Septiyembre

Ang Napulo ka mga Sugo Nagtudlo Kanako sa Paghigugma sa Dios ug sa Iyang mga Anak

“Kon kamo nahigugma kanako kamo mag-alagad kanako ug maghupot sa akong tanan nga mga sugo” (D&P 42:29).

Dugangi ang mga ideya nga gihatag dinhi og pipila sa imong kaugalingon. Matag semana, pagplano og mga paagi sa (1) pag-ila sa doktrina, (2) pagtabang sa mga bata sa pagsabut niini, ug (3) pagtabang kanila sa paggamit niini diha sa ilang mga kinabuhi. Pangutan-a ang imong kaugalingon, “Unsa ang buhaton sa mga bata aron makakat-on, ug unsaon nako sa pagtabang kanila nga mobati sa Espiritu?”

Semana 1: Kita mapanalanginan kon kita magsunod sa mga sugo.

Ilha ang doktrina (nagtan-aw og leksyon nga naggamit og butang): Pagdapit og usa ka inahan sa pagdala sa iyang gamay nga bata sa panahon sa pagpakigbahin. Dapita ang mga bata sa pagpakigbahin og pipila ka mga balaod nga mobantay sa batang gamay nga luwas. Sultihi ang mga bata nga kitang tanan mga anak sa Langitnong Amahan; Siya nahigugma kanato ug naghatag kanato og mga balaod ug mga sugo nga mohimo kanato nga luwas ug malipayon. Pagpakita og hulagway ni Moises ug sa Napulo ka mga Sugo, ug sa daklit i-asoy sa mga bata kon giunsa pagdawat ni Moises ang mga sugo (tan-awa sa Exodo 19–20).

I-awhag ang pagsabut (nagkanta og mga awit): Ibutang ang mosunod nga tulo ka hugpong sa mga pulong diha sa pisara: “Tahura ug Simbaha ang Dios” “Tahura ang mga Ginikanan,” ug Tahura ang Uban.” Sultihi ang mga bata nga ang Napulo ka mga Sugo mahimo nga bulagon ngadto sa tulo ka mga kategoriya. Bahina ang mga bata ngadto sa mga grupo ug hatagi ang matag usa og awit nga may kalabutan sa usa sa mga kategoriya. Hangyoa ang matag grupo sa paghukom kon kinsa ang mokanta sa awit (sama pananglit, mga lalaki lamang, mga babaye lamang, o kadtong nagsul-ob og pula). Human makanta ang awit, ipabutang sa usa ka bata ang awit ubos sa tukma nga kategoriya. Hunahunaa ang paggamit sa mosunod nga mga awit: “Sabado” (SB, 105), “Dali Ko nga Motuman” (SB, 71), “Akong Papa” (SB, 111), “Ang Simbahan ni Jesukristo” (SB, 48), ug “Pagkamabination Magagikan Kanako” (SB, 83).

I-awhag ang paggamit (nagkanta og awit): Kantaha ang“Sunda ang Kasugoan” (SB, 68–69), ug hangyoa ang mga bata sa pagpaminaw alang sa mga saad nga atong madawat kon kita maghupot sa mga sugo. Dapita sila sa pagpakigbahin kon giunsa sila sa pagpanalangin sa diha nga sila naghupot sa mga sugo.

Semana 2: Kinahanglan akong tahuron ug simbahon ang Dios.

I-awhag ang pagsabut ug paggamit (nagbasa sa mga kasulatan): Ipasabut nga ang unang upat ka mga sugo nga gihatag sa Langitnong Amahan ngadto ni Moises nagtudlo kanato nga kinahanglan atong tahuron ug simbahon ang Dios. Isulat ang mosunod nga mga sentence diha sa pisara. Isulat ang mga pakisayran nga kasulatan diha sa upat ka mga pirasong papel.

1. Dili ka magbaton og lain sa atubangan ko. (Exodo 20:3)

2. Alang kanimo dili ka magbuhat og usa . (Exodo 20:4)

3. Dili mo paggamiton ang ngalan sa Ginoo nga imong Dios . (Exodo 20:7)

4. Hinumduman ang , sa pagbalaan niini. (Exodo 20:8)

Bahina ang mga bata ngadto sa upat ka mga grupo Hatagi ang matag grupo og usa sa mga pakisayran nga kasulatan, ug ipabasa kanila ang kasulatan ug ipapangita ang pares nga sentence diha sa pisara. Hangyoa ang unang grupo sa pagsulat sa ilang blangko diha sa pisara ug giyahi ang uban nga mga bata sa pagdungan og sultig balik sa sentence. Hisguti ang kahulugan sa sugo, ug pasugyuta ang mga bata kon unsa ang ilang mabuhat sa pagsunod niini. Isulat ang ilang mga sugyot diha sa pisara. Usba sa ubang tulo ka mga grupo. Awhaga ang mga bata sa pagpili og usa sa mga sugyot diha sa pisara nga buhaton sa sulod sa semana.

Gamay nga mga grupo: Ang pagbahin sa mga bata ngadto sa ginagmay nga mga grupo makahimo og epektibo nga paagi sa pagtugot sa mga bata nga aktibong moapil sa leksyon.

Semana 3: Kinahanglan nga akong tahuron ang akong mga ginikanan.

Ilha ang doktrina (nagsag-ulo og kasulatan): Sa daklit ribyuha ang mahitungod sa mga sugo nga nakat-unan sa mga bata sa milabay nga semana, ug hangyoa ang pipila ka mga bata sa pagpakigbahin kon unsa ang ilang gihimo sa pagsunod niadto nga mga sugo. Bahina ang mga bata ngadto sa upat ka mga grupo, ug ihatag ang usa sa mga gilis sa pulong nga gipakita sa ubos ngadto sa matag grupo (tan-awa sa Exodo 20:12).

Gilis sa mga pulong anaa sa sharingtime.lds.org

Dapita ang unang grupo sa pagtindog, balika pagsulti ang mga pulong diha sa gilis sa mga pulong, ug lingkod, sundan sa uban nga mga grupo sa hustong pagkasunod-sunod. Hangyoa ang mga grupo sa pagpahatag sa ilang mga gilis sa mga pulong ngadto sa lain nga grupo, ug ipabalik ang kalihokan hangtud ang tanan nga mga grupo nakabasa sa matag gilis sa mga pulong. Dapita ang tanan nga mga bata nga magdungan sa pagtindog ug sa pagbalik sa sugo.

I-awhag ang paggamit (nagdula og pares-pares nga dula): Bahina ang mga bata ngadto sa mga grupo. Pahunahunaa ang matag grupo og usa ka butang nga ilang mabuhat sa pagtahud sa ilang mga ginikanan. Dapita ang matag grupo sa pag-pantomime sa ilang aksyon, ug ipatag-an sa uban nga mga bata kon unsa ang ilang gibuhat. Kon husto ang ilang pagtag-an, ipasulat sa usa sa mga bata sa grupo ang ilang ideya diha sa pisara.

Timaan: Ang mga leksyon ingon nga gisulat mahimong dili motubag sa piho nga panginahanglan sa imong mga bata. Sabton nimo ang ilang mga abilidad ug mga sitwasyon ug ipahiangay ang mga ideya sa panahon sa pagpakigbahin aron sa paghimo niini nga epektibo sa imong Primary.

Semana 4: Kinahanglan nga ako morespeto sa uban.

Ilha ang doktrina (naghisgot sa respeto): Sultihi ang mga bata nga usa ka importante kaayo nga tawo moanha sa Primary karon. Hangyoa ang mga bata sa pagpakita kon unsaon nila nga makapakita og respeto ngadto niini nga tawo. Ipatag-an kanila kon kinsa kaha kini nga tawo. Ipa-hum ang “Ako Anak sa Dios” samtang imong i-alpiril ang bitoon nga papel diha sa matag bata. Ipasabut nga ang matag tawo importante ug nga kita kinahanglan nga motagad sa tanan uban ang respeto. Sultihi ang mga bata nga daghan sa Napulo ka mga Sugo nagtudlo kanato kon unsaon ang pagrespeto sa uban.

I-awhag ang pagsabut (naghisgot ug mga case studies): Ipasabut nga ang Napulo ka mga Sugo nagtudlo kanato nga kita kinahanglan nga dili mangawat, o mamakak, kini usa ka paagi nga kita nagrespeto sa uban. Pag-andam og daghan nga mga case studies (tan-awa sa PWLKMT, 161–62) nga naghatag og mga sitwasyon diin ang mga bata nag-atubang og pagpili mahitungod sa pagkamatinuoron. Bahina ang mga bata ngadto sa mga grupo ug hatagi ang matag grupo og pipila ka mga case studies. Hangyoa sila sa pagpabasa sa matag case study ug pahisguti kon unsaon nila nga mahimong magmatinuoron sa matag sitwasyon.

Pangita og mga oportunidad nga nagpakita og gugma ngadto sa matag bata. Samtang magpakita ka og gugma alang sa imong mga gitudloan, mas dali silang modawat sa Espiritu ug mas mahinamon sa ilang pagkat-on (tan-awa sa PWLKMT, 45).