Enero
Kabubut-on Mao ang Gasa sa Pagpili alang sa atong mga Kaugalingon
“Busa, ang mga tawo gawasnon … sa pagpili sa kalingkawasan ug kinabuhing dayon, pinaagi sa halangdon nga Tigpataliwala (2 Nephi 2:27).
Awit: “Kay Anak sa Dios”
(pahina 28 niini nga outline)
Dugangi ang mga ideya nga gihatag dinhi og pipila sa imong kaugalingon. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug sa unsa nga paagi ako makatabang kanila nga mobati sa Espiritu?”
Mga Semana 1 ug 2: Kabubut-on mao ang gasa sa pagpili alang sa atong mga kaugalingon.
Ilha ang doktrina (pagdula og tag-an tag-an): Sultihi ang mga bata nga ikaw naghunahuna og usa ka pulong, ug hatagi sila og mga ilhanan sa pagtabang kanila sa pagtag-an sa pulong. Sultihi sila sa pagpataas sa ilang mga kamot kon ilang mahibaloan ang tubag. Ang mga ilhanan mahimong maglakip sa mosunod: Aduna kita niini sa wala pa kita mianhi sa yuta. Kini usa ka gasa gikan sa atong Langitnong Amahan. Kini usa ka importante nga bahin sa plano sa Langitnong Amahan alang kanato. Gusto ni Satanas nga kuhaon kini gikan kanato. Naggamit kita niini kon kita naghimo og mga pagpili. Kini usa ka gasa nga nagtugot kanato sa pagpili alang sa atong mga kaugalingon. Nagsugod kini sa letrang K. Human ang mga bata nakatag-an sa tubag, dungan og sulti, “Ang kabubut-on mao ang gasa sa pagpili alang sa atong mga kaugalingon.”
I-awhag ang pagsabut (nagtan-aw ug naghisgot og leksyon nga naggamit og butang): Pagpakita sa mga bata og usa ka lipak nga may pulong pagpili nga gisulat diha sa usa ka tumoy ug ang pulong mga sangputanan nga gisulat diha sa pikas tumoy. Ipasabut nga ang sangputanan mao ang unsay kasagaran nga mahitabo tungod sa usa ka pagpili nga atong gihimo; sama pananglit, kon kita mopili sa pagpraktis og tugtog og instrument sa musika, mamaayo kita niini, ug kon kita mopili sa paghikap sa kalayo, kita mahilos. Punita ang lipak ug ipakita sa mga bata nga sa matag higayon nga imong puniton ang lipak, makuha nimo ang pagpili ug ang sangputanan niana nga pagpili. Ipabasa sa mas dako og edad nga bata ang 2 Nephi 2:27. Dapita ang uban nga mga bata sa pagpaminaw alang sa unsay mga sangputanan tungod sa paghimo og matarung nga pagpili (kalingkawasan ug kinabuhing dayon) ug unsa ang mga sangputanan tungod sa paghimo sa sayop nga pagpili (pagkabihag ug pagkaalaut). Pagdrawing og yano nga dayagram diha sa pisara sama sa gipakita dinhi.
Tabangi ang mga bata sa pagsabut nga kon kita naghimo og maayo nga mga pagpili, kini nagpadulong ngadto sa kagawasan ug kalipay, ug kon kita naghimo og sayop nga mga pagpili kini nagpadulong ngadto sa pagkabihag ug pagkawalay kalipay.
Pagdapit og duha ka mga bata sa pag-anha sa atubangan sa kwarto, ug paggunita ang matag bata sa isig ka tumoy sa lipak. Hangyoa ang bata nga naggunit sa “pagpili” nga tumoy sa paghatag og ehemplo sa maayo nga pagpili (sama pananglit, nagsulti nga mabination ngadto sa uban). Hangyoa ang lain nga bata sa pagpakigbahin og posible nga mga sangputanan niana nga pagpili (sama pananglit, naghimo og malungtaron nga mga pakighigala). Balika uban sa daghan nga mga bata.
Dugangi ang kalig-on sa pagkat-on sa mga bata pinaagi sa pagbalik-balik. Tipigi ang “pagpili ug mga sangputanan” nga lipak. Adunay uban nga mga oportunidad nga gamiton kini atol sa panahon sa pagpakigbahin sa tibuok tuig.
I-awhag ang pagsabut (pagkat-on og mga istorya sa kasulatan): Sulod sa unang duha ka semana sa bulan, pagtudlo og pipila ka mga istorya gikan sa mga kasulatan nga nagpakita kon sa unsa nga paagi nga ang paghimo og matarung nga mga pagpili mosangput sa kagawasan ug kalipay ug kon sa unsa nga paagi nga ang sayop nga mga pagpili mosangput sa pagkabihag ug pagkaalaut. Ang mga istorya sa kasulatan nga mahimo nimong gamiton naglakip sa Manluluwas ug Satanas (tan-awa sa Moises 4:1–4); Nephi ug Laman ug Lemuel (tan-awa sa 1 Nephi 2–4, 7, 18); Sadrach, Mesach, ug Abednego (tan-awa sa Daniel 3); o Alma ug Hari Noah (tan-awa sa Mosiah 17–19). Human sa pagtudlo og istorya, pagdapit og duha ka mga bata sa paggunit sa isig tumoy sa “pagpili ug mga sangputanan”nga lipak. Hangyoa ang usa ka bata sa pagpasabut sa mga pagpili nga gihimo niadtong diha sa istorya ug ang lain nga bata sa pagpasabut sa mga sangputanan niadto nga mga pagpili.
I-awhag ang paggamit (naminaw og istorya): Pagbutang og hulagway ni Jesukristo diha sa pisara. Pagdrawing og mga ang-ang nga nagpadulong ngadto sa hulagway. Pagdrawing og tukog nga hulagway diha sa usa ka piraso nga papel, ug ibutang kini diha sa ubos sa mga ang-ang. Pagsaysay og usa ka mubo nga istorya mahitungod sa mga pagpili nga mahimong himoon sa usa ka bata sulod sa usa ka adlaw. Alang sa matag pagpili, hangyoa ang mga bata sa pagpakita kon kini usa ba ka maayo nga pagpili o sayop ba nga pagpili pinaagi sa pagbarug alang sa maayo nga pagpili ug paglingkod alang sa sayop nga pagpili. Sama pananglit: “Giagaw ni Jane ang dulaan gikan sa iyang gamay nga manghud nga lalaki, ug misugod siya (ang bata) sa paghilak. Sa diha nga ang inahan ni Jane nangutana kaniya kon nganong naghilak ang iyang manghud, miingon si Jane nga siya wala mahibalo.” Alang sa matag maayo nga pagpili, isibug ang tukog nga hulagway og usa ka ang-ang padulong ngadto ni Jesus. Ipadayon ang istorya sa uban nga mga pagpili hangtud ang tukog nga hulagway moabut sa Manluluwas. Hisguti kon unsaon sa maayo nga mga pagpili pagdala kanato og kalipay ug pagtabang kanato nga mas maduol ngadto sa Ginoo.
Semana 3: Sa kinabuhi nga wala pa dinhi sa yuta, ako mipili sa pagsunod sa plano sa Dios.
I-awhag ang pagsabut (nagkanta og mga awit): Sa lakbit hisguti ang mosunod nga mga konsepto, ug dayon kantaha ang nahibagay nga mga awit uban sa mga bata: Sa wala pa ako mianhi sa yuta nagpuyo ako sa langit. (“Langit Gipuy-an Ko” [SB, 140]). Mipili ako sa pag-anhi sa yuta ug nakadawat og lawas (“Ako Anak sa Dios” [SB, 2–3]; “Ang Ginoo Naghatag Kanako og Templo” [SB, 73]). Ako pagabunyagan ug modawat sa gasa sa Espiritu Santo” (“Kon Ako Bunyagan” [SB, 53]; “Ang Espiritu Santo” [SB, 56]). Makaandam ako sa pag-adto sa templo (“Gusto Ko nga Makita ang Templo” [SB, 99]; “Mga Pamilya Mahimong Manag-uban sa Hangtud” [SB, 98]). Mabanhaw ako (“Mipadala sa Bugtong Anak” [SB, 20–21]).
Semana 4: Gilalang ni Jesukristo ang kalibutan isip usa ka dapit diin ako makakat-on sa pagpili sa matarung.
Ilha ang doktrina (nagtan-aw ug naghisgot og leksyon nga naggamit og butang): Ipakita sa mga bata ang usa ka sudlanan sa daghan nga nagkalain-laing mga kolor sa mga krayola. Ipakita kanila ang ikaduha nga sudlanan nga may usa lamang ka kolor. Pangutan-a ang mga bata: Kon ikaw mo-kolor og usa ka hulagway, hain niini nga mga sudlanan sa mga krayola imong gustong gamiton? Ngano?” Ipasabut nga ang pagbaton og nagkalain-laing mga pagpili usa ka panalangin. Ipamatuod nga ang Langitnong Amahan ug si Jesus nahigugma kanato ug Sila gusto kanato nga mohimo og husto nga mga pagpili.
Niini nga kalihokan, mahimo kang mopili sa pagpakita sa konsepto nga ang pagpili usa ka panalangin pinaagi sa mga krayola, mga lapis, lain-laing mga prutas, o bisan unsa nga mga butang nga sinati ang mga bata.
I-awhag ang pagsabut (nagkolor): Pakolori sa mga bata ang usa ka kopya sa hulagway diha sa pahina 35 sa manwal sa nursery, Tan-awa ang Inyong Gagmay nga mga Bata, o dapita sila sa pagdrawing og susama nga mga hulagway nga may parehas nga mga ulohan. Hisguti kon kinsa ang naglalang sa mga butang diha sa hulagway ug kon ngano nga kini gilalang. Tudloi ang mga bata nga ang Langitnong Amahan naglaum kanato sa pag-amuma niini nga kalibutan nga gilalang sa Iyang Anak alang kanato. Hangyoa ang mga bata sa pagpakigbahin og mga paagi nga sila makapili sa pag-amuma sa kalibutan ug sa mga nilalang nga anaa diha niini. Dapita ang mga bata sa pagdala sa ilang mga hulagway ngadto sa panimalay ug ipahimo kini sa ilang mga ginikanan og sa usa ka libro.