Mosias 2:1–18

“Nasa Paglilingkod ng Inyong Kapwa-Tao”

Paano nagiging mahusay ang isang lider? Sa mensahe ni Haring Benjamin, mauunawaan natin nang bahagya kung anong uri ng lider at halimbawa siya para sa kanyang mga tao. Si Haring Benjamin ay isang taong naglingkod sa Diyos sa pamamagitan ng paglilingkod sa kanyang mga tao at pagtuturo sa kanila na paglingkuran ang isa’t isa. Layunin ng lesson na ito na tulungan kang mas mapaglingkuran ang Diyos sa pamamagitan ng mas mabuting paglilingkod sa iba.

Ano sa palagay mo ang paglilingkod?

Maglaan ng 60 segundo upang isulat ang iba’t ibang paraan na maiisip mo kung paano ka maglilingkod sa isang tao sa linggong ito.

• Ano ang maaaring maghikayat sa isang tao na gawin ang mga bagay na ito?

• Bakit maaaring mag-alinlangan ang isang tao na gawin ang mga bagay na ito?

Alin sa mga sumusunod ang maaaring pinakamainam na makapaglalarawan sa nararamdaman mo ngayon tungkol sa mga pagkakataong maglingkod?

• Naghahanap ako ng mga pagkakataong maglingkod.

• Handa akong tumulong kapag hiniling ito sa akin.

• Gusto kong maglingkod pero nahihirapan akong unahin sa buhay ko ang paglilingkod.

• Madalas kong isipin na may ibang tao namang maglilingkod.

• Gusto kong maglingkod pero nag-aalala ako kung ano ang maaaring isipin sa akin ng iba.

• Gusto kong maglingkod pero hindi ko maiwasang hangarin na pansinin o kilalanin ng iba.

• Iba Pa:

Habang pinag-aaralan mo ang lesson na ito, pag-isipan kung paano at bakit mo mas paglilingkuran ang mga nasa paligid mo, simula ngayon.

Halimbawa ng paglilingkod ni Haring Benjamin

Nang malapit nang magwakas ang buhay ni Haring Benjamin, hiniling niya sa kanyang anak na si Mosias na tipunin ang mga Nephita upang makausap niya sila. Nagtipon sila sa templo kasama ang kanilang mga pamilya upang makinig kay Haring Benjamin (tingnan sa Mosias 2:1–9).

Basahin ang Mosias 2:10–14, at alamin kung paano pinaglingkuran ni Haring Benjamin ang kanyang mga tao.

1.  Sagutin ang mga sumusunod na tanong:

   • Ano ang pinakanapansin mo tungkol kay Haring Benjamin?

   • Paano maiiba ang iyong pamilya, paaralan, o komunidad kung namuhay ang mga tao gaya ni Haring Benjamin?

Bakit tayo naglilingkod

Basahin ang Mosias 2:15–18, at alamin ang itinuro ni Haring Benjamin tungkol sa paglilingkod.

• Anong mga katotohanan ang natukoy mo?

Ang Mosias 2:17 ay isang doctrinal mastery passage. Maaari mong markahan ang mga doctrinal mastery passage sa partikular na paraan upang madali mong mahanap ang mga ito. Magkakaroon ka ng pagkakataon sa susunod na lesson na magsanay na gamitin ang doktrinang itinuturo sa passage na ito sa isang tanong o sitwasyon.

Ang isang katotohanan na matututuhan natin mula kay Haring Benjamin ay “kung kayo ay nasa paglilingkod ng inyong kapwa-tao, kayo ay nasa paglilingkod lamang ng inyong Diyos.”

2.  Sagutin ang mga sumusunod na tanong:

   • Paano tayo naglilingkod sa Diyos kapag naglilingkod tayo sa iba?

   • Ano ang nakikita mo sa mga talatang ito na nagpapaalala sa iyo tungkol kay Jesucristo?

Basahin ang sumusunod na pahayag ni Pangulong Thomas S. Monson (1927–2018), at alamin ang itinuro niya tungkol sa kaugnayan ng ating paglilingkod sa iba at ng ating kaugnayan sa Diyos:

Kapag nakatingin tayo sa langit, tiyak na malalaman natin ang ating responsibilidad na tumulong sa iba. Upang mahanap ang tunay na kaligayahan, kailangan natin itong hanapin nang hindi nakatuon sa ating sarili. Hindi malalaman ng sinuman ang kahulugan ng buhay hangga’t hindi siya nagpapakumbaba sa paglilingkod sa kanyang kapwa. … Itinuturo ng Bagong Tipan na imposibleng magkaroon ng tamang saloobin kay Cristo kung makasarili ang saloobin ng isang tao sa kanyang kapwa. …

Tinitingnan natin ang Tagapagligtas bilang ating halimbawa ng paglilingkod. Bagama’t Siya ay isinilang sa mundo bilang Anak ng Diyos, mapagpakumbaba Niyang pinaglingkuran ang mga taong nakapaligid sa Kanya. Bumaba Siya mula sa langit para mamuhay bilang isang mortal dito sa lupa at para itayo ang kaharian ng Diyos. Binago ng Kanyang maluwalhating ebanghelyo ang pananaw ng sanlibutan. Pinagaling Niya ang maysakit; pinalakad Niya ang lumpo, pinagaling ang bulag at ang bingi. Maging ang mga patay ay Kanyang binuhay. (Thomas S. Monson, “The Joy of Service,” New Era, Okt. 2009, 4, 6)

• Paano ka nahihikayat na paglingkuran ang iba kapag iniisip mo ang tungkol sa halimbawa ng Tagapagligtas?

ChurchofJesusChrist.org

Matatagpuan ang mga karagdagang halimbawa sa ilalim ng heading na “Ano ang ilang halimbawa ng paglilingkod na katulad ng kay Cristo?” sa bahaging “Opsiyonal: Gusto Mo Bang May Matutuhan Pa?”

• Paano ka napagpala ng paglilingkod sa iba?

• Paano ka napagpala ng paglilingkod ng iba?

Gumawa ng plano

Ibinahagi ni Sister Sharon Eubank, Unang Tagapayo sa Relief Society General Presidency, ang mahalagang kaalamang ito tungkol sa paglilingkod. Isipin kung ano ang itinuturo niya habang naghahanda kang gumawa ng plano na paglingkuran ang iba. ChurchofJesusChrist.orgBasahin ang sumusunod na pahayag.

Kung babaguhin natin ang ating pananaw upang ang pangangalaga sa mga maralita at nangangailangan ay hindi gaanong tungkol sa pagbibigay ng mga bagay-bagay kundi tungkol sa pakikipag-ugnayan sa tao, pagkakaroon ng makabuluhang pag-uusap, at pagbuo ng masaya at mabuting ugnayan, kung gayon maisusugo tayo ng Panginoon sa kung saang lugar. …

… At tandaan na, tulad ng Tagapagligtas, kayo mismo ang isa sa pinakamagagandang kaloob na maibibigay ninyo sa ibang taong nangangailangan. (Sharon Eubank, “Turning Enemies into Friends” [Forum sa Brigham Young University, Ene. 23, 2018], 6–7, speeches.byu.edu)

• Ano ang pinakanapansin mo sa itinuro ni Sister Eubank tungkol sa paglilingkod?

Ano ang ilang paraan kung paano mo magagawa ang itinuro niya? Isipin ang iyong pamilya, mga kaibigan, o komunidad. Manalangin at hilingin sa Ama sa Langit na bigyan ka ng inspirasyon tungkol sa mga paraan kung paano ka makapaglilingkod. Sa iyong study journal, isulat ang mga pangalan ng mga taong naiisip mo at mga ideya kung paano mo sila matutulungan. Magpasiya kung kailan ka kikilos ayon sa mga impresyon sa iyo. Marahil ay may magagawa ka ngayon mismo.

Opsiyonal: Gusto Mo Bang May Matutuhan Pa?

Paano tayo maglilingkod nang mas epektibo?

Itinuro ni Pangulong Joy D. Jones, dating Primary General President:

Kung minsan maaaring sa una ay naglilingkod tayo dahil sa tungkulin o obligasyon, ngunit maging ang paglilingkod na iyon ay maaaring umakay sa atin na gumamit ng isang bagay na higit pa sa nasasaloob natin, na maghihikayat sa atin na maglingkod sa “higit na mabuting paraan [1 Corinto 12:31]. …

Kapag nakatuon tayo sa lahat ng nagawa ng Diyos para sa atin, ang ating paglilingkod ay nagaganyak ng damdamin ng pasasalamat. Kapag hindi na tayo gaanong nag-alala kung paano tayo makikinabang mula sa ating paglilingkod, matatanto na natin na ang tuon ng ating paglilingkod ay ang unahin ang Diyos. (Joy D. Jones, “Para sa Kanya,” Liahona, Nob. 2018, 50–51)

Ibinigay ni Pangulong M. Russell Ballard ng Korum ng Labindalawang Apostol ang sumusunod na paanyaya:

Sa pagdarasal ninyo tuwing umaga, hilingin sa Ama sa Langit na gabayan kayo na magkaroon ng pagkakataong mapaglingkuran ang isa sa Kanyang mahal na mga anak. At saka humayo sa buong maghapon na ang puso ay puno ng pananampalataya at pagmamahal, naghahanap ng matutulungan. … Kung gagawin ninyo ito, lalakas ang inyong espirituwal na pakiramdam at makakakita kayo ng mga pagkakataong maglingkod na hindi ninyo aakalaing posible. (M. Russell Ballard, “Maging Sabik sa Paggawa,” Liahona, Nob. 2012, 31)

Itinuro ni Pangulong Jean B. Bingham, Relief Society General President:

Kung minsan iniisip natin na kailangang dakila at magiting ang bagay na ating gagawin upang “matanggap” ito na paglilingkod sa ating kapwa. Gayunman, ang mga simpleng paglilingkod ay maaaring magkaroon ng malaking epekto sa iba—pati na rin sa ating sarili. Ano ang ginawa ng Tagapagligtas? Sa pamamagitan ng Kanyang dakilang kaloob na Pagbabayad-sala at Pagkabuhay na Mag-uli … “walang sinuman ang nakapagbigay ng gayong makahulugang impluwensiya sa lahat ng nabuhay na at sa lahat ng mabubuhay pa sa mundo” [“Ang Buhay na Cristo: Ang Patotoo ng mga Apostol,” ChurchofJesusChrist.org]. Pero Siya rin ay ngumiti, nakipag-usap, naglakad kasama, nakinig, nag-ukol ng oras, naghikayat, nagturo, nagpakain at nagpatawad. Naglingkod Siya sa pamilya at mga kaibigan, kapitbahay at mga dayuhan, at inanyayahan ang mga kakilala Niya at mga mahal sa buhay upang tamasahin ang saganang mga pagpapala ng Kanyang ebanghelyo. Ang mga “simpleng” paglilingkod at pagmamahal na iyon ay huwaran para sa ating ministering ngayon. (Jean B. Bingham, “Paglilingkod na Tulad ng Ginagawa ng Tagapagligtas,” Liahona, Mayo 2018, 104)

Paano kung hindi maganda ang tugon ng isang tao o tumanggi siyang tanggapin ang iyong paglilingkod?

Itinuro ni Pangulong Joy D. Jones, dating Primary General President:

May naaalala ba kayong pangyayari na mapagmahal ninyong sinikap na tapat na matulungan ang isang nangangailangan at nadama ninyo na hindi pinansin o marahil ay hindi pinahalagahan o kaya’y tinanggihan pa ang mga pagsisikap ninyo? Nang mangyari iyon, pinagdudahan ba ninyo ang halaga ng inyong paglilingkod? Kung gayon, [nawa sa mga salitang ito ni Haring Benjamin ay] mawala ang pagdududa at maging ang sakit na nadama ninyo: “Kayo ay nasa paglilingkod lamang ng inyong Diyos” [Mosias 2:17].

Sa halip na maghinanakit, makabubuo tayo, sa pamamagitan ng paglilingkod, ng mas perpektong kaugnayan sa ating Ama sa Langit. Dahil sa ating pagmamahal at katapatan sa Kanya, hindi na natin kailangan ng pagkilala o pagpapahalaga at tinutulutan nating dumaloy ang Kanyang pagmamahal sa atin at sa pamamagitan natin. (Joy D. Jones, “Para sa Kanya,” Liahona, Nob. 2018, 50)

Ano ang ilang halimbawa ng paglilingkod na katulad ng kay Cristo?