Mga Panudlo alang sa Panahon sa Pagpakigbahin ug ang Pasundayag sa mga Bata sa Sakrament Miting

Minahal nga mga Kapangulohan sa Primary ug mga Lider sa Musika,

Niini nga tuig kamo adunay oportunidad sa pagtudlo sa mga bata sa importansya sa pagpili sa matarung. Ang pagkat-on sa paghimo og maayong mga pagpili usa ka importante nga bahin sa plano sa Langitnong Amahan alang kanato ug modala og daghan nga mga panalangin. Tinguhaa ang pagdapit sa Espiritu sa Ginoo samtang kamo mainampuon nga nagtudlo sa mga leksyon nga gilakip dinhi niini nga outline. Sa inyong pagbuhat sa ingon, ang mga bata mahibalo nga sila makadawat og tabang sa paghimo og mga pagpili pinaagi sa pagsunod sa ehemplo ni Jesukristo, pagsunod sa mga baruganan sa ebanghelyo, ug sa pagpaminaw sa mga pag-aghat sa Espiritu Santo. Ang pagpili sa matarung motabang sa mga bata sa pagpabilin diha sa dalan balik ngadto sa atong Langitnong Amahan.

Among gipasalamatan ang inyong matinud-anon nga serbisyo samtang kamo naghigugma ug nagtudlo sa bililhong mga bata sa inyong Primary. Kami nag-ampo alang kaninyo ug hibalo-i nga ang Ginoo mopanalangin kaninyo samtang kamo nagserbisyo niining importante nga calling.

Ang Kinatibuk-ang Kapangulohan sa Primary

Mga Panudlo alang sa Panahon sa Pagpakigbahin

Panudlo sa Ebanghelyo

Gamita kini nga booklet samtang ikaw nag-andam sa pagtudlo og 15-minutos nga leksyon matag semana sulod sa panahon sa pagpakigbahin. Mahimo nimong dugangan ang sinemana nga mga leksyon sa ubang gitugutan sa Simbahan nga mga materyal, sama sa Friend o sa Liahona. Ang mosunod nga mga giya makatabang kanimo sa pagplano ug sa paghatag sa mga leksyon.

Higugmaa Kadtong Imong Tudloan. Ipakita ang imong gugma sa mga bata pinaagi sa pag-ila sa ilang mga pangalan ug sa pagpakabana sa ilang mga interes, mga talento, ug mga panginahanglan.

Itudlo ang Doktrina pinaagi sa Espiritu. Samtang ikaw nag-andam sa mga leksyon, pag-ampo alang sa giya ug tinguhaa nga malig-on ang imong pagpamatuod sa mga baruganan nga imong itudlo. Kini makatabang kanimo sa pagtudlo pinaagi sa Espiritu.

Dapita ang Pagkat-on. Kini nga booklet gidisenyo sa pagtabang kanimo nga mahibalo dili lamang sa unsa ang itudlo apan usab unsaon ang pagtudlo ug ang pagdapit sa pagkat-on. Makatudlo ka sa doktrina sa mas epektibo nga paagi samtang imong buhaton ang mosunod nga tulo ka mga butang diha sa matag leksyon:

Ilha ang doktrina. Iklaro ang pagpaila sa doktrina nga pagatun-an sa mga bata. Hunahunaa ang mga paagi sa pagbuhat niini sa pulong ug sa biswal. (Alang sa pipila ka mga ehemplo, tan-awa ang mga leksyon alang sa ikatulong semana sa Mayo ug ang ikaduhang semana sa Agosto)
I-awhag ang pagsabut. Siguroha nga ang mga bata nag-angkon og mas lawom nga pagsabut sa doktrina pinaagi sa nagkalain-laing mga pamaagi sa pagtudlo nga nag-apil kanila sa pagkat-on, sama sa pagkanta og mga awit, pag-role play, ug sa pagbasa og mga kasulatan.
I-awhag ang paggamit. Hatagi ang mga bata og mga oportunidad sa paggamit sa doktrina diha sa ilang mga kinabuhi. Hunahunaa kon sa unsa nga paagi sila makapahayag og mga pagbati mahitungod sa o makahimo og usa ka tumong kalabut sa doktrina.

Kini nga booklet naghatag og kompleto nga mga leksyon alang sa pipila ka mga semana sulod sa tuig. Mga ideya, apan dili kompleto nga mga leksyon, giapil alang sa uban nga mga semana. Dugangi kadto nga mga ideya og pipila nga imong kaugalingon. Makakuha ka og mga ideya pinaagi sa pagbasa og ubang mga leksyon niini nga booklet. Kon adunay ikalima nga Dominggo, gamita kini nga panahon sa pagribyu sa miaging mga leksyon. Ang Espiritu makagiya kanimo samtang ikaw nagplano ug nag-andam og mga kalihokan alang sa mga leksyon.

Pakigtrabaho uban sa lider sa musika samtang ikaw nag-andam sa imong mga leksyon. Ang pagpanganta motabang sa pagdugang sa kalig-on sa mga doktrina nga imong gitudlo. Panagsa mahimo ka nga modapit og mga magtutudlo ug sa ilang mga klase sa pagtabang kanimo sa mga bahin sa panudlo sa ebanghelyo.

Ang pipila sa mga leksyon nagsugyot sa pagdapit og dinapit nga mga mamumulong sa pag-apil sa Primary. Kinahanglan ka nga mangayo sa pagtugot sa imong bishop o branch president sa dili pa magdapit niini nga mga tawo sa pag-apil.

Kauban sa mga leksyon mao ang daghan nga mga tabang sa pagtudlo nga motabang kanimo sa pagpalambo sa imong abilidad sa pagtudlo. Ang mga leksyon naglakip usab og mga hulagway nga motabang kanimo nga makita kon unsa ang hulagway sa usa ka kalihokan. Bisan tuod ang pagpalambo og mga kahanas sa pagtudlo importante, ang imong kaugalingong espirituhanong pagpangandam ug pagpamatuod mao ang unsay modapit sa Espiritu sa pagpanghimatuod niini nga mga doktrina diha sa kasingkasing sa mga bata.

Panahon sa Pagpanganta

Ang musika sa Primary kinahanglan nga nagpasiugda og kahimtang sa balaan nga pagtahud, nagtudlo sa ebanghelyo, ug nagtabang sa mga bata nga mobati sa impluwensya sa Espiritu Santo ug sa kalipay nga moabut pinaagi sa pagkanta. Usa ka 20 minutos nga bahin sa panahon sa pagpakigbahin kinahanglan nga igahin sa pagpanganta ug sa pagtudlo og musika. Kini mosiguro nga ikaw adunay igo nga panahon sa pagtudlo og bag-o nga musika ug sa pagtabang sa mga bata nga malingaw sa pagkanta.

Kini nga booklet naglakip og bag-o nga awit nga tun-an sa mga bata niining tuiga (tan-awa sa pahina 28). Kini naglakip usab og seksyon nga nag-ulohan “Unsaon Paggamit sa Musika sa Primary” (tan-awa sa mga pahina 26–27) ug dugang nga mga ideya alang sa pagtudlo og mga awit ngadto sa mga bata (tan-awa sa mga pahina 9, 17).

Mga Giya alang sa Pasundayag diha sa Sakrament Miting

Ubos sa paggiya sa bishop o branch president, ang pasundayag sa mga bata sa sakrament miting kasagaran ihatag sulod sa ikaupat nga bahin sa tuig. Pakigkita sa magtatambag sa kapangulohan sa bishopric o sa branch kinsa nagdumala sa Primary sayo sa tuig aron sa paghisgot sa pasiuna nga mga plano. Pangayoa ang iyang pagtugot kon ang mga plano nahuman na.

Pagplano alang sa mga bata nga mopasundayag sa programa pinasikad sa binulan nga tema sa panahon sa pagpakigbahin. Sa tibuok tuig, pagtipig og mga mubo nga sulat sa mga pakigpulong ug personal nga mga kasinatian sa mga bata nga posibleng magamit sa pasundayag. Samtang ikaw nagplano alang sa mga bata nga mopakigbahin kon unsa ang ilang nakat-unan mahitungod sa tema niini nga tuig, paghunahuna og mga paagi nga makatabang sila sa kongregasyon sa paghatag og gibug-aton sa mga doktrina sa ebanghelyo nga ilang gitudlo. Usa ka sakop sa bishopric mahimong motapos sa miting pinaagi sa mubo nga pakigpulong.

Samtang ikaw nag-andam sa pasundayag, hinumdumi ang mosunod nga mga giya:

Ang mga praktis kinahanglan dili mokuha og oras gikan sa mga klase o sa mga pamilya nga wala kinahanglana.
Ang mga biswal, mga costume, ug mga pasundayag sa media dili angay sa pasundayag diha sa sakrament miting.

Mga Kapanguhaan nga Gigamit dinhi Niini nga Booklet

Ang mosunod nga minubo nga pagkasulat gamiton sa tibuok booklet:

SBSongbook sa mga Bata

PWLKMTPagtudlo Walay Labaw Ka Mahinungdanon nga Tawag

Daghan nga mga leksyon naglakip og mga sugyot alang sa paggamit og mga hulagway. Ikaw makakaplag og mga hulagway diha sa Libro sa mga Hulagway sa Ebanghelyo, sa Pakete sa mga Hulagway sa Ebanghelyo, sa mga pakete sa hulagway sa manwal sa Primary, ug sa mga magasin sa Simbahan ug sa internet diha sa images.lds.org.