmemorya sa Lucas 2:52 pinaagi sa paggamit og yano nga mga aksyon sa pagrepresentar sa mga paagi sa pagtubo ni Jesus sa kaalam (itudlo ang ulo), sa gidak-on (piko-a ang bukton), ug diha sa kahimuot sa Dios (kyugpos) ug sa tawo (wara-wara ngadto sa usa ka higala).

I-awhag ang paggamit (nagbasa og mga kasulatan ug nag-apil og mga kalihokan): Bahina ang kwarto ngadto sa upat ka dapit, ug ibutang ang usa sa mosunod nga mga timaan diha sa matag dapit: Si Jesus mitubo sa kaalam—D&P 88:118; Si Jesus mitubo sa gidak-on—D&P 89:20; Si Jesus mitubo sa kahimuot sa Dios—D&P 88:63; Si Jesus mitubo sa kahimuot sa tawo—Proverbio 18:24. Pag-andam og yano nga kalihokan alang sa matag dapit, ingon nga angay sa edad nga mga pangutana mahitungod sa Langitnong Amahan ug sa Iyang mga sugo (“kaalam”), usa ka tape measure sa pagrekord sa gitas-on sa matag bata ug papel nga drawingan sa mga hulagway sa makapahimsog nga mga pagkaon (“gidak-on”), ug mga istorya gikan sa Friend o Liahona mahitungod sa pagpamatuod ug pakighigala (“sa kahimuot sa Dios ug sa kahimuot sa tawo”). Ipasabut nga kita nagtubo diha sa sama nga mga paagi nga si Jesus mitubo —“sa kaalam ug sa gidak-on, ug sa kahimuot sa Dios ug sa tawo” (Lucas 2:52). Bahina ang mga bata ngadto sa upat ka mga grupo, ug hangyoa ang usa ka hamtong sa paggiya sa matag grupo ngadto sa usa sa mga timaan, diin ilang mabasa og dungan ang kasulatan ug moapil sa kalihokan. Pagpatukar og hinay nga musika kon kini panahon na alang sa mga bata sa pag-adto sa lain nga timaan.

Si Jesus mitubo sa gidak-on

Si Jesus mitubo sa kahimuot sa Dios.

Niini nga kalihokan, ang mga bata makasusama ngadto ni Jesukristo pinaagi sa pag-ila nga Siya mitubo sama nga sila nagtubo.

Semana 3: Si Jesukristo mao ang kahayag ug kinabuhi sa kalibutan.

Ilha ang doktrina (nagbuhat og kalihokan nga kasulatan): Pagbutang og mga hulagway sa pagkatawo ug sa pagkamatay ni Kristo diha sa magkaatbang nga mga kilid sa lawak. Sultihi ang mga bata nga ikaw mobasa og pipila ka mga kasulatan mahitungod sa mga timaan sa pagkatawo ni Jesus o mga timaan sa Iyang pagkamatay. Patuyoka ug paatubanga ang mga bata sa hulagway nga pares sa mga kasulatan nga imong gibasa. (Kon diyutay ang imong Primary, mahimong imong paduolon ang mga bata sa mga hulagway.) Basaha ang 3 Nephi 1:15, 19, 21; 8:20, 22–23. Hisguti kon giunsa ni Jesukristo pagdala og kahayag nganhi sa kalibutan. Hangyoa ang mga bata sa pagtabon sa ilang mga mata ug ipahunahuna ang pipila ka mga hagit nga mahimo nilang atubangon kon sila papuy-on nga walay kahayag. Itandi kini nga mga hagit ngadto sa atong atubangon kon kita walay ebanghelyo ni Jesukristo. Basaha ang Juan 8:12, ug dapita ang mga bata sa pagpaminaw alang sa unsay atong kinahanglan nga buhaton aron dili maglakaw sa kangitngit.

I-awhag ang pagsabut (nagdula og tag-an tag-an): Ipasabut nga daghan nga mga simbolo nagtabang kanato sa paghinumdom nga si Jesus mao ang kahayag sa kalibutan, ang pipila sa mga simbolo gigamit sa Pasko. Ibutang kining pipila ka mga simbolo (sama sa mga kandila, bitoon nga papel, o mga suga) sa usa ka bag. Hangyoa ang usa ka bata sa pagpakuot sa bag, ipahikap ang mga butang nga dili kini tan-awon, ipatag-an kon unsa kini, ug dayon ipakita kini ngadto sa ubang mga bata. Hangyoa ang bata sa pagpakigbahin og usa ka butang nga gibuhat ni Jesus sa pagdala og kahayag sa atong mga kinabuhi. Balika sa lain na usab nga mga butang.

I-awhag ang paggamit (nagdrawing og hulagway): Hatagi ang matag bata og adlaw nga papel. Ipasulat o ipadraw kanila ang usa ka paagi nga sila mosunod sa kahayag ni Jesukristo. Awhaga sila sa pagpakigbahin sa ilang mga papel ngadto sa ilang mga pamilya.

Semana 4: Nakita ug mipamatuod si Joseph Smith ni Jesukristo.

I-awhag ang pagsabut (nag-abli og mga regalo): Pagputos og hulagway sa Unang Panan-awon isip usa ka regalo. Ipasabut nga daghang mga tawo naghatag og mga regalo sa pagsaulog og mga adlaw nga natawhan. Pangutana kon kinsa nga adlaw atong gisaulog sa Pasko. Ipasabut nga laing importante nga tawo nag-adlaw sa Disyembre Pagdapit og usa ka bata sa pag-abli sa regalo aron masayran kon kinsa kana nga tawo. Sultihi ang mga bata nga ang Disyembre 23 mao ang adlaw nga natawhan ni Joseph Smith. Hisguti ang Unang Panan-awon, ug ipasabut nga kita gihatagan og importante nga mga gasa tungod kay nakakita ug mipamatuod si Joseph Smith ni Jesukristo. Diha sa pisara isulat, “Sa mga gasa kita nahatagan tungod kay nakakita ug mipamatuod si Joseph Smith ni Jesukristo.” Pag-andam og upat ka dako nga mga piraso sa papel, nga may usa sa mosunod nga mga regalo nga gisulat diha sa matag usa: “Kita adunay Basahon ni Mormon.” “Kita adunay tinuod nga Simbahan dinhi sa yuta karon.” “Kita adunay Priesthood.” “Kita nasayud nga ang Langitnong Amahan naminaw ug motubag sa mga pag-ampo.”

Bahina ang mga bata ngadto sa upat ka mga grupo. Hatagi ang matag grupo og mga papel, ug ipadraw nila ang hulagway niana nga regalo. Ipahatag ang ilang hulagway isip usa ka regalo ngadto sa lain nga grupo. Dapita ang matag grupo sa pagpakita ug sa pagpasabut sa ilang regalo ngadto sa uban nga mga bata ug ipabutang ang hulagway diha sa pisara.

I-awhag ang paggamit (nagpamatuod ni Jesukristo): Ipapiyong sa mga bata ang ilang mga mata ug ipahunahuna ang usa ka tawo kang kinsa sila mahimong makigbahin sa gasa sa ebanghelyo. Isulti ngadto kanila nga sila makahimo nga mahisama ni Joseph Smith ug makapamatuod ni Jesukristo.