Marso
Mga Buhing Propeta Nagtudlo Kanako sa Pagpili sa Matarung
O, hinumdumi, akong anak, ug pagkat-on og kaalam diha sa imong kabatan-on; oo, pagkat-on diha sa imong kabatan-on sa paghupot sa mga sugo sa Dios” (Alma 37:35).
Awit: “Barugan ang Kamatuoran”
(SB, 81)
Dugangi ang mga ideya nga gihatag dinhi og pipila sa imong kaugalingon. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”
Semana 1: Ang Dios mamulong pinaagi sa mga propeta.
Ilha ang mga doktrina (nagtan-aw og pasundayag ug nagmemorya og kasulatan): Pagdapit og usa ka bata sa pag-adto sa atubangan sa kwarto. Sultihi ang ubang mga bata sa pagsunod sa iyang mga panudlo. Paghunghong og yano nga mga panudlo ngadto sa bata, sama sa “Sultihi sila sa pagpakpak og katulo” o “Sultihi sila sa pagpatindog ug sa pagmartsa diha sa gitindugan.” Tuguti ang daghang mga bata sa pagpuli-puli isip lider. Ipasabut nga bisan tuod og sila dili tanan nakadungog kanimo nga naghatag og mga panudlo, sila nakahimo sa pagsunod sa mga panudlo tungod kay nahibalo sila kinsa ang sundon. Pangutan-a kon kinsa ang atong kinahanglan sundon aron mahibalo kon unsay gusto sa Langitnong Amahan nga atong buhaton. Pagpakita og hulagway sa Presidente sa Simbahan karon . Ipasulti og dungan sa mga bata, “Ang Dios namulong pinaagi sa buhing mga propeta.” Basaha ang Amos 3:7, ug ipasabut ang bisan unsa nga mga pulong nga wala masabti sa mga bata. Tabangi ang mga bata sa pagmemorya sa kasulatan (tan-awa sa PWLKMT, 171–72).
Semana 2: Ang Unang Kapangulohan ug ang Napulog Duha ka mga Apostoles mga propeta.
Ilha ang doktrina: Isulat sa pisara, “Ang Unang Kapangulohan ug ang Napulog Duha ka mga Apostoles mga propeta.” Sultihi ang mga bata nga diha sa Ang Simbahan ni Jesukristo sa mga Santos sa Ulahing mga Adlaw kita gipangulohan sa Presidente sa Simbahan, sa iyang duha ka mga magtatambag diha sa Unang Kapangulohan, ug sa Napulog Duha ka mga Apostoles. Ipasabut nga ang Unang Kapangulohan ug ang Napulog Duha ka mga Apostoles mga propeta.
I-awhag ang paggamit (nagdula og pares-pares nga dula): Pangita og mga hulagway sa unom ka mga sakop sa Unang Kapangulohan ug sa Korum sa Napulog Duha, ug isulat ang ilang mga pangalan sa lain-lain nga mga piraso sa papel. Ibutang ang mga papel ug mga hulagway nga gikulob diha sa pisara. Ipahayang sa usa ka bata ang usa ka hulagway, ug dapita ang lain nga bata sa pagpahayang og piraso sa papel nga may pangalan diha niini. Kon ang hulagway ug ang pangalan wala magkapares, ibalik kini pagbutang sa lugar ug tuguti ang duha ka lain nga mga bata sa pagpili. Kon ang mga papel nagkapares, honghongi ang duha ka mga bata og usa ka baruganan sa ebanghelyo nga gitudlo sa lider sa labing bag-o nga kinatibuk-ang komperensya (tan-awa ang kinabag-ohan nga isyu sa komperensya sa Ensign o Liahona), ug ipaaksyon ang usa ka paagi nga sila makasunod sa baruganan. Dapita ang uban nga mga bata sa pagtag-an kon unsa ang ilang gibuhat.
Semana 3: Ang mga propeta ug mga apostoles sa Dios namulong ngari kanato diha sa kinatibuk-ang komperensya.
I-awhag ang pagsabut ug paggamit (nagdula): Isulat sa lain-lain nga mga piraso sa papel ang usa ka sentence summary sa mga mensahe sa labing bag-o nga komperensya nga gikan sa mga sakop sa Unang Kapangulohan ug sa Korum sa Napulog Duha. Ibutang kini diha sa pisara uban sa mga hulagway sa mga lider. Hisguti ang matag mensahe. Dapita ang usa ka grupo sa mga bata sa pagbiya sa kwarto. Kuhaa ang usa sa mga mensahe gikan sa pisara. Dapita ang mga bata sa pagbalik ug sa paghunahuna hain nga mensahe ang nawala. Papilia ang mga bata og awit sa Primary nga mopares sa mensahe, ug kantaha kini og dungan. Dapita ang mga bata sa pagsugyot og mga paagi nga sila makagamit sa mensahe. Balika og usab sa uban nga mga mensahe.
Ipahiangay ang inyong mga kalihokan ngadto sa mga edad ug mga abilidad sa mga bata nga imong tudloan. Diha sa kalihokan sa semana 3, mahimo kang mogamit og mga hulagway agi og dugang ngadto sa mga sinulat nga mga mensahe.
Semana 4: Ako mapanalanginan kon mopili ako sa pagsunod sa propeta.
Ilha ang doktrina (nagkanta): Kantaha ang ikasiyam nga bersikulo ug ang koro sa “Sunda ang Propeta” (SB, 58–59). Dapita ang mga bata sa pagpaminaw sa mga katarungan nga kita mosunod sa propeta. Pasultiha og dungan ang mga bata, “Ako mapanalanginan kon mopili ako sa pagsunod sa propeta.”
I-awhag ang pagsabut (nag-aksyon og mga istorya sa kasulatan): I-asoy sa mga bata ang istorya kabahin ni Elias ug sa biyuda sa Sarepta (tan-awa sa 1 Mga Hari 17:8–16), ug dapita ang mga bata sa pag-aksyon niini uban kanimo. Sama pananglit: “Ang Ginoo misulti sa propeta nga si Elias sa pag-adto sa usa ka siyudad nga gitawag og Sarepta (lakaw-lakaw sa gitindugan). Sa dihang miabut siya sa siyudad, nakit-an niya ang usa ka babaye nga namunit og mga lipak (pagpakaaron ingnon nga namunit og lipak). Gihangyo ni Elias ang babaye sa paghatag kaniya og tubig (pagpakaaron-ingnon nga naghatag og tubig ngadto sa usa ka tawo) ug usa ka piraso nga pan. Gisultihan sa babaye si Elias nga siya adunay diyutay lamang nga harina ug lana nga himoon og pan alang sa iyang anak nga lalaki (paglingu-lingo). Gisultihan siya ni Elias sa paghimog pipila ka pan alang una kaniya ug ang Dios mohatag kaniya og dugang pa nga harina ug lana. Gituman sa babaye si Elias (pagpakaaron-ingnon nga nagmasa og pan). Siya dihay igo nga harina og lana nga himoon og pan sulod sa daghan nga mga adlaw (pagpakaaron-ingnon nga nagkaon).” Balika ang kalihokan uban sa mga istorya kabahin ni Moises ug sa bitin nga tumbaga (tan-awa sa Numeros 21:5–9) ug ni Nephi ug ang tumbaga nga mga palid (tan-awa sa 1 Nephi 3–4; 5:21–22). Hangyoa ang mga bata sa pagpakigbahin kon sa unsa nga paagi ang mga tawo diha sa mga istorya napanalanginan tungod kay sila misunod sa tambag sa propeta.
I-awhag ang paggamit (naghisgot sa mga pagtulun-an sa propeta): Pangutan-a ang mga bata, “Kinsa ang atong propeta karon?” Pagpakita og hulagway sa Presidente sa Simbahan karon . Ipasabut nga siya tinawag sa Dios. Ipahisgot sa mga bata sa ginagmay nga mga grupo kon sa unsa nga paagi sila makasunod kaniya. Pangutana og pipila ka mga bata gikan sa matag grupo sa pagpakigbahin sa ilang mga ideya. Dapita ang mga bata sa pagpili og usa ka paagi nga sila makasunod sa propeta sulod sa semana. Paghimo og pahinumdom alang kanila nga dad-on ngadto sa panimalay ug ipakigbahin sa ilang mga pamilya. Pahinumdumi ang mga bata nga sila makabati sa mga pulong sa propeta sa panahon sa kinatibuk-ang komperensya, ug awhaga sila sa pagtan-aw o pagpaminaw sa komperensya uban sa ilang mga pamilya. Sa semana sunod sa kinatibuk-ang komperensya, hangyoa ang pipila ka mga bata sa pagpakigbahin og mga kasinatian nga sila aduna samtang sila naminaw sa propeta ug misunod sa iyang mga pagtulun-an.
Ang pagbahin sa mga bata ngadto sa mga grupo nagtugot og mas daghang mga bata sa pag-apil. Makahimo ka og mga grupo sa daghan nga mga paagi. Sama pananglit, makahangyo ka sa mga bata sa pagdungan og trabaho isip mga grupo sa klase, o makapares ka sa mga mas magulang nga bata sa mas manghud nga bata. Usa ka hingkod nga tawo kinahanglan nga modumala sa matag grupo.