Nobyembre
Makapili Ako nga Mahimong Misyonaryo Karon
“Ug siya miingon kanila, Panglakaw kamo sa tibuok kalibutan ug iwali ninyo ang maayong balita ngadto sa tibuok kabuhatan” (Marcos 16:15).
Dugangi ang mga ideya nga gihatag dinhi og pipila sa imong kaugalingon. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”
Semana 1: Mahimo ako nga usa ka misyonaro pinaagi sa pagserbisyo sa uban.
I-awhag ang pagsabut (naghimo og mga role play): Basaha ang Mateo 25:34–40, ug ipasabut nga kon kita nagserbisyo sa uban nagserbisyo usab kita sa Langitnong Amahan (tan-awa sa Mosiah 2:17) ug nga ang serbisyo modala kanato og kalipay ug motabang kanato nga makapuyo pagbalik uban sa Dios. Ipa-role play sa daghan nga mga bata ang pipila ka mga buhat sa serbisyo, sama sa paghatag og pagkaon ngadto sa usa ka tawo kinsa gigutom, pakighigala sa usa ka tawo kinsa nag-inusara, o pagbisita sa usa ka tawo kinsa nasakit. Ipatag-an sa mga bata kon unsa ang nahitabo sa matag role play. Pagpakita og litrato sa mga misyonaryo. Pangutana ko giunsa sa mga misyonaryo pagserbisyo ang Dios. Ipasabut nga kon kita nagserbisyo sa uban kita usab mga misyonaryo.
I-awhag ang paggamit (nagdula ): Paghimo og game board nga may agianan nga hinimo sa unom ka nagkalain-laing mga kolor nga nagpadulong ngadto sa usa ka hulagway ni Jesus. Pag-andam og buburan (spinner) nga may unom ka kinoloran nga mga seksyon aron mobagay sa mga kolor diha sa game board. Sa matag kolor isulat ang pangalan sa tawo nga ang mga bata makaserbisyo, sama sa ginikanan, higala, ug silingan. Pagpili og bata nga motuyok sa buburan (spinner) ug pasultiha kon unsaon niya nga makaalagad sa tawo nga itudlo niini. Dayon ipasibug sa bata ang piraso sa dulaan ngadto sa sunod nga kwadro nga mopares sa kolor diha sa buburan (spinner). Balika pag-usab sa uban nga mga bata hangtud ang mga piraso sa dulaan moabut sa hulagway sa Manluluwas. Pahinumdumi ang mga bata nga kon kita nag-alagad sa uban, kita nag-alagad sa Dios. Kantaha “Kon Kita Motabang” (SB, 108).
Ang game board ug ang buburan spinner anaa sa sharingtime.lds.org
Semana 2: Mahimo ako nga usa ka misyonaryo pinaagi sa paghimo og maayo nga ehemplo.
Ilha ang doktrina (nagtan-aw og leksyon nga naggamit og butang): Sa dili pa ang Primary, paghimo og butang naggamit sa mga blocks, ug tabuni kini aron ang mga bata dili makakita niini. (Kon walay makuha nga mga blocks, makadraw ka og hulagway diha sa pisara ug tabuni ang drawing sa usa ka piraso nga papel. Ihulagway ang butang nga imong gitagoan ug giunsa mo kini paghimo. Dayon hatagi ang pipila ka mga bata og pipila ka mga blocks ug pasulaya sila sa paghimo og butang nga parehas sa unsay imong gihimo. Kon mahuman na sila, kuhai sa tabon ang imong butang, ug tan-awa ang mga kalainan tali sa duha. Hangyoa ang mga bata sa pag-usab sa ilang gihimo samtang ilang tan-awon ang imong ehemplo. Ipasabut nga daghang mga butang nga mas sayon kon nagsunod ka og ehemplo.
Pahimusli ang mga oportunidad sa pag-awhag sa mga bata sa paghunahuna. Ang paghagit sa ilang mga hunahuna uban sa mga pangutana nga angay sa ilang edad o mga sitwasyon nagpalambo og pagkat-on.
I-awhag ang pagsabut ug paggamit (naminaw og mga istorya ug nagkanta): Pagpakita og mga hulagway ug sa daklit pag-asoy og pipila ka mga istorya sa kasulatan diin ang batan-ong mga tawo mao ang maayo nga mga ehemplo (sama pananglit, si Daniel ug ang iyang mga higala nagdumili sa pag-inom sa bino sa hari [tan-awa sa Daniel 1:5–16]; Sadrach, Mesach, ug Abed-nego [tan-awa sa Daniel 3:4–29]; ug si Daniel diha sa langub sa leon [tan-awa sa Daniel 6]). Pagpakita og mga litrato sa mga misyonaryo, ug pangutan-a ang mga bata kon sa unsa nga paagi ang mga misyonaryo maayo nga mga ehemplo. Ipasabut nga kon kita naghimo og maayo nga mga ehemplo, kita mga misyonaryo tungod kay ang atong ehemplo makatabang sa uban sa pagkat-on og labaw pa mahitungod ni Jesukristo. Pakigbahin og pipila ka mga higayon nga ikaw nakakita og mga bata sa imong ward o branch nga maayo nga mga ehemplo.
Pakantaha ang mga bata sa “Dan-ag” (SB, 96). Samtang sila nagkanta, ipapasa-pasa nila ang adlaw nga hinimo sa papel libut sa kwarto. Sa matag higayon nga ang musika mohunong, pasultiha ang bata nga nagkupot sa adlaw kon unsaon niya nga mahimong maayo nga ehemplo (sama pananglit, pinaagi sa pagkamabination, pagsulti sa tinuod, o pagdapit og mga higala ngadto sa Primary).
Dapita ang matag bata sa paghimo sa ilang kaugalingon og adlaw nga papel uban sa mga pulong nga “Ako Mahimong Sanag nga Ehemplo” nga nasulat diha niini. Ipataas sa mga bata ang ilang mga adlaw samtang ilang kantahon ang “Sama Ko sa Usa ka Bitoon” (SB, 84), “Si Jesus Buot nga Ako Mahimong Bidlisiw” (SB, 38–39), o “Dan-ag” (SB, 96).
Semana 3: Makatudlo ako sa akong mga higala mahitungod ni Jesukristo ug sa Iyang Simbahan.
Ilha ang doktrina (nagtan-aw og pasundayag): Lamanoha ang usa o daghan pa nga mga bata ug pag-role play nga nagdapit kanila sa pag-anha sa Primary ug pagkat-on mahitungod ni Jesus. Tudloi kadto kinsa nakadawat og imbitasyon sa pag-imbitar sa uban hangtud ang tanan nga mga bata naimbitar. Ipasabut nga ang Ginoo gusto kanatong tanan nga mamisyonaryo pinaagi sa pagtudlo sa atong mga higala mahitungod ni Jesukristo ug sa Iyang Simbahan.
I-awhag ang pagsabut (naminaw og istorya): Ipakigbahin ang istorya nga giistorya ni Presidente Spencer W. Kimball mahitungod sa usa ka Primary nga batang lalaki kinsa usa ka maayong misyonaryo. Usa ka tawo diha sa tren nangutana sa batang lalaki mahitungod sa Simbahan sa Mormon. Ang batang lalaki misulti sa tanan nga Mga Artikulo sa Hugot nga Pagtuo. Ang tawo nadani og maayo nga kining bata nga lalaki nahibalo kon unsay iyang gituohan nga siya miadto sa Siyudad sa Salt Lake aron sa pagkat-on mahitungod sa Simbahan (tan-awa sa Conference Report, Okt. 1975, 117–19; o Ensign, Nob. 1975, 77–79). Ipasabut nga ang pagkat-on sa Mga Artikulo sa Hugot nga Pagtuo makatabang kanato nga mahimong misyonaryo karon.
I-awhag ang paggamit (ribyuha ang Mga Artikulo sa Hugot nga Pagtuo): Pag-andam og 13 ka mga piraso sa papel nga may numero gikan sa 1 ngadto sa 13 sa matag usa. Bahina ang mga bata ngadto sa mga grupo. Papilia ang matag grupo og usa ka piraso nga papel ug magdungan og buhat aron sa pagkat-on sa artikulo sa hugot nga pagtuo nga pares niana nga numero. Kon ang matag grupo andam na, ipasulti nila kini ngadto sa uban nga mga bata ug dayon magkuha og lain nga papel. Padayon kutob sa itugot sa panahon.
Semana 4: Makaandam na ako karon sa pag-alagad og full time nga misyon.
Ilha ang doktrina (nagtan-aw og mga butang kalabut sa misyonaryo nga buhat): Pag-andam og gamay nga bag o maleta nga dunay sulod nga mga butang nga gamiton sa full time nga mga misyonaryo, sama sa sapatos pang-Dominggo, kurbata, ug mga kasulatan. Pagdapit og pipila ka mga bata sa paghabwa sa mga butang gikan sa bag ug ipakita kini ngadto sa tanan nga mga bata. Pangutan-a ang mga bata kon ngano nga ang pagbaton niining mga butanga dili maghimo sa usa ka tawo nga andam nga mahimong usa ka misyonaryo. Basaha ang Doktrina ug mga Pakigsaad 84:62, ug dapita ang mga bata sa pagpaminaw alang sa usa ka butang nga ang matag misyonaryo nagkinahanglan (pagpamatuod). Pagpamatuod sa kamahinungdanon sa pag-angkon og pagpamatuod.
Pagplano og mga paagi nga modakop sa ilang atensyon diha sa sinugdanan sa kalihokan. Sama pananglit, niini nga kalihokan ang mga bata mainteresado samtang sila nagpaabut kon unsa ang kuhaon gikan sa bag.
I-awhag ang pagsabut (nagtan-aw og mga hulagway ug nagtubag og mga pangutana): Tabangi ang mga bata sa pagsabut sa importante nga mga bahin sa pagpamatuod. Pagpakita og mga hulagway nga nagrepresentar sa pipila niadto nga mga bahin (sama pananglit, nga ang Langitnong Amahan nahigugma kanato, nga si Jesukristo mao ang atong Manluluwas, nga si Joseph Smith usa ka propeta, nga ang Simbahan ni Jesukristo sa mga Santos sa Ulahing mga Adlaw mao ang tinuod nga Simbahan sa Ginoo, ug nga kita gipangulohan sa usa ka propeta). Pangutana og daghan nga mga pangutana mahitungod sa matag hulagway, sama sa: Unsa o kinsa kini? Unsa ang imong nahibaloan mahitungod niini? Unsaon nimo pagpalig-on sa imong pagpamatuod kabahin niini? Pahinganla ang mga bata og mga tawo kang kinsa sila mahimong makigbahin sa ilang pagpamatuod. Ipamatuod nga samtang ang mga bata nakigbahin sa unsay ilang nahibaloan ngadto sa uban, ang ilang mga pagpamatuod motubo ug sila nangandam sa pag-alagad og misyon.