Oktubre
Ang mga Panalangin sa Priesthood Mahatag sa Tanan
“Silang tanan kinsa modawat niini nga pagkapari modawat kanako, miingon ang Ginoo” (D&P 84:35).
Dugangi ang mga ideya nga gihatag dinhi og pipila sa imong kaugalingon. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”
Semana 1: Ang takus nga batan-ong mga lalaki modawat sa priesthood kon sila 12 anyos na ang panuigon.
Ilha ang doktrina (nagtan-aw og hulagway): Pagpakita sa mga bata og hulagway ni Jesukristo nga mipasiugda sa sakrament. Ipasabut nga si Kristo mihatag sa sakrament ngadto sa Iyang mga Apostoles ug sa Iyang mga disipulo diha sa Basahon ni Mormon, ug misugo Siya kanila sa pagpadayon sa pagpanalangin ug sa pagpaambit sa sakrament kon wala na Siya. Basaha og dungan 3 Nephi 18:5–6. Pangutan-a ang mga bata og mga pangutana sama sa : Kinsa ang nagpanalangin sa sakrament sa atong panahon? Kinsa ang nagpaambit sa sakrament? Unsa nga gahum ang gikinahanglan nga huptan sa usa ka tawo aron makapanalangin ug makapaambit sa sakrament?
I-awhag ang pagsabut (naghisgot sa doktrina): Ipasabut nga ang priesthood mao ang gahum sa Dios sa pag-alagad ug pagpanalangin sa mga katawhan dinhi sa yuta. Sa ulahing mga adlaw gitudlo ni Kristo kanato nga bisan kinsa nga lalaki makabaton sa priesthood kutob nga siya makaabut sa duha ka mga gikinahanglan. Ang una mao ang anaa sa piho nga edad. Hangyoa sa pagtindog kon sila makadungog kanimo nga nagsulti sa edad kon kanus-a ang usa ka batang lalaki makadawat sa priesthood. Pag-ihap og hinay gikan sa usa ngadto sa napulog duha. Sultihi ang mga bata nga ang lain nga gikinahanglan mao nga ang batang lalaki kinahanglan gayud nga takus. Ipasabut kon unsa ang kahulugan sa mahimong takus, ug ipasabut nga ang mga lalaki ug mga babaye makagamit sa “Ang Akong mga Sumbanan sa Ebanghelyo” aron sa pagtabang kanila nga mahibalo kon unsaon sa pagpuyo sa takus nga paagi.
I-awhag ang paggamit (nag-apil og pisikal nga kalihokan): Bahina ang mga bata ngadto sa mga grupo. Hatag og usa ka sumbanan gikan sa “Ang Akong mga Sumbanan sa Ebanghelyo” aron ngadto sa matag grupo. Pahunahunaa ang matag grupo og usa ka yano nga aksyon nga nagrepresentar sa ilang sumbanan. Paghingalan og pipila ka mga pulong aron sa pag-ila og usa ka sumbanan, ug patindoga ang nahatagan nga grupo ug ipakita ang ilang aksyon. Ipadayon hangtud ang tanan nga mga grupo nakahuman na. Ipasabut nga ang pagsunod niini nga mga sumbanan nagtabang sa mga batang lalaki nga magpabiling takus sa paghupot sa priesthood ug sa pagdawat sa mga ordinansa sa priesthood ug ang mga babaye magpabilin nga takus sa pagdawat og mga ordinansa sa priesthood, sama sa bunyag ug mga ordinansa sa templo.
Semana 2: Nagdawat kita sa mga ordinansa sa kaluwasan pinaagi sa priesthood.
Ang paggamit og mga butang sa leksyon mahimong gamiton sa pagmugna og interes, sa pagkuha sa atensyon sa mga bata, o sa pagpaila og usa ka baruganan sa ebanghelyo.
Ilha ang doktrina (nagtan-aw og leksyon nga naggamit og butang): Paguniti sa bata ang gibukhad nga payong. Patindoga ang pipila ka mga bata ilawom niini. Ikomparar ang payong ngadto sa priesthood. Itudlo nga kon ulan, ang tanan nga mga bata ilawom sa payong modawat sa panalangin nga dili mabasa, dili lamang ang usa nga naggunit niini. Sa sama nga paagi, ang Dios naghatag, pinaagi sa Iyang priesthood, og usa ka paagi alang sa Iyang tanan nga mga anak nga mapanalanginan. Pinaagi sa priesthood atong madawat ang mga ordinansa sa kaluwasan nga nagtugot kanato sa pagbalik ug sa pagpuyo uban sa Dios pag-usab.
I-awhag ang pagsabut (nagsulbad sa mga puzzles): Isulat ang matag usa nga mosunod diha sa lain-lain nga piraso sa papel: bunyag, kumpirma, ordinasyon sa priesthood (alang sa mga lalaki), temple endowment ug sealing didto sa templo. Guntinga ang matag piraso sa papel ngadto sa usa ka puzzle. Sa daklit ipasabut ngadto sa mga bata kon unsa ang ordinansa (usa ka sagrado nga tulumanon o buhat nga adunay espirituhanon nga mga kahulugan), ug sultihi ang mga bata nga ang pipila ka mga ordinansa sa priesthood gikinahanglan alang kanato aron mahibalik ug makapuyo uban sa Langitnong Amahan. Pagdraw og lima ka ang-ang diha sa pisara, ug ibutang ang hulagway ni Jesukristo sa ibabaw sa tumoy nga ang-ang. Bahina ang mga bata ngadto sa lima ka grupo, ug hatagi ang matag grupo og usa sa mga piraso sa puzzles nga imong gihimo. Ipasulbad ang ilang puzzle ug dayon ipakigbahin kon unsay ilang nahibaloan mahitungod sa ordinansa ngadto sa tanang Primary. Ipabutang sa mga grupo ang ilang nasulbad nga puzzle sa hustong pagkasunod-sunod diha sa mga ang-ang sa pisara.
Semana 3: Makadawat ako og gahum sa paglig-on pinaagi sa mga panalangin sa priesthood.
Ilha ang doktrina (naghisgot sa doktrina): Hangyoa ang mga bata sa pagpataas sa ilang mga kamot ug sa pagtan-aw niini. Pangutan-a sila kon giunsa sa ilang mga kamot sa pagtabang kanila sa pagdula, pagtrabaho, ug sa pag-andam alang sa pagsimba. Ipa-pantomime kanila ang matag tubag. Dayon pangutan-a sila kon sa unsa nga paagi ang mga tawo makagamit sa ilang mga kamot sa pagtabang sa uban. Ipasabut nga ang mga tighupot sa priesthood makagamit sa ilang mga kamot sa paghatag og mga panalangin nga nagtabang ug naglig-on kanato.
I-awhag ang pagsabut ug paggamit (nagtan-aw og mga hulagway ug nakigbahin sa mga kasinatian): Pagbutang og mga hulagway sa sakrament, bunyag, pagkumpirma, pagpanalangin sa batang gamay, ug pagpangalagad ngadto sa masakiton diha libut sa kwarto, ug ipasabut kon unsa ang nahitabo sa matag hulagway. Ipa-trace sa mga bata ang ilang duha ka kamot diha sa usa ka pirasong papel ug ipagunting kini. Ipasulat niini ang ilang pangalan diha sa atubangan sa matag marka sa kamot. Ipa-tape ang usa sa ilang papel nga mga kamot duol sa hulagway nga nagpakita og panalangin o ordinansa nga ilang nadawat gikan sa mga kamot sa tighupot sa priesthood. Pagpili og pipila ka mga kamot, ug dapita kadtong mga bataa sa pagpakigbahin sa ilang mga pagbati mahitungod sa kon giunsa sa priesthood ang pagpanalangin ug paglig-on kanila. I-asoy ang istorya ni Jesus nga nagpanalangin sa mga bata gikan sa 3 Nephi 17:11–25. Pagbutang og hulagway ni Jesus nga may mga bata diha sa atubangan sa kwarto, ug dapita ang matag bata sa pag-tape sa ilang ikaduhang kamot duol sa hulagway. Ipasabut nga ang mga tighupot sa priesthood adunay gahum sa paglihok diha sa pangalan ni Jesukristo; makapanalangin sila kanato sama lamang sa himoon ni Jesus kon Siya ania pa dinhi.
Ang pagtabang sa mga bata nga abtik moapil sa leksyon motabang kanila sa pagbati sa doktrina nga gitudlo.
Semana 4: Makaadto ako sa templo aron sa pagdawat sa mga ordinansa alang sa akong mga katigulangan kon ako modako na.
Ilha ang doktrina ug i-awhag ang pagsabut (nagkolor): Pahinumdumi ang mga bata nga kita kinahanglan nga modawat og piho nga mga ordinansa sa priesthood sa dili pa kita makabalik sa pagpuyo uban sa Langitnong Amahan. Hangyoa ang mga bata sa paghingalan og pipila niadto nga mga ordinansa. Ipasabut nga daghang mga tawo ang nangamatay nga walay kahigayunan sa pagdawat niini nga mga ordinansa, ug sila nanginahanglan sa atong tabang. Istoryahi ang mga bata mahitungod sa usa sa imong mga katigulangan kinsa namatay sa wala pa makadawat niini nga mga ordinansa. Hatagi ang matag bata og yano nga drawing sa usa ka tawo nga ginunting gikan sa papel. Hangyoa sila sa pagdraw sa ilang mga kaugalingon sa pikas nga bahin sa papel ug usa ka hulagway sa katigulangan nga imong giistorya kanila sa pikas nga bahin. (Kon ang mga bata nakaila sa usa sa ilang mga katigulangan kinsa namatay nga wala makadawat sa mga ordinansa sa priesthood, makadraw sila niana nga tawo.) Ipabalik og usab kanila ang tema alang niini nga semana samtang naggunit sila sa papel nga tawo diha sa ilang atubangan. Hangyoa sila sa pagpakita sa hulagway sa ilang kaugalingon kon isulti nila ang pulong nga “Ako” ug ang hulagway sa katigulangan kon isulti nila ang pulong nga “mga katigulangan.”