Pebrero
Kon Kita Mopili sa Matarung, Kita Panalanginan
“Kon kamo maghupot sa iyang mga sugo siya mopanalangin kaninyo ug mopauswag kaninyo” (Mosiah 2:22).
Awit: “Buhata Unsa ang Matarung”
( Mga Himno ug Mga Awit sa Mga Bata, nu. 34)
Dugangi ang mga ideya nga gihatag dinhi og pipila sa imong kaugalingon. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”
Semana 1: Gipanalanginan si Noe tungod sa pagpili sa matarung.
Ilha ang doktrina (nagdula og tag-an tag-an): Pagdrawing og yano nga arka diha sa pisara. Pag-andam og daghang pundok sa duha ka managsama nga mga hulagway sa hayop. Hatagi og hulagway ang matag bata. Hangyoa ang mga bata sa pagpatindog ug sa paghimo sa tingog nga gihimo niana nga hayop sa ilang hulagway ug sa pagpaminaw og lain pa nga naghimo og sama nga tingog. Kon ang mga bata nga nagkaparehas og hulagway nagkakita, patupara sila og tindog hangtud nga ang tanan nga mga hayop napares. Hangyoa ang mga bata sa pagpaduol nga nagpares ug sa pagpabutang sa ilang mga hayop diha sa drawing nga arko. Pangutan-a ang mga bata. “Kinsa nga propeta ang gisugo sa Ginoo sa pagpundok sa mga hayop ngadto sa arka?” Itudlo nga kadto tingali usa ka malisud nga sugo sa pagpundok sa daghan kaayo nga mga hayop ngadto sa arka, apan si Noe mipili sa pagsunod sa sugo sa Dios.
I-awhag ang pagsabut (nagbasa sa mga kasulatan): Pagpakita sa mga bata og hulagway ni Noe nga nagsangyaw, ug basaha ang Moises 8:20. Pangutan-a ang mga bata kon nganong naghunahuna sila nga ang mga katawhan wala maminaw ngadto ni Noe. Bahina og tunga ang pisara, ug isulat ang mosunod nga mga pangutana diha sa usa ka bahin, uban sa mga pakisayran sa kasulatan nga wala sunura diha sa pikas nga bahin. Unsa ang buhaton sa Ginoo sa paglaglag sa mga dautan? (Genesis 6:17). Unsa ang Iyang gisulti ni Noe nga buhaton sa pagluwas sa iyang pamilya? (Genesis 6:17). Unsa ang gibuhat ni Noe sa pagpili sa matarung? Genesis 7:5 Hangyoa ang mga bata sa pagpabasa sa mga kasulatan ug sa pagpangita hain ang motubag sa matag pangutana. Ipakita sa mga bata ang hulagway ni Noe nga nagtukod og arka. Ipasabut nga usahay kini malisud ang pagpili sa matarung. Pangutana, “Giunsa pagpanalangin si Noah tungod sa pagpili sa matarung?” Awhaga ang mga bata sa pagpakigbahin kon unsaon sila sa pagpanalangin samtang nagpili sila sa matarung.
Semana 2: Ang mga disipulo ni Jesus napanalanginan pinaagi sa pagpili sa matarung.
I-awhag ang pagsabut (nagbasa og mga kasulatan, nagkolor, ug paggamit og mga puppet): Basaha kauban sa mga bata ang mosunod nga mga asoy kon giunsa sa mga disipulo ni Jesus ang pagpili sa matarung. Lucas 10:38–42 (Maria); Mateo 4:18–20 (Pedro ug Andres); Mga Buhat 9:1–9, 17–20 (Pablo). Hisguti ang pipila ka mga panalangin nga nadawat niini nga mga katawhan tungod sa pagpili sa matarung. Pagdrawing og yanong mga hulagway alang sa matag bata (o gamita ang mga hulagway sa kasulatan diha sa “Funstuf,” Friend, Ene 2006, 35; ug “Funstuf,” Friend, Peb. 2006, 31). Pakolori sa mga bata ang mga drawing, guntinga kini, ug himoa kini og ipapilit sa tudlo nga mga puppet o bulsita nga mga puppet. Dapita ang mga bata sa paggamit sa ilang mga puppet sa pag-asoy og usab sa usa sa mga istorya. Sama pananglit: “Ang akong pangalan mao si Pablo. Ako nanglutos og mga tawo kaniadto kinsa misunod ni Jesus. Nakakita ako og usa ka panan-awon ni Jesus. Mihangyo si Jesus kanako sa paghunong og pangpanggukod Kaniya. Mipili ako sa pagsunod ni Jesus ug nahimong misyonaryo sa nahibilin nako nga kinabuhi.”
Yano nga mga puppets mahimong gamiton sa pagdrama og mga bahin sa usa ka leksyon. Kini bililhong mga himan alang sa paglig-on sa labing importanting ideya ug sa pagdani sa atensyon sa mga bata (tan-awa sa PWLKMT, 178).
I-awhag ang paggamit (nagribyu og mga istorya sa kasulatan): Dapita ang mga bata sa paggamit sa ilang mga puppet sa pag-asoy og balik sa mga istorya sa kasulatan ngadto sa ilang mga pamilya diha sa panimalay. Awhaga sila sa pagpakigbahin ngadto sa mga sakop sa ilang pamilya kon giunsa sa tagsa-tagsa ka mga tawo diha sa istorya pagpili sa matarung ug kon giunsa sila sa pagpanalangin. Pangutan-a ang mga bata kon unsaon nila nga makapili sa matarung sulod sa sunod semana.
Ang ipapilit nga mga puppet anaa sa sharingtime.lds.org
Semana 3: Gipanalanginan si Nephi tungod sa pagpili sa matarung.
I-awhag ang pagsabut (nag-apil og mga drama): Ipa-aksyon sa mga bata ang mga panahon sa diha nga si Nephi misunod sa iyang amahan ug sa Ginoo (sama pananglit, tan-awa sa 1 Nephi 16:18–24, 30–32; 1 Nephi 17:8, 17–18, 48–53; 1 Nephi 18:9–21). Hunahunaa ang pagpagamit kanila og yano nga mga sinina ug mga props (alang sa impormasyon mahitungod sa mga drama, tan-awa sa PWLKMT, 165–66) Basaha og dungan kon unsay gisulti ni Nephi diha sa 1 Nephi 17:3.
Ang mga tabang nga biswal makadugang sa pagkat-on. Himoa nga yano ang mga biswal. Nagtugot kini sa mga bata sa paghatag og pagtagad diha sa mensahe sa leksyon kay sa biswal.
I-awhag ang paggamit (nagkanta og awit): Ipakita ang “pagpili ug mga sangputanan” nga lipak gikan sa Enero, ug dapita ang mga bata sa pagpakigbahin kon unsay ilang nahinumduman mahitungod sa mga pagpili ug sa mga sangputanan. Sultihi sila nga daghang mga panalangin nga atong nadawat mga sangputanan sa maayo nga mga pagpili nga atong gihimo. Dapita ang mga bata sa paghunahuna og mga paagi nga sila mahisama ni Nephi ug naghimo og maayo nga mga pagpili. Pakantaha ang mga bata sa “Ang Kaisug ni Nephi” (SB, 64–65) ug ipalibut ang “pagpili ug mga sangputanan” nga lipak samtang sila nagkanta. Hunonga ang musika bisan kanus-a. Kon mohunong ang musika, dapita ang bata nga naggunit sa lipak sa pagpakigbahin og usa ka maayo nga pagpili nga iyang gihimo. Ipapasa sa bata ang lipak ngadto sa lain nga bata, ug dapita siya sa pagpakigbahin og panalangin nga miabut tungod sa paghimo niana nga maayong pagpili. Balika kutob sa itugot sa panahon.
Semana 4: Ang mga miyembro sa simbahan karon napanalanginan tungod sa pagpili sa matarung.
I-awhag ang pagsabut (pakigbahin og mga istorya): Pagdapit og daghan nga mga ginikanan o mga apohan sa mga bata diha sa imong Primary sa pagpakigbahin og mga istorya mahitungod sa giunsa nila o sa ilang mga katigulangan ang pagpili og matarung. Kini mahimong mag-apil og mga istorya kon giunsa nila pagpili nga mopasakop sa Simbahan. Sa dili pa ang matag istorya, hangyoa ang mga bata sa pagpaminaw og mga paagi nga kini nga mga miyembro sa Simbahan mipili sa matarung ug giunsa sila sa pagpanalangin sa pagbuhat sa mao. Human sa matag istorya, hangyoa ang mga bata sa pag-asoy kon giunsa pagpanalangin ang mga miyembro tungod sa pagpili sa matarung. Hunahunaa ang paghangyo sa mga bata sa pagdraw og mga hulagway mahitungod sa mga istorya samtang nadunggan nila kini ug dayon ipakigbahin ang ilang mga hulagway ngadto sa uban diha sa Primary ug diha sa panimalay.