Ko ha Fāmili ʻo e Ngaahi Makasini Fakaemāmani Lahí

Naʻe kamata ʻi Sānuali 2021 hono pulusi ʻe he Siasí ha ngaahi makasini fakaemāmani lahi ʻe tolu: ko e Kaumeʻá (maʻá e fānau taʻu 3–11), Ki Hono Fakamālohia ʻo e Toʻu Tupú (maʻá e toʻu tupu taʻu 11–18), pea mo e Liahoná (maʻá e kakai lalahí). Naʻe fetongi ʻe he ngaahi makasini ko ʻení ʻa e ngaahi makasini ʻe fā kimuʻa ʻa e Siasí, ʻa ia ko e makasini ʻe tolu ne pulusi pē ʻi he lea faka-Pilitāniá.

ʻI heʻenau fanongonongo e ngaahi makasini foʻou ko ʻení, naʻe pehē ʻe he Kau Palesitenisī ʻUluakí, “Ko ʻemau fakaʻamú ke lesisita pea talitali lelei ʻe he kāingalotu ʻi he feituʻu kotoa pē ʻa e ivi tokoni ʻo e tuí ki honau lotó mo e ʻapí” (Tohi ʻa e Kau Palesitenisī ʻUluakí, 14 ʻAokosi 2020).

ʻOku mau ngāue mālohi ke fakapapauʻi ʻe tatau ai pē pe ʻokú ke haʻu mei Silovēnia pe Sipeini, Matakasikā pe Masasūseti, ko e ngaahi makasini ko ʻení maʻau. Ko ia ʻoku tatau ai pē pe ʻokú ke lea faka-Kōlea pe Kilipati, pe ʻoku piliki pe kofe ho ʻapí, pe naʻá ke papitaiso ʻi he taʻu ʻe 80 kuohilí pe ʻaneafi pē, ʻoku fakahaaʻi ʻe he ngaahi fakamatala ko ʻení hoʻo fakamoʻoní, meʻa kuó ke aʻusiá, pea mo hoʻo fale ʻo e tuí. Ko e taha ia ʻo e ngaahi tāpuaki maʻongoʻonga ʻo e ngaahi makasini fakaemāmani lahi ko ʻení: ʻoku nau fakatahaʻi kitautolu mo fakamanatu mai ʻoku tau kau kotoa ki ha fāmili fakaemāmani lahi ʻo e Siasí.

ʻE fakaʻatā ʻe hono maʻu ha makasini fakaemāmani lahi ʻe tolú ha pēseti ʻe 97 ʻo e kāingalotú ke nau maʻu ha makasini kuo paaki he māhina kotoa pē pe fakahili māhina kotoa pē. (ʻI he kuohilí, naʻe maʻu ʻe ha ngaahi lea fakafonua ʻe niʻihi ha makasini pē ʻe taha he taʻu!) Vakaiʻi ʻa e peesi FTE ko ʻení ke maʻu ha fakamatala lahi ange fekauʻaki mo e founga ʻe toutou pulusi ai ʻa e ngaahi fakamatala ʻo e makasiní ʻi he ngaahi lea fakafonua kehekehe.

ʻI he Ngaahi Makasiní ʻi he Gospel Library, te ke sio ai ki ha fakatātā takitaha ki he makasini fakaemāmani lahi ʻe tolu ko ʻení, kae pehē ki ha fakatātā ki he makasini paaki fakaʻilekitulōnika foʻou maʻá e kakai lalahi kei talavoú ʻoku ui ko e YA Fakauiké. Te ke lava ʻo ako lahi ange fekauʻaki mo e ngaahi makasini takitaha ko ʻení ʻi he konga ki he “Fekauʻaki mo e Ngaahi Makasini ʻa e Siasí.”