Hunyo

Ako Nagpili sa Matarung pinaagi sa Pagpuyo sa mga Baruganan sa Ebanghelyo

“Ako moadto ug mobuhat sa mga butang nga ang Ginoo nagsugo kanako, kay ako nasayud nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7).

Awit: “Ang Kaisug ni Nephi”

(CS, 64–65)

Dugangi ang mga ideya nga gihatag dinhi og pipila nga imong kaugalingon. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”

Semana 1: Nag-ampo ako ngadto sa Langitnong Amahan alang sa kalig-on sa pagbuhat kon unsay matarung.

I-awhag ang pagsabut (naghisgot sa pag-ampo): Ipakita sa mga bata ang usa ka telepono o lain nga matang sa komunikasyon. Hisguti kon unsaon kini paggamit. Pangutan-a ang mga bata kon unsaon nato sa pagpakigsulti ngadto sa Langitnong Amahan. Ipasabut nga sama lamang nga kita nag-dial og numero sa pagpakigsulti ngadto sa usa ka tawo diha sa telepono, kita makaampo sa pagpakigsulti ngadto sa Langitnong Amahan; makapangayo kita Kaniya alang sa kalig-on sa pagbuhat kon unsay matarung. Hatagi ang matag klase og hulagway sa lain-laing matang sa pag-ampo (sama pananglit, personal nga pag-ampo, pamilya nga pag-ampo, pagpanalangin sa pagkaon, o pag-ampo diha sa klase). Pangutan-a ang matag klase sa pagpakita sa ilang hulagway ngadto sa uban nga mga bata ug ipasulti kanila kon unsa nga matang sa pag-ampo ang gipakita ug kanus-a, asa, ug nganong kini nga matang sa pag-ampo gilitok.

I-awhag ang paggamit (nagdula): Paglungag og gamay sa tumoy sa duha ka aluminum nga mga lata nga walay sulod, ug sumpaya ang mga lata sa usa ka pisi. Hugti ang pisi, ug papuli-puliha ang mga bata pagsulti og hinay ngadto sa usa ka lata og usa ka butang nga ilang mahimo nga i-ampo ngadto sa Langitnong Amahan samtang sila naninguha sa pagbuhat sa matarung (sama pananglit, sa pagsulti sa tinuod, sa pagtahud nga may kaligdong, o sa pagmabination). Ipapaminaw sa lain nga bata ang lain nga lata. Ipakigbahin (o hangyoa ang usa ka bata sa pagpakigbahin) og kasinatian sa diha nga ang Langitnong Amahan naghatag kanimo og kalig-on sa pagbuhat sa matarung. Ipamatuod nga ang Langitnong Amahan naminaw ug nagtubag sa atong mga pag-ampo ug mohatag kanato og kalig-on sa pagbuhat kon unsay matarung.

Semana 2: Kon ako nagbayad sa akong ikapulo, ang Langitnong Amahan mopanalangin kanako.

Ilha ang doktrina ug i-awhag ang pagsabut (nagtan-aw og pasundayag): Ipasabut nga ang ikapulo mao ang paghatag og ikanapulo sa salapi nga imong kinitaan ngadto sa Ginoo pinaagi sa Iyang Simbahan. Pagpakita sa mga bata og 10 ka sinsilyo. Pangutana kanila kon pila ka mga sinsilyo ang kinahanglan nga gamiton sa pagbayad sa ikapulo. Pagpakita og sobre sa ikapulo ug usa ka donation slip, ug ipasabut nga magbayad kita og ikapulo pinaagi sa pagsulat sa donation slip,pagbutang niini sa sobre uban sa atong ikapulo, ug paghatag niini ngadto sa bishop o sa usa sa iyang mga magtatambag.

I-awhag ang paggamit (nagdula og pares-pares nga dula): Pagpakita og mga hulagway ug mga butang nga nagrepresentar og mga panalangin nga miabut gikan sa pagbayad og ikapulo, sama sa mga templo, mga meetinghouse, hymnbook, ang Songbook sa mga Bata, manwal sa Primary, ug ang mga kasulatan. Sultihi ang mga bata nga tungod sa mga pundo sa ikapulo ang Simbahan makahatag niini nga mga butanga. Tabuni ang mga hulagway ug ang mga butang. Kuhai og usa o duha. Kuhaa ang tabon ug ipatag-an sa mga bata kon unsa ang nawala. Balika sa makadaghan nga higayon. Ipasabut nga adunay uban nga mga panalangin nga moabut gikan sa pagbayad og ikapulo nga dili makita (tan-awa sa 3 Nephi 24:10). Ipasulti sa usa o duha ka mga hamtong ang mahitungod sa mga panalangin nga ilang nadawat gikan sa pagbayad og ikapulo.

Semana 3: Ako nagsunod sa Pulong sa Kaalam pinaagi sa pagkaon ug pag-inom niana diin maayo ug paglikay niana diin ngil-ad.

I-awhag ang pagsabut (nagbasa og mga kasulatan ug nagdula): Basaha og dungan ang 1 Mga Taga-Corinto 3:16–17. Dapita ang mga bata sa pagpakigbahin kon unsa ang kahulugan niini nga kasulatan ngadto kanila. Ipasabut nga ang Langitnong Amahan gusto kanato nga amumahon ang atong mga lawas. Pagbutang og mga hulagway sa nagkalain-lain nga mga pagkaon, mga ilimnon, ug uban nga mga butang nga maayo o dili maayo alang sa lawas (sama sa mga prutas, mga utanon, pan, alkohol, ug tabako) diha sa usa ka sudlanan. Paghimo og kopya sa pahina 47 sa manwal sa nursery, ug guntinga kini og mga piraso sa puzzle. Papuli-puliha ang mga bata sa pagkuha og mga hulagway gikan sa sudlanan. Kon ang butang diha sa hulagway maayo alang kanato, pabutangi sa bata og piraso sa puzzle ang pisara. Kon ang butang dili maayo, ipakuha ang piraso sa puzzle Ipadayon ang pagdula hangtud ang puzzle nakompleto (ikaw nagkinahanglan og mas daghan nga maayong mga butang diha sa sudlanan kay sa dili maayo nga mga butang). Hangyoa ang usa ka hamtong o bata sa pagpakigbahin og pipila ka mga panalangin nga iyang nadawat pinaagi sa pagsunod sa Pulong sa Kaalam (tan-awa sa D&P 89:18–21).

Semana 4:Kon ako nagsinina sa ligdong nga paagi, nagrespeto ako sa akong lawas isip usa ka gasa gikan sa Dios.

Ilha ang doktrina (nagtan-aw og hulagway ug nagbasa og mga kasulatan): Isulat ang mosunod diha sa pisara: “Ang akong usa ka .” Pagpakita og litrato sa templo. Pangutana, “Ngano nga ang mga templo espesyal kaayo?” Ipaukab sa mga bata ang 1 Mga Taga-Corinto 6:19. Ipapangita kanila kon unsa ang gisulti niini mahitungod sa ilang mga lawas samtang sila nagbasa sa kasulatan og kusog uban kanimo. Pangutan-a ang mga bata kon unsa nga mga pulong mokompleto sa sentence diha sa pisara (lawas, templo). Dapita ang mga bata sa pagtindog ug sa pagsulti og dungan sa sentence

I-awhag ang pagsabut ug paggamit (nagkanta ug naghisgot): Sultihi ang mga bata nga ang atong mga lawas mga templo diin ang Balaang Espiritu makapuyo. Kantaha ang unang bersikulo sa “Ang Ginoo Naghatag Kanako og Templo” (SB, 73). Dapita ang mga bata sa pagpakigbahin kon sa unsa nga paagi ang Langitnong Amahan gusto kanato nga magsinina ug ngano. Ipasabut nga ang mga propeta sa Dios kanunay nga nagtambag sa Iyang mga anak nga magsinina sa ligdong nga paagi. Dapita ang mga bata sa pagpaminaw alang sa mga bahin sa ilang mga lawas nga kinahanglan tabunan samtang ikaw nagbasa sa “Sinina ug Panagway” nga seksyon sa Alang sa Kalig-on sa mga Kabatan-onan. Hangyoa ang mga bata sa paghunahuna og usa ka paagi nga sila magsinina sa ligdong nga paagi. Pag-itsa og usa ka humok nga butang ngadto sa usa ka bata ug dapita kana nga bata sa pagpakigbahin sa iyang ideya. Ipaitsa sa bata ang butang ngadto sa lain nga bata, kinsa mopakigbahin sa iyang ideya. Ipadayon sa uban nga mga bata.